Isua Chu Eng Ang Hmêl Pu Nge A Nih?
Bible chhânna
Bible-in Isua pianhmang a târ lan loh avângin eng ang hmêl pu nge a nih chiah tumahin an hre lo. Hei hian a tisa lam lan dân chu a pawimawh lo tih a târ lang a. Amaherawh chu, Bible-in Isua lan dân tlângpui hriat theihna min pe a ni.
A lan dân: Isua nu chu Juda mi a nih avângin Juda mi nâwlpuite hmêl ang bawk a put a rinawm. (Hebrai 7:14) Hmêl danglam bîk tak a put hmêl loh. Ṭum khat chu a rûkin Galili aṭangin Jerusalem thleng a zin a. (Johana 7:10, 11) A zirtîrte zîngah pawh hmêl danglam bîk a pu hran lo. Chuvângin, hriamhrei keng mipuite’n man tuma an va pan khân, Juda Iskariota chuan Isua hriat hran theihna tûr thil a ti a ni.—Matthaia 26:47-49.
A sam sei zâwng: Bible-in “mipa hian sam sei a neih chuan a tân a zahthlâk a ni,” tia a sawi avângin Isua sam chu a sei hmêl loh.—1 Korinth 11:14.
Khabe hmul: Isua chuan khabe hmul a nei a. Ani chuan Juda dân, mipa puitlingte tâna ‘khabe hmul sîr tuak tan lo’ tûra khapna chu a zâwm a ni. (Leviticus 19:27; Galatia 4:4, 5) Chu bâkah, Bible chuan a hrehawm tawrhna chungchânga hrilh lâwkna pakhatah Isua’n khabe hmul a nei tih a târ lang bawk.—Isaia 50:6.
Taksa: Isua chu hrisêl leh chak ṭha tak a ni tih a chiang hle. Rawng a bâwl laiin mêl tam tak kein a zin kual ṭhîn a. (Matthaia 9:35) Judate biak in vawi hnih a thianfai a, tangka thlengtute dawhkân a namthlûksak a, ṭum khat phei chu hruihruala vuakna siamin an ran rualte a hnawh darhsak a ni. (Luka 19:45, 46; Johana 2:14, 15) McClintock and Strong’s Cyclopedia chuan: “A rawng bâwl chhûng chanchin ziahna zawng zawngte chuan Isua chu mi hrisêl leh chak ṭha tak a ni tih a târ lang,” tiin a sawi.—Volume IV, phêk 884.
Hmêl lan dân: Isua chu mi nêlawm leh khawngaihna nei tak a ni a, chu chu a hmêl lan dânah a lang ang tih a chiang a ni. (Matthaia 11:28, 29) Mi chi hrang hrangte chuan a hnênah thlamuanna leh ṭanpuina an hmu a. (Luka 5:12, 13; 7:37, 38) Naupangte hial pawhin a bula awm nuam an ti bawk.—Matthaia 19:13-15; Marka 9:35-37.
Isua lan dân chungchânga ngaih dân dik lote
Ngaih dân dik lo: Mi ṭhenkhatin Isua chu African thlah a ni tiin an sawi, a chhan chu Thu Puan buin a sam chu berâm hmul ang leh a kê chu “dâr tle mi” nêna a khaikhin avângin.—Thu Puan 1:14, 15.
Thu dik: Thu Puan bu hi ‘hriattîrna’ thua hmêlhriattîr a ni a. (Thu Puan 1:1) Isua sam leh kê sawifiahna hian leia a awm laia a hmêl lan dân ni lovin, a thawhleh hnua a miziate entîrnei ṭawngkamin a târ lang zâwk a ni. Thu Puan 1:14-a Isua “lû leh a sam chu berâm hmul vâr angin a vâr a, vûr angin a vâr a,” tih hi a ngial a nganna lâk tûr a ni lo. Sam vâr chu Isua’n kum upate neih ang finna a nei tih entîrneia sawina a ni zâwk.
Isua kête chu “rawh tuina meia rawh thianghlim tawh ang” a ni a. (Thu Puan 1:15) A hmêl pawh “ni sat vâng lai tak ang a ni.” (Thu Puan 1:16) Eng hnam mahin hetiang vun rawng hi an put loh avângin, he inlârna hi tho leh Isua chu “hnaih theih rual loh êngah chuan a awm” tih entîrna neia sawina a ni.—1 Timothea 6:16.
Ngaih dân dik lo: Isua chu chak lo leh derdêp tak a ni.
Thu dik: Isua chu pâ tak a ni a. Entîr nân, amah man tuma lo kal hriamhrei keng mipuite hnênah huaisen takin a inhriattîr a ni. (Johana 18:4-8) Isua chu hmanraw siam chawpte hmanga thingrem siamtu a nih angin, mi chak tak a ni ang tih a chiang hle bawk.—Marka 6:3.
A nih, engvângin nge Isua chu amah nghaisakna ban putpui a ngaih? Engvângin nge a ruala tihhlumte aia a thih hma zâwk? (Luka 23:26; Johana 19:31-33) Tihhlum a nih hma aṭang rêngin a taksa chu a chak tawh lo. A rilru a hrehawm êm avângin a tlaivâr a. (Luka 22:42-44) Chumi zân chuan Judate’n an nghaisa a, a tûkah Rom mite’n thing banah an khêngbet leh a ni. (Matthaia 26:67, 68; Johana 19:1-3) Chûng thilte chuan a thih hmatîr ngei ang tih a rinawm.
Ngaih dân dik lo: Isua chuan lungngai hmêl leh ngui hmêl a pu reng.
Thu dik: Isua chuan Bible-in “Pathian hlim” anga a târ lan, a Pa vâna mi Jehova miziate chu ṭha famkimin a lantîr a. (1 Timothea 1:11, NWT; Johana 14:9) A nihna takah chuan, Isua’n mi dangte chu hlimna neih dân a zirtîr a ni. (Matthaia 5:3-9; Luka 11:28) Hêng thilte hian Isua’n hlim hmêl a pu ziah ṭhîn tih a târ lang bawk.