Engtin Nge Jehova Thuhretute Rawngbâwlna Chu Sum leh Paia Chhawmdâwl A Nih?

Khawvêl puma kan rawngbâwlna chu Jehova Thuhretute phal taka pêk thawhlâwm hmanga chhawmdâwl a ni a.a Thawhlâwm bâwmte chu kan inkhâwmna hmunahte hûn a ni a, kawng danga thawhlâwm thawh theih dânte chu jw.org-ah (Donations tih hnuaiah en rawh) hmuh theih a ni. Chutah chuan khawvêl pum huap rawngbâwlna atân leh tualchhûng atân, a nih loh leh a pahnih atâna thawh theih dân duhthlan tûr a awm a ni.

Jehova Thuhretute chu sâwma pakhat pe tûr emaw, bituk zât neia thawhlâwm thawh tûr emaw, a nih loh leh an sum lâk luh aṭanga a percent ang zâwnga thawh tûra beisei an ni lo. (2 Korinth 9:7) Kan inkhâwmnaah thawhlâwm, a nih loh leh luh man kan khawn ngai lo va; kan rawngbâwltute pawhin baptisma te, mitthi vui te, inneihna te, leh sakhaw rawngbâwlna thiltih dangte an tihsak hian sum an dîl ngai lo bawk. Ei tûr zawrh te, thil zawrh te, a nih loh leh chutiang chi thil dangte hmangin sum kan zawng lo va, mite chu thawhlâwm thawh tûrin kan phût lui lo bawk. Thawhlâwm thawhtute chu vântlâng hmaah puan an ni ngai lo. (Matthaia 6:2-4) Kan website leh kan thu leh hla chhuahahte chuan sum hmuhna atâna fakna a chuang lo bawk.

Jehova Thuhretute kohhran tinah thla tina sum hman dân report chu inkhâwma telte hriat tûra puan a ni ṭhîn a. Thawhlâwmte ṭha taka hman a ni tih chian nân kohhran tina sum chhinchhiahnate chu endik ziah a ni bawk.—2 Korinth 8:20, 21.

Thawhlâwm Thawh Theih Dân Kawngte

• Thawhlâwm bâwmte: Thawhlâwmte chu Kingdom Hall-ah te, Assembly Hall-ah te, a nih loh leh kan inkhâwmna hmun danga thawhlâwm bâwmahte chuan pawisa faiin emaw, check-in emaw i thawh thei a ni.

• Online aṭanga thawhlâwm thawhna: Ram tam takah chuan, “Donate to Jehovah’s Witnesses” tih aṭangin credit card te, debit card te, bank transfer te, leh electronic hmanraw dangte hmangin thawhlâwm i thawh thei ang.b Thuhretu ṭhenkhat chuan chûng thawhlâwm thawh theih dânte zînga pakhat hmanga thawhlâwm an thawh ziah theih nân, thla tina “dah khâwl” chu an thlang a ni.—1 Korinth 16:2.

  

• Thawh tûra ruahmanna siam lâwk: Thawhlâwm thawh theih dân kawng ṭhenkhatah chuan ruahman lâwk, a nih loh leh dân lama thurâwnte a ngai a ni. Chutianga ruahman lâwkna i neih chuan, i awmna rama chhiah chawi chungchâng nêna inkûngkaihin hlâwkna i nei thei ang. Mi tam tak chuan an dam laia an tih theih, a nih loh leh an thih hnua nghawng ṭha tak nei thei thawhlâwm thawh chungchâng an hria chu an hlâwkpui a ni. A hnuaia târ lan anga thawhlawm thawh i duh a nih chuan chipchiar zâwka i hriat theih nân, tualchhûnga Jehova Thuhretute branch office bia ang che:

  • bank-a pawisa dah

  • zângna dawmna leh pension

  • in hmun lo ram

  • stock leh bond-te

  • thurochhiah leh pawisa inkawltîr

In tualchhûnga thawhlâwm thawh theih dân kawngte hriat belh nân, “Donate to Jehovah’s Witnesses” tih en rawh.