ZIRLAI 24
Engtin Nge Khawvêl Puma Kan Rawngbâwlna Chu Chhawmdâwl A Nih?
Nepal
Togo
Britain
Kan inawpna pâwl chuan kum tinin Bible leh thu leh hla chhuah dangte chu maktaduai têl tichhuakin, man lovin a sem chhuak a. Kingdom Hall leh branch office-te pawh kan sain, ṭha takin kan enkawl bawk. Chu bâkah, Bethel-a rawngbâwl sâng têlte leh missionary-te kan enkawlin, leilung chhiatna a thlen hunah chhawmdâwlna hna kan thawk bawk. Chuvângin, ‘Engtin nge hêng zozaite hi chhawmdâwl a nih?’ tiin i ngaihtuah mai thei a ni.
Sâwma pakhat pêk te, member nih man khawn te, leh thawhlâwm khawn te kan ti ve lo. Kan thu hrilh rawngbâwlna chhawmdâwl nân sum tam tak hmang mah ila, sum kan khawn lui ngai lo. Kum za chuang kalta khân, Vênnainsâng chhuak hmasa ber dawttu chuan Jehova’n min ṭanpui ang tih kan rin avângin, ‘mihring ṭanpuina kan dîl ngai lo vang a, kan ngên ngai hek lo vang,’ tih a sawi a—tûn thlengin kan la ngên ngai lo rêng rêng!—Matthaia 10:8.
Kan rawngbâwlna hi mahni duhthua thawhlâwm thawhte hmanga chhawmdâwl a ni. Mi tam tak chuan kan Bible zirtîr rawngbâwlna hi an ngaihhlut êm avângin thawhlâwmte an thawh a. Thuhretute ngei chuan khawvêl puma Pathian duhzâwng tih nân an hun te, tha leh zung te, sum leh pai leh thil hlu dangte chu lâwm takin an pe a ni. (1 Chronicles 29:9) Kingdom Hall leh kan inkhâwmpuinaahte chuan thawhlâwm thawh duhte tân thawhlâwm bâwmte chu hûn a ni a. A nih loh leh, kan website, jw.org aṭang pawhin thawhlâwm a thawh theih a ni. A tam zâwkah chuan, thawhlâwmte chu Isua’n a fak êm êm, biak in thawhlâwm bâwma dâr tangka dere pahnih thlâktu hmeithai rethei tak ang bawka dinhmun tlâwm taka nungte hnên aṭanga kan dawn a ni. (Luka 21:1-4) Chuvângin, mi tinin ‘an thinlunga an tum ang zêla’ an pêk theih nân, an “dah khâwl ṭheuh” thei a ni.—1 Korinth 16:2; 2 Korinth 9:7.
Jehova chuan a duhzâwng hlen chhuahna tûra Lalram rawngbâwlna atân, ‘an suma amah chawimawi’ duhtute thinlung chu a chêttîr chhunzawm zêl ang tih kan ring tlat a ni.—Thufingte 3:9.
Engin nge kan inawpna pâwl chu sakhaw dangte lakah tidanglam bîk?
Engtin nge mahni duhthua thawhlâwm thawhte chu hman a nih?