Khawvêl Pumah Remna A Awm Ang

Mi tinte hian remna awmna khawvêla chên an duh a. Mihring chanchin pumpuiah khawvêla hruaitute chuan innghirnghona ti tâwpa remna awmtîr tûrin theih tâwp an lo chhuah tawh a. A châng chuan hun rei lote chhûng chu remna an awmtîr thei a. Mahse, lungchhiatthlâk takin innghirnghonate chu an nuai bo thei lo. Khawvêlah hian remna a awm thei tak tak ang em? Thei ang! A awm theih chhan kan hriat theih nân Isua thil la tih tûrte leh a zirtîrnate hi lo ngaihtuah ta ila.

Isua thil la tih tûrte

Bible chuan khawvêlah remna a awm theih nâna Isua thil la tih thuai tûrte a târ lang.

• “[Isua chu] Remna Lal an ti dâwn si a. A ram a zau zêl ang a, a ramah remnain tâwpintai a nei lo ang.” (Isaia 9:6, 7) Pathian Rama Rorêltu tûr a nih angin Isua chuan khawvêl pumah tâwp ngai tawh lo tûr remna a awmtîr ang.

• “Pachhiain a auhvin ani chuan a chhanhim ang a, mi rethei, ṭanpuitu nei lo pawh chu, a chhanhim ang.” (Sâm 72:12-14) Isua’n a thuneihna chu rorêlna dik awmtîr nân te, indona tih tâwp nân te, tharum thawhna tih tâwp nân te leh, hrehawm tawrhna tih tâwp nânte a hmang ang.

• “Hnam dangin hnam dang chungah khandaih an lek tawh lo vang a, indo dân pawh an zir tawh hek lo vang.” (Isaia 2:4) Isua rorêlna hnuaiah mi zawng zawngin indo dân ni lovin, remna neih theih dân an zir ang.

Isua’n nakina remna a awmtîr dân tûr leh chuta i awm ve theih dân tûr hriat nân, video tawi tê Pathian Ram Chu Eng Nge Ni? tih chu en rawh.

Isua zirtîr chu

Tûn laiah pawh Isua zirtîrnate chuan mi maktaduai têlte chu remna nei tûrin a ṭanpui a. Isua chuan Tlâng Chunga a Thusawi lâr takah kan nî tin nuna remna kan awmtîr theih dân a târ lang a ni. Entîrna ṭhenkhat lo ngaihtuah ta ila.

• “Remna siamtute chu an hlim e.” (Matthaia 5:9) Isua chuan a hnungzuitute chu innghirnghona pumpelhtu mai ni lovin, remna siamtu ni zâwk tûrin a fuih a ni.

• “I unau chu rem hmasa phawt la; tichuan, i thilpêk chu rawn hlân ang che.” (Matthaia 5:23, 24) Isua chuan a thu ngaithlatute chu a rang thei ang bera an thu inhmuhlohnate chingfel tûrin a fuih a. Ani chuan Pathian nêna inlaichînna ṭha nei tûr chuan mi dangte nên kan inrem a pawimawh tih min zirtîr a ni.

• “Sawisêl tawh suh u, sawisêla in awm loh nân.” (Matthaia 7:1) Isua chuan innghirnghona thlentu khirhkhiap tak, a nih loh leh vervêk taka mi dangte sawisêl lo tûrin min vaukhân a. A hnungzuitute chu tlin lohna inhmuhsak tawn aiin, an mihringpuite tlin lohna chu “ngaidam zêl” zâwk tûrin a zirtîr a ni.—Luka 6:37.

Khawvêl puma mite chuan Isua zirtîrnate chu an nunpui a. Tharum thawhna, a nih loh leh innghirnghona a hluarna hmunah awm mah se, thinrimna tel lova innghirnghona chinfel dân te, mi dangte ngaihdam dân te leh, miten’n ngilnei lo taka thil an ti chung pawha hmangaihna lantîr dânte an zir a ni.

Isua zirtîrnate’n remna hmu tûra mi ṭhenkhat a ṭanpui dân hriat nân, “Indonate Kâra Thlamuanna Hmuh Dân” tih thuziak chu chhiar rawh.