Sakhuate Chunga Thleng Tûr Bible-in Eng Nge A Sawi?

Sakhuate thil tih dân chuan a ti beidawng che emaw, an thil tih dân chu i ngei emaw hial em? Sakhuana chuan khawtlâng leh mite chungah thil ṭha thlen ve ṭhîn mah se, chhiatna tam tak a thlen bawk a. “Hun kal tawha indona râpthlâk ber berte chu sakhaw thurin inperhsan tak takte avânga thleng a ni,” tiin Encyclopedia of Religion and War chuan a sawi. Sakhaw hruaitu ṭhenkhat chuan sakhuana chu biakna atân ni lovin, politics lam thil chawi lâr nân an hmang ṭhîn a. Sakhaw hruaitu dangte chuan mipat hmeichhiat hman sualna emaw, sum leh pai lama rinawm lohna emawte chu an la thup reng bawk.

Sakhuana thil tihin a ti lunghnual tawh che a nih chuan, chumi chungchânga Pathian ngaih dân hriat chu i duh mai thei a. Bible chuan an thil tihte avângin sakhaw tam zâwkte chungah Pathian a lâwm lo tih a târ lang a. Chu bâkah, chûng sakhuate chunga Pathian thil la tih tûrte chu a hrilh lâwk bawk. Chu mai a ni lo, Bible chuan entîr nei ṭawngkam hmangin tûn hmaa la thleng ngai lo, khawvêl puma sakhuate chunga Pathian thil la tih tûr chu a târ lang bawk a ni.

Bible-in sakhuate hma lam hun tûr chungchângah eng nge a sawi?

Hrilh lâwkna: Bible-a Thu Puan bu chuan Babulon Khaw Ropui tih hming pu nawhchizuar chungchâng a sawi a. Chu nawhchizuar chu sakawlh sen lâr tak chungah a chuang a. Mahse, a hnuah chu hmeichhia chu, chu sakawlh chuan a sawisa ang a, a that ang.—Thu Puan 17:3, 5, 16.

A awmzia: Nawhchizuar, Babulon Khaw Ropui chuan sakhaw dik lo—Pathianin a hnâwl sakhuaa—zawng zawng a entîr a. Sakawlh sen lâr tak chuan United Nations (UN)b a entîr a ni. Sakawlh sen lâr chunga nawhchizuar a ṭhutna chuan sakhaw dik lovin UN thunun a, a thu thua awmtîr a tumna a kâwk a. Chu sakawlhin nawhchizuar a tih hlumna chuan UN leh amah thlâwptu ramte’n khawvêla sakhaw dik lo zawng zawng dovin an ti boral dâwn tih a târ lang a ni. Chu thil thleng danglam tak chuan mite a ṭhâwng hle ang.

Engtin nge sakhaw dik lo chu tih chhiat a nih ang?

Hrilh lâwkna: “Ki sâwm i hmuh leh sakawlh khân nawhchizuar chu huain an sawisa ang a . . . meiin an hâl ral ang. Pathianin a ngaihtuahnate an hlen chhuah theihna tûrin chu chu an thinlungah [khawvêl hruaitute thinlungah] a dah si a; ni e . . . an ngaihtuahna thuhmun an hlen chhuah theihna tûrin an lalram chu sakawlh hnênah an pe ang . . . A hremna thihna te, lungngaihna te leh, ṭâmte chu ni khat chhûng lekin a lo thleng vek ang a, meia hâl ral a ni ang, a chunga rorêltu Pathian Jehovac chu a chak si a.”—Thu Puan 17:16, 17; 18:8.

A awmzia: Pathian chuan khawvêl hnamte thinlungah “a ngaihtuahnate” a tuhsak ang a. Anni chu “an lalram,” a nih loh leh an thuneihna UN hnêna pe tûrin a chêttîr bawk ang. Tichuan, ramte’n thuneihna an pêk UN chuan khawvêl puma sakhaw dik lote chu a ti chhia ang. Chu thil thleng mak tak chu “ni khat chhûng” leka thil thleng ang maiin rang takin a thleng thut ang a, mi tam tak chuan an beisei loh avângin mak an ti hle ang.—Thu Puan 18:21.

Engvângin nge sakhaw dik lo chu tih chhiat a nih ang?

Hrilh lâwkna: “A sualnate chu chhiar sên rual a ni lo, a thil sual tihte avângin Pathianin ro a rêlsak ang.”—Thu Puan 18:5.

A awmzia: Sakhaw dik lo chuan kum zabi têl Pathian ti lâwm lo thilte a lo ti tawh a. Pathian rorêlna hmachhawn ngai hial khawpa a “sualnate” hi lo ngaihtuah ta ila:

Politics thila inhnamhnawihna. Isua Krista chuan a hnungzuitute chu politics thila inhnamhnawih lo va, mihring sawrkâr thlâktu tûr vân sawrkârd, Pathian Rama an beiseina nghat zâwk tûrin a zirtîr a. (Daniela 2:44; Matthaia 6:9, 10; Johana 6:15; 18:36) Sakhaw dik lo erawh chuan mihring sawrkâr chunga rinna nghat tûrin a fuih thung. Pathian chunga rinawm aiin politics thila a inhnamhnawih nasat êm avângin Thu Puan bu-a hrilh lâwkna chuan Babulon Khaw Ropui chu “nungchang bawlhhlawhna” suala inhmang angin a sawi a, chumi nêna inâwm takin “nawhchizuar ropui” tiin a ko a ni.—Thu Puan 17:1, 2; Jakoba 4:4.



Tharum thawhna. Sakhaw dik lo chu “leia an tih hlum zawng zawngte thisen chhuahnaa mawhphurtu” anga sawi a ni. (Thu Puan 18:24) Sakhaw tam tak chuan an mi leh sate chu remna ûm tûra an zirtîr loh mai bâkah, indonate leh firfiaka chêtnate chu thlâwpin chuta tel ve tûrin an fuih hial zâwk a ni.



Duhâmna. Sakhaw dik lo chuan ‘nawmsip a bâwl a.’ (Thu Puan 17:4; 18:7) Sakhaw tam tak chu an thuneihna leh anmahni thlâwptute hmangin nasa takin an inti hausa a. Chutiang duhâmna chuan Pathian a ti lâwm lo.—Tita 1:7.



Dâwt thute. Sakhaw dik lo chuan Bible-a chuang thutak nêna inkalh zirtîrna leh thil chîntee a chawi lâr a. Sakhaw dik lo chu zirtîrna dik lo leh Pathian ti lâwm lo thil chînte lo chhuahna a nih avângin, hrilh lâwkna chuan ani chu “leia thil tenawmte nu” tiin a sawi.—Thu Puan 17:5; 18:23.

Sakhua zawng zawng chu tih chhiat an ni vek ang em?

Ni lo vang. Thu Puan bu chuan “mipui tam tak” tia koh, khawvêl pum huapa hnam hrang hranga mite chungchâng a sawi a. (Thu Puan 7:9) Chûng mipui tam takte chu “kawrfual vâr hate” anga târ lan an ni a, chumi awmzia chu a tehnate milin rinawm takin Pathian an bia tihna a ni. Chûng mite chu Pathianin sakhaw dik lo leh a hmêlma zawng zawngte a tih boral hun, Bible-in “hrehawm nasa tak” tia a sawiah chuan an dam chhuak ang. (Thu Puan 7:13, 14; 19:11, 19-21) Chûng mipui tam tak kawrfual vâr hate chu sakhaw dik vuantute an ni a, chu sakhua chu chatuanin a awm ang.f

Sakhaw dik lo tih chhiatna chuan i tân eng awmzia nge a neih?

Sakhaw thil tih râpthlâk takte chu Pathianin a pawm lo tih hriatna aṭangin thlamuanna i nei thei a. Pathian chawimawi lotu leh mite hrehawm tawrhna thlentu sakhua zawng zawngte chu tih boral thuai an la ni dâwn tih hriain, beiseina nên hma lam hun chu i thlîr tlat thei a ni.

Pathian pawm tlâk biakna a awm tih i hre thei bawk a. Bible chuan: “Pathian chibai bûktu dik takte’n thlarau leh thutakin Pa chibai an bûk ang, chutianga amah chibai bûktu tûr chu Pain a zawng si a,” tiin a sawi. (Johana 4:23) Pathian chuan a mite hnênah: “Ka mite u, a sualnate ṭâwmpui in duh loh va, a hremna tawrhte tawrh ve in duh loh chuan ani chu chhuahsan rawh u,” tiin a hrilh a. (Thu Puan 18:4, 5) Ni e, Pathian chuan mite chu thutaka amah chibai bûk tûrin a sâwm a ni. (1 Timothea 2:3, 4) A sâwmna pawmtute chu chatuanin an nung ang tih a tiam bawk.—1 Johana 2:17.