Pathian Thu Aṭanga Thuchah—Râltlânte Tâna Beiseina!

Kum tin hian mi maktaduai têlte chuan an sa himna zawngin an chênna in an tlânsan a ngai ṭhîn a. Chutiang dinhmun lungchhiatthlâk tak chu i tawng ve em? I tawng ve a nih chuan, nangmah chauhva i hmachhawn a ngai lo—Pathian chuan nun ṭha zâwk beiseina min pe a, chu chu Pathian Lehkha Thu Thianghlim aṭangin i zir thei a ni.

“Râltlânte leh loh theih lohva an in chhuahsan ngaite chuana rîkrum thila kan ṭanpuina chauh ni lovin, . . . hma lam hun beiseina pawh an mamawh tel,” tiin European Union commissioner,b Christos Stylianides-a chuan a sawi. Miin beiseina an neih chuan hma lam hun a êng zâwnga thlîr chhan tûr an nei a. Mahse, beiseina mai bâkah, rilru lamah pawh thlamuanna an mamawh a ni.

“Ka chênna ram chhuahsana ka chhûngte ka kalsan hnu chuan chhûngrilah ruak ngawih ngawih hian ka inhria a. Ka hlauvin, ka lung a chhe hle a, ka rilru a hah hle bawk.”—Emmanuel-a, Haiti.

Emmanuel-a tawn ang chu i tawng ve tawh em? I sa him nân i in aṭangin i tlânchhia a nih chuan, beiseina leh thlamuanna i hmuh theihna hmun i pan a ngai a. Engtin nge Pathian Thu Bible-in a ṭanpui theih che?

Pathian Thu Aṭanga Thlamuanna

Bible sawi dân: “Jehovac. . . . chuan ram dang mite chu a hmangaih.”—Deuteronomy 10:17, 18, NWT.

Bible sawi dân: “Lalpa chuan a kotu zawng zawngte chu a hnaih ṭhîn.”—Sâm 145:18.

Bible sawi dân: “Pathian chuan thil suaksual tiin . . . Engkimtitheia chuan a rêl khawlo hek lo vang.”—Joba 34:10, 12.

Chu chu i hrehawm tawrh chu Pathian thlentîr a ni lo tihna a ni. A hrem lo che a, i nun ti harsain a fiah hek lo che.

Pathian Thu aṭanga beiseina

Bible chuan nakina Pathianin min la tihsak tûr thilte a târ lang a. He beiseinain mahni chênna in tlânsantute a ṭanpui dân ngaihtuah rawh.

Bible sawi dân: “[Pathian] chuan an mittui zawng zawng a hru hul ang a, thihna a awm leh tawh lo vang a, lungngaihna te, ṭahna te, natnate pawh a awm leh tawh hek lo vang.”—Thu Puan 21:4.

Chu chu kan hrehawm tawrhna lak ata kan la zalên dâwn tihna a ni. Nun hi beidawnthlâk tak anga lantîrtu harsatna zawng zawngte chu Pathianin chinfelsak min tiam a ni.

“Pathian chuan tûna kan chhehvêla thleng rorêl dik lohna leh thil sualte hi a ti tâwp thuai ang. Chu beiseina chuan hrehawm tawrhna zawng zawng a tâwp hun tûr ngaihtuah tlat tûrin min ṭanpui a ni.”—Karla-i, El Salvador.

Bible sawi dân: “Tûn hma thilte chu hriat rengin a awm tawh lo vang a, rilruah pawh a lût tawh hek lo vang.”—Isaia 65:17.

Chu chu kan rilru ti natu thilte kan hre reng tawh dâwn lo tihna a ni. Thil ṭha lo i tawnte avânga ngaihtuahna ṭha lo i neihte’n kumkhuaa a tih buai reng che chu Pathianin a phal ngai lo vang.

“Bible chuan kan natnate leh kan thil chân tâkte avânga kan tawrhnate pawh kan hriat reng tawh loh tûr thu min tiam a. Chu beiseina chuan thil engkim a la inthlâkthleng thuai dâwn tih min hriattîr avângin, kan hmachhawn harsatnate tuar chhuak thei tûrin min ṭanpui a ni.”—Natalia-i, Ukraine.

Bible sawi dân: “Vân Pathianin ram a rawn din ang a, . . . hêng ram zawng zawngte hi a tikeh sawmin a tiral zâwk ang.”—Daniela 2:44.

Chu chu vân sawrkâr ṭha famkimin lei chungah ro a rêl dâwn tihna a ni. Pathian chuan mihring sawrkâr zawng zawng chu a vân lam sawrkârin a rawn thlâkthleng thuai ang a. Chu sawrkâr chuan mi tin tân remna leh muanna dik tak bâkah, rorêlna dik leh hmuingîlna a thlen ang.—Mika 4:3, 4.

“Inhnehchhiahna, thlei bîk neihna, inrinhlelhna leh, chi inthliarna te a reh thuai dâwn tih hriatna chuan min ti chak a—Jehova Lalram chuan chûng harsatna zawng zawng chu a nuaibo hlen tawh ang.”—Mustafa-a, Middle East.

Pathian Thu aṭanga finna

Bible-a finna thu ṭangkai takte chuan i nuna i thiltawnte pawm thiam tûrin a ṭanpui thei che a. I thil hloh tâkte pawh tiamin i dinhmun inthlâkthlengte hmachhawn thei tûrin a ṭanpui thei bawk che a ni. A hnuaia thu bulte’n râltlânte a ṭanpui dân hi lo chhinchhiah ang che:

Bible sawi dân: “Miin thil tam tak nei mah se, a thil neihte chuan nunna a pe thei si lo.”—Luka 12:15.

Hêng thu fing takte’n hmachhawn thei tûra a ṭanpui theih dân che: I thil kalsan tâkte avângin hrilh hai tak leh lungngai takin i awm thei a. Mahse, châwl lawka i thil chân tâk zawng zawngte aiin i nunna a hlu hle zâwk tih i ngaihtuah a nih chuan, chu chuan chûng thilte avânga lungngai lutuk lo tûrin a ṭanpui ang che.

“Nunna hi kan thil neihte aiin a hlu zâwk hle a. Dinhmun ṭhenkhatah chuan, i sum leh pai, a nih loh leh i thil neihte chuan an chhanhim thei lo che.”—Natalia-i, Ukraine.

Bible sawi dân: “Nang chuan zâwt suh, hmân lai nîte ṭhat zâwkzia, tûn lai aiin.”—Thuhriltu 7:10.

Hêng thu fing takte’n hmachhawn thei tûra a ṭanpui theih dân che: I dinhmun tawh chu a harsa hle a nih pawhin, hun kal tawha i nun dân ṭhin nên khaikhin loh i tumna chuan rilru hrehawma awm reng lo tûrin a ṭanpui ang che.

“A nihna anga tûna ka dinhmun ka pawm thiamna chuan a êng zâwnga thil thlîr thei tûrin min ṭanpui.”—Eli-a, Rwanda.

Bible sawi dân: “Ei tûr leh silhfên inbel tûr neiin, chûngah chuan kan lungawi ang.”—1 Timothea 6:8.

Hêng thu fing takte’n hmachhawn thei tûra a ṭanpui theih dân che: Nuna i mamawh bulpuite neia lungawi i tum tlat chuan, rilru hahna i nei tlêm ang a, chu chuan a lutuka lungkham lo tûrin a ṭanpui ang che.

“Bible chuan kan thil chân tâkte chu ngaihtuah ngut ngut lova thlîr dân danga thil thlîr tûrin min ṭanpui a. Ka nupui nên nungdama hmun him taka kan awm thei hi kan lâwm hle.”—Ivan-a, Ukraine.

Bible sawi dân: “Chuvângin, miin in chunga an tiha in duh tûr ang chiah chu mi chungah pawh in ti tûr a ni.”—Matthaia 7:12.

Hêng thu fing takte’n hmachhawn thei tûra a ṭanpui theih dân che: Dawhtheihna leh ngilneihna nei tûra theih tâwp i chhuah chuan mi dangte nên inlaichînna ṭha lehzual i nei ang a. Chu bâkah, tualchhûng mite tân pawm i awlsam lehzual ang a, an en hrang lo vang che.

“Mite chuan zah tak, ngilnei tak, leh hmangaih taka cheibâwl an duh a. Chûng miziate chuan i awmna thara mi dangte nêna inlaichînna ṭha nei tûrin a ṭanpui ang che.”—Angelo-a, Sri Lanka.

Bible sawi dân: “In dîlnate chu Pathian hnênah hriattîrin awm zâwk rawh se. Tichuan, . . . Pathian thlamuanna chuan in thinlung leh in rilrute chu . . . a vênsak ang che u.”—Philippi 4:6, 7.

Hêng thu fing takte’n hmachhawn thei tûra a ṭanpui theih dân che: Pathian hnênah i rilru chhûngrila awm te, i mamawh te, i hlauhna te leh, i lungkhamnate ṭawngṭaiin thlen rawh. Chutianga ṭawngṭaina chuan i rilru hahna a ti ziaawm theiin, i dinhmun thar mila i insiamrem zêl ruala a lutuka lungkham lo tûrin a ṭanpui ang che.

“Harsatna ka neih apiangin Pathian hnênah ka ṭawngṭai ṭhîn a, min chhâng bawk ṭhîn. Bible aṭanga ka thil zirte chuan chhûngrila thlamuanna min neihtîr a ni.”—Yol-a, South Sudan.

“Bible-a thurâwn ṭha takte chuan he dinhmun khirh tak hmachhawn thei tûra ka mamawh chhûngrila thlamuanna nei tûrin min ṭanpui a ni.”—Valentina-i, Ukraine.

“Pathian Jehova min tiam nun ṭha zâwk hriatna chuan min ti chak.”—Emmanuel-a, Haiti

Bible thutiam thlamuanna leh beiseinate chu zir belh a, i rin theih chhan hriat belh chu i duh em? A thlâwna tlawh tûr chein Jehova Thuhretute hnênah dîlna theh lût ang che. Nangmah ṭanpui che chu an châk hle a ni.