Khawvêl Indonaah $2 Trillion Aia Tam Hman A Ni—Bible-in Eng Nge A Sawi?

Kum 2022 khân, khawvêl indonaah U.S. dollar 2.24 trillion aia tam hman a ni a, chûng zînga a tam ber chu Russia-in Ukraine a rûnnaa hman a ni deuh ber a. Stockholm International Peace Research Institute (SIPRI)-in kum 2023, April thlaa a tihchhuah report-ah chuan, kum 2022 chhûng hian:

• Europe khawmuala indonaa sum hman zât chu za zêlah 13-in a pung a, chu chu cold war hun hmaa lo hman tawh belh khâwm aia tam zâwk a ni.”

• “Russia chuan … a sum hman zât chu a tipung a, 9.2 vêl hmang nia chhût a ni, chu chu khawvêla hmang tam ber pangana aṭangin pathumnaah a hlângkai tihna a ni.”

• United States chu hmang tam ber dinhmunah a la awm reng a, “khawvêl indonaa hman zât za zêla 39 vêl a hmang a ni.”

“Tûn hnai kuma indona atâna sum hman zât pung chho zêl chu khawvêl dinhmun derthâwng taka kan awm tawhzia târ langtu chiang tak a ni,” tiin SIPRI chanchin ziaktu pakhat Dr. Nan Tiana-a’n a sawi.

Bible chuan tûn laia khawvêl thuneihna inchuh avânga inhuatna sosâng zêl chu a sawi lâwk bâkah, remna atâna beisei tûr awmchhun pawh a târ lang bawk a ni.

Indona pung chho zêl chu sawi lâwk a ni

• Bible chuan kan chênna hun hi “hun hnuhnûng,” tiin a ko va.—Daniela 8:19.

• Daniela bu chuan chumi hun chhûng chuan khawvêl thuneihna inchuh a ni dâwn tih a sawi lâwk a. Chûng khawvêl thuneitute chu an ‘innawr,’ a nih loh leh chak zâwk nih inchuhin an awm ang. Chutiang inbeihnaah chuan “thil hlute,” a nih loh leh sum tam tak hman a ni ang.—Daniela 11:40, 42, 43.

He Bible hrilh lâwkna ngaihvenawm tak chungchâng hriat belh nân, Hrilhlâwkna Thleng Famkim—Daniela Bung 11 tih video chu en rawh.

Remna dik tak a thlen dân tûr

• Bible chuan Pathianin mihringte rorêlna chu a rawn thlâk dâwn tih a sawi a. Pathianin “ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang.”—Daniela 2:44.

• Nakin lawkah, Pathian Jehovaa chuan miringte’n an tih theih loh—chatuan daih remna dik tak—chu a rawn thlen tawh ang. Engtin nge? A vân Lalram sawrkâr chuan râlthuam zawng zawng leh tharum thawhna zawng zawng chu a rawn nuai bo tawh ang.—Sâm 46:8, 9.

Pathian Lalramin a rawn hlen tûr chungchâng hriat belh nân, “Pathian Ram Hnuaiah ‘Thlamuanna Nasa Tak Chu A Duah Hlauh Hluah Ang,’” tih thuziak chu chhiar rawh.