Pathianin Bengngawngte A Ngaihsak Dân
Khawvêl pumah bengngawng mi maktaduai 70 vêl an awm a, an zînga tam tak chu zaizir ṭawng 200 aia tam zînga ṭawng eng emaw ber hmangin an inbe thei a. Lungchhiatthlâk takin, bengngawngte chuan hêng a hnuaia târ lan ang hian, dik lo taka cheibâwl an tâwk fo ṭhîn a ni:
“Khawvêl pumah, bengngawngte leh hriatna lama harsatna neite neih dikna chu ngaihthah a ni fo.”—National Association of the Deaf (U.S.).
“Ram retheia awm bengngawngte chu a rethei ber berte zînga mi an ni a, zirna te, hnathawhna te leh, chanchin hriatna lamah an dinhmun a chau hle.”—World Federation of the Deaf.
Engtin nge Pathianin bengngawngte chu a thlîr? Bengngawngte chungchâng Bible-in eng nge a sawi? Chu bâkah, engtin nge Jehova Thuhretute’n bengngawngte chu tûn laiah an ṭanpui?
Pathianin Bengngawngte A Thlîr Dân
Bible chuan Pathian Jehova’na bengngawngte a ngaihsak tih a târ lang a. Anni chu dik taka cheibâwl ni tûrin leh A pêk zirtîrna chu hlâwkpui tûrin a duh a ni.
Bible châng: “Bengngawng chu ânchhia i lawh tûr a ni lo.”—Leviticus 19:14.
A Awmzia: Hmân lai Israel mite hnêna pêk Jehova Dân chuan bengngawngte dikna neih chu a humhim a ni.
Bible châng: “Pathianin mi duhsak bîk a nei lo.”—Tirhkohte 10:34.
A Awmzia: Jehova chuan bengngawngte pawh tiamin, hnam dân leh ṭobul hrang hranga mite chu a ngaihsak vek a ni.
Bible châng: “Isuan . . . , Ram Chanchin Ṭha chu hrilin, . . . , a fang zêl a.”—Matthaia 9:35.
A Awmzia: Isua chu bengngawngte pawh tiamin, mite hnêna Pathian Ram chanchin hril tûr leh chu Lalramin mi zawng zawng tâna a tihsak tûrte sawi tûrin he leiah a lo kal a ni.—Matthaia 6:10.
Bible châng: Isua chuan “bengngawngte a tihvârsak a, ṭawng thei lote pawh a ti ṭawng ṭhîn.”—Marka 7:37.
A Awmzia: Isua chuan bengngawngte leh ṭawng thei lote tâna Pathian Ramin a tihsak tûrte chu a hmuhtîr a. Ṭum khat chu, Isua’n bengngawng leh ṭawng fiah lo pakhat a tihdam hmain ani chu zaizirin a bia.—Marka 7:31-35.
Bible châng: “Bengngawngte beng chu tihvârin a awm ang.”—Isaia 35:5.
A Awmzia: Jehova chuan bengngawngte beng chu tihvârin a awm ang tih a sawi lâwk.—Isaia 29:18.
Tûn Laia Jehova Thuhretute’n Bengngawngte An Ṭanpui Dân
Jehova Thuhretute chuan khawvêl puma bengngawngte hnênah Pathian hnên aṭanga lo kal beiseina thuchah an hrilh a. He hna hi engtin nge kan hlen theih? Bible leh Bible ṭanchhan video-te chu zaizir ṭawng 100 aia tamin kan tichhuak a. Chu bâkah, zaizir ṭawngin Bible zirtîrna leh Kristian inkhâwmte pawh kan nei bawk. Chûng zawng zawng chu Pathian ṭanpuina dawng duhtute tân man chawi lovin kan ti vek a ni. Engvângin nge? Isua’n: “A thlâwnin in hmu a, a thlâwnin pe ang che u,” tia thu min pêk vâng a ni.—Matthaia 10:8.
Chûng video-te chu online aṭangin a en theih a, a nih loh leh hêng a hnuaia târ lan aṭangte pawh hian a download theih bawk a ni:
JW.ORG. Zaizir ṭawng eng emaw bera tihchhuahte i hmuh theih nân website phêk chung lama ṭawng chhinchhiahna lem hi hmet rawh.
JW Library app. He app hi i phone-ah emaw, tablet-ah emaw a thlâwnin install la; tichuan, zaizir ṭawng 100 chuanga tihchhuah video-te chu i download thei, a nih loh leh streaming-in i en thei a ni.
Bible Ṭanchhan Eng Zirtîrnate Nge Kan Tihchhuah?
Zaizir ṭawnga Bible. American Zaizir Ṭawnga tihchhuah New World Translation of the Holy Scriptures chu Bible bu puma zaizir ṭawnga tihchhuah hmasak ber a ni a. Zaizir ṭawng hrang tam taka tihchhuah New World Translation chu tûnah chuan a bu pumin emaw, a ṭhen a zâr emaw a hmuh theih tawh a, kum tinin ṭawng danga tihchhuah belh zêl a ni. (Ṭawng awm zât hriat nân, a nih loh leh online-a Bible en nân, “Zaizir Ṭawnga Tihchhuah New World Translation Bible,” tih bâwm chu en rawh.)
Zaizir ṭawnga Bible tihchhuah a nih dân chungchâng hriat nân, The Complete New World Translation Is Available in ASL tih video chu en rawh.
Bible chhiarna tihhmasâwn nân, JW Library app chu install rawh. He app hian zaizir ṭawnga Bible châng i duhna laite thlang thei tûrin a ṭanpui ang che.
Dmytro-a leh Vita-i te chu bengngawng nu leh pa ni mah se, an fate erawh bengngawng an ni lo. An chhûngkuain nî tina zaizir ṭawnga Bible an enna aṭanga hlâwkna an hmuh dânte chu hmuh tum rawh.
Bible chungchâng zirtîrtu Video-te. Jehova Thuhretute chuan mite chu Bible-a thurâwn ṭangkai takte hre thiam a, nunpui thei tûrin zaizir ṭawngin video-te an tichhuak a, hêng mite tân hian a ni . . .
Mi Pahnih Inkâra Neih Phûrawm Taka Bible Sawihona. I awmna hmunah mi mal taka kaihhruaina dawngin, zaizir ṭawngin Bible thuchah chu zir rawh. A thlâwna Bible sawihona neih dân chu dîl rawh.
Jeson Senajonon-a chu Philippin rama awm a ni a. Bible sawihonain Pathian nêna inlaichînna ṭha nei chho tûra a ṭanpui dân hi en rawh.
Mario Antúnez-a chu Honduras rama church pastor pakhat a ni a. A chanchin chuanna “Chhânna Aiin Zawhna Ka Ngah Zâwk,” tih thuziaka a sawi angin, Bible zawhnate chhânna a hmuh dân chu hriat tum rawh.
Inkhâwmte leh thiltihte. Khawvêl pumah hian zaizir ṭawng hmang kohhrante leh group-te kan nei a, chûngahte chuan bengngawngte’n chawlkâr tinin Pathian biakna an nei ṭhîn a ni. Chu bâkah, kum tin hian zaizir ṭawng hmanga Bible zirtîrna lian tham tak takte pawh kan huaihawt bawk. Kan inkhâwmnaah leh thiltihnaahte chuan bengngawng leh mitdel ni kawpte tân an kut vuana ṭawng lehlinsaknate a tel a. A thlâwna neih theih mitdel hawrawpa thu leh hlachhuahte pawh kan siam bawk a ni.
I bul hnaia awm kohhran chu zawng hmu rawh.
Kum tina kan neih inkhâwmpuite leh bial inkhâwmte chanchin chu hriat tum rawh.
Kum khat chhûnga thilthleng pawimawh ber, Isua thih Hriatrengna inkhâwmah lo tel rawh.
José Luis Ayala-a chu Mexico rama chêng a ni a. A beng a ngawng a, a mit a del bawk a ni. Bible zirtîrtu thiam tak ni tûra ṭanpui a nih dân hi hriat tum ang che.
a Jehova chu Pathian hming bil a ni. (Sâm 83:18) He thuziak “Jehova Chu Tu Nge Ni?” tih hi en rawh.