COVID Avângin Mi Maktaduai 6 An Boral—Bible-in Eng Nge A Sawi?

World Health Organization (WHO) chuan COVID-19 avângin mi maktaduai 6.27 an boral thu kum 2022, May 23 khân a sawi a. Mahse, 2022, May 5-a tihchhuah chanchin pakhatin WHO chuan mitthi zât dik tak chu, chu aiin a tam zâwk hle thei tih a chhût thu a sawi a. Kum 2020 leh 2021 chhûngin “COVID-19 hripui avâng leh chumi nêna inkaihhnawih avânga thi zât chu maktaduai 14.9 dâwn lai an ni,” tiin a sawi. Thin ṭhawng thei tak chutiang chanchin chu Bible-in eng nge a sawi?

Bible chuan hripui hlauhawm tak tak chungchâng a sawi lâwk

• Isua chuan ‘ni hnuhnûngte’ tia koh he hun chhûng hian hrite, a nih loh leh hripui hlauhawm tak takte a lên tûr thu a sawi lâwk a.—Luka 21:11; 2 Timothea 3:1.

Isua sawi lâwk chu tûnah a thleng famkim mêk a ni. Hriat belh nân, “‘Ni Hnuhnûng’ A Nih Loh Leh ‘Tâwpna Hun’ Chhinchhiahna Chu Eng Nge Ni?” tih thuziakte chu en rawh.

Bible chuan thlamuanna a pe

• ‘Thlamuanna zawng zawng Pathian chuan kan hrehawmna zawng zawngah min thlamuan ṭhîn.’—2 Korinth 1:3, 4.

Thihnaa hmangaih tak chântu mi tam tak chuan Bible thuchah aṭangin thlamuanna an hmu a. “Lusûnna Tawrh Thiam Dân—Tûna I Tih Theihte,” tih leh “Lusûnte Tâna Ṭanpuina Ṭha Ber,” tih thuziakte chu en rawh.

Bible chuan chinfel hlenna a târ lang

• “I ram lo thleng rawh se. I duh zâwng vâna an tih angin leia min ti rawh se.”—Matthaia 6:10.

“Pathian Ram” chuan hma a lâk thuai tawh dâwn avângin “chumi khuaa awm chuan, ‘Ka dam lo ve,’ a ti lo vang.” (Marka 1:14, 15; Isaia 33:24) Chu vân sawrkârna chungchâng leh chumiin a tih tûrte hriat nân, Pathian Ram Chu Eng Nge Ni? tih video chu en rawh.

Nang leh i chhûngte’n Bible thurâwn fing tak leh thutiam ropui takte in hlâwkpui theih nân Bible sawite zir belh tûrin kan sâwm a che u.