Bible-in Hripuite Chungchângah Eng Nge A Sawi?
Bible chhânna
Bible chuan ni hnuhnûng chhûngin hrilêngte (hripuite pawh tiamin natna darhzau takte) a awm tûr thu a sawi lâwk a. (Luka 21:11) Chutiang hripuite chu Pathian thlentîr emaw, hremna emaw a ni lo. Chu aiin, Pathian chuan hripui pawh tiamin dam lohna zawng zawngte hi a Lalram hmangin a rawn titâwp vek ang.
Bible-in hripuite chungchâng a sawi lâwk em?
Bible chuan hetiang COVID-19 te, AIDS te, TB te, malaria te, leh Spanish hripui ang chi hripuite chu a hming hmerin a târ lang lo. Mahse, thihna thlen thei “hrite” a lêng ang tih a sawi lâwk a ni. (Luka 21:11; Thu Puan 6:8) Hêng thilthlengte hi ‘ni hnuhnûng’ chhinchhiahna zînga mi a ni a, “khawvêl tâwpna chhinchhiahna,” tia koh a ni bawk.—2 Timothea 3:1; Matthaia 24:3.
Pathianin mite chu natnain a hrem ngai em?
Bible chuan Pathianin natnate hmanga mite hrem châng a nei zeuh ṭhîn tih a târ lang a. Entîr nân, mi ṭhenkhat chu phâr a veitîr a ni. (Numbers 12:1-16; 2 Lalte 5:20-27; 2 Chronicles 26:16-21) Mahse, chûng thilthlengte chu mi sual leh mi ṭha vai hmertu hripuite ang a ni ve lo. Chu aiin, Pathian laka helte chunga rorêlna a ni zâwk a ni.
Tûn laia hripui lêngte hi Pathian hremna a ni em?
Ni lo. Mi ṭhenkhat chuan tûn laia mite hrem nân Pathianin hripuite leh natna dangte a hmang niin an sawi a. Mahse, Bible-in chutiang ngaih dân chu a thlâwp lo. Engvângin nge?
A chhan pakhat chu, hmân lai leh tûn laia Pathian betute chuan natnate an tawrh ve ve vâng a ni. Entîr nân, mi rinawm Timothea chu ‘a dam lo fo va.’ (1 Timothea 5:23) Mahse, Bible chuan chu chu Pathian hremna niin a sawi lo. Chutiang bawkin tûn laiah pawh, Pathian chhiahhlawh rinawm ṭhenkhatte chu an dam lovin, natnate an vei a. A chhan chu, a hun lo leh hmun lova an awm palh vâng a ni fo.—Thuhriltu 9:11.
Chu bâkah, Bible chuan mi suaksualte hremna tûra Pathian hun ruat chu a la thleng lo tih min zirtîr a. Chu aiin, “chhandamna nî-ah” kan nung a—chumi awmzia chu Pathianin amah hnaih a, chhandam ni tûra mi zawng zawngte a sâwmna hunah kan awm tihna a ni. (2 Korinth 6:2) A sâwm dân kawng khat chu khawvêl puma thuchah ṭha tak, “Ram chanchin ṭha” hrilhna hmangin a ni.—Matthaia 24:14.
Hripui lêngte hi a tâwp ngai ang em?
Tâwp ang. Bible chuan nakin lawkah tumah an nat tawh lohna hun a awm dâwn tih a sawi lâwk a. Pathian chuan a Lalram rorêlna hnuaiah natna zawng zawng a tidam vek ang a. (Isaia 33:24; 35:5, 6) Hrehawm tawrhna, natna, leh thihna te chu a tibo vek bawk ang. (Thu Puan 21:4) Chu bâkah, mitthite chu he leia dinhmun ṭha famkim hnuaia hrisêlna ṭha tak nei tûrin a kaitho dâwn a ni.—Sâm 37:29; Tirhkohte 24:15.
Natna chungchâng târ langtu Bible chângte
Matthaia 4:23: “Isuan an inkhâwmna inahte zirtîrin, Ram chanchin ṭha chu hrilin mite zînga natna tinrêng leh chak lohna tinrêng tidamin Galili ram zawng zawng a fang vêl a.”
A awmzia: Isua thil mak tihte chu Pathian Ramin nakin lawka mihring zawng zawngte tâna a tihsak tûrte entîrna mai a ni.
Luka 21:11: “Hrite a lêng bawk ang.”
A awmzia: Natna darhzau takte hi ni hnuhnûng chhinchhiahna zînga mi a ni.
Thu Puan 6:8: ‘Tin, ngai teh, sakawr dâng ka hmu a; a chunga chuang hming chu Thihnaa a ni; tin, Mitthi Khuaan a rawn zui a. Tin, hritea tihlum tûrin thuneihna an pe a ni.’
A awmzia: Thu Puan bua sakawr chungchuang palite chungchânga hrilh lâwkna chuan kan hun laiah hripuite a lêng dâwn tih a târ lang.