Milem Biakna—Bible-in Eng Nge A Sawi?

Catholic News Service-in a sawi dânin, March 25, 2022-a St. Peter Basilica hmuna huaihawt, hun serhah Pope Francis-a chu Mari lim hmaah dingin a “mit a chhîng a, kûnin zâwi têin a ṭawngṭai a.” Remna a awm theih nân “Mari hnênah a ngên” a ni. Vatican Chanchinbu pakhat chuan, “Pope chuan mihringte Tihthianghlim nân, a bîk takin Russia leh Ukraine tân Nula Thianghlim Mari hnênah a ṭawngṭaisak a ni,” tiin a belhchhah bawk.

Eng nge i ngaih dân? Milem hmaa ṭawngṭai emaw, biaknaa milem hman emaw chu a inâwmin i hria em? A hnuaia Bible chângte hi lo ngaihtuah ta ila:

• ‘Milem siam chawp leh thil, a anpui rêng rêng-chung lam vâna mi emaw, hnuai lam leia mi emaw, lei hnuai lama tuia mi emaw i tân i siam tûr a ni lo: Chûng chu chibai i bûk tûr a ni lo va, an rawng i bâwl tûr a ni hek lo: kei, Jehova i Pathian hi, Pathian thîkthuchhia ka nih hi.’—Exodus 20:4, 5.a

• “An milemte chu tangka leh rangkachak an ni a, mihring kut chhuak an ni. Kâte an nei a, an ṭawng thei si lo va; mitte an nei a, an hmu thei si lo va; bengte an nei a, an hre thei si lo va; hnârte an nei a, rim an hre thei si lo va; kutte an nei a, eng mah an khawih thei si lo va; kête an nei a, an kal thei si lo va; an hrawkin an ṭawng thei hek lo. Chûng siamtute chu chûngte ang chuan an awm ang; a ni, chûng ringtu apiangte chu.”—Sâm 115:4-8.

• “LALPA chu ka ni; chu chu ka hming a ni: ka ropuina hi mi dang hnênah ka pe lo vang a, fak ka hlawhna hi milem siam chawpte hnênah ka pe hek lo vang.”—Isaia 42:8.

• “Milem biak hi tlânsan rawh u.”—1 Korinth 10:14.

• “Milem lakah inthiarfihlîm rawh u.”—1 Johana 5:21.

Biaknaa milemte hman chungchâng Bible sawite hriat belh nân “Bible Thlîr Dân—Milemte” tih thuziak chhiar la, a nih loh leh Pathianin Biaknaah Milemte Hman A Phal Em? tih video en ang che.

Hêng thute chungchânga Bible sawi chu i ngaihven mai thei bawk:

• “Nula Thianghlim Mari—A Chungchâng Bible-in Eng Nge A Sawi?”

• “Nula Thianghlim Mari Hnênah I Ṭawngṭai Tûr A Ni Em?”

• “Thil Makte leh Inlârnate—Pathian Hnên Aṭanga Chhinchhiahna A Ni Em?”

• “Leiah Remna—Engtin Nge A Lo Thlen Ang?”

Photo credit: Vincenzo Pinto/AFP via Getty Images