Chhiartute Zawhna

Engtikah nge hnamte chuan “muanna leh himna” thu an puan chhuah ang?

Tûn hnai Vênnainsâng-aa tih chhuah “Chhiartute Zawhna,” tih thuziaka kan hriat tawh angin, nakin lawkah Jehova chuan ‘a ngaihtuahna’ chu “ki sâwm” (mihring sawrkâr zawng zawng) thinlungah a dah ang; chumi awmzia chu an thiltihtheihna leh thuneihna chu “sakawlh sen lâr”—United Nations—hnênah an pe dâwn tihna a ni. He sakawlh hi “sakawlh hmasa zâwk lim,” tia koh a ni bawk. (Thup. 13:14, 15; 17:3, 16, 17) Chumi hnuah, “ki sâwm” leh thiltihtheihna rawn nei thar sakawlh chuan khawvêla sakhaw dik lo zawng zawng chu a ti boral ang. Hnamte chuan sakhaw dik lo an tih chhiat hmain, a nih loh leh, an tih chhiah hnuah “muanna leh himna”b an puang ang em?—1 Thes. 5:3.

Tlang taka sawi chuan, nakina “muanna leh himna” an puan hun tûr chiah chu kan hre lo va. Chipchiar takin hre vek ila chuan, harhvâng tak, a nih loh leh inring renga kan awm a ngai lo vang. Mahse, Isua chuan a hnungzuitute chu ‘inring renga’ awm tûrin a hrilh nawn fo a ni. (Mt. 24:42; 25:13; 26:41) Tûnah, Thessalonia khuaa mite hnêna tirhkoh Paula lehkhathawna târ lan thlarauva thâwk khum hrilh lâwkna hi i lo bih chiang ang u.

Paula chuan: “‘Muanna leh himna!’ tia an sawi lai takin, . . . chawplehchilhin an chungah chhiatna a lo thleng thut ang,” tiin a ziak a. (1 Thes. 5:2, 3) Heta Paula thusawite hi kan thu leh hla chhuahahte chuan hetianga hrilhfiah a lo ni tawh ṭhîn a: “Muanna leh himna” chu Babulon Khaw Ropui, tia koh khawvêl sakhaw dik lo lalram tih chhiatna hmanga inṭan tûr hrehawm nasa tak a thlen hma lawkah puan chhuah a ni ang tiin. Nakina he thu puan chhuahna hi hrehawm nasa tak a inṭan tawh dâwn tih hriattîrna hnuhnûng ber a ni ang, tia târ lan a ni tawh ṭhîn bawk.

Mahse, ngun taka zir bingna neih belh a nih hnuah, hrilhfiah theih dân kawng dang a awm niin a lang. “Muanna leh himna” chu sakhaw dik lo tih chhiat a nih hnuah puan chhuah a ni thei a ni. Engvângin nge chu chu thil thleng thei a nih? A hnuaia zawhnate hi i lo ngaihtuah ang u.

Engtin nge sakhaw dik lote chu he khawvêl indonaa an lo inhnamhnawih tawh ṭhin? Bible chuan heti hian a sawi a: “Ani [“nawhchizuar ropui tak,” Babulon Khaw Ropui] chu . . . leia an tih hlum zawng zawngte thisen chhuahnaa mawhphurtu a ni,” tiin. (Thup. 17:1, 5; 18:24) Mihringte chanchin tluanchhuakah hian, chu nawhchizuar ropui tak chu hnamte indona thlâwptu leh fîrfiakte chêt lâkna chawk thotu a ni fo ṭhîn a. Chuvângin, ani chu muanna leh himna ni lovin, indona leh innghirnghona awmtîrtu ber a ni. Chu chuan he zawhna hi a chawk chhuak a ni: Hnamte chuan Babulon Khaw Ropui an tih chhiat hnuah chauh “muanna leh himna” an puang ang em? tih hi. Chu chu thil ni thei a ni a; mahse, chiang takin kan sawi fak thei lo.

“Muanna leh himna” puan chhuahna chu engin nge rawn zui ang? Paula chuan: “Chawplehchilhin an chungah chhiatna a lo thleng thut ang,” tiin a sawi a. (1 Thes. 5:3) Study note chuan he Bible châng hi heti hian a hrilhfiah a ni: “Paula thusawi chuan ‘muanna leh himna’ puan chhuah a nih hun leh chumi puangtute chunga chhiatna a lo thlen hun tûr inkârah hun tlêm tê chauh a awm emaw, hun a awm lo hulhual emaw a ni thei tih a târ lang a. Chu chu chawplehchilhin a lo thleng ang a, pumpelh theih a ni lo vang,” tiin. Khawvêl sawrkâr thiltithei takte’n “muanna leh himna” chu sakhaw dik lo an tih chhiat hnuah an puang a nih chuan, chumi hnuah, chûng hnam zawng zawngte chhiatnain chawplehchilhin a zui nghâl ang.

Engtin nge Jehova mite’n chu sawi lâwk thil thleng tûr chu an chhân lêt ang? Paula chuan heti hian a sawi a: “Nangni erawh chu unaute u, chumi nî chuan rûkru anga a nanna tûr che uin thimah in awm lo ve,” tiin. (1 Thes. 5:4) Hei hi han ngaihtuah teh: “Muanna leh himna” chu sakhaw dik lo tih chhiat a nih hnuah puan chhuah a nih chuan, Jehova mite chuan hnamte tih chhiatna chu a lo thleng mai dâwn tih an hria ang. Mahse, hnamte thlîrna aṭang chuan, an chhiatna chu hriattîr lâwkna awm lo, chawplehchilhin, rûkru angin a lo thleng ang.

A nih chuan, eng nge kan beisei theih? Nakin lawkah, “ki sâwm” leh thiltihtheihna nasa tak nei sakawlh chuan sakhaw dik lo chu a ti chhia ang a. Chu chu hrehawm nasa tak inṭanna a ni ang. Chu bâkah, engtik hunah emaw, hnamte chuan “muanna leh himna” chu an puang chhuak ang tih kan hre bawk. Chu chu engtikah nge a thlen ang? Thil ni thei pahnih kan sawiho tawh a. Ni thei pakhatna: Chu puan chhuahna chu sakhaw dik lo tih chhiat a nih hmain a thleng ang. Ni thei pahnihna: Chu puan chhuahna chu khawvêl sawrkâr thuneitute’n sakhaw dik lo an tih chhiat vek hnuah a thleng ang. Mahse, thilthlen dân tûr dik tak chu nakinah kan hre dâwn a ni. Bible hrilh lâwknate chu a thlen famkim mêk laiin, a nih loh leh a thlen famkim vek hnuah chauh hriatthiam a ni fo ṭhîn.—Johana 12:16 nên khaikhin rawh.

Chûng thilte a lo thlen hmaa, tûna kan ngaih pawimawh ber chu “muanna leh himna” puan chhuah hun tûr ni lovin, Pathian chunga rinawm tlat hi a ni a. Thil thlen dân tûr chu engtin pawh lo ni se, ṭha taka kan lo inbuatsaih lâwk theih nân, “harhvâng taka awmin i ngaihven reng zâwk ang u.”—1 Thes. 5:6.