Obadia Angin Pathian Ṭihna Nei Rawh

Obadia chu Israel ram puma Baal biakna chawilârtu leh rorêltu sual tak Lal Ahaba in chhûng enkawltu a ni a. Ani chuan a “tleirâwl tirh ata” Pathian Jehova ṭihna thûk tak a nei a. (1 Lal. 18:1-13) Mahse, Lalnu Jezebeli’n Jehova zâwlnei zawng zawng ti hlum tûra a mite thu a pêk khân, Obadia chuan chu ruahmanna suaksual tak chu dang tûrin huaisen taka hma a lâk a ngai tih a hria a ni. Zâwlnei pakhat chauh thuhrûk pawh thil hlauhawm tak a nih laiin, ani chuan zâwlnei mi 100 meuh thukruin, ṭâm nasa tak chhûngin anni chu ei tûr a pe a nih chu! Lalnu leh lalpa rawngbâwlsaktu zâwlnei der za têlte’n an hmuh chhuah loh nâna chutianga hma lâk a harsat dân tûr chu han mitthla teh.—1 Lal. 18:19.

He Pathian ṭih mi hnên aṭang hian eng nge kan zir theih? Ahaba a hlauhna aiin, Pathian a ṭihna chu a nasa zâwk a. Chu chuan a unaute vênghim tûra a nunna hial thâp ngam khawpin huaisenna a pe a ni. Keini pawh kan chênna hmunah biakna dik khap beh a nih chuan, Obadia angin Pathian ṭihna kan nei ve thei a. Pathian ṭihna chuan fiahna tâwk mêk kan unaute ṭanpui tûra hma la tûrin min ti chak dâwn a ni.