Fanaute Hi “LALPA Laka Kan Rochan” An Ni

“ROCHAN” tih thu mal i hriat hian i rilru-ah eng nge lo lang? Sum leh pai, kan thil neih te, a nih loh leh kan hmangaih tak chhûngkhatte min pêk ro hlu eng emaw a lo lang thei a. Eng ang thil pawh lo ni se, rochan chu thil hlu tak a ni a, ṭha taka enkawl i duh ngei ang.

Bible chuan fanaute chu “LALPA laka kan rochan an ni,” tiin a sawi a. (Sâm 127:3) Ni e, Kristian nu leh pate chuan an fate chu kan Pa vâna mi hnên aṭanga an dawn thilpêk hlu tak anga an thlîr avângin, an fate chu tisa lam, rilru lam leh, thlarau lamah him taka awm tûr leh ṭha taka ngaihsak ni tûrin theih tâwp chhuah an duh a ni.

Mahse, tûn laiah, nu leh pa ṭhenkhatin an fate chu Pathian hnên aṭanga an dawn ro hlu anga an thlîr lo chu a lungchhiatthlâk hle. (Is. 49:15; 2 Tim. 3:1-3) Nu leh pa dang lehte chuan an fate ṭha taka ngaihsak chu an duh tak meuh mai; mahse, harsatna hrang hrang avângin chutiang chuan an ti thei lo va. Nu leh pate tâna an fate ngaihsak ti harsatu chona ṭhenkhatte chu engte nge ni? Jehova’n nu leh pate lakah eng nge a beisei? Engtin nge Kristian nu leh pate chuan an fate an enkawlnaah an hlawhtlin theih ang?

CHONATE

• Khawtlâng leh chhûngkaw nêksâwrna. Khawvêl hmun ṭhenkhatah chuan fanau tam tak nei nu leh pate chu khawtlângah zah an kai lehzual a. Chuvângin, nupate chuan an enkawl theih loh khawpa tam fanaute nei tûrin an chhûngte emaw, an vêngte emaw hnên aṭanga nawrna an tâwk thei a ni.

• Hma lam hun atâna lungkhamna. Ei leh bâr harsatna te, natna te, leh hrisêlna lama inenkawlna ṭha awm lohnate avânga naupang tam tak an thihna ramahte chuan nupa ṭhenkhatte’n an fate zîngah dam khawchhuak an awm beiseiin fa tam tak an nei a. Nupa dang lehte chuan an upat huna enkawltu tûr an neih theih nân fa tam tak neih an thlang mai thei bawk a. Hei hi kum upate tâna sawrkâr ṭanpuina awm lohna ramahte chuan a dik lehzual a ni.

• Chhûngkaw ruahmanna. Hmun dang lehahte chuan nupa ṭhenkhatte chuan an mamawh ang tâwk indanna lei tûr an hmu lo va. Mi dangte chuan indannate chu nei thei mah se, a quality a ṭhat tâwk loh avângin, nghawng ṭha lo awm theite chu an hlau va. Mi dang lehte chuan chûng indannate chu a man a to êm avângin an lei thei lo thung.a

JEHOVA’N NU LEH PATE LAKAH ENG NGE A PHUT?

I fate mamawh chu phuhhrûksak rawh. Jehova’n nu leh pate chu an fate tisa lam mamawh phuhru tûrin mawhphurhna a pe a. Anni chu an fate ei leh bâr tûr te, silh leh fên te leh, awmna tûr hmunte inhuam taka phuhhrûksak tûrin a beisei a ni. Chu bâkah, Jehova chuan nu leh pate chu an fate zirtîr tûr pawhin a phût bawk a. Chuvângin, Kristian nu leh pate chuan an fate chu boarding school-ahte an dah mai tûr a ni lo. Chu aiin, zirtîrna ṭha leh mi mal ngaihsakna an dawn theih nân, an puitlin chhoh thlenga chênpui an duh ngei ang; chu chuan an fate chu him leh hmangaih nia inhriatna a neihtîr dâwn a ni. Chutih rualin, Jehova chu a âwm tâwk hre tak a ni a, nu leh pate chu hausa tûrin a beisei lo. Dik tak chuan, a hmangaih tak a Fapa enkawl seilian tûrin tisa lamah rethei mah se, mi taima tak nu leh pate a thlang a ni.—Mt. 13:55, 56; Lk. 2:24.

Bible thu bul: “Tu pawh a chhûngkhatte, a bîk takin a chênpui a chhûngte châwm lo chuan rinna a phatsan a ni, ring lotu aiin a sual zâwk.”—1 Tim. 5:8.

Jehova chuan nu leh pate’n an upat chhoh hunah ṭanpuina dawn an mamawh thei tih a hria a. Dik tak chuan, fate’n an nu leh pate an chawimawi theih dân kawng khat chu an nu leh pate upat huna anmahni ngaihsak tûra ruahmanna siam hi a ni. (Ex. 20:12; 1 Tim. 5:4) Chutih rualin, nu leh pate’n nakina ngaihsak an nih dân tûr aiin, anmahni’n an fate an ngaihsak theih dân tûr an dah pawimawh zâwk hian Jehova chu a lâwm a ni.—2 Kor. 12:14.

Thlarau lam mamawh phuhrûksak rawh. Jehova hmangaih tûr leh be tûra an fate zirtîr chu Kristian nu leh pate mawhphurhna a ni bawk. Jehova thlîr dân chuan chutianga zirtîrna pêk chu an fate an enkawl seilennaa pêng pawimawh tak a ni.—Deut. 6:6, 7.

Bible thu bul: “Jehova thununna leh zilhna ang zêlin [in fate chu] enkawl seilian zâwk ang che u.”—Eph. 6:4.

JEHOVA’N HLAWHTLING TURIN A DUH CHE

Ruahman lâwk rawh. Fate neih in tum a nih chuan, in dinhmunte chu ngun takin ngaihtuah ang che u. Entîr nân, fa tam tak in lo nei a nih chuan, anni chu ei leh bâr te, silh leh fên te leh, zirtîrna ṭhate in pe thei ang em? Thei dâwn lo a nih chuan, Jehova’n a beisei ang che ua in fate in enkawl theih nân in fa neih zât tûr chungchâng chu inrâwn ang che u. Ni e, Jehova chuan thil engkim hi ruahman lâwk theih vek a ni lo tih a hria a. (Thur. 9:11) Chutih rualin, nu leh pa hlawhtling tak ni tûra inthawh rimnate chu mal a sâwm dâwn a ni.

Bible thu bulte: “Mi taima ngaihtuahna chuan neihnunna lam chauh a pan a, mi thatchhia erawh chuan tlâkchhamna lam chuah a pan a ni.”—Thuf. 21:5.

“In zîngah tu pawhin in sâng sak tum ula, tuin nge a sak zawhna tûr khawp sum a neih leh neih loh ṭhua chhût hmasa lo vang che u?”—Lk. 14:28.

Chhûngkuaah Jehova dah pawimawh ber rawh. Pathian Jehova biakna chu in chhûngkuaah dah pawimawh ber ang che u. Fate in nei tawh a nih chuan, Jehova rawn hmangaih chho tûrin a mal tê têin zirtîr ṭheuh tum ang che u. Kohhran inkhâwmahte rilru pea inzir tûrin ṭanpui ula. Chawlhkâr tin Chhûngkuaa Pathian Biakna hun duan chu zui tum tlat bawk ang che u. In fate chu rawngbâwlnaah zirtîr bawk ula. Nu leh pa anga in mawhphurhnate chu in fa u zâwkte emaw, in chhûngkhat dangte emaw hnênah hlân suh u. Jehova hmangaih tûra fate enkawl seilian tûr chuan hun leh thate sên a ngai ngei mai; mahse, chu chu thawhrimna manhla tak a ni ang.

Bible thu bul: “Ka fate’n thutak kawng an zawh zêl tih ka hriatna aia lâwmna nasa zâwk ka nei lo.”—3 Joh. 4.b

Jehova rinchhan rawh. Fate neih in tum emaw, in lo nei tawh emaw a nih pawhin, Jehova tehnate chu tualchhûng hnam dânte leh chîn dânte aiin a pawimawh zâwk tih ring tlat ang che u.

Fa neih tlêm in tum a nih pawhin, Jehova chuan in upat hunah a ṭanpui ang che u tih in ring tlat thei a. Fate chu ‘upat huna min châwmtu tûr an ni,’ tih ngaih dân chu hnâwl ang che u. Thlahthlam in ni ang tih in hlauh a ngai lo. Jehova’n ngaihsak che u a tiam a, ani chuan a thutiamte chu a vawng reng ṭhîn.—Jos. 23:14.

Bible thu bulte: “I thinlung zawng zawngin LALPA ring la, nangma hriatnaah innghat suh; I kawng zawng zawngah amah hre reng la, i kawngte chu a kawhhmuh zêl ang che.”—Thuf. 3:5, 6.

“Naupang ka lo ni tawh a, tûnah tar ka lo ni ta a; nimahsela mi fel chu kalsana a awm ka hmu ngai lo va, a thlahte chaw khawn pawh ka hmu ngai hek lo.”—Sâm 37:25.

“Pathian Ram leh a felna chu zawng hmasa zêl ula; tichuan, chûng zawng zawng chu pêk belh in ni ang.”—Mt. 6:33.

Fanaute chu nu leh pate hnêna Jehova kawltîr thilpêk hlu tak an ni a. Kristian nu leh pate’n A duh dân anga an fate an enkawl tih a hmuh hian Jehova chu a va hlim dâwn tak êm! Anni chuan an fate tisa lam, rilru lam leh, thlarau lam mamawhte chu hmangaihna nei takin an phuhrûksak a; fa neih zât tûr an ruahman a; Pathian thil phûtte chu tualchhûng hnam dânte leh chîn dânte aiin an dah pawimawh zâwk a ni. Kristian nu leh pate chuan chutianga tiin, an fate chu ‘LALPA laka an rochan,’ thilpêk hlu tak an ni tih an lantîr a ni.