‘Ni hnuhnûng’ Tâwp Lamah Hian Pathian Duh Zâwng Tiin Buai Reng Rawh

1. Engin nge “ni hnuhnûngahte” kan awm tih min chiantîr?

KUM 1914 hnu lama piang i ni em? I nih chuan, i dam chhûng chu he khawvêl ‘ni hnuhnûng’ chhûng hian i hmang tihna a ni. (2 Tim. 3:1) Kan za hian he hun atâna Isua sawi lâwk thilthlengte chu kan hmu ṭheuh va. Chutah chuan indona te, ṭâm te, lîrnghîng te, hri te, sual punna te, leh Jehova mite tihduhdahnate a tel a ni. (Mt. 24:3, 7-9, 12; Lk. 21:10-12) Tirhkoh Paula hrilh lâwk nungchang ang pu mite pawh kan hmu a. (“Tûn Lai Mite Awm Dân” tih bâwm chu en rawh.) Jehova betute kan nih angin, “ni hnuhnûngahte” kan awm tih kan chiang a ni—Mik. 4:1.

2. Eng zawhnate nge kan chhân ang?

² Kum 1914 aṭanga hun tam tak a liam tawh avângin, ‘ni hnuhnûng’ tâwp lamah kan awm tawh ngei ang. Tâwpna a hnaih tawh êm avângin, hêng zawhna pawimawh tak chhânnate hi kan hriat a ngai a ni: ‘Ni hnuhnûng’ tâwpah eng thilte nge thleng ang? Chûng thilte lo thlen hun kan nghah lai hian Jehova’n eng ti tûrin nge min beisei? tihte hi.

‘NI HNUHNUNG’ TAWPAH CHUAN ENG THILTE NGE THLENG ANG?

3. Thessalonika thawn khat 5:1-3-a sawi lâwk angin, hnamte chuan eng nge an puanchhuah ang?

³ Thessalonika thawn khat 5:1-3 chhiar rawh. Paula chuan “Lalpa Nî” chungchâng a sawi a. He Bible chânga târ lan angin, chu nî chuan “Babulon Khaw Ropui,” khawvêl sakhaw dik lo lalram beih ṭan hun aṭanga Armageddon tâwp thleng a kâwk a ni. (Thup. 16:14, 16; 17:5) Chu “nî” a inṭan hma lawkin, hnamte chuan “Muanna leh himna” chu an puang ang (Ṭawng lehlin ṭhenkhat chuan: “Remna leh muanna,” tiin a sawi.) Khawvêl hruaitute’n hnamte inkâra inlaichînna tihnghehna chungchâng an sawi hian chutiang ṭawngkam chu hman châng an nei a.b Mahse, Bible-a târ lan “muanna leh himna” puanchhuahna chu a danglam bîk ang. Engvângin nge? Chumi a lo thlen hun chuan, mite chuan khawvêl rorêltute’n khawvêl chu hmun him zâwk leh râlmuang zâwkah an siam thei tawh niin an ngai mai thei a ni. Mahse, a nihna takah chuan “hrehawm nasa tak” a inṭan ang a, ‘chawp leh chilha boralnain’ a zui nghâl ang.—Mt. 24:21.

4. (a) “Muanna leh himna” puanchhuahna chungchânga kan la hriat lohte chu eng nge ni? (b) Chumi chungchângah eng nge kan hriat tawh?

⁴ “Muanna leh himna” puanchhuahna chungchângah thil ṭhenkhat kan hria a. Mahse, thil dang hriat lohte pawh kan nei a ni. Chutianga an puanchhuah chhan leh puanchhuah a nih dân tûr chu kan hre lo va. Chu bâkah, vawi khat chauh puanchhuah tûr nge ni a, vawi tam tak puanchhuah tûr tih pawh kan hre hek lo. Eng thil pawh lo thleng se, hei hi kan hria a ni: Khawvêla rorêltute’n muanna an thlen thei nia ngaiin, bumin kan awm tûr a ni lo, tih hi. Chu aiin, Bible-in chu puanchhuahna chu ngaihven tûrin min hrilh a. Chu chu “Lalpa Nî” inṭanna tûr chhinchhiahna a ni.

5. Thessalonika thawn khat 5:4-6-na chuan “Lalpa Nî” atâna inpeih tûrin engtin nge min ṭanpui?

⁵ Thessalonika thawn khat 5:4-6 chhiar rawh. Paula fuihna chuan “Lalpa Nî” atân kan inpeih tih kan chian theih dân min hrilh a. ‘Mi dangte angin kan muhîl’ tûr a ni lo. ‘Kan mengin,’ harhvâng takin kan awm tûr a ni. Entîr nân, khawvêl politics thila kan tualdâwihna tichhe thei thil hlauhawmte lakah kan harhvâng reng tûr a ni a. Kan inhnamhnawih a nih chuan “khawvêla mi” kan ni thei a ni. (Joh. 15:19) Pathian Ram chu khawvêla muanna thlen tûra kan beisei theih awmchhun a ni tih kan hria.

6. Mite chu eng ti tûrin nge ṭanpui kan duh a, engvângin nge?

⁶ Mahni ngei harhvâng taka kan awm bâkah, mite chu khawvêla thil lo thleng tûr chungchânga Bible hrilh lâwkte hre tûra ṭanpui chu kan duh bawk. Hrehawm nasa tak a inṭan tawh chuan, mite tân Jehova lam hawi nân a tlai lutuk tawh ang tih i hre reng ang u. Chuvângin, kan thu hrilh rawngbâwlna hi a hmanhmawhthlâk hle!c

THU HRILHNAAH BUAI RENG RAWH

7. Jehova’n tûnah eng ti tûrin nge min beisei?

⁷ A “nî” inṭan hma hun tlêm tê la awmah hian, Jehova chuan thu hrilh rawngbâwlnaa buai reng tûrin min beisei a. “Lalpa hna ṭhahnemngai taka thawk fovin” kan awm tih kan chiang tûr a ni. (1 Kor. 15:58) Isua chuan kan tih tûrte a sawi lâwk a. Ni hnuhnûnga thilthleng tûr mak danglam takte a sawi hnuah, heti hian a sawi belh a ni: “Chanchin Ṭha hi hnam zawng zawng hnêna hrilh hmasak tûr a ni,” tiin. (Mk. 13:4, 8, 10; Mt. 24:14) Han ngaihtuah teh: Rawngbâwla i chhuah apiang hian chu Bible hrilh lâwk thlen famkimnaah i tel ve tihna a nih chu!

8. Engtin nge Lalram thu hrilh rawngbâwlna chuan hma a sâwn chhoh zêl?

⁸ Lalram thu hrilh rawngbâwlna hmasâwnna chungchângah eng nge kan sawi theih? Kum tin hian, he hna hian hma a sâwn chho zêl a. Entîr nân, he ni hnuhnûng chhûnga khawvêl puma Lalram puang chhuaktute ṭhan chhoh dân hi han ngaihtuah teh. Kum 1914 khân, ram 43-ah thuchhuahtu mi 5,155 an awm a. Tûnah chuan, ram 240-ah thuchhuahtu mi maktaduai 8.5 vêl kan awm tawh! Chuti chung pawhin, kan rawngbâwlna chu a la zo chuang lo. Pathian Ram chu mihringte harsatna zawng zawng sukiang thei awmchhun a ni tih kan puang chhunzawm zêl tûr a ni.—Sâm 145:11-13.

9. Engvângin nge Lalram thuchah chu kan hrilh chhunzawm zêl ang?

⁹ Kan Lalram thu hrilh rawngbâwlna hi Jehova’n tâwk a tih hma chu thawh zawm zêl a ni ang. Mite’n Pathian Jehova leh Isua Krista an hriat theih nân engtia rei nge hun la awm? (Joh. 17:3) Chu chu kan hre lo. Hrehawm nasa tak inṭan hmain, “chatuana nun duhna rilru dik tak neite” chuan chanchin ṭha chu an la chhâng lêt thei reng a ni tih erawh kan hre chiang a ni. (Tirh. 13:48, New World Translation.) Engtin nge chûng mite chu a tlai lutuk hmaa kan ṭanpui theih ang?

10. Mite thutak zirtîr tûra Jehova min pêk ṭanpuina chu eng nge ni?

¹⁰ Jehova chuan a inawpna pâwl hmangin mite thutak zirtîr tûra kan mamawh zawng zawng chu min pe a. Entîr nân, chawlhkâr tina kan neih chawlhkâr chhûng inkhâwmahte zirtîrna kan dawng ṭhîn a ni. Chu inkhâwm chuan tlawh hmasak berna leh tlawhkîrna kan neih huna thusawi dân hre tûrin min ṭanpui a. Bible zirpuina kaihhruai dân pawh min zirtîr a. Jehova inawpna pâwl chuan kan Zirtîrna Hmanraw Bâwmah chuan hmanruate min buatsaihsak bawk a ni. Chûng hmanruate chuan . . .

• Inbiak ṭanna nei tûrin,

• Tuina chawk tho tûrin,

• Zir belh duhna nei tûra mite ṭanpui tûrin,

• Bible zirpuina hmanga thu tak zirtîr tûrin, leh

• Tuina neite chu kan website leh Kingdom Hall tlawh tûra sâwm tûrin min ṭanpui a ni.

Chûng hmanruate neih mai chu a tâwk lo va. Chûngte chu kan hmang tûr a ni.d Entîr nân, tuina nei tuemaw nêna tîtîna phûrawm tak kan neih hnuah, tract emaw, magazine emaw kan hnutchhiah a; tichuan, kan tlawh leh theih hmâ chu chûngte chu a lo chhiar zawm thei ang. Lalram thu hrilh rawngbâwlnaa thla tina buai reng chu mi mal tin mawhphurhna a ni.

11. Engvângin nge Online Bible Study Lessons chu buatsaih a nih?

¹¹ Mite’n thutak an zir theih nâna Jehova ṭanpuina pêng pakhat, jw.org^®-a Online Bible Study Lessons hi han ngaihtuah teh. (Sâpṭawnga hmuh theih a ni. BIBLE TEACHINGS > ONLINE LESSONS tih hnuaiah lût rawh.) Engvângin nge chûng zir tûrte chu buatsaih a nih? Thla tin hian, khawvêla mi sâng tam takte chuan Bible thute hriat nân Internet-ah an zawng a. Kan website-a târ lan chûng thute chuan mite chu Pathian Thu thutak a hmêlhriattîr thei a. I mi tawh ṭhenkhat chuan mi mala Bible zirpuina neih chu pawm an hreh pawh a ni mai thei. Chutiang a nih chuan, kan website-a he hmêlhmang hi hmuh la, a nih loh leh chûng thute târ lanna link chu thawn ang che.e

12. Miin Online Bible Study Lessons aṭangin eng nge a zir theih?

¹² Kan Online Bible Study Lessons-ah chuan hêng thute hi a tel a ni: “Bible leh A Ziaktu,” “Bible-a A Changtu Bîkte,” leh “Bible-a Beiseina Thuchah,” tihte hi. Chûng thute chuan hêngte hi a zirtîr a ni:

• Bible-in min ṭanpui theih dân

• Jehova, Isua, leh vântirhkohte nihna

• Pathianin mihringte a siam chhan

• Hrehawm tawrhna leh sual a awm chhan

Zir tûrte chuan, Jehova’n . . .

• hrehawm tawrhna leh thihna a tihtâwp dân tûr te,

• mitthite a kaihthawh dân tûr te, leh

• hlawhtlinna nei lo mihring sawrkârte chu Pathian Ramin a thlâk dân tûrte pawh a târ lang ang.

13. Online lessons chu Bible zirpuina ruahmanna thlâk nâna siam a ni em? Hrilhfiah rawh.

¹³ Online lessons chu Bible zirpui ruahmanna thlâk nâna siam a ni lo. Isua chuan zirtîr siamna chanvo hlu min pe a. Tuina neite chuan online lessons chu an zir ang a, an thu hriatte an hlut avângin zir belh zêl an duh ang tih kan beisei a ni. Chutiang a nih chuan, Bible zirpuina neih chu an duh ngei ang. Zirlai tâwp lam apiangah chhiartu chu Bible zirna dîl tûrin sâwm a ni. Kan website aṭangin khawvêl pumah chawhrualin, mi 230-te chuan ni tinin Bible zirna an dîl a! Chutianga mi mal taka Bible zirpuina neih chu a va pawimawh tak êm!

ZIRTIRTE SIAM TUM ZEL RAWH

14. Matthaia 28:19, 20-a chhinchhiah Isua kaihhruaina angin, theih tâwp chhuaha tih kan tum tlat chu eng nge ni a, engvângin nge?

¹⁴ Matthaia 28:19, 20 chhiar rawh. Bible zirpuina kan kaihhruai hian, “zirtîrahte siam ula, . . . thu ka pêk zawng zawng che u pawm tûrin zirtîr rawh u,” tih chu theih tâwp chhuaha zawm kan tum tûr a ni. Mite chu Jehova rawngbâwl leh a Lalram thlâwp a pawimawhzia hre thiam tûrin kan ṭanpui a ngai a. Chumi awmzia chu an thu zirte nunpui a, Jehova hnêna inpumpêk a, baptisma chang tûrin fuih kan tum tihna a ni. Chutiang a nih chauhvin, Jehova nîah chhandam an ni thei ang.—1 Pet. 3:21.

15. Eng atân nge hun kan neih loh va, engvângin nge?

¹⁵ A chunga kan sawi tâk angin, he khawvêl tâwp nân hun tlêm tê chauh a awm tawh a. Chuvângin, Krista zirtîr nih tum tak tak lote nêna Bible zirna neih zawm zêl nân hun kan nei lo. (1 Kor. 9:26) Kan rawngbâwlna chu a hmanhmawhthlâk hle! A tlai luat hmaa, Lalram thuchah hriattîr tûr mi tam tak an la awm a ni.

SAKHAW DIK LO LAKAH FIHLIM RAWH

16. Thu Puan 18:2, 4, 5, 8-a târ lan angin, kan zain eng nge kan tih ngai? (Foonote en rawh)

¹⁶ Thu Puan 18:2, 4, 5, 8 chhiar rawh. Hêng Bible chângte hian Jehova’n amah chibai bûktute laka a beisei thil dang pawh a târ lang a. Kristian dik zawng zawngte chu Babulon Khaw Ropui lakah an inthiar fihlîm tûr a ni. Bible zirlai chu thutak a hriat hmain sakhaw dik lo pâwla mi a ni mai thei a. Ani chu sakhaw thiltihahte telin, a inhmang pawh a ni thei. A nih loh leh, chutiang pâwl tân sum a thawh pawh a ni thei bawk. Bible zirlai chuan baptisma la chang lo thuchhuahtu a nih hmain, sakhaw dik lo nêna inzawmna a neih zawng zawng chu a titâwp tûr a ni. Chu bâkah, a lo awm tawh ṭhinna kohhran leh a lo zawm ṭhin Babulon Khaw Ropui nêna inzawmna nei pâwltef hnênah chuan bânna lehkha a theh lût bawk tûr a ni.

17. Kristian chuan eizawnna lamah eng hnate nge a pumpelh ang a, engvângin nge?

¹⁷ Kristian dik chuan eizawnna lama a hnathawh chu Babulon Khaw Ropui nên inzawmna a nei lo tih a tichiang tûr a ni. (2 Kor. 6:14-17) Entîr nân, ani chuan Kristianna ram biak inah hna a thawk lo vang. Chu bâkah, mi dang kut hnuaia hna thawk Kristian chuan sakhaw dik lo chawi lârna hmuna hun rei tak chhûng hnathawh chu a duh lo bawk ang. Ani chu mahnia hna nei a nih chuan, Babulon Khaw Ropui pêng engemaw tâna thawh tûr hnate chu a pawm lo vang. Engvângin nge chutianga kan din ngheh tlat? Pathian mithmuha thianghlim lo sakhaw pâwlte thiltihnaah leh an sualnaah tel ve kan duh loh vâng a ni.—Is. 52:11.g

18. Engtin nge unaupa pakhat chuan eizawnna hna a thawhnaah Bible thu bulte a vawn ngheh tlat?

¹⁸ Kum engemaw zât kal taah khân, mahnia hna nei kohhran upa pakhat chu a awmna khuaa biak in pakhatah hna thawk tûrin contractor pakhatin a sâwm a. Contractor chuan unaupa’n biak in-a hnathawh chu a hnâwl ziah tih a hria a. Mahse, tûn ṭumah chuan contractor chuan mi dang rawih tûr a hmu zo ngang lo va. Chuti chung pawhin, unaupa chuan Bible thu bulte vuan tlatin, chu hna chu a hnâwl a ni. A hnu chawlhkârah chuan, hnathawktu dang pakhatin chu biak in-a Kross a vuah lai chu tualchhûng chanchinbuah a lang a ni. Kan unaupa chu a rinnaah ding nghet lo se chuan, chanchinbuah a thlalâk chu a chuang ngei ang. Chu chuan a Kristian unaute zînga a hming a tihchhiat dân tûr chu han ngaihtuah teh! Jehova rilru nat dân tûr pawh ngaihtuah ang che.

ENG NGE KAN ZIR?

19-20. (a) Eng thute nge kan hriat tawh? (b) Engte nge kan la hriat belh ang?

¹⁹ Bible hrilh lâwk angin, nakin lawka khawvêla thilthleng langsâr tak lo awm tûr chu hnamte’n “muanna leh himna” tia an puanchhuahna a ni ang. Mahse, hnamte chuan muanna dik tak leh tluantling an thlen dâwn lo tih Jehova’n min hrilh avângin kan lâwm tak zet a ni. Chumi a lo thlen hma, leh chawp leh chilha boralnain a rawn zui hmain eng nge kan tih ang? Jehova chuan Lalram thuchah hrilhnaa buai reng tûr leh tam lehzuala zirtîrte siam tûrin min beisei a. Chutih rualin, sakhaw dik lo zawng zawng lakah kan inla hrang tûr a ni. Chutah chuan chûng sakhaw dik lote aṭanga kan inhnuhdawhna leh Babulon Khaw Ropui nêna inzawmna nei hnate kan hnâwlna pawh a tel bawk.

²⁰ He ‘ni hnuhnûng’ tâwp lamah hian thilthleng tûr dangte pawh a awm a. Jehova’n ti tûra min beisei thil dangte pawh a awm bawk. Chûngte chu eng nge ni a, kan hma lawka thil lo thleng tûr zawng zawngte atân engtin nge kan inbuatsaih theih? Chu chu a dawta thuziakah kan hmu ang.