Ring Lotu Kan Chhûngte Ṭanpui Theih Dân

1-2. Thutak kan hriat hmasak ber ṭum khân, chu chuan kan chhûngte chungah eng nghawng nge a neih mai theih?

ISUA chuan a hnungzuitu rawn ni duh mi pakhat hnênah heti hian a hrilh a: “I chhûngte hnênah va haw la, Jehova’n i chunga a thil tih zawng zawng leh i chunga khawngaihna a lantîr dân zawng zawng hi va hrilh rawh,” tiin. (Mk. 5:19) Chutiang chuan, Isua’n mihringte hian pianpui mize chi khat, kan hmangaihte hnêna chanchin lâwmawm hrilh châkna kan nei tih a târ lang a ni.

² Chanchin ṭha i hriat hmasak ber ṭuma i rilru awm dân kha i la hria em? Sawi chhuak lo thei lovin i awm ngei ang! Mahse, i hmangaih takte chuan ṭha takin an chhâng lêt lo pawh a ni thei a. A nih loh leh, an hnêna thutak i hrilh dân chuan in inkârah inhmuh thiam lohna a awmtîr a ni thei bawk. Chutiang a nih chuan, Kristian tehnate mila nun chu bânsan chuang lo va, i chhûngte nêna inlaichînna ṭha nei reng tûrin emaw, siam ṭha leh tûrin emaw eng nge i tih theih?

3. He thuziakah hian eng nge kan sawiho vang?

³ He thuziakah hian: (1) khawngaihnain ring lotu kan chhûngte’na an chhân lêt loh hun pawha an chunga mi mal ngaihsakna lantîr tûra min chêttîr dân; (2) thil tih leh ṭawngkam ngilnei lote piah lam hmuh thiam dân; (3) kan dawhtheihna leh beisei tlatnain thutak pawm tûra kan chhûngte a ṭanpui theih dân leh, (4) anni chu kan hmangaih tih kan lantîr theih dânte kan hria ang.

AN CHUNGAH KHAWNGAIHNA LANTIR RAWH

4. Engtin nge Isua’n a thuchah ken dawngsawng duh lotute chu a chhân lêt?

⁴ Isua chu a thuchah ken dawngsawng duh lotute chungah a beidawng nghâl mai lo va. Ani chuan rah chhuah thei lo theipui kûngin rah a chhuah theih nâna thawkrim tak grêp huan enkawltu nên a inkhaikhin a ni. (Lk. 13:6-9) Isua’n kha tehkhin thu a sawi khân, Juda mite’n a chungah rinna an neih theih nân anni chu kum thum aia tam a lo ṭanpui tawh a ni. Engvângin nge anni chu ṭanpui tuma hma a lâk zawm zêl? Isua chuan mite chu a khawngaih a, chu chuan an chungah dawhtheihna lantîr tûrin a chêttîr a ni.

5. Isua chu a chipui Juda mite chunga khawngaihna lantîr tûrin engin nge chêttîr?

⁵ Isua chuan a chipui Juda mite chu sakhaw hruaitute’n Pathiana rinna nei tûra an ṭanpui loh avângin a khawngaih êm êm a. “Vêngtu nei lo berâm ang” an ni tih a hmu a ni. (Mk. 6:34) A thih hma lawk khân, Jerusalema chêng a tam zâwkte’n rinna an tlâkchham avângin an nun an chân dâwn tih pawh a hria a, a ṭap hial a ni. (Lk. 19:41-44) Keini pawh kan chhûngte chungah chutiang khawngaihna kan lantîr ve a nih chuan, anmahni ṭanpui tûra chhêttîrin kan awm ang.

6. Engvângin nge ring lotu kan chhûngte chunga dawhtheihna kan lantîr ang? (Galatia 6:9)

⁶ Galatia 6:9 chhiar rawh. Kan chhûngte’n kan thurin an la ngaihven rih lo a nih pawhin, an chungah dawhtheihna lantîrin, “thil ṭha tih” kan bânsan tûr a ni lo. Miin ngaih dân nghet tak a lo neih tawh thlâk tûr leh Jehova chunga rinna nei chho tûr chuan hun a duh tih kan hria a. Nang pawh, tûn hmain, “khawvêlah hian beiseina nei lo leh Pathian tel lovin” i lo awm tawh ngai em? (Eph. 2:12) I awm tawh ngai a nih chuan, tu emaw ṭanpuina i dawng tih a chiang reng mai. Nang pawhin, a theih phawt chuan, i chhûngte thlarau lam mamawh phuhrûksak chu i duh a ni lâwm ni?

THIL TIH LEH ṬAWNGKAM NGILNEI LO PIAH LAM HMUH THIAM DAN

7. Isua unaute’n a hnung an zui duh loh chhan chu eng nge ni thei?

⁷ Isua unaute chuan Galili rama a thil mak tihte chu an hriat ngei a rinawm a. (Lk. 4:14, 22-24) Mahse, a tîrin, ani chu an ring lo. (Joh. 7:5) Engvângin nge? Bible chuan a chhan sawi lan a nei lo. Mahse, Juda ṭhenkhatte’n Isua hnung zui an hreh chhan a lo berah pahnih a târ lang a ni. Ṭhenkhat chuan khawtlâng mite hnâwl an hlau va. (Joh. 9:18-22) Mi dangte chuan Isua chu a naupan têt aṭanga an hriat avângin, Pathian aiawhtu a nih an ring thei lo a ni. (Mk. 6:1-4) Isua unaute ngei pawhin chutiang ngaih dânte chu an nei mai thei a. Chutiang thilte chuan kan hmangaih takte chungah pawh nghawng a nei thei ang em?

8. Ring lotu kan chhûngkhatte’n ngilnei lo taka min biak emaw, kan chunga thil an tih emaw chhan chu eng nge ni thei?

⁸ An thusawi leh thil tihte phêna anmahni chêttîrtu chu ngaihtuah rawh. Isua “a â a nih chu le,” tia sawitu a chhûngkhatte zîngah chuan a unaute pawh an tel a rinawm a. (Mk. 3:21) Engvânga chutianga thu tâwp siam nge an nih theih? Bible chuan Isua chu chaw pawh ei hman lo khawpin thu hrilh rawngbâwlnaah a buai hle tih a târ lang a. (Mk. 3:20) A chhûngkhatte chuan ani chu sakhaw âtchilh mi niin an ngai em? Chu chu thil ni thei a ni. Keini pawh kan chhûngkhatte’n sakhuana la urhsûn lutuk angin min ngai thei a. Chutianga min ngai a nih chuan, a âwm tâwk hre mi kan nihzia thil tiha kan lantîr a ngai dâwn a ni.

9. Kan chunga kan chhûngkhatte rilru put hmang thlâk danglam tûrin anni chu engin nge ṭanpui mai thei? (1 Petera 3:1, 2) (Milem en bawk rawh.)

⁹ Nungchang ṭha lantîr zawm zêl rawh. Kan ṭawngkam ngilnei tak leh thil tihte chuan kan chunga kan chhûngte rilru put hmang chu a thlâk danglam thei a. (1 Petera 3:1, 2 chhiar rawh.) Ring lotu pasal chu a nupuiin kohhran inkhâwmah leh rawngbâwlnaah a kal chhuahsan fo a nih chuan, a pasal chuan mal nia inhriatna emaw, lungnih lohna emaw a nei thei a ni. Chutianga a awm loh nân, nupui chuan a pasal chu hun tam lehzual hmanpui thei tûrin a thlarau lam hun duante a siamrem a ngai thei a. Entîr nân, a pasal a buai hun leh, ina a awm loh hunte chu chângin rawngbâwlnaah a tel thei a ni. Insiamrem thei tak leh a âwm tâwk hre tak nihna hmangin, Kristian nupui chuan a pasal chu Thuhretute a thlîr dân thlâk danglam tûrin a ṭanpui mai thei a ni.

10. Sawisêl kan nih hunah, engtin nge Isua kan entawn theih?

¹⁰ Sawisêlna zawng zawng chu chhân lêt vek a ṭûl niin ngai suh. Chaw leh uain heh tia sawichhiat a nih khân, Isua chu a thinrim lo va. Chu aiin, mite chu thu dik ngaihven tlat tûrin a fuih zâwk a ni. (Mt. 11:19) Chu bâkah, hringnun thlîr dân inbûk tâwk tak a nei tih a nun kawng chuan a târ lang bawk. (Johana 2:2, 6-10 nên khaikhin rawh.) Chutiang bawkin, sawisêlna i tawh zawng zawngte chu chhân lêt vek a ṭûl niin ngai suh. Chu aiin, i chhûngkhatte chu thlîr dân inbûk tâwk tak leh nun hlimawm tak i neihzia i thil tihin lantîr la, anni chu mahniin thu tâwp siamtîr ang che. Kan chungchânga an thu hriatte chu a dik lo tih an rawn pawm ṭan pawh a ni thei a ni.

DAWHTHEIHNA LEH BEISEINA NEI RENG RAWH

11. Engtin nge Isua’n a chunga rinna nei lo a pianpui unaute chu a cheibâwl?

¹¹ Chanchin Ṭha ziakte chuan Isua’n a unaute chungah dawhtheihna a lantîr reng tih a târ lang a. Entîr nân, Kana khuaa Isua’n thil mak a tih hmasak ber ṭum khân anni pawh an awm ve tih a chiang a. (Joh. 2:11, 12) Chu bâkah, târ lan tawh angin, a pianpui unaute chuan a chungah rinna an nei lo a ni. Mahse, Isua’n anni chu a thlahthlam chuang lo. Kana khuaa thil mak a tih hmasak ber aṭanga kum thum a liam hnuah pawh, Isua’n a unaute chu ngilnei takin a la be reng tih Bible chuan a târ lang a ni.—Joh. 7:5-8.

12. Kan chhûngkhat zînga ṭhenkhatte’n rilru thlâk hun an la nei ang tih beiseina nei tlat tûrin engin nge min ṭanpui thei?

¹² Jehova’n zahngaihna nasa tak a nei tih kan hriatna chuan beiseina nei reng tûrin min ṭanpui thei a. Sakhaw dik lo zawng zawng tih tâwp a nih hunah, kan chhûngkhatte chuan chumi chungchâng chu an hnênah kan hrilh tawh tih an hre chhuak mai thei a ni.b (Thup. 17:16) Anni chuan hrehawm nasa tak hnuah kan rualin biakna dikah min rawn zawm hial pawh a ni thei! Kan chhûngkhatte’n harsatnate an tâwk mêk a nih chuan, theih tâwp chhuaha ṭanpui chu kan duh tak meuh va. An chungah hmangaihna leh ngilneihna dik tak kan lantîr tih an hmuh chuan, Bible thutakte pawm duhna an rawn nei ṭan pawh a ni thei a ni.

ANNI CHU I HMANGAIH TIH LANTIR RAWH

13. Jehova rawngbâwlnaah buai hle mah ila, eng nge kan fîmkhur ngai?

¹³ Jehova rawngbâwlnaah buai hle mah ila, kan chhûngte chu an tân hun kan pe thei lo emaw, anni chu kan mamawh tawh lo emaw nia inhriatna neihtîr chu kan duh ngai lo vang. (Mt. 7:12) Engtin nge anni chu kan hmangaih tih kan lantîr theih ang? Kan lantîr theih dân kawng ṭhenkhat hi han ngaihtuah teh.

14-15. Ring lotu kan chhûngte kan hmangaih tih kan lantîr theih dân kawng khat chu eng nge ni? Entîrna pe rawh.

¹⁴ Anni chu be pawh rengin, i hmangaih thu hrilh rawh. Kan dinhmunte hrilh hriat rengna hmangin kan chhûngte chu kan hmangaihzia kan lantîr thei a. Entîr nân, anni chu message-te kan thawn hunah, chawlh kan lâk lai, khual kan zin lai leh, ṭhiante nêna hun kan hmanho lai thlalâkte chu kan thawn thei a. Thilpêk mâwlmang tak, a nih loh leh, ṭawngkam ngilnei takte hmanga ziah lehkha thawnte chuan inlaichînna ti hmasâwn tûrin min ṭanpui thei bawk. Chutianga hma lain kan hmangaih tih kan hrilh thei a ni.

¹⁵ Armenia rama unaunu Anna-i thiltawn hi han ngaihtuah teh. An chhûngkuain piancham lawm nî leh holiday-ahte inhmu khâwmin hun an hmangho ṭhîn a. Anna-i’n thutak a pawm chuan, a chhûngte chuan a rinnain an inlaichînnaah nghawng a neih dân tûr chu ngaihtuahin thlaphânna an nei ṭan a. Thuhretu ni tûra a thu tlûkna siamin a hma lam hun a nghawng dân tûr pawh an hlauhthâwnpui bawk. Engtin nge Anna-i’n an hlauhthâwnnate chu a tih kiamsak? Ani chuan, “Ka chhûngte ka va tlawh hian ka nuna thilthlengte leh nî tina ka thil tihte ka hrilh ṭhîn a. Anni chu min rawn tlawh tûrin ka sâwm a, ka ṭhiante nên ka hmêlhriattîr bawk. Ka ṭhian kawmte an hriat chian tâk hnu chuan, ka chhûngte a tam zâwk chu an thla a muang ta sawt a ni,” tiin a sawi a. Chu bâkah: “Ka hlimzia mit ngeia an hmuh avângin, min ngaihtuah tawh loh thu an sawi a ni,” tiin a sawi belh bawk.

16. Engtin nge Isua’n a pianpui unau Jakoba chungah mi mal ngaihsakna a lantîr? (Footnote en bawk rawh.)

¹⁶ An nuna thilthlengte chu i ngaihven tih lantîr rawh. A thawhleh hnu khân, Isua chuan a unau Jakoba chu mi mal taka va hmuin, a ngaihsakzia a lantîr a. (1 Kor. 15:7) A chungah Isua a beidawng mai lo tih a hriat huna Jakoba awm dân tûr chu i mitthla thei em? Chu an inhmuh lehna chuan Isua chu Messia a ni tih a rinnghehtîr ngei ang. Chutianga an inhmuh hnuah, Jakoba chuan a chhûngkhat dangte chu Isua nihna chungchânga thutak hre tûra a ṭanpui ngei a rinawm bawk.c—Tirh. 1:14.

17. Engtin nge Rom 12:15-a kan hmuh thu bul hi kan nunpui theih? (Milem en bawk rawh.)

¹⁷ Rom 12:15 chhiar rawh. Kan hmangaihte chu an dinhmun a ṭhat hun leh a ṭhat loh hunah pawh tiamin, min mamawh ber huna ngaihsakna kan lantîr a nih chuan, chu chuan kan chunga an rilru put hmang chu a thlâk danglamtîr thei a ni.d Entîr nân, nau an neih hunahte kan lawmpui tak zetzia hrilhin thilpêkte kan pe thei a. Thihnaa hmangaih takte an chân hunah pawh, va thlamuanin leh a ṭûl anga ṭanpuina pein, card-te pawh kan ziahsak thei a ni. Ni e, inbiak pawhna ṭha kan nei reng tûr a ni a; a bîk takin, hun khirh takte an hmachhawn hunah ngaihsakna kan lantîr lehzual tûr a ni.

18. Engtin nge zirtîr Andria chu kan entawn theih?

¹⁸ Anni chu i Kristian unaute hmêlhriattîr rawh. Zirtîr Andria’n Isua chu Messia a ni tih a hriat chuan a unaupa Petera chu Isua hnênah hruaiin phûr takin a hmêlhriattîr a. (Joh. 1:40-42) Chutiang chuan kan ti ve thei ang em? Entîr nân, kan chhûngkhat tu emaw chu kohhran inkhâwmah, a nih loh leh ṭhiante nêna chaw kan ei khâwmnaahte a chângin kan sâwm thei ang em? Kan Kristian unaute kan hmêlhriattîr a nih chuan, Thuhretute chu mi pângngai ve mai an ni tih leh mi ṭha an ni tih an hmu ang.

19. Kan chhûngkhatte’n kan thurin ṭhenkhat an hre thiam vek lo a nih pawhin, engtin nge anni chu kan cheibâwl ang? (1 Petera 3:15)

¹⁹ Petera thawn khat 3:15 chhiar rawh. Kan chhûngte chuan thil ṭhenkhat kan tih loh chhante chu an hre thiam vek lo thei a; mahse, an chunga kan lantîr ngilneihna leh zahna erawh an hre reng ang. Ṭum danga hun kan pêk theih lohte aiah, hun hmanho theihna hun remchâng dangte siama kan hmalâknate chu an ngaihhlut ngei a rinawm bawk. Entîr nân, Bible thu bul nêna inmil lo kût nîte leh hnam dânah te kan telpui thei lo va; mahse, ṭum dangah anni chu tlawhin, chawte eipuiin, thilpêkte kan pe thei a ni.

I CHHUNGTE CHUNGAH BEIDAWNG NGAI SUH

20. Engvângin nge Jakoba entawn tûr siamin min tih chak?

²⁰ Jakoba chuan Isua chu a rawngbâwlnaa thawhpui theihna hun remchâng hloh mah se, a hnuah Isua zirtîr a rawn ni a. (Gal. 1:18, 19; 2:9) Ani chu zirtîr hmasate zîngah tel lo mah se, Isua zirtîrnate chu thinlung takin a pawm a. Entîr nân, Kristiante hnêna a lehkhathawn pakhatah chuan Tlâng Chunga Thusawia Isua zirtîrnate nêna inang fuihna thute a ziak a ni.e

21. Engvângin nge ring lotu kan chhûngte chungah kan beidawn mai loh vang?

²¹ Theih tâwp kan chhuah chung pawhin, ring lotu kan chhûngte chuan thutak an ngaihven lo emaw, mi mal taka ngaihsakna kan lantîrte chu an ngaihlu lo emaw thei a. Engvângin nge an chungah kan beidawn mai loh vang? A chhan chu an chunga ngilneihna kan lantîr apiangin zahngaihnaa khat Pathian Jehova leh Isua kan entawn tihna a ni. (Lk. 6:33, 36) Hunte a liam zêl rualin, kan nungchang ṭha chuan kan chunga an rilru put hmang chu a thlâk danglamtîr thei a. Tûn hmaa kan hrilh kan thurinte chu an hre chhuak pawh a ni thei a ni. An chungah kan beidawng lo a nih chuan, kan hmangaih tak kan chhûngte zînga ṭhenkhatte’n biakna dika min rawn zawm hunte a awm a nih chuan, chumi avângin hlimna kan nei thei ang!