Engtin Nge Tlanna Chu I Chhân Lêt Ang?

1-2. Isua tlanna inthawinain eng ti tûrin nge min chêttîr ang a, engvângin nge? (2 Korinth 5:14, 15) (Milem en bawk rawh.)

BUILDING chim ata chhan chhuah tawh i nih chuan, i nun chhan himtu chungah bâ nei nia inhriatna i nei a ni lâwm ni? Mi dangte pawh nangmah anga chhan chhuah ni ve mah se, chhan chhuah i nihna chu a hlutzia i hriat avângin, mi mal taka i lâwmzia lantîr chu i duh ngei ang.

² Thuziak hmasaa târ lan tawh angin, sual bâwih ata mahniin kan inchhan chhuak thei lo va. Mahse, Isua tlanna inthawina chuan (1) kan thil sual tihte ngaihdamna, (2) ṭha famkim tûra beiseina leh, (3) Pathian nêna inremna min neihtîr a ni. Chuvângin, Jehova khawvêl thara chatuana nun beiseina kan nei a ni. Ni e, tlanna chuan mite chunga Isua hmangaihna—mihring ṭha famkim nia a rawn pian hma aṭang daih tawha a neih hmangaihna—chu a târ lang a. (Thuf. 8:30, 31) Tirhkoh Paula chuan “Krista hmangaihna chuan min tîr lui si a,” tiin a ziak a. (2 Korinth 5:14, 15 chhiar rawh.) Chumi awmzia chu Isua hmangaihna chuan tlanna inthawina chu kan ngaihlu reng a ni tih kawng eng emaw taka lantîr tûrin min chêttîr tûr a ni tihna a ni.

3. Engvângin nge mi tinte’n tlanna an chhân lêt dân chu a inan loh mai theih?

³ Hmangaihna nei taka buatsaih tlanna chuan eng kawngin nge a chêttîr ang che? I chhânna chu mi dangte chhânna nên a inang kher lo vang. Entîr nân, hei hi han mitthla teh: mi pathum chu an rawn chhuah ṭanna hmun inang lo mah se, tum ram inang panin khual an zin a. An kawng zawhte chu a inang lo ṭheuh a ni. Chutiang bawkin, i tum ram, a nih loh leh thil tum—tlanna chunga i lâwmzia lantîr tûra i hma lâk dân “kawng”—chu tûna Jehova nêna in inlaichînaah a innghat a. Chu chu hre rengin, he thuziakah hian hêng mi chi thum: (1) Bible zirlai te, (2) baptisma chang tawh Kristian te leh, (3) berâm huang aṭanga tawlh bo te’n chutianga hma an lâk theih dân kawngte chu kan sawiho vang.

BIBLE ZIRLAITE

4. Eng kawngin nge Bible zirlaite chu Jehova’n a hriat?

⁴ Bible zir mêk i nih chuan, hei hi han ngaihtuah teh: Chanchin ṭha i pawmna chuan Jehova’n amah nêna inlaichînna nei tûra a hîpte zînga mi i ni tih a târ lang tih hi. (Joh. 6:44; Tirh. 13:48) “Thinlung erawh chu Lalpan a fiah ṭhîn.” Chumi awmzia chu a chanchin zir tûra theih tâwp i chhuahna te leh, a tehnate mila nung tûra inthlâk danglamna siama, hma i sâwn dânte chu a hmuin a hlim tihna a ni a. (Thuf. 17:3; 27:11) Tlanna avângin Jehova nên in ṭhian ṭhatna hnai tak i rawn nei thei ta a ni. (Rom 5:10, 11) Chu chu theihnghilh ngai suh ang che.

5. Engtin nge Bible zirlaite chuan Philippi 3:16-a thurâwn pêk chu an zawm theih?

⁵ Bible zirlai i nih angin, engtin nge tlanna chunga i lâwmzia i lantîr theih? Lantîr theih dân kawng khat chu: “Hma kan sâwn tawh chin aṭang hian hma i sâwn chhunzawm zêl ang u,” tia Philipi khuaa mite hnêna tirhkoh Paula thurâwn pêk zawmna hmangin a ni. (Phil. 3:16) Chu thurâwn pêk nêna inmilin, nunna kawng zawha i hmasâwnna chu eng thil mah indâltîr phal ngai suh ang che.—Mt. 7:14; Lk. 9:62.

6. Bible zirlaite’n inthlâk danglamna siam harsa an tih chuan eng nge an tih theih? (Deuteronomy 30:11-14) (Milem en bawk rawh.)

⁶ Tûn hnaia i hriat Bible zirtîrna eng emaw ber pawm harsa tih i neih chuan engtin nge ni ang? Chu zirtîrna chungchângah zir bingna nei la, hre thiam lehzual tûrin Jehova hnênah ṭanpuina dîlin ṭawngṭai ang che. (Sâm 86:11) Hriatthiam harsa i la ti cheu a nih chuan, chu chu tûnah dah ṭha rih la; Bible zirna erawh tâwpsan chuang suh ang che. A nih leh, Bible-in a dem chîn dân eng emaw bânsan harsa i tih chuan engtin nge ni ang? Jehova’n ṭha famkim lo mihringte hnênah an tih theih ngai loh tûr a phût lo tih hre reng ang che. A tehnate milin i nung thei a ni. (Deuteronomy 30:11-14 chhiar rawh.) Chu bâkah, Jehova’n ṭanpui che a tiam bawk a. (Is. 41:10, 13; 1 Kor. 10:13) Chuvângin, beidawng suh ang che. Tûna i hmachhawn mêk harsatnate ni lovin, tlanna ruahmanna pawh tiamin, Jehova’n a buatsaihsak zawng zawngte i ngaihhlutna chu ngaihtuah tlat zâwk ang che. Jehova i hmangaihna a pun zêl rualin, “a thupêkte chu zawm harsa lutuk a ni lo,” tih i hria ang.—1 Joh. 5:3.a

7. Thutaka seilian ṭhalaite’n eng nge an chhût ngun theih?

⁷ Thutaka seilian nangni ṭhalaite chungchâng hi eng nge ni ve? Nangni pawh Bible zirlaite in ni a. Dik tak chuan, in nu leh pate tâna Bible zirlai pawimawh berte in ni. Bible chuan: “Pathian hnaih rawh u; tichuan, ani’n a hnaih ang che u,” tiin a sawi a. (Jak. 4:8; 1 Chro. 28:9) Jehova hnaih tûra hma i lâk ṭan khân, ani pawhin a hnaih che a ni. Jehova chuan pâwl pakhata tel ve ang lekin a thlîr lo che a. Ani chuan thutaka seilian mi mal tinte pawh tiamin, mi mal tinte chu a lamah a hîp a ni. A nih leh, Jehova’n amah nêna mi mal taka inṭhian ṭhatna i neih theih nân eng nge a tihsak che? I ngaihhlut reng tûr tlanna hi a ni. (Rom 5:1, 2) Chuvângin, kumina neih tûr Hriatrengna Inkhâwma i tel hmain, engvângin nge Isua thihnain i tâna awmzia a neih chu i chhût ngun loh vang? Chu chuan Jehova’n a Fapa hmanga a pêk tlanna chunga i lâwmzia lantîr nâna, thlarau lam thiltum i insiam eng pawh chu hlen tûra hma la tûrin chêttîr che rawh se.b

BAPTISMA CHANG TAWH KRISTIANTE

8. Engtin nge baptisma chang tawh Kristiante’n tlanna an rinzia an lantîr tawh?

⁸ Baptisma chang tawh Kristian i nih chuan tlanna i rinzia kawng tam takin i lantîr tawh a. Entîr nân, Jehova hnaih tûr leh a tehnate mila insiamrem tûrin hma i la tawh a. I thurinte mi dangte hnêna hrilhna hmangin mite zirtîra siam tûra Isua thupêk chu i zâwm tawh bawk. Jehova hnêna inpumpêkin, baptisma i chang tawh bawk a ni. Biakna dik atâna i din tlat avângin dodâlnate i tâwk tawh em? (2 Tim. 3:12) Rinawm taka chhelna i lantîrna chuan Jehova i hmangaihzia leh a Fapa kal tlanga a buatsaih tlanna chunga i lâwmzia a târ lang a ni.—Heb. 12:2, 3.

9. Baptisma chang tawh Kristiante’n eng nge an fîmkhur a ngaih?

⁹ Baptisma chang tawh Kristiante kan nih angin, kan fîmkhur a ngaihna thil pakhat a awm a. Hunte a liam zêl hian, tlanna chunga kan lâwmna chu a kiam thei a ni. Chu chu engtin nge a thlen theih? Kum zabi khatnaa Ephesi khuaa Kristiante chungchâng hi han ngaihtuah teh. Chhelna an lantîr avângin tho leh Isua chuan anni chu a fak a. Mahse, an hnênah: “A tîra i neih hmangaihna kha i hloh tâk avângin ka dem che,” tiin a hrilh a. (Thup. 2:3, 4) Heta Isua thusawiin a târ lan angin, Kristian tu emaw biakna chu zawi zawiin chîn dân pângngai maiah a chang thei a. Ani chu a ṭawngṭaiin, kohhran inkhâwmahte kalin, rawngbâwlnaahte tel mah se, tih dân pângngai mai zuia chutianga ti a ni thei a. Hmangaihna chêttîr avânga ti a ni tawh lo a ni. A nih leh, Jehova i hmangaihna chu tûn hma anga a chak tawh lo nia i hriat chuan eng nge i tih theih?

10. Engtin nge Pathian i biak dânte “chhût ngun” a, chûng thilahte i ‘inhman zawh’ theih? (1 Timothea 4:13, 15)

¹⁰ Tirhkoh Paula chuan Timothea chu Pathian a biak dânte “chhût ngun” a, chûng thilahte “inhmang zo” tûrin a fuih a. (1 Timothea 4:13, 15 chhiar rawh.) Chu fuihna nêna inmilin, ‘thlarau thianghlima ṭhahnem i ngaih’ reng theih nân, Pathian i biakna chu awmze nei zâwk i nihtîr theih dân kawngte ngaihtuah ang che. (Rom 12:11) Entîr nân, ṭha lehzuala inbuatsaihna hmangin kohhran inkhâwmahte i rilru i pe lehzual thei a. A nih loh leh, i thu zirte ṭha taka i chhût ngun theih nân, hun fianrialte insiamin, mi mal inzirna chu i hlâwkpui lehzual thei a ni. Mei alh zawm zêl tûra thing i tuah belh ṭhîn ang hian, tlanna pawh tiamin, i tâna Jehova buatsaih zawng zawngte chunga i lâwmna ti thar leh tûrin chûng rawtnate chu i nunpui thei a ni. Chu bâkah, engvângin nge Hriatrengna Inkhâwm neih hma chawlhkârte chu Jehova malsâwmna kan dawn zawng zawngte chhût ngun nâna i hman loh vang? Chu chuan Jehova nêna in inlaichînna ṭanchhan ber tlanna chunga i lâwmna a ti pung ang tih chu rinhlelh rual a ni lo.

11-12. Hun rei lote chhûng ṭhahnemngaihna i hloh a nih chuan, chu chu Pathian thlarau i hloh ta tihna a ni em? Hrilhfiah rawh. (Milem en bawk rawh.)

¹¹ Biakna dik atâna i duh anga ṭhahnemngai lo nia i inhria a nih chuan, beidawng mai lo la; Pathian thlarau thianghlim i hloh ta niin inngai hek suh. Tirhkoh Paula’n Korinth khuaa mite hnêna a rawngbâwlna chungchâng a ziah hi hre reng ang che: “Ka duh thu ni lova thawk ka nih pawhin, chu chu ka thawh tûra Lalpa’n mi kawltîr a la ni tho tho,” tiin a ziak a ni. (1 Kor. 9:17) A sawi tum chu eng nge ni?

¹² Paula pawhin, thu hrilh châkna neih loh chângte a nei a. Chutianga peih loh chângte nei mah se, thu hrilh zawm zêl erawh a tum tlat a ni. Nang pawh, chutiang chuan i tum tlat thei a ni. Tih châkna i nei lo a nih pawhin, thil ṭha tih tum tlat la. “Thil tih châkna leh thiltihtheihna” nei tûrin ṭawngṭai ang che. (Phil. 2:13) I thlarau lam hun duante chu zui tlat bawk ang che. I thil tihte chuan zawi zawia i rilru rawn thununin, thinlunga Pathian i hmangaihna chu a rawn ti thar leh ang tih ring nghet tlat bawk ang che.

13. Engtin nge “rinnaah” kan awm tih kan chian theih ang?

¹³ Korinth thawn hnih 13:5-naa he fuihna: “Rinnaah in awm nge awm lo inbih chiang ṭhîn ula,” tih thu nêna inmilin, a chânga mahni kan inenfiah a ngai a. A khât tâwkin, heti hian kan inzâwt thei a ni: ‘Ka nunah Lalram ka dah hmasa ber em?’ (Mt. 6:33) ‘Intih hlimna chungchânga ka duh thlanna siamte chuan sual ka hua tih a târ lang em?’ (Sâm 97:10) ‘Kristian unaute zîngah remna leh inpumkhatna ka awmtîr em?’ tiin. (Eph. 4:2, 3) Jehova min buatsaihsak tlanna chungchâng a bîk taka kan chhût ngun theih hun, he Hriatrengna hun chhûng hian mahni inenfiah tûr leh mahni tân ni lo va, Krista tân kan nung tih inchian theihna hun remchâng kan nei a ni.c

BERAM HUANG AṬANGA TAWLH BOTE

14. Kristian ṭhenkhatte berâm huang aṭanga an tawlh bo chhan chu eng nge ni thei?

¹⁴ Kristian ṭhenkhat chuan kum, a nih loh leh thla eng emaw zât rinawm taka rawng an bâwl hnuah, kohhran an bêl tawh lo a ni. Engvângin nge? Ṭhenkhat chu “nuna lungkhamnate’n” a ti chau va. (Lk. 21:34) Mi dangte chu an Kristian unaute thusawi leh thil tih avângin an tlûk phah a. (Jak. 3:2) Mi dang lehte chuan sual lian tak tiin, ṭanpuina dîl an hreh a ni. A chhan chu eng pawh ni se, berâm huang aṭanga i tawlh bo a nih chuan, eng nge i tih theih? Hmangaihna nei taka buatsaih tlannain eng ti tûrin nge a chêttîr theih che?

15. Engtin nge Jehova’n berâm huang aṭanga tawlh bo berâmte a ngaihsak tih a târ lan? (Ezekiela 34:11, 12, 16)

¹⁵ Berâm huang aṭanga tawlh bote chungchânga Jehova thlîr dân hi han ngaihtuah teh. Anni chu a hnâwl lo va. Chu aiin, chûng berâm bote chu a zawng zâwk a ni. Anni chu a châwmin, a hnêna lo kîr leh tûrin a ṭanpui a. (Ezekiela 34:11, 12, 16 chhiar rawh.) Jehova’n i tân pawh chutiang chuan a ti thei ang em? Ti thei e! He thuziak i ngaihtuahna ringawt pawh hian i thinlungin felna a ngaina tih a târ lang a ni. Jehova’n i thinlung a hmu a, thutak pawm tûra a hîp che ang bawk khân, tûnah hian lo kîr leh tûrin a hîp che a ni thei ang em?

16. Berâm huang aṭanga tawlh bo berâmte’n Jehova hnêna kîr leh tûrin eng ṭanpuinate nge an hmuh theih? (Milem en bawk rawh.)

¹⁶ Jehova Hnênah Kîr Leh Ang Che tih brochure-ah he thu thlamuanthlâk takte hi a chuang a: “Jehova hnêna i kîr leh chuan, ani’n a ṭanpui ang che tih ring tlat rawh. Lungkhamna hmachhawn tûr te, lungnih lohna tiveng tûr te, chhia leh ṭha hriatna thiang aṭanga neih theih rilru leh thinlunga thlamuanna hmu tûr tein a ṭanpui ang che. Tichuan, i unaute ruala Jehova rawngbâwl leh châkna i lo nei ang,” tih hi. Kohhran upate’n ṭanpui che an duh tih pawh hi hre reng ang che. Anni chu i tân “thlipui laka bîkna hmun ang leh thlihrâng laka inhumhimna ang” an ni thei a ni. (Is. 32:2) Tlanna i ngaihhlut avângin, ‘Jehova hnêna kîr leh tûrin eng nge ka tih theih?’ tiin inzâwt bawk ang che. (Is. 1:18; 1 Pet. 2:25) Entîr nân, Kingdom Hall-a inkhâwmahte i tel thei ang em? Kohhran upate zînga pakhat va panin, hun eng emaw ti chhûng Bible zirna neih pawh tiamin, thlarau lam ṭanpuina i dîl thei ang em? Jehova’n a Fapa tlanna chunga i lâwmzia lantîr nâna ṭawngṭaia i hma lâknate chu mal a sâwm ang tih i ring nghet tlat thei a ni.

ENGTIN NGE I CHHAN LET ANG?

17-18. Engtin nge kumina neih tûr Hriatrengna Inkhâwm hma chawlhkârte chu ṭha taka kan hman theih?

¹⁷ Isua chuan “tu pawh amaha rinna lantîrtu apiang an boral loh va, chatuana nunna an neih zâwk nân” tlanna chu pêk a ni tih a sawi a. (Joh. 3:16) Tlanna chu sual leh thihna sawhkhâwkte laka min chhuah zalên tûra Jehova ruahmanna a ni. Chumi chunga kan lâwmna chu kan hloh ngai tûr a ni lo. (Rom 3:23, 24; 2 Kor. 6:1) Hriatrengna Inkhâwm neih hma nîahte chuan Jehova leh Isua lantîr hmangaihna chhût ngun theihna hun remchâng kan nei a; chu hmangaihna chuan kan lâwmzia lantîr tûrin min chêttîr tûr a ni.

¹⁸ Engtin nge tlanna avânga i lâwmzia i lantîr ang? I chhânna chu mi dangte chhânna nên a inang lo mai thei. Mahse, “mahni tâna nung tawh lo va, an thih aia thia tho leh atâna nung,’ betu dik mi maktaduai tam takte ruala i hma lâknate chu Jehova’n mal a sâwm ang tih i chiang thei a ni.—2 Kor. 5:15.