Tlanna Kan Mamawh Chhan

1-2. Eng aṭangin nge chhan chhuah kan ngaih a, engvângin nge? (Rom 7:22-24) (Milem en bawk rawh.)

HEI hi han mitthla teh. Pa pakhat chu in chimah a tâng a. La dam mah se, chu in chim aṭang chuan amahin a tâl chhuak thei lo a ni. Ṭanpuina dîl a, tu emawin a rawn chhan chhuak ang tih beisei mai loh chu thil dang eng mah tih theih a nei lo.

² Kan zavai hian chutiang dinhmunah chuan kan awm a ni. Eng kawngin nge? Adama chu Siamtu Pathian laka a hel khân, mi sual a lo ni a. A thlahte kan nih vek avângin, keini pawh mi sual kan ni. Chuvângin, mi zawng zawngin sual kan rochung a, a sawhkhâwkte aṭangin kan tâl chhuak thei lo a ni. Tirhkoh Paula chuan Rom khuaa mite hnêna a lehkha thawnah, chu kan dinhmun chu chiang takin a târ lang a. (Rom 7:22-24 chhiar rawh.) ‘He thihnaa min hruai mêktu taksa lak aṭanga’ chhan chhuah ni tûrin a ngên a. Paula chu thihna thlentu sual bâwihah a tâng a ni. (Rom 6:23) Keini pawh chu dinhmun khirh takah chuan kan awm a. Chhan chhuah kan va ngai tak êm!

3. Eng kawngtein nge tlannain min chhan chhuah theih?

³ Paula chuan sual chungchâng chauh a târ lang lo va. “He thihnaa min hruai mêktu taksa lak aṭang hian tuin nge min chhan chhuak ang?” tia zawhna a siam hnuah, amah vêkin heti hian phûr takin a chhâng a ni: “Kan Lalpa Isua Krista hmanga min chhan chhuah avângin Pathian hnênah lâwmthu ka sawi e!” tiin. (Rom 7:25) Hetah hian Paula chuan Isua tlanna inthawina chungchâng a sawi a ni.a Chu tlanna chuan (1) kan sualte ngaihdamna, (2) kan rochun sual ata damna leh, (3) min Siamtu nêna inremna min neihtîrin min chhandam thei a ni. Hêng thute kan sawiho hunah, “beiseina petu Pathian” Jehova kan hmangaihna chu a pung lehzual ang a. (Rom 15:13) “Tlanna avânga zalenna kan neihna,” Isua chunga kan lâwmna pawh a pung bawk ang.—Kol. 1:14.

TLANNA AVANGA NGAIHDAMNA

4-5. Engvângin nge kan zavai hian tlanna kan mamawh? (Thuhriltu 7:20)

⁴ Kan sualte ngaihdam a nih theih nân tlanna kan mamawh a. Ṭha famkim lo mihringte hian ṭawngkam leh thil tihtein thil kan ti sual ṭheuh va. (Thuhriltu 7:20 chhiar rawh.) Sual ṭhenkhat chu a dangte aiin a nasa a ni. Entîr nân, uirêna leh tual thahna ang chi thil sual titute chu Mosia Dân hnuaiah chuan tih hlum theih an ni a. (Lev. 20:10; Num. 35:30, 31) Ni e, sual tam tak chu chutiang khawpa nasa ni lo mah se, sual a ni tho a ni. Entîr nân, Sâm ziaktu Davida chuan: “Ka lei hian thil ka tihsual lohna tûrin, ka awm dânte hi ka vêng ṭha ang,” tiin a sawi. (Sâm 39:1) Ni e, ṭawngkama thil kan tih sual châng pawh a awm thei a ni.—Jak. 3:2.

⁵ Tûn hmaa i thusawite leh i thil tihte kha han ngaihtuah lêt teh. Sût lêt leh theih ni se i tih thute i sawi tawh em? Inchhîrna neihtîrtu che thil sual tih i nei tawh em? Chûng zawhna pahnih chu ‘aw’ tiin i chhâng ngei ang. Bible chuan: “‘Sual kan nei lo,’ kan tih chuan mahni kan inbum a, thutak keimahniah a awm lo tihna a ni,” tiin a sawi. —1 Joh. 1:8.

6-7. Engin nge Jehova chu kan sualte ngaihdamna tûr chhan pe? (Milem en bawk rawh.)

⁶ Tlanna avângin Jehova’n kan sualte a ngaidam a. (Eph. 1:7) Jehova’n chutianga kan sualte a ngaihdam hian, kan thil sual tih chu a ngaizam mai tihna erawh a ni lo. Sual chu a haw tak zet a. (Is. 59:2) A rorêl dikna avângin kan sualte ngaidam tûr chuan chhan eng emaw a awm a ngai a ni.

⁷ Mosia Dân chuan Israel mite chu an sualte ngaihdam a nih theih nân rana inthawina a phût a. (Lev. 4:27-31; 17:11) Chûng inthawinate chuan Isua inthawina ropui zâwk leh chumiin a thlen tûr malsâwmnate chu a lo entîr lâwk a. A inthawina chuan Jehova chu kan sualte ngaihdamna tûr chhan a pe dâwn a ni. A hnua Paula chuan Korinth khuaa Kristiante hnêna a lehkha thawna a târ lan angin, Isua tlanna inthawina hlutzia chu a hre thiam a. Tûn hmaa an thil chîn dân ṭha lote a sawi lan hnuah, heti hian a sawi a: “Kan Lalpa Isua Krista hmingah leh kan Pathian thlarauvah chuan tlenfai in ni tawh a; tih thianghlim in ni tawh a; mi fela puan in ni tawh e,” tiin.—1 Kor. 6:9-11.

8. Kumina neih tûr Hriatrengna Inkhâwm atâna i inbuatsaih hunah eng nge i ngaihtuah theih?

⁸ Kumina neih tûr Hriatrengna Inkhâwm atâna i inbuatsaih hunah, Jehova ngaihdamnain i tâna awmzia a neih dân chu ngun takin ngaihtuah ang che. Entîr nân, tlanna avângin, inchhîrna i lantîr tawh hnu chuan tûn hmaa i thil lo tih sual tawhte avânga inthiam lohna i neih a ngai tawh lo. Chu chu pawm harsa i tih chuan engtin nge ni ang? ‘Jehova’n min ngaidam thei tih chu ka hria; mahse, mahni ka inngaidam thei lo,’ tiin i inngaihtuah pawh a ni thei a. Chutianga i awm a nih chuan, hei hi hria ang che: Ngaidamtu tûr chu Jehova a ni a, a Fapa chu kan chunga rorêltu tûrin thuneihna a pe tawh bawk. Jehova’n a zahngaihna dawngtu tûr leh dawng lotu tûr chungchânga thu tlûkna siam tûrin nang pawh tiamin, tu mah mawhphurhna min pe lo. Bible chuan: “[Jehova] chu ênga a awm anga ênga kan kal chuan . . . a Fapa Isua thisen chuan kan sual zawng zawng min tlen faisak ṭhîn,” tiin a sawi. (1 Joh. 1:6, 7) He thu hi Bible zirtîrna dang ang bawkin kan ring nghet tlat thei a ni. Tlanna chuan Jehova chu kan chunga zahngaihna lantîrna tûr chhan a pe a, a Thu Bible chuan ani chu ‘ngaihdam a peih,’ tih min hrilh a ni.—Sâm 86:5.

TLANNA CHUAN DAMNA MIN PE

9. ‘Sual’ tih thu malah hian thil tih sualte bâkah, eng dangte nge tel? (Sâm 51:5)

⁹ Bible-a “sual,” tih thu mal hian thil tih mai ni lovin, kan pian tirh aṭanga kan rochun ṭhat famkim lohna dinhmun pawh a kâwk tel bawk a ni. (Sâm 51:5 chhiar rawh.) Chu dinhmun chuan thil sual tih châkna min neihtîr mai ni lovin, natna, tarna leh, thihna min thlentu taksa chak lohnate min neihtîr bawk a. Chu chu thil sual la ti ngai hauh lo nausênte an dam lova an thih theih chhan a ni. Mi ṭha leh mi sualte hrehawm tuara an thih chhan a ni bawk. Chutiang chuan, Adama thlah ṭha famkim lo mi zawng zawngin sual kan rochun vek a ni.

10. Engtin nge Evi leh Adama chu an rochun sualin a nghawng?

¹⁰ Chu sual dinhmunin nupa tuak hmasa ber chunga nghawng a neih dân chu han ngaihtuah teh. Chhûng lama inthiam lohna nasa tak a neihtîr a ni. Evi leh Adama te an hel hnu khân, ‘an thinlunga dân inziak’ Pathian dân an bawhchhiat avângin, a sawhkhâwkte chu an tuar nghâl a. (Rom 2:15) Anmahniah thil fel lo eng emaw a awm tih an hre thei a ni. An taksa pêng ṭhenkhat chu thup ngai niin an hria a, dân bawhchhetu angin, Siamtu lakah an biru a ni. (Gen. 3:7, 8) Evi leh Adama chuan an la neih ngai loh mahni inthiam lohna te, lungkhamna te, insitna te, rilru natna te leh, zahnate an rawn nei ṭan a. Chûngte chuan an thih thlengin eng emaw chen chu an nun a ti hrehawm ngei ang.—Gen. 3:16-19.

11. Kan ṭhat famkim lohnain kan chungah eng nghawng nge a neih?

¹¹ Ṭhat famkim lohnain nupa tuak hmasate chunga nghawng a neih ang bawkin kan chungah pawh nghawng a nei a. Chuvângin, tisa lam leh rilru lamah hrehawm tawrh chângte kan nei ṭhîn a. Kan dinhmun tih hmasâwn tumin theih tâwp chhuah eng ang mah ila, mahnia kan chinfel theih loh buainate chu a awm reng tho dâwn a ni. Engvângin nge? Bible chuan kan zavai hian “thil eng mah lo mai mai hnuaiah” kan awm tia a sawi vâng a ni. (Rom 8:20) Hei hi mi mal tin chungah mai ni lovin, mi zawng zawng chungah pawh a thleng dik a ni. Entîr nân, chhehvêl boruak siam ṭha tûr te, dân bawhchhiatna leh retheihna nuai bo tûr te leh, hnamte inkâra remna awmtîr tûrtea mihringte hma lâkna hi han ngaihtuah teh. Hmasâwnna tlêm azâwngte chu awm mah se, an thawhrimnate chu eng mah lo mai a ni. A nih leh, engtin nge tlannain kan ṭhat famkim lohna dinhmun ata min chhan chhuah theih ang?

12. Tlanna avângin eng beiseina nge kan neih?

¹² Tlanna avângin, “thil siamte ngei pawh chu chhiatna bâwih aṭanga chhuah zalenin an awm ang,” tih beiseina kan nei a. (Rom 8:21) Pathian khawvêl tharah tlanna avânga malsâwmna a kima kan dawn hunah chuan, tisa lam leh rilru lamah hrehawmna kan tuar tawh lo vang a; mahni inthiam lohna te, lungkhamna te, insitna te, rilru natna te leh, zahnate pawhin min ti buai tawh hek lo vang. Chu bâkah, leilung siam ṭhaa remna chên tûra kan hma lâknate chu a thlâwn tawh lo vang a, min tlantu “Remna Lal” Isua Krista rorêlna hnuaiah chuan kan hlawhtling tawh zâwk ang.—Is. 9:6, 7.

13. Kumina neih tûr Hriatrengna Inkhâwma tel tûra i inbuatsaih hunah eng dangte nge i ngaihtuah theih?

¹³ Ṭhat famkim lohna ata chhuah zalennain i tâna awmzia a neih dân chu han ngaithtuah teh. Tûk tin dam taka tho harh a, nangmah leh i hmangaihte ril ṭâm leh nâa an awm emaw, an thih emaw hlauh ngai tawh lova nî tin hun i hman dân tûr chu i mitthla thei a. ‘Chu beiseina chu . . . rinawm leh nghet tak a ni a,’ chu chu ‘nghet taka kan vawn a, . . . kan nunna atân thîrchakaia kan nei’ a nih chuan tûnah ngei pawh thlamuanna eng emaw chen kan nei thei a ni. (Heb. 6:18, 19) Thîrchakaiin lawng a chelh nghet tlat angin, i beiseina chuan i rinna a ti nghetin, tûna i hmachhawn mêk fiahnate chhel taka tuar chhuak thei tûrin a ṭanpui ang che. Dik tak chuan, Jehova chu “ṭhahnemngai taka amah zawngtute hnêna lâwmman petu a ni,” tih i ring nghet tlat thei a ni. (Heb. 11:6) Tûna kan neih mêk thlamuanna leh hma lam hun beiseina hi tlanna avâng chauhva nei thei kan ni.

TLANNAIN INREMNA A SIAM

14. Engtin nge sualin Siamtu nêna kan inlaichînna chunga nghawng a neih a, engvângin nge?

¹⁴ Evi leh Adamate’n thil sual an tih aṭang khân, mihringte chu Pathian laka ṭhen hranin kan awm a. Bible pawhin chutiang chiah chuan a sawi a ni. (Rom 8:7, 8; Kol. 1:21) Engvângin nge? A chhan chu Jehova tehna ṭha famkim chuan sual chu a ngaizam liam mai thei lo a ni. Bible chuan Jehova chungchângah: “Nang, thil sual hmu thei lo khawpa mit thianghlima, inhnehchhiahna en thei lo,” tiin a sawi. (Hab. 1:13) Chuvângin, sual chuan Pathian leh mihringte inkâra inzawmna chu a ti chhia a ni. Chu inzawmna chhe ta chu siam ṭhat leh a nih loh chuan, Jehova nêna inlaichînna neih emaw, amah nêna inremna neih emaw chu thil theih a ni lo. Mahse, tlanna avângin chu inremna chu kan nei leh thei a ni.

15. Engtin nge tlanna chuan mihringte chu Jehova nêna inlaichînna ṭha nei leh tûra a ṭanpui?

¹⁵ Bible chuan Isua chu “kan sualte atâna inthawina a ni,” tiin a sawi a. (1 Joh. 2:2) A nih leh, engtin nge Isua inthawina chuan mihringte chu Jehova nêna inlaichînna ṭha nei leh tûra a ṭanpui? Isua thihna chuan kan Pathian ṭha famkim chu mihringte nêna inlaichînna ṭha nei leh tûrin ṭanchhan fel tak a pe a. (Rom 3:23-26) Chuvângin, Pathianin Krista thih hmaa rinawm taka a rawng lo bâwltute pawh mi fel angin a thlîr thei a ni. (Gen. 15:1, 6.) Engtin nge? Tlanna ṭanchhanin a ni a. Jehova chuan a Fapa Isua’n chu tlanna chu a pe ngei dâwn tih a chiang a. (Is. 46:10) Chuvângin, tlanna chuan mihringte tân Pathian nêna inrem leh theihna kawng a hawng a ni.

16. Kumina neih tûr Hriatrengna Inkhâwm atâna inbuatsaihna i neih hunah eng thil dangte nge i ngaihtuah theih? (Milem en bawk rawh.)

¹⁶ Pathian nêna inremna neihnain i tâna awmzia a neih chu han ngaihtuah teh. Entîr nân, Isua min hrilh angin, Jehova chu “Pa” tiin i ko thei a. (Mt. 6:9) “Ṭhian” tih pawhin i ko thei bawk. Chutianga “Pa” a nih loh leh “Ṭhian” tih ṭawngkamte kan hman hunah, zahna leh inngaihtlâwmna neia kan hman a ngai a ni. Engvângin nge? Ṭha famkim lo kan nih avângin, Jehova kan hnaih theihna chu kan phû rêng vâng a ni lo. Tlanna avâng chauhva Jehova nêna inlaichînna nei thei kan ni a. ‘Nghaisakna bana Krista thisen chhuak hmanga thil dang zawng zawng amah nêna inremtîr leh’ tûra hma latu chu Jehova a ni. (Kol. 1:19, 20) Chuvângin, ṭha famkim lo kan ni chung pawhin, tûnah ngei pawh Jehova nên inlaichînna kan nei thei a ni.

TLANNAIN JEHOVA ZAHNGAIHNA A LANTIR

17. Engtin nge tlannain Jehova zahngaihna a târ lan? (Ephesi 2:4, 5)

¹⁷ Tlanna chuan Jehova chu “zahngaihnain a khat,” tih a târ lang a. Ani chuan, “kan bawhchhiatnate avânga thi kan nih lai pawh khân, . . . min ti nung” a ni. (Ephesi 2:4, 5 chhiar rawh.) ‘Chatuan nunna petu thutak pawm duhna neite’ chuan sual bâwihah an tâng tih leh chhan chhuah an ngai tih an inhriat avângin, ṭanpuina an dîl a. (Tirh. 13:48) Jehova chuan amah leh a Fapa Isua hriatna an rawn neih theih nân, Lalram thuchah hmangin ṭanpui an dîlnate chu a chhâng a ni. (Joh. 17:3) Setana’n Evi leh Adama te bawhchhiatna avângin Pathianin a thiltum chu a ti hlawhtling thei tawh dâwn lo nia a ngai a nih chuan, a ti sual hle ngei ang.

18. Tlanna chungchâng kan chhût ngun rualin, eng thubuai nge kan hriat reng ngai?

¹⁸ Tlanna kan hlâwkpui theih dânte kan chhût ngun rualin, thubuai lian zâwk kan hriat reng a ngai a. Tlanna chu kan hlâwkpui tûr atân chauh anga thlîr lovin, chu chu Jehova’n Eden huana Setana tih chhuah chona chhân lêtna atân a hmang tih kan hre reng tûr a ni. (Gen. 3:1-5, 15) Tlanna hmangin, Pathian Jehova chuan sawichhiatna zawng zawng lak ata a hming a ti thianghlim a. Hmangaihna Pathian a nihzia lantîrin, sual leh thihna ata pawh min chhan chhuak bawk. Ṭha famkim lo ni mah ila, a khawngaihna nasa tak avângin, Setana chona chhân lêt theihna hun remchâng min pe a ni. (Thuf. 27:11) Engtin nge tlanna avânga i lâwmzia i lantîr theih? Chu zawhna chhânna chu a dawta thuziakah kan sawiho vang.