Khawngaihna Nei Takin Thutak Sawi Rawh

1. Jehova chhûngkaw zînga tel tûr chuan eng nge kan tih ngai?

JEHOVA betu kan unaute nêna kan inhmuh hmasak ber ṭuma kan inzawh ṭhin zawhna pakhat chu, “Engtin nge thutak i hmuh?” tih hi a ni a. Ṭhenkhat chuan “thutaka seilian ka ni,” tiin an chhâng a. Mi dangte chuan tûn hnai maia “thutak an hmuh” thu an sawi mai thei bawk. Bible thutakin kan nun pum pui a thunun avânga chutianga sawi chu kan ni. Engvânga chutianga kan nun pum inthununtîr nge kan nih? Thutak kan ngainat a, kan nunpui chauhvin, Jehova chhûngkaw zîngah kan tel thei tih kan hriat vâng a ni a. Chutah chuan kan thusawi leh thil tih kawng eng kima rinawm a tel a ni.—Sâm 15:1-3.

2. (a) Mite’n Isua chu engtin nge an ngaih? (b) Isua zirtîr thutakin mite chungah eng nghawng nge a neih?

² Isua chuan eng lai pawhin thutak a sawi a. A thusawi chu mite’n an duh dâwn lo tih a hriat hunah pawh dik takin a sawi ṭhîn tih a hmêlmate ngei pawhin an pawm a ni. (Mt. 22:16) A zirtîr thutakin mite chunga nghawng a neih dân tûr chungchângah, Isua chuan: “Mi a pa dotîr tûr te, fanu a nu dotîr tûr te leh, mo a pasala nu dotîr tûrtea lo kal ka ni,” tiin a sawi a. (Mt. 10:35) A hnungzuite nêna an hrilh thuchah mite’n a chhe zâwnga an chhân lêt chu duh lo mah se, chu chu a pumpelh thei lo tih a hria a. (Mt. 23:37) A thuchah ken chuan mite chu Bible thutak ngainatute leh ngaina lotute angin pâwl hnihah a ṭhen hrang dâwn tih a hria a ni.—2 Thes. 2:9-11.

3. He thuziakah hian eng nge kan sawiho vang?

³ Isua angin, keini pawhin, mite’n kan thusawi an pawm duh loh hunah pawh thutak sawi chu kan tum tlat a. Mi ṭhenkhat chu kan thusawi avânga an lungni lo a nih pawhin, Bible thutak chu kan hrilhin, kan zirtîr tho a ni. Mahse, chu chu thutak kan sawi dân leh sawi hun tûr chungchângah remhriatna kan hman a ngai lo tihna a ni em? Ni lo ve! He thuziakah hian: Khawiah nge thutak kan hmuh theih? tih zawhna hi kan ngaihtuah hmasa ang a. Chumi hnuah: Engvângin nge, engtin nge, eng hunah nge thutak kan sawi ang? tih zawhnate pawh kan ngaihtuahho bawk ang. Chûng zawhnate chhânna chuan khawngaihna nei taka—fingthiam tak leh a hun taka—thutak sawina kawnga hmasâwn tûrin min ṭanpui dâwn a ni.

KHAWIAH NGE THUTAK KAN HMUH THEIH?

4. Engvângin nge Jehova chu thutak lo chhuahna Bul tia kan sawi theih?

⁴ Jehova chu thutak lo chhuahna Bul a ni a. A thusawi eng pawh chu thutak a ni. Entîr nân, thil dik leh dik lo chungchânga a sawite chu a rinchhan tlâk a. (Sâm 19:9; 119:142, 151) Hma lam hun chungchâng a sawite pawh a thleng dik ziah ṭhîn. (Is. 55:10, 11) Ani chuan a thutiam a bawhchhe ngai lo va. (Num. 23:19) Dik tak chuan, dâwt sawi chu Jehova tân thil theih a ni lo! (Heb. 6:18) Chuvângin, ani chu “thutak Pathian,” tia hriat a ni rêng a ni.—Sâm 31:5.

5. Engvângin nge “thutak Pathian” chu zawn hmuh a harsat loh? Hrilhfiah rawh. (Tirhkohte 17:27)

⁵ Mi ṭhenkhatte sawi chu eng pawh ni se, “thutak Pathian” Jehova zawn hmuh chu thil harsa a ni lo. Pathian a awm tih finfiahna chu thil siamahte a lang a. (Rom 1:20) Atheni khuaa Grik mi fingte hnêna thu a sawi khân, tirhkoh Paula chuan Pathianin amah ‘zawng hmu’ tûrin min duh a, “ani chuan min hlat lo ṭheuh,” tih a sawi. (Tirhkohte 17:27 chhiar rawh.) Dik tak chuan, Jehova’n thutak zawngtu mi inngaitlâwmte chu a lamah a hîp a ni.—Joh. 6:44.

6. Bible-a chuang thutak ṭhenkhat chu engte nge ni a, engvângin nge chûng thutakte hriat chu i ngaihhlut?

⁶ Jehova kan zawn hmuh theih dân kawng khat chu Bible zirna hmangin a ni a. Bible ziaktute chuan Pathian thlarau thianglim thâwk khumin an ziak a. (2 Pet. 1:20, 21) Chuvângin, Bible thute chu thutak niin, a rinchhan tlâk a ni. Entîr nân, lei leh vân chungchâng leh nun lo inṭan dân chungchânga Bible sawite chu kan ring tlat thei a. (Gen. 1:1, 26) Kan zaa thil sual kan tih chhan leh hrehawm tawrhna leh thihna a awm chhan chungchânga a sawite pawh kan ring thei a ni. (Rom 5:12; 6:23) Jehova’n “dâwt pa” Setana avânga chhiatna awm zawng zawngte a Fapa hmanga a sût lêt leh vek tûr thu a sawite pawh kan ring pumhlûm thei bawk. (Joh. 8:44; Rom 16:20) Chu bâkah, Isua’n mi suaksualte a ti boral ang a, mitthite a kai tho vang a, leilung hi a din ṭha leh ang a; tichuan, mihringte chu ṭha famkim ni tûrin min ṭanpui ang tih Bible thutiamte chu kan rinchhan thei bawk a ni. (Joh. 11:25, 26; 1 Joh. 3:8) Jehova chuan thutak min zirtîr a, mi dangte hnêna zirtîr chhâwn theihna chanvo hlu pawh min pe bawk a. Chu chu a hnên aṭanga kan dawn chanvo ropui a va ni êm!—Mt. 28:19, 20.

THUTAK KAN SAWI CHHAN

7-8. Thutak sawi tûra min chêttîrtu chu a pawimawh em? Entîrna pe rawh. (Marka 3:11, 12) (Milem en bawk rawh.)

⁷ Kan târ lan tawh angin, Jehova chhûngkaw zînga tel kan duh chuan thu dik kan sawi tûr a ni a. Mahse, amah ti lâwm tûr chuan thu dik sawi mai aia tam kan tih a ngai a ni. Thutak kan sawi chhan chu Jehova tân a pawimawh a. Isua leia rawng a bâwl laia thilthleng kha han ngaihtuah teh. (Marka 3:11, 12 chhiar rawh.) Galili Tuipui kianga Isua’n thu a hrilh khân, mipui tam takin an rawn pan a. An zîngah chuan Isua hmaa tlu a, “Pathian Fapa i ni,” tia au chhuak, ramhuai mante pawh an tel a ni. Engvângin nge chûng ramhuaite chuan Isua chungchânga thu dik an sawi? An thiltum chu an thusawi ngaithlatute rin hlawh nih an duh avâng leh, Jehova rawngbâwl bânsantîr an duh vâng a ni thei a. Chûng ramhuaite chuan a tîrin thu dik sawi ve mah se, anmahni chêttîrtu erawh mahni hmasialna a ni. Isua an bum thei lo va, an ti lâwm thei hek lo. Dik tak chuan, Isua’n chûng ramhuaite chu a chungchâng sawi lo tûrin thu a pe a ni.

⁸ He thilthleng aṭang hian eng nge kan zir theih? Thutak sawi tûra min chêttîrtu chu Jehova tân a pawimawh hle a. Thutak zirtîr tûra min chêttîrtu chu a thianghlim a, chawimawina chu keimahni ni lo va, Jehova hnêna kan pêk chu a va pawimawh tak êm!—Matthaia 5:16; Tirhkohte 14:12-15 nên khaikhin rawh.

9. Eng tih nge kan pumpelh ang a, engvângin nge?

⁹ Mahni inchawimawi kan pumpelh a ngaihna dinhmun dang leh hi han ngaihtuah teh. Mawhphurhna nei unau tu emawina thurûk ṭhenkhat min hrilh chu, mi dangte hnêna hrilh chhâwng leh angah han inmitthla teh. Anni chuan kan thu hrilhte chu a dik tih a hnuah an hriat chuan, kan thu hriatte avângin min ngaisâng pawh a ni thei a, chu bâkah, thurûk tam tak hria angah min ngai pawh a ni thei. Chu chuan mite mithmuha mi pawimawh angin min lantîr thei mah se, Pathianin min thlîr dân erawh a danglam lo. (Thuf. 11:13) Engvângin nge? Thurûk kan sawi chhuah mai bâkah, thu dik sawi chhuak tûra min chêttîrtu pawh a dik loh vâng a ni.

THUTAK SAWI DAN TUR

10. “Khawngaihna tel” ṭawngkam tih awmzia chu engtin nge i hrilhfiah ang? (Kolossa 4:6)

¹⁰ Kolossa 4:6 chhiar rawh. Tirhkoh Paula chuan Kolossa khuaa Kristiante hnênah an thusawite chu “khawngaihna tel ni reng” tûrin a hrilh a. Chumi awmzia chu eng nge ni? A tîra ziak he ṭawngkam hian kan thusawite chu mi dangte tâna hlâwkna thlentu mai ni lo vin, ngilnei tak leh ngaihthlâk nuam tak a ni bawk tûr a ni tih a târ lang.

11-12. Engvângin nge thutak chu fîmkhur taka kan zirtîr ang? Entîrna pe rawh. (Milem en bawk rawh.)

¹¹ Mi dangte thutak kan zirtîr hunah khawngaihna nei taka thusawi tûra Paula fuihna chu kan nunpui a ngai a. Bible chuan thutak chu nunna leh thlarau phel hrang thei khandaih hriam nên a khaikhin a. Thu danga sawi chuan, kan chhûng rila kan nihna dik tak leh min chêttîrtute chu a hai lang thei a ni. (Heb. 4:12) Mahse, Bible chu thiam taka kan hman loh chuan, ṭûl lo takin mite kan ti thinrimin, inhnial buaina kan chawk chhuak thei a ni. Engtin nge chutiang chu a thlen theih?

¹² Hei hi han mitthla teh. Tih tak zeta milemte hmaa ṭawngṭai ṭhîn, an chhûngkuaa Krismas leh Easter kût nîte hmang ṭhîn tu emaw chu rawngbâwlnaah kan tâwk a. Nunna nei lo milemte hmaa ṭawngṭai a âtthlâkzia leh, Krismas leh Easter kût nîte chu biakna dik lo aṭanga lo chhuak a nihzia Bible hmangin kan finfiah thei ngei mai. (Is. 44:14-20; 2 Kor. 6:14-17) Mahse, kan hmuh hmasak ber ṭuma chutianga kan ti a nih chuan, kan thu hrilh chu thutak ni mah se, Bible chu thiam takin kan hmang lo tihna a ni ang.

13. Engtin nge kan ṭawngka chhuak chu chia al kan nihtîr theih?

¹³ Paula chuan kan ṭawngka chhuakte chu chia al a ni tûr tih a sawi bawk. Thutak chu kan ti danglam tûr emaw, kan thup tûr emaw a tihna erawh a ni lo. Chu aiin, kan thusawi ngaithlatute tâna ngaihthlâk nuam a nih theih nân, kan ṭawngka chhuakte chu “chia al” ni tûrin min fuih zâwk a ni. (Job. 12:11) Mahse, chutianga tih chu a awlsam lo thei a. Entîr nân, tui kan tih zâwng ei leh inte chu mi dangte pawhin tui an tih ve kan ring ṭhîn a. Chutiang bawkin, kan thusawi dân chu mi zawng zawngin ngaihthlâk nuam an tih kan ring thei a ni. Mahse, chu chu a dik lo. Entîr nân, an ṭobul leh hnam dân avângin, mi ṭhenkhat chuan an aia upate an biak hunah pawh an ngaih dânte chu tlang takin an sawi nghâl mai ṭhîn a. Chu chu mi ṭhenkhat tân pawm a harsat theih mai bâkah, inzah lohna angin an ngai thei a ni. Paula chuan ‘mi tin kan chhân dân tûr’ chu kan hre tûr a ni tih a sawi a. Chumi awmzia chu kan thusawite chu kan duh dân ang ni lovin, kan thu ngaithlatute tâna ngaihthlâk nuam tûr zâwngin kan siamrem tûr tihna a ni.

THUTAK SAWI HUN TUR

14. Isua leia a awm lai khân, a thu hriat zawng zawng chu a hnungzuitute a zirtîr vek em? Hrilhfiah rawh.

¹⁴ Isua chuan a hnungzuitute chu khawngaihna nei taka biain, ngilneihna nei takin thil tam tak a zirtîr a. (Mk. 6:34) Mahse, zir tûr tam tak an la nei cheu a ni. Isua chuan a hriat zawng zawng chu zirtîr nghâl vek a tum lo va. An phâk chin chu a dâwnpui a ni. Thutak ṭhenkhat chu zirtîr a la hun rih lo tih a hria a. Dik tak chuan, chûng thutakte chu an la pawm thei rih lo vang tih a sawi a ni. (Joh. 16:12) Chu chuan eng nge min zirtîr?

15. Kan Bible zirpuite chu kan thu hriat zawng zawng ṭum khatah kan zirtîr vek tûr a ni em? Hrilhfiah rawh. (Thufingte 25:11) (Milem en bawk rawh.)

¹⁵ Thutak hria tih awmzia chu kan thu hriat zawng zawng ṭum khatah kan zirtîr nghâl vek tûr tihna a ni lo tih Isua entawn tûr siam chuan a târ lang a. A nih leh, engtin nge a entawn tûr siam chu kan zui theih ang? Mite dinhmun chu kan ngaihtuahpui tûr a ni a. Entîrna hmasaa a chhûngte nêna Krismas leh Easter kût nî hmangtu kha han ngaihtuah leh teh. Chûng kût nîte chu biakna dik lo aṭanga lo chhuak a ni tih leh Pathianin a pawm lo tih chu kan hria a ni. Mahse, Krismas ṭan hma chawlhkâr hnih khat vêlah ani chu Bible i zirpui ṭan angah han mitthla teh. Biakna dik lo aṭanga lo chhuak chûng kût nî chungchânga Bible sawite hmuhin, Krismas lawmte bânsan nghâl tûra kan beisei a nih chuan, chu chu khawngaihna nei takin kan zirtîr kan ti thei ang em? Ni e, zirlai ṭhenkhat chuan Bible aṭanga an thu zirte chu an nunpui nghâl thei ngei mai. Mahse, mi dangte chuan an ngaihtuah dân leh thil tihte siamrem tûrin hun an mamawh thei a. Chuvângin, kan Bible zirpuite hnênah an hriat ngaite chu an hriat a ṭûl hun—an pawm theih hun—chauhva hrilhin, anni chu hmasâwn tûrin kan ṭanpui thei a ni.—Thufingte 25:11 chhiar rawh.

16. Engtin nge kan Bible zirpuite chu ‘thutak kawng zawh zêl’ tûra kan ṭanpui theih?

¹⁶ Jehova chungchânga thutak hre tûra mi dangte kan ṭanpui tluka hlimna min thlentu thil dang a awm tam chuang lo. Hêng thurâwnte hi kan zâwm a nih chuan anni chu ‘thutak kawng zawh zêl’ tûrin kan ṭanpui thei ang: An tân entawn tûr ṭha siam zêl la. (3 Joh. 3, 4) I nun kawng chuan Bible-a Pathian thutiamte i rinzia a târ lang tih chian ang che. Chu bâkah, chêttîrtu dik tak nên thu dik sawi la. Thutak i zirtîr hunah ṭawngkam ngilnei leh zaidam chu a hun taka hmangin, khawngaihna nei takin sawi ang che. Chawimawina zawng zawng chu Jehova hnênah pe bawk ang che. Chutianga i tih chuan, thutak Pathian Jehova ta i ni tih i lantîr a ni ang.