Chak Lote Enkawl Huna Hlimna Vawn Reng Theih Dân

1-2. Engtin nge Jehova’n dam lo enkawltute chu a thlîr? (Thufingte 19:17) (Milem en bawk rawh.)

KOREA rama unaupa Jin-yeol-a chuan, “Ka’n nu nêna kan inneihna hi kum 32 lai a ni tawh a. Parkinson natna avânga a chêt ṭhat theih loh avângin, kum nga chhûng ka lo enkawl tawh a. Ani chu ka hmangaih êm avângin enkawl nuam ka ti a. Zan tin kan inah dam lo tâna a bîk taka duan khumah a mu a, a bula muin kut kan invuan ṭhîn a ni,” tiin a sawi.

² I hmangaih tak i nu leh pa, khawppui, fate, a nih loh leh ṭhian tu emaw enkawl mêk i nei em? I nei a nih chuan, chutianga enkawl chu chanvo hlu angin i ngai ngei ang. I hmangaih takte enkawlin Jehova i hmangaihzia i lantîr a. (1 Tim. 5:4, 8; Jak. 1:27) Chuti chung chuan, mi dangte hriatpui loh harsatnate i hmachhawn pawh a ni thei a. Harsatna tâwk awmchhun nia inhriat châng pawh i nei thei a ni. Mite mit hmuhah chuan nui hmêl pû angin lang mah la, mahni têa i awm hunah i lungchhe hle pawh a ni thei. (Sâm 6:6) Mahse, mite’n i harsatna tawhte chu an hriatpui lo che a nih pawhin, Jehova chuan a hriatpui reng che a ni. (Exodus 3:7 nên khaikhin rawh.) I mittui leh i inpêknate chu a tân a hlu hle a. (Sâm 56:8; 126:5) I hmangaih takte i ṭanpui dân zawng zawng chu a hre vek a ni. Ani chuan i thil tihte avânga i chunga leibâ nei anga inngaiin, lâwmman pêk che a tiam bawk.—Thufingte 19:17 chhiar rawh.

3. Abrahama leh Sari chuan Tera an enkawlnaah eng harsatnate nge an hmachhawn mai theih?

³ Bible-ah hian an hmangaih takte enkawltu a hmei a pate chanchin tam tak a chuang a. Abrahama leh Sari te chanchin hi han ngaihtuah teh. Ur khua an chhuahsan khân, an pa, Tera chu kum 200 vêl ni tawh mah se, an rualin kilometer 960 (mêl 600) vêla hla Haran lam panin a kal chhuak ve a. (Gen. 11:31, 32) Abrahamate nupa chuan Tera chu an hmangaih hle tih a chiang a, chutih rualin, an zin kawnga amah enkawl a harsat dân tûr chu han mitthla teh. Sanghâwngsei, a nih loh leh sabengtung hmanga zin chu kum upa tak Tera tân a harsa hle ngei ang. An chauh hle châng a awm ang tih chu hriatthiamawm tak a ni. Mahse, Jehova chuan an mamawh chakna a pe tih a chiang a. Abrahama leh Sari a ṭanpui angin, nang pawh a ṭanpuiin a ti chak dâwn che a ni.—Sâm 55:22.

4. He thuziakah hian eng nge kan sawiho vang?

⁴ Hlimna chuan i hmangaih takte i enkawl hunah chhel tûrin a ṭanpui thei che a. (Thuf. 15:13) Mi hlim thei tak chu eng dinhmun hnuaiah pawh a hlim thei reng a ni. (Jak. 1:2, 3) A nih leh, engtin nge chutiang hlimna chu i neih theih ang? I neih theih dân kawng khat chu ṭawngṭaia Jehova rinchhan leh rilru put hmang dik nei reng tûra a hnêna ṭanpuina dîl hi a ni. He thuziakah hian enkawltute’n hlimna nei reng tûra an tih theih thil dangte chu kan sawiho vang a. Enkawltute kan ṭanpui theih dân pawh kan ngaihtuahho bawk ang. A hmasain, enkawltute’n hlimna an neih reng a ngaih chhan leh an hlimna la bo theitu harsatna an hmachhawnte chu i lo ngaihtuahho vang u.

CHAK LOTE ENKAWL HUNA HLIM RENG A HARSAT CHHAN

5. Engvângin nge enkawltute’n hlimna an vawn reng a ngaih?

⁵ Enkawltute’n hlimna an hloh a nih chuan an chau nghâl mai thei a. (Thuf. 24:10) Chutianga an chau mai a nih chuan, an duh anga ngilneihna lantîr leh ṭanpuina pêk chu a harsa thei a ni. A nih chuan, eng harsatnate’n nge an hlimna hlohtîr thei?

6. Engvângin nge enkawltu ṭhenkhat chu an chauh hle theih?

⁶ Enkawltute chu an chau hle thei. Unaunu Leah-i chuan: “Dam lo enkawl hi thil a kaltluan hunah pawh rilru lamah a chauhthlâk hle a. Ni khat a han liam meuh chuan, eng mah hi ka ti peih tawh thlâwt lo. A châng phei chuan text message chhâng lêt tûr tak ngial pawhin tha ka nei lo,” tiin a sawi. Mi dang lehte chuan mut an kham lovin, an mamawh angin an châwl hahdam thei lo va. Unaunu Inés-i chuan: “Kham khawpin ka mu ngai lo va. Zânah, ka nu ngaihven tûrin dârkâr 2 danah ka harh ziah a. Chu bâkah, kan nupaa chawlh kan lâk theih lohna hi a kum têl a ni tawh,” tiin a sawi. Enkawltu ṭhenkhat chuan an hmangaih tak te’n hunbi kima ngaihsak an mamawh avângin intih hlimnaah te an tel thei lovin, theocratic chanvote pawh an thawk thei lo va. Chûng an dinhmunte avâng chuan, mal nia inhriatna leh rilru ipikna an nei thei a ni.

7. Engvângin nge enkawltu ṭhenkhat chuan inthiam lohna leh lungchhiatna an neih mai theih?

⁷ Enkawltute chuan inthiam lohna leh lungchhiatna nasa tak an nei thei. Unaunu Jessica-i chuan: “Ka tih theih a tlêm ṭhin êm avângin hrehawm ka ti a. Mahni inngaihsak tûra hun ka hman hian inthiam lohna leh hmasial nia inhriatna ka nei a ni,” tiin a sawi. Enkawltu ṭhenkhat chuan an dinhmun tawn chunga lungawi loh châng an neih avângin inthiam lohna an nei bawk a. Mi dangte chuan an hmangaih takte duh anga an ṭanpui ṭhat tâwk loh an hlau a ni. Mi dang lehte chuan an rilru hah lai taka ṭawngkam na tak an lo hman palh avângin inthiam lohna an nei bawk a. (Jak. 3:2) Mi ṭhenkhat chu an hmangaih takte an chak lo telh telh an hmuh hian an lungchhe hle thei bawk. Unaunu Barbara-i chuan: “Harsa ka tih ber chu ka hmangaih tak a ni têla a chak lo tial tial hmuh hi a ni,” tiin a sawi.

8. Lâwmthu sawina ho têin enkawltute chunga nghawng a neih dân thiltawn pakhat sawi rawh.

⁸ Enkawltu ṭhenkhat chuan an thil tih ngaihhlutsak lo nia inhriatna an nei thei. Engvângin nge? An thawhrimnate leh an inpêknate avânga lawm leh fak an hlawh ṭhin loh vâng a ni a. Lâwmthu sawina ho tê pawhin, nasa takin thil a ti thei a ni. (1 Thes. 5:18) Unaunu Melissa-i chuan: “Ka chauh ṭhin êm avânga ṭah châng ka nei a. Mahse, ka mi enkawlte’n, ‘Ka tâna i thil tih zawng zawng avângin ka lâwm e,’ tia min hrilh hian chakna ka nei thar leh ṭhîn! Chutiang thute chuan anmahni enkawl chhunzawm thei tûra ka mamawh chakna min pe a ni,” tiin a sawi. Unau Ahmadu-a pawhin lâwmthu sawina ṭawngkamte’n a chunga nghawng a neih dân chu a sawi a. An nupain kaih natna nei an vah nu pakhat chu an enkawl a. Unau Ahmadu-a chuan: “A tâna kan inpêk nasatzia chu hre thiam vek lo mah se, a thiam ang tâwka lâwmthu sawi a, ‘Ka hmangaih che u,’ tia min hrilh hian hlimna nasa tak kan nei a ni,” tiin a sawi.

HLIMNA VAWN RENG THEIH DAN

9. Engtin nge enkawltu chuan thuhnuairawlhna a lantîr theih?

⁹ Thuhnuairawlh tak ni rawh. (Thuf. 11:2) Kan thil tih duh zawng zawngte ti tûrin hun leh tha kan nei reng lo va. Chuvângin, i tih theih leh theih loh chungchângah ramri in siam la; tichuan, a ṭûl hunah i tih theih loh tûr thu sawi ang che. Chu chu thuhnuairawlhna lantîrna a nih avângin thil ṭha tak a ni. Ṭanpui duhtu che an awm a nih chuan, lâwm takin pawm bawk ang che. Unau Jay-a chuan: “Ṭum khatah thil tam tak kan ti thei lo va. Mahni theih chin tâwk hria a, chumi pêla thil tih lohna chuan hlimna vawng reng tûrin min ṭanpui ang,” tiin a sawi.

10. Engvângin nge enkawltute tân hriatthiamna neih a pawimawh? (Thufingte 19:11)

¹⁰ Hriatthiamna nei rawh. (Thufingte 19:11 chhiar rawh.) Hriatthiamna i neih chuan, tih lungnih lohva i awm hunah pawh dam takin i chhâng lêt thei ang. Hriatthiamna neitu chuan mite thil tih chhante chu hriatthiam a tum ṭhîn a ni. Natna benvawn nei mi ṭhenkhatte’n pângngai lo taka thil tih châng an neih chu a hriatthiamawm hle. (Thur. 7:7) Entîr nân, mi ngilnei ṭhîn tak pawh mi hnial peih tak a rawn ni thei a. A nih loh leh, phunchiar, sawisêl hmang leh, tih lâwm harsa tak a rawn ni thei bawk. Natna khirh tak nei tu emaw i ṭanpui a nih chuan, a natna chungchâng zir chian chu a ṭangkai hle thei a. A dinhmun i hriatthiam poh leh a chêt dân chu a duh rêng vâng ni lovin, a natna vâng a ni tih i hre thiam lehzual ang.—Thuf. 14:29.

11. Enkawltute chuan eng thil pawimawh zâwkte atân nge nî tin hun an pêk a ngaih? (Sâm 132:4, 5)

¹¹ Jehova nêna in inṭhian ṭhatna chu ti nghet rawh. Thil “pawimawh zâwkte” i tih theih nân, thil ṭhenkhat dangte ngaihthah a ngaih châng a awm thei a. (Phil. 1:10, NWT) Chûng thil pawimawh zâwkte zînga pakhat chu Jehova nêna in inlaichînna tih ngheh hi a ni. Lal Davida chuan Jehova biakna chu a nunah a dah pawimawh ber a. (Sâm 132:4, 5 chhiar rawh.) Chutiang bawkin, Bible chhiar nân leh ṭawngṭai nâna nî tin hun insiam chu thil pawimawh tak a ni. Unaunu Elisha-i chuan: “Ṭawngṭaina leh Sâm bua thu thlamuanthlâk tak takte chhût ngunna chuan hlimna nei reng tûrin min ṭanpui a. A bîk takin, ṭawngṭaina hian min ṭanpui nasa hle. Rilru hahdamna nei tûrin nî tin Jehova hnênah vawi tam tak ka ṭawngṭai ṭhîn a ni,” tiin a sawi.

12. Engvângin nge enkawltute chuan an hrisêlna atâna hun an insiam a ngaih?

¹² I hrisêlna atân hun insiam rawh. Dam lo enkawltute ang chi mi buai thei takte chuan ei tûr ṭha leh hrisêlte in leia insiam nân hun an nei tlêm hle thei a. Ei leh in ṭha leh taksa sâwizawi ziah chu i tisa lam leh rilru lam hrisêlna atân a pawimawh êm avângin, chûngte tih nân i hun neih chhunte chu thiam takin hmang ang che. (Eph. 5:15, 16) Chu bâkah, kham khawpa mut tum bawk rawh. (Thur. 4:6) Zir chianna chuan kham khawpa mut chu thluak hrisêlna atân a pawimawh hle tih a târ lang a. “Muthilhnain Rilru Hahna A Tih Kiam Theih Dân,” tih Banner Health thuziak pakhat chuan kham khawpa mutnain lungkhamna a tih kiam theih dân leh rilru hahnate hmachhawn thei tûra a ṭanpui theih dân a târ lang a ni. Intih hlimna atâna hun i insiam a ngaih châng pawh a awm thei a. (Thur. 8:15) Dam lo enkawltu pakhatin hlimna nei reng tûra amah ṭanpuitu chungchâng chu heti hian a sawi a ni: “Nikhua a ṭhat hian pâwn ni lum ka ai ṭhîn a. A lo berah thla khatah vawi khat ṭhiante nên hun hlimawm tak hman ka tum bawk,” tiin.

13. Engvângin nge nuih hi a ṭhat? (Thufingte 17:22)

¹³ Nuih theihnghilh suh. (Thufingte 17:22 chhiar rawh; Thur. 3:1, 4) Nuih hi i tisa lam leh rilru lam hrisêlna atân a ṭha a. Tu emaw i enkawl hian, beisei angin thil a awm thei reng lo a ni. Mahse, chutiang dinhmunah pawh thilte a êng zâwnga thlîrin, nuih i zir thei a. Chu bâkah, dam lo i enkawl mêk nêna nuih dunna chuan in inlaichînna chu a ti nghet lehzual thei a ni.

14. Engtin nge ṭhian hnai tak hnêna i rilru awm dânte hrilhna chuan a ṭanpui theih che?

¹⁴ I ṭhian hnênah i rilru awm dân hrilh rawh. Theih tâwp i chhuah chung pawhin, hlim taka awm reng chu a harsa thei a. Chutiang hunah chuan, rilru nuam lova siam lo tûr che, i ṭhian hnai tak tu emaw hnêna i rilrua awmte sawichhuahna chuan a ṭanpui thei che a. (Thuf. 17:17) Ṭha taka a ngaihthlâksakna che leh a thusawi thlamuanthlâk takte chu hlimna nei reng tûra i mamawh tak a ni thei a ni.—Thuf. 12:25.

15. Engtin nge hma lam hun thlîr tlatna chuan hlimna min neihtîr theih?

¹⁵ Paradis-a chêng dûn angin inmitthla rawh. Enkawltu nia i mawhphurhna chu rei lo tê atân chauh a ni tih leh, chu chu mihringte tâna Jehova thiltum a ni lo tih chu hre reng ang che. (2 Kor. 4:16-18) “Nunna tak tak” chu kan hmaah a awm a ni. (1 Tim. 6:19, NWT) I hmangaih tak i enkawl mêk nêna Paradis-a in tih dun tûr thilte sawihona chuan nasa takin a ti hlim thei che u a. (Is. 33:24; 65:21) Entîr nân, chumi chungchângah unaunu Heather-i chuan heti hian a sawi: “Dam lo ka enkawlte hnênah hian, puan kan ṭhui dun hun tûr te, kan tlân dun hun tûr te, bike kan khalh dun hun tûr te leh, kan hmangaih tak tho lehte tâna chhang leh ei tûr kan siamsak hun tûrte chu ka hrilh fo ṭhîn a. He hma lam hun beiseina avâng hian Jehova hnênah lâwmthu kan sawi ṭhîn a ni,” tiin.

ENKAWLTUTE KAN ṬANPUI THEIH DAN

16. Engtin nge kan kohhrana dam lo enkawltute chu kan ṭanpui theih? (Milem en bawk rawh.)

¹⁶ Enkawltute chu chawlh hahdamna hun siamsak rawh. Kohhrana mite chuan dam lo chu a mamawh ṭanpuina pein, a enkawltu chu a chawlh hahdam theih nân leh a tih tûrte a tih theih nân hun kan siamsak thei a. (Gal. 6:2) Thuchhuahtu ṭhenkhat chuan chutiang chuan chawlhkâr tin hunbi neiin an ṭanpui ṭhîn a ni. Zeng natna nei a pasal enkawltu unaunu Natalya-i chuan: “Kohhrana unau pakhat chuan ka pasal hun hmanpui tûrin chawlhkâr khatah vawi hnih khat a rawn tlawh ṭhîn a. Rawngbâwlnaah an tel dûn a, an inkâwm a, movie-te an en dûn ṭhîn a ni. Chûng hunte chu ka pasal tân a hlu hle a, kei a enkawltu tân pawh han vah chhuah lawkna ang chi ka tih duhte tih nân hun thâwl ka neih phah a ni,” tiin a sawi. Dinhmun ṭhenkhatah chuan, a enkawltu tui taka a mut theih nân dam lo va riahpui chu thil ṭha tak a ni thei bawk.

17. Engtin nge kohhran inkhâwmahte enkawltute chu kan ṭanpui theih?

¹⁷ Enkawltute chu kohhran inkhâwmahte ṭanpui rawh. An hmangaih takte enkawla an buai theih êm avângin enkawltute tân kohhran inkhâwm te, bial inkhâwmpui te leh, regional inkhâwmpuitea ṭha taka rilru pêk chu a harsa thei a ni. Chuvângin, kohhrana unaute chuan dam lo chu inkhâwm hun chhûng zawng, a nih loh leh hun eng emaw chhûng ṭhutpuiin a enkawltu chu an ṭanpui thei a. In a chhuahsan thei lo a nih chuan, a enkawltu a hmuna a inkhâwm theih nân, inah va kalin, dam lo chu video-conference hmangin a inkhâwmpui thei a ni.

18. Enkawltute chu eng thil dangte nge kan tihsak theih?

¹⁸ Enkawltute chu fak la, ṭawngṭaisak rawh. Kohhran upate chuan enkawltute chu berâm tlawhna an neihpui ziah a ngai a. (Thuf. 27:23) Kan dinhmun tawh chu eng pawh ni se, kohhrana mi tinte chuan enkawltute chu kan hmangaihzia leh kan ngaihhlutzia kan hrilh ziah thei bawk a. Chu bâkah, Jehova’n chakna pe zawm zêl tûr leh hlimna vawng reng thei tûra ṭanpui tûrin kan ngensak thei a ni.—2 Kor. 1:11.

19. Eng beisei tûr nge kan neih?

¹⁹ Nakin lawkah chuan, Jehova’n hrehawm tawrhna avânga kan mittui tlate chu a hru hul tawh ang. Natna leh thihna pawh a awm tawh lo vang a. (Thup. 21:3, 4) “Ke baite chu sakhi angin an zuang ang.” (Is. 35:5, 6) Kum upatna avânga nghawng ṭha lote leh dam lo enkawltute hrehawm tawrhnate chu ‘hriat renga awm tawh lo tûr tûn hma thilte an ni tawh bawk ang.’ (Is. 65:17) Kan beiseina ropui tak thlen famkim hun tûr kan nghah mêk lai hian, Jehova’n min thlahthlam dâwn lo a ni. Chakna min pe tûra kan rinchhan zawm zêl a nih chuan, ‘dawhtheihna leh lâwmna nêna tuar chhuak thei’ tûrin min ṭanpui ang.—Kol. 1:11, NWT.