Isua—Khawngaihna Ngah Tak Kan Puithiam Lalber

1-2. (a) Engvângin nge Jehova’n a Fapa chu leiah a rawn tirh? (b) He thuziakah hian eng nge kan sawiho vang? (Hebrai 5:7-9)

KUM 2,000 liam ta khân, Pathian Jehova chuan a Fapa duh tak chu leiah a rawn tîr a. Engvângin nge? A chhan tam tak zînga pakhat chu sual leh thihna laka mihringte chhandam tûr leh Setana tih chhuah buaina zawng zawng nuai bo tûrin a ni a. (Joh. 3:16; 1 Joh. 3:8) Mihring anga Isua thiltawnte chuan ani chu khawngaihna, hriatthiamna leh, lainatna ngah tak Puithiam Lalber ni tûrin a buatsaih dâwn tih pawh Jehova’n a hria a. Isua chu C.E. 29-a baptisma a chan hnuah Puithiam angin rawng a bâwl ṭan a ni.a

² He thuziakah hian leia a thiltawnte chuan Isua chu khawngaihna ngah tak Puithiam Lalber nia rawngbâwl tûra a buatsaih dân kan sawiho vang a. Puithiam ni tûra “tih famkima a awm” dân kan hriat thiam poh leh, kan sualte leh chak lohnate avânga lunghnuala kan awm hunah Jehova pan chu awlsam kan ti lehzual dâwn a ni.—Hebrai 5:7-9 chhiar rawh.

PATHIAN FAPA DUH TAK LEIAH A LO KAL

3-4. Isua leia a lo kal khân, eng inthlâk danglamna lian takte nge a hmachhawn?

³ Kan zînga tam tak chuan mahni in lum nuam tak chhuahsanin, chhûngte leh ṭhian ṭhate kalsan ang chi dinhmun inthlâk danglamnate chu kan tawng ṭheuh tawh ngei ang. Chûng inthlâk danglamnate chu a awlsam lo a ni. Mahse, Isua inthlâk danglamna tawn ang chu tu man kan la tawng lo. Ani chuan vânah Jehova thlarau fate zînga dinhmun sâng ber a luah a. Jehova hmangaihna a dawn reng avâng leh Pathian ‘kut ding lama’ rawng a bâwl ṭhin avângin a hlim reng a ni. (Sâm 16:11; Thuf. 8:30) Mahse, Philippi 2:7-na chuan leia ṭha famkim lo mihringte zînga awm tûrin vâna a dinhmun sâng tak pawh tiamin, inhuam takin ‘a thil neih engkim a kalsan’ tih a sawi a ni.

⁴ Leia Isua nun tîr lam hi han ngaihtuah teh. A pian hnua a nu leh pate thil hlan tlâwm tak aṭangin ani chu chhûngkaw rethei tak aṭanga lo piang a ni tih kan hre thei a ni. (Lev. 12:8; Lk. 2:24) Lal sual Heroda’n Isua a piang tih a hriat chuan tih hlum a tum a. Chuvângin, Heroda kut aṭanga an chhuah theih nân, Aiguptaah hun eng emawti chhûng chu an chhûngkuain an chêng a ni. (Mt. 2:13, 15) Mihring nia leia a lo kal hma nên chuan a va danglam tak êm!

5. Isua’n leiah engte nge a hmuh a, engtin nge a thiltawnte chuan Puithiam Lalber ni tûra a buatsaih? (Milem en bawk rawh.)

⁵ Leia a awm lai khân, Isua chuan a chheh vêla hrehawm tawrhnate chu a hmu a. A pa hrawn Josefa pawh tiamin, a hmangaih takte chu thihnaah a chân ngei ang. A rawngbâwl chhûngin, phâr te, mitdel te, zeng te leh, lu sûn nu leh pate a hmuh chuan a khawngaih hle ṭhîn a ni. (Mt. 9:2, 6; 15:30; 20:34; Mk. 1:40, 41; Lk. 7:13) Ni e, chûng hrehawmnate chu vâna a awm lai pawh khân a lo hmu tawh ṭhîn ngei mai. Mahse, tûnah chuan mihring angin mite hrehawm tawrhnate chu kawng dang hlakin a hmu a ni. (Is. 53:4) A thiltawnte chuan mihring rilru awm dân te, hrehawmna te leh, rilru natnate chu hre thiam lehzual tûrin a ṭanpui a. Amah ngei pawhin lungchhiatna te, chauhna te leh, lungngaihnate ang chi mihringte tawrh ang chu a tuar ve a ni.

ISUA’N MITE CHUNGAH LAINATNA A LANTIR

6. Zâwlnei Isaia entîr nei ṭawngkamte chuan Isua khawngaihna leh lainatna chungchângah eng nge min zirtîr? (Isaia 42:3)

⁶ Isua’n a rawngbâwl chhûngin chak lote leh dinhmun hnuaihnunga awmte chu lainatna nasa tak lantîrin, hrilh lâwkna a thlen famkimtîr a ni. Hebrai Pathian Lehkha Thu-ah chuan, mi nei nungte leh mi chak takte chu huan ṭha tak leh thingkûng nghet takte nêna tehkhin an ni a. (Sâm 92:12; Is. 61:3; Jer. 31:12) Mahse, mi retheite leh lunghnualte chu mi dangte tâna ṭangkaina nei lo anga lang luang sâwp tliak lek lek leh la khu mit lek lekte nên tehkhin an ni thung. (Isaia 42:3 chhiar rawh; Mt. 12:20) Thlarau thâwk khumna hnuaiah zâwlnei Isaia chuan chûng entîr nei ṭawngkamte chu hmangin, mi dangte ngaihhlut loh mite chunga Isua lantîr tûr hmangaihna leh khawngaihnate chungchâng a lo hrilh lâwk a ni.

7-8. Engtin nge Isua’n Isaia hrilh lâwkna chu a thlen famkimtîr?

⁷ Chanchin Ṭha ziaktu Matthaia chuan, “Luang sâwp a ti tliak fithla lo vang a, la khu pawh a ti mit lo vang,” tih Isaia hrilh lâwkna thu chu Isua chungah a thleng famkim tih a târ lang a. Isua thil mak tih ṭhenkhat chu luang sâwp tliak lek lek anga awm mi lunghnualte leh, rei lo têa thi mai tawh tûr la khu mit lek lekte anga awm beisei bote chuan an hlâwkpui a ni. Chûng zînga pakhat chu phâr natna vei pakhat a ni a. Ani chuan tih dama awm a, a chhûngte leh ṭhiante nêna awmho leh chu a beisei thei tawh lo a ni. (Lk. 5:12, 13) Chu bâkah, bengngawng leh ṭawng fiah thei lo pakhat a awm bawk a. Mi dangte thusawi a hriat thiam loh avânga a bang bo dân tûr chu han mitthla teh. (Mk. 7:32, 33) Chûngte chu entîrna pahnih khat mai a ni.

⁸ Isua hun laia Juda mi tam tak chuan hrehawm tuarte chu anmahni sualna vâng, a nih loh leh an nu leh pate sualna avânga hremna tâwk niin an ngai a. (Joh. 9:2) Chu ngaih dân dik lo chuan chûng hrehawm tuarte chu hlutna nei lo nia inhriatna a neihtîr a ni. Isua erawh chuan Isaia hrilh lâwkna thlen famkimtîrin, chûng hrehawm tuarte chu a ti dam a, Pathianah beiseina a neih thartîr leh a ni. Chu chuan eng rinnghehna nge min neihtîr?

9. Engtin nge Hebrai 4:15, 16-na chuan kan Puithiam Lalberin ṭha famkim lo mihringte a khawngaih tak zetzia a târ lan?

⁹ Hebrai 4:15, 16 chhiar rawh. Isua chuan kan chungah khawngaihna a lantîr reng dâwn tih kan chiang thei a. Chumi awmzia chu eng nge ni? Khawngaihna neitu thinlung chu mi dangte hrehawm tawrhna leh rilru vei zâwng chuan a khawih hle ṭhîn a. “Khawngaih” tia lehlin Grik thu mal chuan mi dangte thiltawn leh rilru awm dân hriatthiampui tih a kâwk a. (Chu thu mal Paula’n a hmanna Hebrai 10:34 en bawk rawh.) Isua’n mite a ṭanpui dân chungchâng kan chhiar hian, an chunga khawngaihna a neih nasatzia kan hmu thei a ni. Mawhphurhna avâng chauhva mite ti dam a ni lo va. Tih tak zeta a ngaihsak avâng leh ṭanpui a duh tak zet avâng zâwk a ni. Entîr nân, phâr a tih dam khân, a hla aṭangin ti dam thei mah se, ani chu khawihin a ti dam zâwk a. Chu phâr tân chuan kum tam tak chhûnga mihring kuta khawih a tawhna hmasa ber a ni ang! Bengngawng pakhat pawh Isua’n hriatthiamna nei takin mipui zîng aṭanga kal chhuahpuiin a fâlin a ti dam a. Chu bâkah, Pharisai pakhatin a mittuia Isua kete sil a, a sama hrutu inlamlêt hmeichhia pakhat a ngaihnêpzia a lantîr khân, Isua’n hmeichhia chu ṭan tlatin a hum a ni. (Mt. 8:3; Mk. 7:33; Lk. 7:44) Isua’n dam lo te leh sual lian tak titute chu a pumpelh ngai lo va. Chu aiin, anni chu ṭha taka lâwmin, khawngaihna nei takin a thlamuan zâwk a. Keini pawh min khawngaih ang tih kan chiang ve thei a ni.

TUN LAIA KAN PUITHIAM LALBER KAN ENTAWN DAN

10. Tûn laiah bengngawngte leh mitdelte ṭanpui tûrin eng thlarau lam hmanruate nge kan hman theih? (Milem en bawk rawh.)

¹⁰ Isua hnungzuitu rinawmte kan nih angin, mi dangte chunga hmangaihna, lainatna leh, khawngaihna lantîrna kawngah amah entawn kan tum tlat a. (1 Pet. 2:21; 3:8) Bengngawngte leh mitdelte chu ti dam thei lo mah ila, anni chu thlarau lamah kan ṭanpui thei a ni. Entîr nân, Bible ṭanchhan thu leh hla chhuahte chu kut zaizir ṭawng 100 chuangin a hmuh theih tawh a ni. Khaw hmu fiah thei lote leh mitdel te’n an hlâwkpui theih nân an tâna a bîk taka buatsaih thu leh hla chhuahte chu ṭawng 60 chuang leh audio description pawh ṭawng 100 chuanga tih chhuah a ni a. Chûngte chuan bengngawngte leh mitdelte chu Jehova leh a Fapa hnaih tûrin a ṭanpui a ni.

11. Ṭobul hrang hranga mite Isua’n a ngaihsak tih engtin nge Jehova inawpna pâwlin a lantîr? (Tirhkohte 2:5-7, 33) (Milem en bawk rawh.)

¹¹ Jehova inawpna pâwl chuan ṭobul hrang hranga mite chu ṭanpui a duh a. Isua’n a thawhleh hnu khân Pentikost kût hmang tûra lo kal zawng zawngte’n “anmahni ṭawng ṭheuhva” chanchin ṭha an hriat theih nân an chungah thlarau thianghlim a leih tih chhinchhiah ang che. (Tirhkohte 2:5-7, 33 chhiar rawh.) A kaihhruaina hnuaiah, inawpna pâwl chuan ṭawng 1,000 chuangin Bible ṭanchhan thu leh hla chhuahte a ti chhuak a, chûng zînga ṭhenkhat chu mi tlêm tête ṭawng hman a ni a. Entîr nân, Amerindian ṭawng ṭhenkhat chu North leh South America-a chêng mi tlêm tête hman a ni a. Mahse, mi a tam thei ang berte’n chanchin ṭha an hriat theih nân kan thu leh hla chhuahte chu chûng mite hman ṭawng 160 aia tama hmuh theih a ni. Kan thu leh hla chhuahte chu Romany ṭawng hrang hrang 20 chuanga hmuh theih a ni bawk. Chûng ṭawng hmang mi a sâng têlte chuan thutak chu an chhâng lêt tawh a ni.

12. Jehova inawpna pâwlin eng ṭanpuina dangte nge a pêk?

¹² Jehova inawpna pâwl chuan chanchin ṭha theh darhna kawnga theih tâwp a chhuah mai bâkah, leilung chhiatna tâwkte pawh a ṭanpui a. Mi a sâng têlte chu an unau ṭanpui ngaite tân inhuam takin an inpe a ni. Inawpna pâwl chuan mite’n a huhova Pathian hmangaihna chungchâng an zirho theihna tûr biakna hmun pângngai takte a buatsaihsak bawk.

KAN PUITHIAM LALBERIN MIN TANPUI THEI

13. Isua min ṭanpui dân kawng ṭhenkhat chu eng nge ni?

¹³ Kan berâm pu ṭha tak a nih angin, Isua chuan mi mal tinte thlarau lam mamawh chu a ngaihsak a. (Joh. 10:14; Eph. 4:7) Kan dinhmun tawnte avângin, phairuang tliak lek lek leh la khu mit lek lek anga inhriat châng kan nei thei a ni. Natna khirh tak te, hlawhchhamna avângte leh Kristian unau tu emaw nêna kan inrem loh avângtein kan lunghnual hle pawh a ni thei a. Chûng harsatnate aia kan hma lam beiseina ngaihtuah tlat chu harsa kan ti thei a ni. Mahse, Isua’n i thil hmachhawn mêkte chu hmuin, chhûngrila i ngaihtuahnate chu a hriatthiampui che tih hria ang che. A lainat che avângin ṭanpui che a duh a ni. Entîr nân, i chak loh hunah thlarau thianghlim hmangin a ti chak thei che a. (Joh. 16:7; Tit. 3:6) Chu bâkah, Isua chuan ‘mihringte hnêna thilpêkte’ leh Kristian unau dangte chu nangmah ti chaka ṭanpui tûr chein a hmang thei bawk a ni.—Eph. 4:8, NWT.

14. Kan lunghnual hunah eng nge kan tih theih?

¹⁴ I lunghnual a nih chuan Isua chu kan Puithiam Lalber a ni tih hre rengin, chu chuan i tâna awmzia a neih dân chu ngaihtuah la. Jehova’n Isua leia a rawn tirh chhan chu tlanna pe tûr chauh ni lo vin, ṭha famkim lo mihringte hmachhawn buainate hrethiam lehzual tûrin a ni tih hre bawk ang che. Kan thil sual tih te leh kan chak lohnate avânga kan lunghnual hunah Isua’n “a hun taka” ṭanpuina min pêk a inhuam reng a ni.—Heb. 4:15, 16, NWT.

15. Jehova berâm huang aṭanga tawlh bo tu emaw chu kohhrana kîr leh tûra ṭanpui a nih theih dân târ langtu thiltawn pakhat sawi rawh.

¹⁵ Isua’n a mite chu Jehova berâm huang aṭanga tawlh bote an zawnnaah leh ṭanpuinaah a kaihruai a. (Mt. 18:12, 13) Unau Stefano-ab thiltawn hi chhinchhiah ang che. Kohhran aṭanga chhuahtîr a nih aṭanga kum 12 hnuah inkhâwmah a rawn tel ṭan leh a. Ani chuan: “Zâmawm hle mah se, hmangaihna nei tak Jehova chhûngkaw zînga tel leh ka duh a ni. Min kâwmtu kohhran upate chuan hawihhâwm takin min lo lâwm a. Hlu lo nia inhriat châng ka neih hian beidawn mai ka duh ṭhîn a. Mahse, unaute chuan Jehova leh Isua’n bei fan fan tûrin min duh tih min hriat nawntîr a ni. Kohhrana ka luh leh chuan unau zawng zawngte’n kan chhûngkuain duat takin min lo lâwm a. A hnuah, ka nupui pawhin Bible a zir a, tûnah chuan kan chhûngkuain Jehova rawng kan bâwl a ni,” tiin a sawi. Inlam lêtte’n kohhrana lo kîr leh tûra an mamawh ṭanpuina an dawng tih kan Puithiam Lalberin a hmuh chuan a va hlim dâwn tak êm!

16. Engvângin nge khawngaihna ngah tak Puithiam Lalber kan neih avânga kan lâwm theih?

¹⁶ Leia hringnun a hman chhûng khân, Isua chuan mi tam takte chu a hun takah a ṭanpui ṭhîn a. Tûn laiah pawh, ṭanpui kan mamawh hun apiangin min ṭanpui ang tih kan chiang thei a ni. Khawvêl thar a lo thlen hunah, thuâwih mihringte chu sual leh ṭhat famkim lohna sawhkhâwk zawng zawng laka zalên fihlîm tûrin min ṭanpui bawk ang. A hmangaihna leh zahngaihna nasa tak avânga a Fapa Isua chu khawngaihna ngah tak kan Puithiam Lalber ni tûra ruattu Pathian Jehova chungah kan va lâwm tak êm!