Lîrthei Khalh Ka Tâwpsan Ang Em?

Chutiang dinhmun chu i tawng em? I tawng a nih chuan, motor i kalh zawm dâwn leh dâwn loh chungchânga thu tlûkna siam tûrin engin nge ṭanpui thei che?

Ram ṭhenkhatah chuan, an license ti thar duhtu kum upa lam motor khalhtute chu doctor-te’n an en fiah ṭhîn a. Chûng rama chêng Kristiante chuan thuneitute dân siam leh thu tlûkna siamte chu an zâwm a ni. (Rom 13:1) Chutih rualin, khawi ramah pawh awm mah la, him taka motor khalh thei tûra ṭanpui theitu che kaihhruainate a awm a ni.

I MOTOR KHALH DAN ENFIAH RAWH

United States-a National Institute on Aging (NIA) website thurâwn pêk angin, hetiang hian i inzâwt thei a ni:

• Zânah kawng kawh hmuhtu sign-te chu ka hmu theiin ka chhiar thei em?

• Motor hnung lam enna dârthlalang leh a sîr vêlte en paha him taka khalh thei tûrin ka hawiherte a zâng tawh lo em?

• Accelerator leh brake-te rah thlâk zung zung ka harsat em?

• Traffic ti buai khawpin ka khalh muang em?

• Tûn hnaiah ka accident ṭhelh ṭhelh em? A nih loh leh, thil eng emaw ka sut avângin, ka motor-ah khuar leh khem te a awm em?

• Ka motor khalh dân avângin police officer-te’n min ti ding tawh em?

• Motor khalh laiin ka muthlu tawh em?

• Ka motor khalh ti buai thei khawp damdawi ei ka nei em?

• Ka chhûngte leh ka ṭhiante’n ka motor khalh dânah min hlauhthâwnpui em?

Chûng zawhnate zînga pahnih khat chu ‘aw’ tia i chhâng a nih chuan, insiamremna ṭhenkhat neih i duh ngei ang. Entîr nân, a bîk takin, zan lama khalh tam loh chu i duh thei a. I khalh ṭhat tâwk leh tâwk loh inen dik ṭhîn la. I motor khalh dân chungchângah i chhûngte, a nih loh leh i ṭhian tu emaw chu a ngaih dân zâwt ang che. Chu bâkah, him taka motor khalh dân zir chu i duh mai thei bawk. Chutih rualin, a chunga târ lan zawhna a tam zâwkte chu ‘aw’ tia i chhâng a nih chuan, motor khalh tâwpsan chu i tân a ṭha ber thei a ni.a

BIBLE THU BULTE INKAIHHRUAITIR RAWH

Tûn hma angin motor kan khalh ṭha thei tawh lo tih kan inhre lo pawh a ni thei a. Motor khalh i tâwpsan dâwn leh dâwn loh chungchânga thu tlûkna siam chu a harsa hle thei bawk. A nih chuan, i dinhmun chu a nihna ang taka hmu thiam tûr leh thu tlûkna fing siam tûrin, eng Bible thu bulte’n nge ṭanpui thei che? Thu bul pahnih hi han ngaihtuah teh.

Thuhnuairawlh tak ni rawh. (Thuf. 11:2) Kan kumte a upat chhoh zêl rual hian kan mit te, beng te, tha te a chak tawh lovin, kan hawiherte pawh a zâng tawh lo va. Entîr nân, mi tam tak chuan an upat chhoh hian an lo tih ṭhin infiamna ṭhenkhat chu an tân a him tawh loh avângin an bânsan a. Motor khalh chungchângah pawh chutiang bawk chu a ni a. Mi chuan a himna atân motor khalh bânsan a ṭûl hun a awm tih chu inngaitlâwm taka a pawm a ngai thei a. (Thuf. 22:3) Thuhnuairawlhna chuan mi dangte thurâwn pêkte pawm a, ngaithla tûrin a chêttîr dâwn a ni.—2 Samuela 21:15-17 nên khaikhin rawh.

Mi dangte thihna thlentu ni suh. (Deut. 22:8) Motor chu him taka khalh a nih loh chuan râlthuam hlauhawm tak a ni thei a. Miin ṭha taka motor a khalh thei tawh lo chung pawha a la khalh zawm zêl a nih chuan, mahni leh mi dangte nunna chu dinhmun hlauhawmah a dah thei a ni. Amah avânga chêtsualna eng emaw a awm a nih chuan, mi dangte thisen mawh chu a phurh a ngai ngei ang.

Motor khalh bânsan leh bânsan loh chungchânga thu tlûkna i siam a ngai a nih chuan, hlutna nei tawh lo tûr angin inngai suh. Jehova chuan thuhnuairawlhna, inngaihtlâwmna leh, mi dangte ngaihsakna ang chi i mize duhawm tak takte avângin a hmangaih chein a ngaihlu tak zet che a ni. Chu bâkah, ani chuan ṭanpui leh thlamuan che a tiam a. (Is. 46:4) A thlahthlam ngai dâwn lo che a ni. Chuvângin, motor khalh bânsan leh bânsan loh chungchânga thu tlûkna i siam hunah finna leh hriatthiamna nei tûrin a ṭanpuina dîl ang che.