Jakoba Hrilh Lâwkna Hnuhnûngte Aṭanga Kan Zir Theihte—Ṭhen 2

1. He thuziakah hian eng nge kan sawiho vang?

JAKOBA fapate chuan a vêla ṭhuin an hnêna a thusawite chu uluk takin an ngaithla a. Thuziak hmasaa kan sawiho tawh angin, Reubena, Simeona, Levia leh, Juda te hnêna Jakoba thusawite chuan an zaa mak ti taka a siam a rinawm a. Chuvângin, a fapa dang pariatte hnêna Jakoba thusawi tûrte chu hriat an châk ngei ang. Tûnah, Zebuluna, Isakara, Dana, Gada, Asera, Naphtalia, Josefa leh, Benjamina te hnêna a thusawite aṭanga kan zir theihte chu i lo ngaihtuahho vang u.a

ZEBULUNA

2. Zebuluna malsâwmna dawn leh a thlen famkim dân chu hrilhfiah rawh. (Genesis 49:13) (Bâwm en bawk rawh.)

² Genesis 49:13 chhiar rawh. Jakoba chuan Zebuluna thlahte chu Ram Tiam hmâr lam tuipui kama an awm tûr thu a sawi a. Kum 200 aia tam a liam hnu chuan, Zebulun hnam chuan Galili Dîl leh Mediterranean Tuipui inkârah an ram tûr chu an chang a. Mosia chuan: “Lâwm rawh, Zebulun, i vahchhuahnaah te,” tiin a lo sawi lâwk a ni. (Deut. 33:18) Chu chu, Zebulun-ho chu tuipui depah awm lo mah se, tuipui kamte chu awlsam taka tlawh pawhin, chuta mite nêna an sumdâwn theih tûr thu sawina a ni thei a. Eng pawh chu ni se, Zebuluna thlahte chuan lâwm nachhan tûr an nei a ni.

3. Engin nge lungawina nei tûra min ṭanpui thei?

³ Eng nge kan zir theih? Khawi hmunah pawh awmin eng dinhmun pawh tawng mah ila, lâwm nachhan tûr kan nei a. Mahse, lâwmna nei reng tûr chuan kan neih tâwkah kan lungawi a ngai a ni. (Sâm 16:6; 24:5) A châng chuan, kan thil ṭha neihte aiin kan thil neih lohte ngaihtuah chu a awlsam zâwk thei a. Chuvângin, i dinhmun chu a êng zâwnga thlîr thiam tum ang che.—Gal. 6:4.

ISAKARA

4. Isakara malsâwmna dawn leh a thlen famkim dân chu hrilhfiah rawh. (Genesis 49:14, 15) (Bâwm en bawk rawh.)

⁴ Genesis 49:14, 15 chhiar rawh. Jakoba chuan Isakara chu thil rit tak tak phur thei sabengtung chak tak nêna tehkhinin a taimâkna avângin a fak a. Ram nuam tak a luah tûr thu a sawi bawk a ni. Jakoba thusawite nêna inmilin Isakar-ho chuan Jordan Lui hrûla awm ram leilung ṭha tak chu an chang a. (Jos. 19:22) Taima takin an ram chu an enkawl ngei ang a; chutih rualin, mi dangte tân pawh an thawk rim a ni. (1 Lal. 4:7, 17) Entîr nân, Isakar-ho chuan hnam pum tâna râl beih an inhuam a. Rorêltu Baraka leh zâwlneinu Debori hun lai pawhin chutiang chuan an ti a ni.—Ro. 5:15

5. Engvângin nge kan thawh rim ang?

⁵ Eng nge kan zir theih? Pathian Jehova chuan Isakar-ho thawhrimna chu a ngaihhlut ang bawkin, a rawngbâwlnaa kan thawhrimna chu a ngaihlu a. (Thur. 2:24) Entîr nân, kohhran ngaihsak tûra thawk rim unaute chungchâng hi han ngaihtuah teh. (1 Tim. 3:1) Râl tak tak beih ngai lo mah se, anni chuan Pathian mite chu an thlarau lam tichhe thei dinhmunte laka vênghim tûrin an thawh rim a ngai a. (1 Kor. 5:1, 5; Jud. 17-23) Kohhran tichak thei thute sawi tûrin theih tâwp chhuahin an inbuatsaih bawk a ni.—1 Tim. 5:17.

DANA

6. Dan-ho chuan eng chanvo nge an dawn? (Genesis 49:17, 18) (Bâwm en bawk rawh.)

⁶ Genesis 49:17, 18 chhiar rawh. Jakoba chuan Dana chu indonaa an hman ṭhin sakawr ang chi, a aia sa lian zâwkte bei ṭhîn rûl nên a tehkhin a. Dan-ho chu Israel hmêlmate tâna hlauhawm tak an ni dâwn a ni. Ram Tiam an pannaah “a hnuhnûng berah” awmin Israel hnam pum chu an vênghim a. (Num. 10:25) Dan-ho thiltih chu Israela thlah dangte’n hre vek lo mah se, chanvo pawimawh tak a ni.

7. Kan theocratic chanvo dawnte chu engtin nge kan thlîr ang?

⁷ Eng nge kan zir theih? Mi dangte hriat hlawh loh chanvo i dawng tawh ngai em? Kingdom Hall tihfai leh thawmṭhatna, a nih loh leh inkhâwmpuia hna thawk tûra inpêk ang chi chanvote i thawk pawh a ni thei a. Chutiang a nih chuan, i fakawm hle! Jehova’n a tâna i tih zawng zawngte chu a hmuin a ngaihlu tih hre reng ang che. A bîk takin, mi dangte fak hlawh duh vâng ni lova, amah i hmangaih tak zet tih lantîr i duh avâng zâwka a rawng i bâwlnate chu a ngaihlu a ni.—Mt. 6:1-4.

GADA

8. Engvângin nge Israel hmêlmate tân Gada thlahte chu beih an awlsam? (Genesis 49:19) (Bâwm en bawk rawh.)

⁸ Genesis 49:19 chhiar rawh. Jakoba chuan Gada chu râlin a bei dâwn tih a sawi lâwk a. Kum zabi hnih aia tam a liam hnu chuan Gada thlahte chu hmêlmate nêna inrîna, Jordan Lui chhak lamah chuan an awm a. Chûng an hmêlma hnamte chuan awlsam takin an bei thei a ni. Mahse, an ram chu ran tlatna atâna hmun ṭha tak a nih avângin, Gada thlahte chu an awm chhunzawm zêl a. (Num. 32:1, 5) Gad-ho chu mi huaisen tak an ni tih kan hre thei a ni. Chu bâkah, Pathian Jehova’n an hnêna a pêk ram chu râl laka an vênhimnaah a ṭanpui ang tih an ring tlat bawk a. Jordan Lui thlang lama Ram Tiam lâknaa an unaute ṭanpui tûrin an sipaite chu kum tam tak chhûng an kaltîr hial a ni. (Num. 32:16-19) An mipate awm loh hlânin, Pathianin an nupuite leh an fate chu a vênghim ang tih an ring a. An huaisenna leh inpêkna avângin Jehova’n mal a sâwm a ni.—Jos. 22:1-4.

9. Engtin nge Jehova rinchhanna chuan nuna kan duhthlanna siamte chu a nghawng ang?

⁹ Eng nge kan zir theih? Harsatnate kâra Jehova rawngbâwl tûr chuan amah kan rinchhan zawm zêl a ngai a. (Sâm 37:3) Tûn laia mi tam tak chuan theocratic in sakna project-a ṭanpui tûr te, mamawh zualna hmuna rawngbâwl tûr te, a nih loh leh chanvo dang thawk tûrtea inpêkna neiin Jehova an rinchhanzia an lantîr a. Jehova’n a ngaihsak reng ang tih an rin tlat avângin chutiang chuan an ti a ni.—Sâm 23:1.

ASERA

10. Aser-hovin engte nge an tih loh? (Genesis 49:20) (Bâwm en bawk rawh.)

¹⁰ Genesis 49:20 chhiar rawh. Jakoba chuan Asera thlahte chu an neinung ang tih a sawi lâwk a. Chutiang chiah chuan a thleng a ni. Asera thlahte ram chan zîngah chuan Israel rama lei ṭhat berna hmunte a tel a. (Deut. 33:24) An ram chu Mediterranean Tuipui depa awm niin, Sidon lawng chawlhna hmuna Phoiniki sumdâwnna hmunpui pawh a huam bawk a ni. Mahse, Aser-ho chuan Kanaan mite chu an hnawt chhuak vek lo. (Ro. 1:31, 32) Chuvângin, Kanaan mite thununna ṭha lo bâkah, an neihnunna chuan biakna thianghlim atâna an ṭhahnemngaihna chu a tikiam a ni thei a. Rorêltu Baraka’n Kanaan hnam ṭangrualte bei lêt tûra a sâwmna chu an chhâng lêt lo. Chuvângin, ‘Megiddo tui kianga’ Israelte’n hnehna an chan theih nâna Jehova’n thil mak tia a ṭanpui dânte chu an hmu ve lo a ni. (Ro. 5:19-21) Thlarauva thâwk khuma Baraka leh Debori’n, “Aser-ho chu tuifinriat kamah an ṭhu hle hle a,” tia hnehna hla an sak an hriat chuan Aser-ho chu an zak hle ngei ang. —Ro. 5:17.

11. Engvângin nge sum leh pai chungchânga thlîr dân inbûk tâwk kan neih reng a ngaih?

¹¹ Eng nge kan zir theih? Jehova chu kan neih ṭha ber pêk kan duh a. Chutianga ti tûr chuan, sum leh pai leh thil neihte chungchânga khawvêl thlîr dân chu kan hnâwl a ngai a ni. (Thuf. 18:11) Sum leh pai chungchânga thlîr dân inbûk tâwk neih reng kan tum a. (Thur. 7:12; Heb. 13:5) Kan mamawh tak tak loh thilte neih tumin kan hun leh tha kan khawhral lo. Chu aiin, nakinah nun nuam leh him kan nei dâwn tih kan hriat avângin, tûnah Jehova hnêna kan hun leh tha a ṭha thei ang bera pêk kan tum a ni.—Sâm 4:8.

NAPHTALIA

12. Eng kawngin nge Naphtalia malsâwmna dawn chu a thlen famkim? (Genesis 49:21) (Bâwm en bawk rawh.)

¹² Genesis 49:21 chhiar rawh. “Thu ṭha takte,” tia Jakoba sawi chuan leia rawng a bâwl chhûnga Isua thusawi dânte chu a kâwk thei a. Isua chuan Naphtali biala awm Kapernaum khawpuiah chuan hun tam tak a hmang a. Chuvângin, Kapernaum chu a chênna khua tia koh a ni. (Mt. 4:13; 9:1; Joh. 7:46) Isua nêna inkûngkaihin, Isaia’n Zebulun leh Naphtali-hote chuan “êng nasa tak” an hmu dâwn tih a sawi lâwk bawk. (Is. 9:1, 2) Isua chu a zirtîrna hmangin “êng dik tak, mi tin tiêngtu” a rawn ni ta a ni.—Joh. 1:9, NWT.

13. Engtin nge kan thusawite’n Jehova a tilâwm tih kan chian theih?

¹³ Eng nge kan zir theih? Kan thusawite leh kan thusawi dânte chu Jehova’n a ngai pawimawh a. Engtin nge amah tilâwmtu “thu ṭha takte” chu kan sawi theih ang? Thu dik sawina hmangin a ni. (Sâm 15:1, 2) Mi dangte fak uara sawisêl loh tumin mite chu kan tichak thei a. (Eph. 4:29) Chu bâkah, thu hrilh theihna kawng hawng thei tîtîna neih ṭan thiam lehzual kan tum thei bawk a ni.

JOSEFA

14. Josefa malsâwmna dawn thlen famkim dân chu hrilhfiah rawh. (Genesis 49:22, 26) (Bâwm en bawk rawh.)

¹⁴ Genesis 49:22, 26 chhiar rawh. Jakoba chuan Josefa chu a chhuang hle a. Jehova’n ani chu ‘a unaute hnên ata tihrangin’ kawng danglam takin a hmang a. Jakoba chuan ani chu “pêng rah duh tak,” tiin a ko va. Jakoba ngei chu a kûngpui niin Josefa chu a pêng a ni. Josefa chu Jakoba nupui duh tak Rakili fa tîr a ni a. Jakoba chuan Leaii fa tîr Reubena aiah Josefa’n fa tîr chanvo chu a dawn tûr thu a sawi a. (Gen. 48:5, 6; 1 Chro. 5:1, 2) Chu hrilh lâwkna chu thleng famkimin Josefa fapa Ephraima leh Manasea thlahte chuan hnam pahnih angin ram chu an chang a ni.—Gen. 49:25; Jos. 14:4.

15. Engtin nge Josefa’n rorêl dik lohna a hmachhawnte chu a chhân lêt?

¹⁵ Jakoba chuan Josefa chu thala ‘kâpa tiduhdahtu’ an awm thu a sawi a. (Gen. 49:23) Chûng mite chu tûn hmaa amah îtsîka a chunga rorêl dik lohna tam tak thlentu a unaute an ni. Chuti chung chuan, Josefa chu a unaute chungah emaw, Jehova chungah emaw lungni lovin a awm lo va. Chuvângin Jakoba chuan: “[Josefa] thalngul chu khauh takin a awm reng a, a kut thate chu,” tiin a sawi a ni. (Gen. 49:24) Josefa chuan harsatna a tawh chhûng zawngin Jehova a rinchhan a. A unaute chu a ngaihdam mai bâkah, ngilnei takin a cheibâwl bawk a ni. (Gen. 47:11, 12) A harsatna tawhte aṭangin a intâthriam a. (Sâm 105:17-19) Chuvângin, Pathian Jehova chuan ropui takin a hmang thei a ni.

16. Fiahna kan chhân lêt dânah engtin nge Josefa chu kan entawn theih?

¹⁶ Eng nge kan zir theih? Kan harsatna tawhte’n Pathian Jehova emaw, kan Kristian unaute emaw laka min tihhran chu i phal ngai lo vang u. Pathian chuan rinna fiahnate chu min zirtîrtu atân a hmang thei tih hre reng ang che. (Heb. 12:7) Chutiang zirtîrna chuan zahngaihna leh ngaihdamna ang chi, Kristian miziate chu nei chhova ṭha lehzuala lantîr tûrin min ṭanpui thei a. (Heb. 12:11) Jehova chuan Josefa hnêna lâwmman a pêk ang bawkin, kan chhelna avângin lâwmman min pe ang tih kan chiang thei a ni.

BENJAMINA

17. Engtin nge Benjamina chungchânga hrilh lâwkna chu a thlen famkim? (Genesis 49:27) (Bâwm en bawk rawh.)

¹⁷ Genesis 49:27 chhiar rawh. Jakoba chuan Benjamin-ho chu chinghnia ang maia inbeih thiam tak an nih tûr thu a sawi a. (Ro. 20:15, 16; 1 Chro. 12:2) Israel lalram din ṭanna “zîngah” chuan Benjamin hnama mi Saula chu Israel lal hmasa ber a rawn ni a. Ani chuan Philistia mite chu huaisen takin a bei a ni. (1 Sam. 9:15-17, 21) Israel lalna tâwp lam “tlai lamah” chuan Benjamin hnama mi Lalnu Estheri leh Prime Minister Mordekaia te chuan Israelte chu Persia Lalrama tihboral an nihna tûr lak ata an chhan chhuak a ni.—Est. 2:5-7; 8:3; 10:3.

18. Benjamin-hovin Jehova ruahmanna an thlâwp tlat dân chu engtin nge kan entawn theih?

¹⁸ Eng nge kan zir theih? Hrilh lâwkna thlen famkimna atâna an chipuite zînga mi ngei lal a rawn nih chuan, Benjamin-ho chu an lâwm hle ngei ang. Mahse, Pathianin lalna chu Juda hnama mi Davida hnêna a pêk chuan, Benjamin-ho chuan a hnuah ani chu an thlâwp leh ta tho a ni. (2 Sam. 3:17-19) Kum sâwmbi tam tak hnua Israela thlah dangte an hel khân, Benjamin-ho chuan Pathian ruat lal leh Juda-ho chu rinawm takin an thlâwp tlat a ni. (1 Lal. 11:31, 32; 12:19, 21) Keini pawh, tûn laia a mite kaihruai tûra Jehova ruatte chu i thlâwp tlat ang u.—1 Thes. 5:12.

19. Engtin nge Jakoba hrilh lâwkna hnuhnûngte chu kan hlâwkpui theih?

¹⁹ Jakoba hrilh lâwkna hnuhnûngte chu kan hlâwkpui thei a. A thlen famkim dân zirna chuan Jehova hrilh lâwkna Thu kan rinna chu a tinghet thei a ni. Chu bâkah, Jakoba fapate malsâwm an nih dân chhût ngunna chuan Pathian Jehova kan tihlâwm theih dân chu chiang lehzualin min hriatthiamtîr bawk.