Hriat Loh Chin I Nei Tih Thuhnuairawlh Takin Pawm Rawh

1. Pathian Jehova’n eng theihnate nge min pêk a, engvângin nge?

JEHOVA chuan ngaihtuah theihna, thil thar zir theihna, hriatthiamna tihpun theihna leh, finna lan chhuahtîr theihna neiin min siam a. Engvângin nge hetianga min siam? ‘Pathian hriatna chhar chhuak’ tûr leh kan ngaihtuah theihna hmang chunga a rawngbâwl tûra min duh vâng a ni.—Thuf. 2:1-5; Rom 12:1.

2. (a) Eng phâk chin nge kan neih? (Job. 37:23, 24) (Milem en bawk rawh.) (b) Engtin nge thuhnuairawlh taka kan phâk chin pawmna chu kan hlâwkpui?

² Thil tharte chu zir thei mah ila, hriat phâk chin kan nei a. (Joba 37:23, 24 chhiar rawh.) Joba hi han ngaihtuah teh. Jehova chuan a hnênah zawhna tam tak a zâwt a, chu chuan thil hriat loh tam tak a nei tih hre thiam tûrin a ṭanpui a. Chu a thiltawn chuan inngaihtlâwmna nei tûr leh a ngaihtuah dân siam ṭha tûrin a ṭanpui a ni. (Job. 42:3-6) Thil engkim kan hre vek lo tih thuhnuairawlh taka pawm chu kan tân pawh a ṭha a. Chutiang thuhnuairawlhna chuan thu tlûkna fingte siam tûra thil kan hriat ngai tak takte chu Jehova’n min hrilh ang tih ring tûrin min chêttîr a ni.—Thuf. 2:6.

3. He thuziakah hian eng nge kan sawiho vang?

³ He thuziakah hian kan hriat loh thil ṭhenkhatte leh chumi avânga kan tawh theih harsatna ṭhenkhat chu kan sawiho vang a. Thil ṭhenkhat kan hriat loh a ṭhat chhan pawh kan bih chiang bawk ang. Chûngte sawihona chuan “hriatna famkim neitu” Jehova chuan thil kan hriat ngai tak takte chu min hriattîr ang tih min rin nghehtîr lehzual dâwn a ni.—Job. 37:16.

TAWPNA A THLEN HUN TUR CHU KAN HRE LO

4. Matthaia 24:36-a sawi angin, eng nge kan hriat loh?

⁴ Matthaia 24:36 chhiar rawh. He khawvêl tâwp hun tûr chu kan hre lo va. Isua ngei pawhin leia a awm lai khân chumi “nî leh dârkâr” chu a hre lo.a A hnuah, a tirhkohte hnênah Hun Vawng Diktu Ropui, Jehova chuan thil ṭhenkhat thlen hun tûr chu ruat tûrin thuneihna a nei tih a sawi a ni. (Tirh. 1:6, 7) Jehova chuan tâwpna a lo thlen hun tûr chu a ruat tawh a; mahse, chumi thlen hun tûr tak lo ngaihruat chu kan tih tûr a ni lo.

5. Tâwpna thlen hun tûr kan hriat loh avângin engtin nge kan awm mai theih?

⁵ Isua thusawite ṭanchhanin, tâwpna chu engtia rei nge kan la nghah dâwn tih kan hre lo va. Chuvângin, a bîk takin Jehova nî chu hun rei tak chhûng kan lo nghâk tawh a nih chuan, beidawng leh lunghnual takin kan awm phah thei a ni. A nih loh leh, kan chhûngte emaw, mi dangte emaw nuihsawhna chu tawrh chhunzawm harsa kan ti thei bawk. (2 Pet. 3:3, 4) Chutih rualin, tâwpna thlen hun tûr kan hria a nih chuan, dawhthei taka nghah fan fan leh nuihsawhnate tawrh chu a awlsam phah lehzual dâwn niin kan ngai mai thei.

6. Engvângin nge tâwpna lo thlen hun tûr hriat loh chu a ṭhat?

⁶ Dik tak chuan, Jehova’n tâwpna thlen hun tûr chu min hrilh loh avângin, a rawng kan bâwl chhan chu amah hmangaiha kan rin avâng a ni tih lantîr theihna hun remchâng kan nei a ni. Jehova rawng chu tiam chin neiin—tâwpna lo thlen hma chhûng chauh—kan bâwl lo va; chatuana bâwl kan duh a ni. ‘Jehova nî’ a lo thlen hun tûr chauh ngaihtuah reng lovin, chumi nîin a thlen tûr thil ṭhate chu kan ngaihtuah zâwk tûr a ni a. Chutianga tihna chuan, Pathian min hnaihtîrin a lawm min hlawhtîr lehzual ang.—2 Pet. 3:11, 12.

7. Eng nge kan hriat?

⁷ Chutih rualin, tâwpna chungchânga kan thil hriatte ngaihtuah chu a pawimawh bawk a. Entîr nân, ni hnuhnûng chu kum 1914-ah a inṭan tih kan hria a ni. Jehova’n chumi chungchânga hrilh lâwknate chu Bible-ah a chuantîr mai bâkah, a hnua thilthleng tûrte pawh chipchiar takin a lo sawi lâwk a. Chuvângin, “LALPA ni ropui tak chu a hnai” tih kan chiang a ni. (Zep. 1:14) ‘Pathian Ram chanchin ṭha’ chu mi a tam thei ang berte hnêna hrilh tûrin Jehova’n min duh tih kan hre bawk a. (Mt. 24:14) Chu chanchin ṭha chu ram 240 vêlah ṭawng 1,000 chuanga hrilh mêk a ni. He hna pawimawh taka ṭhahnemngai taka tel tûrin a “nî leh dârkâr” chu kan hriat kher a ngai lo.

JEHOVA’N ENG NGE A TIH DAWN KAN HRE LO

8. ‘Pathian thiltih,’ tih ṭawngkam chuan eng nge a kawh? (Thuhriltu 11:5)

⁸ ‘Pathian thiltih’ dân chu kan hre thiam reng lo. (Thuhriltu 11:5 chhiar rawh.) ‘Pathian thiltih,’ tih ṭawngkam chuan a duh zâwng a thlen famkim theih nâna Jehova thiltihte emaw, thlentîr a remtihte emaw chu a kâwk a ni. Chuvângin, thil eng emaw thlentîr a remtih chhan, a nih loh leh min ṭanpui dân tûr tak chu chiang takin kan hre lo va. (Sâm 37:5) Chu chu tûn thlenga scientist-te’n an la hriatthiam theih loh, nu pum chhûnga nau insiam chhoh dân nên Bible chuan a tehkhin a ni.

9. Jehova min ṭanpui dân tûr kan hriat loh avângin, eng harsatnate nge kan tawh mai theih?

⁹ Jehova min ṭanpui dân tûr kan hriat lohna chuan tui lai rapin min siam thei a. Entîr nân, nun tihsamkhai emaw, Lalram thuchhuahtu mamawh zualna hmuna insawn emaw ang chi rawngbâwlna zauhna atâna inpêkna neih chu kan hreh thei a ni. A nih loh pawhin, kan thlarau lam thiltum kan hlen loh hunah te, rawngbâwlnaa kan thawhrimnaah rah ṭha tak kan hmuh loh hunah te leh, theocratic project eng emawa harsatna kan tawh hunahte Pathian pawm hlawh lo nia inhriatna kan nei thei bawk.

10. Jehova thiltih tûrte kan hriat lohna chuan eng mize pawimawh takte nge nei chho tûra min ṭanpui?

¹⁰ Dik tak chuan, Jehova thiltih tûrte kan hriat lohna chuan inngaihtlâwmna leh thuhnuairawlhna ang chi mize pawimawh takte nei chho tûrin min ṭanpui a. A ngaihtuahte leh a kawngte chu keini aia sâng zâwk a ni tih kan rawn hre thiam chho a ni. (Is. 55:8, 9) Kan thiltihtea hlawhtling tûra amah rinchhan lehzual dân kan zir bawk a. Rawngbâwlnaah emaw, theocratic project-ah emaw rah ṭha kan hmuh hian Jehova chu a phû angin kan chawimawi a ni. (Sâm 127:1; 1 Kor. 3:7) Kan beisei anga thil a thlen loh hunah pawh Pathianin engkim a hria tih kan hriat reng a ngai a. (Is. 26:12) Kan tih tûrte chu tiin, Jehova’n min ṭanpui ang tih kan ring chhunzawm zêl a. Hmân laia a tih ang khân thil makte ti tawh lo mah se, kan mamawh kaihhruainate chu min pe ang tih kan ring nghet tlat a ni.—Tirh. 16:6-10.

11. Eng thil pawimawh takte nge kan hriat?

¹¹ Jehova chu hmangaihnaa khat, dik taka thil ti ṭhîn leh, fing tak a ni tih kan hria a. Amah leh kan unaute tâna kan thiltihte chu a ngaihlu hle tih pawh kan hria a. Chu bâkah, a chunga rinawmte chu lâwmman a pe ṭhîn tih kan hre bawk.—Heb. 11:6.

A TUKA THIL THLENG TUR KAN HRE LO

12. Jakoba 4:13, 14-a sawi angin, eng nge kan hriat loh?

¹² Jakoba 4:13, 14 chhiar rawh. Thil chiang tak pakhat chu kan nun kal zêl dân tûr kan hre lo tih hi a ni. He kal hmanga kan awm chhûng hi chuan “hun leh beisei loh thilthlengte” thununna hnuaiah kan awm a. (Thur. 9:11, NWT) Chuvângin, kan ruahmannate a hlawhtlin dâwn leh dâwn loh emaw, kan dam chhûngin kan tihhlawhtlin theih dâwn leh dâwn loh emaw kan hre lo.

13. Thil lo thleng tûr kan hriat lâwk lohna chuan engtin nge min nghawng theih?

¹³ Thil thlen dân tûr dik tak kan hriat lâwk loh avângin chhelna lantîr a harsa thei a. Engtin nge? Thil thleng theite chungchânga kan lungkhamna chuan kan hlimna a la bo thei a ni. Kan hriat lâwk loh thilthlengte leh tawh sualte chuan lungchhe tak leh rilru buai takin min siam thei a. Kan beisei anga thil a thlen loh hian beidawng leh lunghnual takin kan awm thei bawk a ni. —Thuf. 13:12.

14. Kan hlimna dik tak chu engah nge a innghah? (Milem en bawk rawh.)

¹⁴ Harsatnate chu chhel taka kan tawrh chhuah hian, hmasialna ni lovin, hmangaihna avâng zâwkin kan Pa vâna mi rawng kan bâwl tih kan lantîr a. Pathian Jehova’n harsatna zawng zawng laka min vênhim kan beisei tûr a ni lo tih leh, kan nuna thilthlengte chu a ruat lâwk lo tih Bible-in a târ lang a. Kan hlimna chu hma lam huna thil thleng tûr kan hriat leh hriat lohvah a innghat lo tih a hria a. Chu aiin, a kaihhruaina leh a thuawihnaah a innghat zâwk a ni. (Jer. 10:23) A kaihhruaina dîla thu tlûknate kan siam hian, “Lalpan rem a tih chuan kan dam ang a, chu mi kha mi kan ti ang,” tia sawi ang kan ni.—Jak. 4:15.

15. Hma lam hun chungchângah eng nge kan hriat?

¹⁵ Nî tina thil thleng tûrte chu hre lo mah ila, Jehova’n vânah emaw, leiah emaw chatuana nunna pêk min tiam tih kan hria a. Dâwt a sawi thei lo tih leh a thiltumte hlen lo tûrin eng mahin a dâl thei lo tih pawh kan hria a ni. (Tit. 1:2) Amah chauhvin ‘a tâwp tûr chu a tîr aṭang rêngin a sawi ṭhîn a, thil la tih lohte chu hmasâng aṭang rêngin a sawi ṭhîn.’ Chu chu hun kal tawhahte khân a thleng dik a, hun lo la awm tûrah pawh a thleng dik ang. (Is. 46:10) Min hmangaih lo tûrin eng thil mahin Jehova a dang thei lo tih chiang takin kan hria a ni. (Rom 8:35-39) Kan tawh theih eng pawh tuar chhuak tûra kan mamawh finna, thlamuanna leh, chakna chu min pe dâwn a. Min ṭanpuiin mal min sâwm ang tih kan chiang thei a ni.—Jer. 17:7, 8.

JEHOVA MIN HRIAT CHIANZIA CHU KAN HRE THIAM TAK TAK THEI LO

16. Sâm 139:1-6-a sawi angin, kan hriatthiam tak tak theih loh tûr eng thil nge Jehova’n a hriat?

¹⁶ Sâm 139:1-6 chhiar rawh. Min Siamtu chuan siam kan nih dân bâkah, kan pian phung, rilru vei zâwng leh, ngaihtuah dân te thununtu chu a hria a. Min ngaihven reng a ni. Ani chuan kan thusawite leh kan sawi tumte, kan thiltihte leh kan tih chhante chu a hria a. Lal Davida sawi angin, Jehova chu min ṭanpui tûrin kan bul hnaiah a awm reng a ni. Lei leh vâna Lal Chungnungber, Siamtu engkimtitheiin heti khawpa min ngaihsak hi a va ropui tak êm! Chuvângin: “Chuti kauva hriatna chu ka tân a mak lutuk a; a sâng êm a, ka phâk lo a ni,” tiin Davida chuan a sawi a ni.—Sâm 139:6.

17. Engvângin nge Jehova min hriat chianzia chu pawm harsa kan tih mai theih?

¹⁷ Kan chhûngkaw ṭobul, kan hnam dân leh, tûn hmaa kan sakhaw vawn te avângin, Jehova chu min ngaihsaktu Pa hmangaihna ngah tak anga thlîr chu kan tân a har thei a. A nih loh leh, tûn hmaa sual pawi tak kan lo tih tawh avângin Jehova’n min hre duh lovin, kan hlatah a awm niin kan ngai thei a. Chutiang ngaih dân chu Davida pawhin a lo nei ṭhîn a ni. (Sâm 38:18, 21) Chu bâkah, tih tak zeta a nun dân thlâk danglama Pathian tehna felte mila nun tum tu emaw chuan: ‘Pathianin min hre thiam tak tak a nih chuan, engvângin nge ka tâna nun dân pângngai tak hi hnâwl tûra min beisei?’ tiin a ngaihtuah mai thei.

18. Jehova’n mahni kan inhriat aia chiangin min hria tih pawm chu engtin nge kan hlâwkpui? (Milem en bawk rawh.)

¹⁸ Mahni kan inhriat aia chiangin Pathianin min hria tih leh kan hmuh loh keimahnia ṭhatna awm min hmuhsak tih pawm chu kan zir thei a. Ani chuan kan rilru vei zâwngte leh kan thiltih chhante chu hre thiamin kan ṭhat famkim lohnate chu hmu mah se, min hmangaih a ni. (Rom 7:15) Jehova’n kan theihna min hmuhsak tih hriat chu kan ngaihhlut poh leh, rinawm tak leh hlim taka a rawngbâwl tûrin rinnghehna kan nei tam lehzual sauh vang.

19. Jehova chungchângah eng nge chiang taka kan hriat?

¹⁹ Jehova chu hmangaihna a ni tih kan hria a. Chu chu rinhlelh nachhan tûr rêng a awm lo. (1 Joh. 4:8) A tehna felte chuan min hmangaihzia a târ lang tih leh kan ṭhatna tûr a ngaihtuah reng ṭhîn tih kan hria a. Chatuana nunna kan neih a duh tih kan hre bawk. Chutiang ni thei tûr chuan tlanna min buatsaihsak a. Tlanna thilpêk chuan ṭha famkim lo chung pawhin, Jehova kan tilâwm thei tih min rin nghehtîr a ni. (Rom 7:24, 25) “Pathian chu kan rilru aiin a ropui zâwk a, engkim a hre si a.” (1 Joh. 3:19, 20) Ani chuan kan nihna engkim a hria a, a duh zâwng tihnaah kan hlawhtling thei tih a ring tlat a ni.

20. Engin nge ṭûl lo taka lungkhamna neih pumpelh tûrin min ṭanpui ang?

²⁰ Jehova chuan kan hriat ngei ngei ngaite chu kan lakah a thup lo. Chu thu dik chu thuhnuairawlh taka kan pawm chuan, kan thunun theih loh thilte avânga ṭûl lo taka lungkhamna neih chu pumpelhin, thil pawimawh zâwkte chu kan ngaihven tlat thei ang. Chutianga tiin, ‘hriatna famkim Neitu’ Jehova chu kan rinchhan pumhlûm tih kan lantîr a. (Job. 36:4) Thil ṭhenkhat chu hre thiam vek rih lo mah ila, chatuana kan Pathian Ropui tak chungchâng zir a, a hnên aṭanga thil tharte zir hlân chu kan va nghâkhlel tak êm!—Thur. 3:11.