Jakoba Hrilh Lâwkna Hnuhnûngte Aṭanga Kan Zir Theihte—Ṭhen 1

1-2. A thih dâwn hnaihah Jakoba chuan eng nge a tih a, engvângin nge? (A kâwma milem en bawk rawh.)

JEHOVA chhiahhlawh rinawm Jakoba chu Kanaan ram aṭanga Aigupta rama a chhûngte nêna an pêm hnu aṭangin kum 17 vêl a ni tawh a. (Gen. 47:28) Chutih hun chhûng chuan, a fapa duh tak Josefa nêna an intawn leh avâng leh chhûngkaw kima an awm leh theih avângin a hlim hle a ni. Mahse, a thi mai tawh dâwn tih a hria a. Chuvângin, chhûngkuaa inhmuh khâwmna pawimawh tak neih a rawt a ni.—Gen. 49:28.

² Chûng hun lai chuan, chhûngkaw lûte chuan an thih dâwn hnaihah an chhûngte chu ko khâwmin thuchah hnuhnûng an sawi ṭhîn a. (Is. 38:1) Chûng inhmuh khâwmnaahte chuan, an dawta chhûngkaw lû rawn ni tûrte chu an ruat ṭhîn a ni.

3. Engvângin nge Genesis 49:1, 2-a Jakoba thusawite chuan awmzia a neih lehzual?

³ Genesis 49:1, 2 chhiar rawh. Mahse, chu chu chhûngkaw inhmuh khâwmna pângngai mai a ni lo. Jakoba chu zâwlnei a ni a. Chu inhmuh khâwmnaah chuan, Jehova’n a thlahte chunga nasa taka nghawng nei tûr thilthleng pawimawh takte chungchâng sawi tûrin thlarauvin a thâwk khum a. Chuvângin, Jakoba thusawite chu a hrilh lâwkna hnuhnûngte anga sawi ṭhin a ni.

4. Jakoba hrilh lâwkna hnuhnûngte kan zir chian hunah, eng nge kan hriat reng ang? (“Jakoba Chhûngkua,” tih bâwm chu en bawk rawh.)

⁴ He thuziakah hian, a fapa pali Reubena, Simeona, Levia leh, Juda te hnêna Jakoba thusawite chu kan ngaihtuahho vang a. A dawta thuziakah chuan, a fapa dang pariatte hnêna a thusawite chu kan sawiho bawk ang. Kan la hriat tûr angin, Jakoba chuan a fapate mai ni lovin, nakina Israel hnam rawn ni tûr an thlah lo la awm tûrte chungchâng pawh a sawi a. Israel hnam chanchin zir chianna aṭangin Jakoba hrilh lâwkna thute thlen famkim dân chu kan hre chiang thei a ni.

REUBENA

5. Eng chanvo hlu nge Reubena chuan a pa hnên aṭanga dawn a inbeisei mai theih?

⁵ A hmasa berin, Jakoba chuan Reubena hnênah: “Nang hi ka fa tîr i ni,” tiin a sawi a. (Gen. 49:3) Fa tîr a nih angin, Reubena chuan a pa ro zînga a leh hnih dawn a inbeisei ngei ang a. A pa thih hnua chhûngkaw lû rawn nih a, a thlahte hnêna chu chanvo hlan chhâwn pawh a inbeisei ngei ang.

6. Engvângin nge Reubena chuan fa tîr chanvo a dawn loh? (Genesis 49:3, 4)

⁶ Mahse, Reubena chuan fa tîr chanvo chu a dawng lo. (1 Chro. 5:1) Engvângin nge? Kum eng emaw zât kal taa a pa hmei Bilhaii a mutpui vâng a ni a. Bilhaii chu Jakoba nupui duh tak Rakili bâwihnu a ni. (Gen. 35:19, 22) Reubena chu Jakoba nupui dang Leaii fapa a ni a. Ani chuan tisa châkna avânga chutianga ti chu a ni thei a. A nih loh pawhin, Bilhaii’n a nu aia a pa hmangaihna a dawn a hlauh avânga chutianga ti chu a ni thei bawk.—Genesis 49:3, 4 chhiar rawh.

7. Reubena leh a thlahte chungah eng thil nge thleng? (“Jakoba Hrilh Lâwkna Hnuhnûngte,” tih bâwm chu en bawk rawh.)

⁷ Jakoba chuan Reubena hnênah: “Chungnun berna chu i nei lo vang,” tiin a sawi a. Chûng thute chu a thleng dik a ni. Reubena thlahte zîngah lal, puithiam, a nih loh leh zâwlnei rawn ni chhinchhiah tu mah an awm lo. Chutih rualin, Jakoba chuan ani chu a thlauthla chuang lo va, a thlahte pawh Israel hnam zînga chhiar tel an ni tho a ni. (Jos. 12:6) Reubena chuan dinhmun dangahte chuan mize ṭha takte a lantîr a; chu bâkah, a thil sual tih chu a tinawn leh tih chhinchhiahna a awm lo bawk.—Gen. 37:20-22; 42:37.

8. Reubena chanchin aṭangin eng nge kan zir theih?

⁸ Eng nge kan zir theih? Insûm theihna nei tûr leh nungchang bawlhhlawhna hnâwl tûrin ṭan kan lâk a ngai a. Thil sual ti tûra thlêm kan nih hunah, kan thiltihin Jehova, kan chhûngte leh, mi dangte rilru a tihnat dân tûr chu kan ngaihtuah tûr a ni a. “Miin a theh apiang, chu mi vêk chu a seng bawk dâwn” tih chu kan hre reng bawk tûr a ni. (Gal. 6:7) Chutih rualin, Reubena chunga thilthlengte chuan Jehova zahngaihna chu min hriat nawntîr bawk a. Ani chuan kan thil tihsual sawhkhâwkte lakah min vênghim dâwn lo mah se, thil dik ti tûra ṭan kan lâknate chu mal a sâwm dâwn a ni.

SIMEONA LEH LEVIA

9. Engvângin nge Jakoba chu Simeona leh Levia chunga a lungawi loh? (Genesis 49:5-7)

⁹ Genesis 49:5-7 chhiar rawh. A dawtah, Jakoba’n Simeona leh Levia te a biak chuan, an chunga a lâwm lohzia tilangtu ṭawngkam na takte a hmang a. Kum tam tak kal ta khân, Jakoba fanu Dinaii chu Kanaan mi Sekema chuan a pâwngsual a. An farnu chunga thilthleng avânga Jakoba fapate an thin a rim chu hriatthiamawm hle mah se, Simeona leh Levia chuan tharum an thawh a ni. Sekem khaw mite hnênah serh an tan chuan remna an siampui tûr thu sawiin an bum a. Chûng mite chuan an sawi ang chuan an ti ta a. An serh tan avânga nâ an la tawrh laiin Simeona leh Levia chuan “an khandaih keng ve vein, a rûkin khua chu an bei a, mipa zawng zawng chu an that zo phiar a.”—Gen. 34:25-29.

10. Engtin nge Simeona leh Levia chungchânga Jakoba hrilh lâwkna chu a thlen famkim? (“Jakoba Hrilh Lâwkna Hnuhnûngte,” tih bâwm chu en bawk rawh.)

¹⁰ Jakoba chu a fapa pahnihte tharum thawha chêt lâkna chuan a tithinur hle a. Chuvângin, Israel rama ṭhen hran leh tihdarha an awm tûr thu a sawi lâwk a ni. Chûng hrilh lâwknate chu kum 200 aia tam a liam hnu, Ram Tiama Israelte an luh khân a thleng famkim a. Simeon hnam chuan Juda hnam biala ram ṭhenkhat chu an chang a. (Jos. 19:1) Levi-ho chuan Israel rama hmun hrang hrangah khawpui 48 an chang bawk a ni.—Jos. 21:41.

11. Simeon leh Levi-ho chuan eng thil ṭhate nge an tih?

¹¹ Simeona leh Levia thlahte chuan an pate thil tihsual ang chu an ti ve lo va. Levi-ho chuan biakna thianghlim chu rinawm takin an thlâwp a ni. Sinai Tlânga Mosia’n Pathian hnên aṭanga Dân thupêk a dawn lai khân, Israel mi tam tak chu bâwngno lem biaknaah an inhnamhnawih a. Mahse, Levi-ho chu Mosia lamah an ṭang a, biakna dik lova telte tihboralnaah an ṭanpui a ni. (Ex. 32:26-29) Pathian Jehova chuan Levi-ho chu tihrangin puithiam nih theihna chanvo hlu a pe a. (Ex. 40:12-15; Num. 3:11, 12) A hnua Ram Tiam lâknaah, Simeon-ho chuan Pathian thiltum nêna inmilin Juda-ho chu huaisen takin râl an beihpui a ni.—Ro. 1:3, 17.

12. Simeona leh Levia chanchin aṭangin eng nge kan zir theih?

¹² Eng nge kan zir theih? Thinrimna chu i thu tlûkna siamte leh thiltihte thununtîr ngai suh. Nangmah emaw, i hmangaih tak tu emaw dik lo taka cheibâwl in nih hian thinrim chu thil pângngai tak a ni a. (Sâm 4:4) Mahse, Pathianin thinur taka thusawi leh thiltihte chu a lâwm lo tih kan hre reng tûr a ni. (Jak. 1:20) Kohhran chhûng lam leh pâwn lama kan tawh rorêl dik lohnate chu Bible thu bulte nêna inmila kan hmachhawn chuan, thunun loh thinurnain a thlen theih thil ṭha lote chu kan pumpelh thei dâwn a ni. (Rom 12:17, 19; 1 Pet. 3:9) I nu leh pate’n Jehova tilâwm lotu thilte an tih pawhin i tih ve kher a ngai lo tih hre reng la. Jehova tilâwmtu thilte i tih chuan a malsâwmna i dawng dâwn tih hre reng ang che. Thil dik ti tûra i ṭan lâknate chu malsâwmsak chein, lâwmman a pe dâwn che a ni.

JUDA

13. Engvângin nge Juda chuan a hnêna a pa thusawi hun a lo thlen chuan hlauhthâwnna a neih mai theih?

¹³ A dawtah, Jakoba chuan Juda chu a bia a. A ute hnêna a pa thusawite a hriat hnu chuan, Juda chuan hlauhthâwnna a neih a rinawm. Ani pawhin sual pawi takte a lo ti tawh a. Sekem khaw rawknaah a tel ve ngei niin a lang. (Gen. 34:27) An nau Josefa sala hralhnaah leh an pa bumnaah chuan a unaute chu a thurualpui a. (Gen. 37:31-33) A hnuah, a monu Tamari chu nawhchizuar nia ngaiin a mutpui bawk a ni.—Gen. 38:15-18.

14. Juda chuan eng thil ṭhate nge a lo tih tawh? (Genesis 49:8, 9)

¹⁴ Mahse, thlarauva thâwk khuma awmin Jakoba chuan Juda hnênah malsâwmna leh fakna thute chauh a sawi a. (Genesis 49:8, 9 chhiar rawh.) Juda chuan an pa upa tawh tak chungah nasa takin ngaihsakna a lantîr ṭhîn a. Chu bâkah, an naupang ber Benjamina chungah khawngaihna a lo lantîr bawk a ni.—Gen. 44:18, 30-34.

15. Eng kawngtein nge Juda chuan malsâwmna tam tak a dawn?

¹⁵ Jakoba chuan Juda chu a unaute zîngah hotu a ni dâwn tih a sawi lâwk bawk a. Mahse, chu hrilh lâwkna chu a hnu daihah a thleng famkim a ni. Kum 200 hnua Israel mite Aigupta aṭanga Ram Tiam lam pana thlalêra an kalnaah chuan, Juda hnam chu hmahruaitu anga a vawikhatna atâna târ lan a ni. (Num. 10:14) Kum sâwmbi tam tak hnua, Ram Tiam lâknaah pawh Juda hnam chuan hma a hruai leh a. (Ro. 1:1, 2) Davida chu Juda hnam aṭanga lo chhuak lalte zînga a hmasa ber a ni bawk. Mahse, Jakoba hrilh lâwkna chuan thlen famkimna dang tam tak pawh a nei a ni.

16. Engtin nge Genesis 49:10-a hrilh lâwkna chu a thlen famkim? (“Jakoba Hrilh Lâwkna Hnuhnûngte,” tih bâwm chu en bawk rawh.)

¹⁶ Jakoba chuan mihringte chunga chatuana Rorêltu tûr chu Juda thlah a nih tûr thu a sawi a. (Genesis 49:10 chhiar rawh.) Chu Rorêltu tûr chu Jakoba’n Silova tia a koh Isua Krista a ni. Vântirhkoh pakhatin Isua chungchângah: “Pathian Jehova chuan a pa Davida lalṭhutthlêng a pe ang,” tiin a sawi a. (Lk. 1:32, 33, NWT) Chu bâkah, Isua chu “Sakeibaknei, Juda hnama mi” tia koh a ni bawk.—Thup. 5:5.

17. Engtin nge mi dangte kan thlîr dânah Jehova kan entawn theih?

¹⁷ Eng nge kan zir theih? Juda chuan sual pawi takte lo ti tawh mah se, Jehova’n ani chu mal a sâwm a ni. Mahse, a unaute chuan Jehova’n mal a sâwm chu mak an ti mai thei. Eng pawh chu ni se, Pathianin Juda ṭhatna lai chu hmuhsakin mal a sâwm a ni. Engtin nge Pathian Jehova chu kan entawn theih? Kan unau tu emawin chanvo pawimawh tak a dawn hian, a famkim lohnate ngaihtuahin chu chanvo pêk a nih chhan chu mak kan ti mai thei a. Mahse, a mize ṭhate chungah chuan Jehova a lungawi tih kan hre reng tûr a ni. Pathian chuan a mite ṭhatna lai chu a zawng a. Chuvângin, chutianga ti tûrin theih tâwp i chhuah ang u.

18. Engvângin nge dawhtheihna kan neih a ngaih?

¹⁸ Juda chanchin aṭangin dawhtheih a ngaihzia pawh kan zir thei a. Pathian Jehova chuan a thutiamte chu thlentîr ziah mah se, kan beisei dân leh beisei hunah a thlentîr reng lo. Juda thlahte chuan Pathian mite zîngah hma an hruai nghâl lo va. Chuti chung chuan, Levia mi Mosia, Ephraim mi Josua leh, Benjamin hnama mi Lal Saula ang chi, hmahruai tûra Pathian ruat apiangte chu rinawm takin an thlâwp a ni. Tûn laia a mite zînga hmahruai tûra Pathian ruat apiangte chu i thlâwp ve tlat ang u.—Heb. 6:12.

19. Jakoba hrilh lâwkna hnuhnûngte chungchâng sawihona aṭangin Jehova chungchâng eng nge kan hriat?

¹⁹ Jakoba hrilh lâwkna hnuhnûngte chungchâng sawihona aṭangin engte nge kan hriat? “Lalpa chuan mihring en dân angin a en ve si lo” tih chu a chiang hle a. (1 Sam. 16:7) Jehova chu a dawhtheiin ngaihdam a peih a ni. Thil ṭha lo chu ngai thei lo mah se, amah betute hnên aṭangin ṭhat famkimna a phût lo va. Tûn hmaa sual pawi tak titute pawh simna dik tak an lantîr a, thil dik tih an tum tlat chuan mal a sâwm a ni. A dawta thuziakah chuan, a fapa dang pariatte hnêna Jakoba thusawite chu kan ngaihtuahho vang.