Ṭhian Ṭha Tak Nih Theih Dân
HARSATNA i tawhte chu mahnia hmachhawn ngai nia hriat châng i nei ṭhîn em? ‘Hun khirh takahte’ kan nun avângin lunghnualna leh mal nia inhriatna kan nei thei a ni. (2 Tim. 3:1) Mahse, nuna harsatnate chu mahnia kan hmachhawn a ngai lo. Bible chuan “mangan nî atâna” ṭhian ṭhate neih hlutzia chu a târ lang a ni.—Thuf. 17:17.
ṬHIAN ṬHATE’N MIN ṬANPUI THEIH DAN
Ina tântîr ni mah se, tirhkoh Paula chuan a ṭhian rinawmte ṭanpuinain a rawngbâwlna a hlen thei
Tirhkoh Paula chuan a khual zinpuite nêna an inṭhianna chu a hlâwkpui hle a. (Kol. 4:7-11) Rom khuaa tântîr a nih khân, a ṭhiante chuan a tih theih loh thilte chu an tihsak a ni. Entîr nân, Philippi khuaa unaute’n Paula hnêna a thil mamawh an thawnte chu Epaphrodita chuan a kensak a. (Phil. 4:18) Tukika chuan kohhran hrang hrangte hnênah Paula lehkhathawnte chu a kensak bawk a. (Kol. 4:7) Chutiang chuan, Paula’n ina tântîr emaw, tân ina khung emaw a nih lai pawhin a unaute ṭanpuinain a rawngbâwlna chu a hlen thei a ni. Tûn laiah, engtin nge ṭhian ṭha i nih theih ang?
Tûn laia unaute thiltawnte chuan ṭhian ṭhate hlutna chu a târ lang a. Spain rama regular pioneer Elisabet-i tâna ṭhian a nihzia lantîrtu unaunu chungchâng hi han ngaihtuah teh. Elisabet-i nu chuan enkawl dam theih loh cancer a neih chuan, chu unaunu chuan Bible chângte ṭanchhana ziah text message tam tak a thawn a. Elisabeti chuan: “Chûng message-te chuan nî tin mal nia inhriatna nei lova ka harsatnate hmachhawn tûrin chakna min pe a ni,” tiin a sawi.—Thuf. 18:24.
Kohhran thiltihnatea unaute thawhpuiin kan inṭhianna chu kan tinghet thei a. Entîr nân, kum upa unau tu emaw chu inkhâwmnaah leh rawngbâwlnaah motor-in i hruai thei ang em? Chutianga i tih chuan, intihchak tawnna thlen thei thute chu in sawi dûn thei ngei ang. (Rom 1:12) Chutih rualin, Kristian ṭhenkhatte chuan in an chhuahsan thei lo a ni. Engtin nge an tân ṭhian ṭha kan nih theih ang?
IN CHHUAHSAN THEI LOTE TAN ṬHIAN ṬHA NI RAWH
Unau ṭhenkhat chu hrisêl lohna vâng emaw, dinhmun dangte avângin emaw inkhâwmnaah a takin an rawn tel thei lo va. Cancer natna chi khat lymphoma tuar David-a chungchâng hi lo ngaihtuah ta ila. Thla ruk chuang chemo a la a. A inenkawl chhûng zawngin, a nupui Lidia-i nên online aṭangin an inkhâwm ṭhîn a ni.
Kohhrana an ṭhiante hnên aṭangin eng ṭanpuinate nge an dawn? Inkhâwm bânah, an zînga ṭhenkhat chuan Kingdom Hall aṭangin videoconference hmangin David-a leh Lidia-i te chu an be ṭhîn a. Chu bâkah, David-a te nupain chhânna an pêk hian a hnuah unaute hnên aṭangin mi tichak thei text message-te an dawng ṭhîn a ni. Eng nge a rah chhuah? David-a leh Lidia-i te chuan mal niin an inhre lo a ni.
In chhuahsan thei lote chu rawngbâwlnaah telpui rawh
Rawngbâwlnaah in chhuahsan thei lo unaute chu kan teltîr thei ang em? Insiamremna tlêm tê neiin chûng unaute chu kan theihnghilh lo tih kan hriattîr thei a ni. (Thuf. 3:27) Lehkhathawn emaw, phone emaw hmanga thu hrilhna neihpui tûrin engvângin nge ruahmanna i siam loh vang? Chûng in chhuahsan thei lote chu videoconference hmangin rawngbâwlna inkhâwmah an rawn tel pawh a ni thei a. He ruahmanna hi David-a leh Lidia-i te chuan an ngaihlu hle a ni. David-a chuan: “Kan rawngbâwlna group nêna rei lo te chhûng sawihona neih a, ṭawngṭaina chuan min tichak hle,” tiin a sawi a ni. Chu bâkah, dinhmunin a zira a him bawk chuan, in chhuahsan thei lo unau tu emaw ina i Bible zirpui nêna zirna nei tûrin ruahmanna i siam thei ang em?
In chhuahsan thei lo unaute thawhpuia an mize ṭhate hmuhna chuan anmahni nên min inhnaihtîr lehzual thei a. Entîr nân, anni chu rawngbâwlnaa i telpui a, tu emaw thinlunga Pathian Thu thlen tûra thiam taka Bible an hman dân i hmuh hian i ngaina lehzual a ni. Unaute chu thlarau lam thiltihnatea kan telpuina aṭangin ṭhian tam lehzual kan siam thei bawk a ni.—2 Kor. 6:13.
Tita’n a va hmuh hnuah chuan Paula chu thlamuang takin a awm thei ta a. (2 Kor. 7:5-7) He thilthleng hian a mamawhte hnêna ṭawngkama khawngaihna lantîr mai bâkah, an bul hnaia awma anmahni ṭanpui tûra kan tih theih apiang tiin thlamuang takin kan awmtîr thei tih min hriat nawntîr a ni.—1 Joh. 3:18.
TIHDUHDAHNA A THLEN HUNAH ṬHIAN ṬHA TAK NI RAWH
Russia rama kan unaute chuan inṭanpui tawnna kawngah entawn tûr ṭha tak an siam a. Sergey-a leh a nupui Tatyana-i te thiltawn hi lo ngaihtuah ta ila. Police-te’n an in an dap hnuah thu zâwt fiah tûrin an hruai a. Tatyana-i chu chhuahtîr hmasak niin inah a haw a ni. “Ina [Tatyana-i] a thlen veleh, unaunu huaisen tak pakhat hian a rawn tlawh vat a. Kan ṭhian dangte pawh a hnua rawn kalin kan in chhûng chu min rem felsak leh a ni,” tiin Sergey-a chuan a sawi.
Sergey-a vêk chuan: “Thufingte 17:17-na hi ka châng duh tak a ni a, chutah chuan: ‘Ṭhian chuan englai pawhin a hmangaih reng a, mangan nî atâna unauva piang a ni,’ tiin a inziak a ni. Tihduhdahna chu mahni chauhva hmachhawn harsa ka tih hunahte hian, chûng thute chuan awmzia a nei lehzual a. Pathian Jehova’n huaisen taka min ṭanpuitu ṭhiante min pe a ni,” tiin a sawi belh bawk.
Dinhmun khirh lehzualte kan hmachhawn hian kan rinchhan theih ṭhiante kan mamawh a. Hrehawm nasa tak chhûngin kan mamawh lehzual dâwn a ni. Chuvângin, tûn aṭangin theih tâwp chhuahin ṭhian ṭha nih i tum ṭheuh vang u!—1 Pet. 4:7, 8.