Mi Tin Zawh Theih Zawhna Tluangtlam Tak

Mary-i leh a pasal John-aa chu Philippines ram aṭanga hnathawk tûra lo kal mi tam tak awmna ramah an chêng a. An hnênah chanchin ṭha an hrilh ṭhîn a ni. COVID-19 hripui lên chhûng khân, Mary-i chuan a awmna ram mai bâkah, ram dangahte pawh Bible zirpui a nei thei a ni. Engtin nge a tih?

Mary-i chuan a Bible zirpuite hnenah: “Bible zir duh âwm mi dang hriat i nei em?” tiin a zâwt ṭhîn a. Hriat an neih chuan amah nêna inhmêlhriattîr tûrin a ti ṭhîn a. Chu zawhna tluangtlam tak chuan rah ṭha a chhuah fo a ni. Engvângin nge? A chhan chu Pathian Thu ngaihlutute chuan an thu zirte chu an chhûngkhatte leh ṭhiante hnêna hrilh an duh ṭhin vâng a ni. A nih leh, Mary-i’n chu zawhna a zawh hnuah eng thil nge thleng?

Mary-i zirpui Jasmine-i chuan Bible zir duh mi pali a hmêlhriattîr a. An zînga pakhat, Kristine-i chuan zirna neih chu nuam a tih êm avângin chawlhkâr khata vawi hnih zir a rawt hial a ni. Mary-i’n Bible zir duh mi dang hriat a neih leh neih loh a hnêna a zawh chuan, “Aw nei e, ka ṭhiante ka hmêlhriattîr dâwn che nia,” a ti a. Chawlhkâr rei lo te chhûngin, Kristine-i chuan Bible zir duh a ṭhian palite a hmêlhriattîr a. A hnuah pawh Mary-i chu a ṭhian dangte a hmêlhriattîr leh a, anni pawhin a hnênah mi dangte an hmêlhriattîr leh chhâwng a ni.

Kristine-i chuan Philippines-a awm a chhûngte pawh Bible zir tûra a duh êm avângin, a fanu Andrea-i chu a be ta a ni. A tîrah Andrea-i chuan, ‘Thuhretute chu pâwl maksak tak an ni, Isua an ring lo va, Thuthlung Hlui chauh an ring,’ tiin a lo chhâng a. Mahse, vawi khat Bible an zir hnu chuan Thuhretute chungchânga a thu hriatte chu a dik lo tih a hre ta a. Zirna an neih chhûng chuan, “Bible sawi a nih phawt chuan a dik ngei ang!” tiin a sawi ṭhîn a ni.

A hnuah, Andrea-i chuan Mary-i chu a ṭhian pahnih leh a hnathawhpui pakhat a hmêlhriattîr a, anni pawhin Bible an zir ṭan a ni. Chu bâkah, Mary-i hriat lohvin Andrea-i nî mitdel Angela-i chuan zirna an neih laiin a lo ngaithla ve ṭhîn a. Ni khat chu, Andrea-i hnênah Mary-i nêna Bible zir ve a duh thu a hrilh a. A thu zirte chu ṭha a ti hle a ni. Thla khat chhûngin Bible châng tam tak a by-heart a, chawlhkâr khatah vawi li a zir bawk! Andrea-i ṭanpuinain inkhâwmte chu videoconference hmangin a tel ziah thei a ni.

Kristine-i pasal Joshua-a chu zirna an neih chhûngin a hnungah a lo awm ve ṭhîn tih Mary-i’n a hriat chuan, Bible zirnaa tel a duh leh duh loh a zâwt a. Joshua-a chuan: “Ka lo ngaithla ve mai mai ang, eng mah min zâwt ve suh. Min zawh chuan ka kal bo a ni mai,” tiin a chhâng a. An zir ṭan aṭanga minute nga chhûngin Kristine-i aiin zawhna a zâwt tam zâwk a, Bible zirna neih chhunzawm zêl a duh bawk a ni.

Mary-i chuan zawhna tluangtlam tak zâwtin Bible zirpui tam tak a nei thei a. An zînga ṭhenkhat chu Thuhretu dangte hnênah a hlân chhâwng bawk a. Chawh rualin, ram pali-ah Bible zirpui 28 a nei a ni.

He thiltawna Bible zirlai târ lan hmasak ber Jasmin-i chuan kum 2021, April thlaah baptisma a chang a. Kristine-i’n kum 2022, May thlaah baptisma changin Philippines-a a chhûngte bulah a lêt leh a. Kristine-i’n a hmêlhriattîr zirlai pahnih pawhin baptisma an chang bawk a ni. Thla rei lo te hnuah, Angela-i pawhin baptisma changin regular pioneer a thawk mêk a. Kristine-i pasal, an fanu Andrea-i leh, zirlai dangte pawh hma an sâwn hle.

Kum zabi khatnaah khân, mi tam takin chanchin ṭha chu an chhûngte leh ṭhiante hnênah an hrilh chhâwng a ni. (Joh. 1:41, 42a; Tirh. 10:24, 27, 48; 16:25-33) I Bible zirpuite leh ngaihventu mi dangte hnênah, “Bible zir duh âwm mi dang hriat i nei em?” tiin engvângin nge i zawh loh vang? Chu zawhna tluangtlam tak chu zâwtin Bible zirna tam tak i nei ṭan lo vang tih tuin nge hria?