Mahni Hmasialna Rilru Put Hmang Chu Hnâwl Rawh
TUN laia mi tam tak chuan mi dangte aia ṭha zâwka cheibâwl leh chanvo hlute chu dawn phû niin an inngai a. An dawng tawh a nih pawhin, dawn belh zêl phû niin an inngai a ni. Chu ngaih dân chu mahni hmasialna leh lâwm nachâng hriat lohna rilru put hmang aṭanga lo chhuak a ni a, ni hnuhnûnga mite chhinchhiahna langsâr tak pakhat a ni.—2 Tim. 3:2.
Mahni hmasial tak tak an lo awm tawh a. Evi leh Adam te chuan thil ṭha leh ṭha lo chungchângah mahniin duh thlanna an siam a, chu chuan sawhkhâwk ṭha lo tak a thlen a ni. Kum zabi tam tak a liam hnuah, Juda Lal Uzzia chuan biak ina rimtui hâl tûra tling niin a inngai a; mahse, chutianga ti tûr chuan dikna a nei lo. (2 Chro. 26:18, 19) Chutiang bawkin, Pharisaite leh Sadukaite pawhin Abrahama thlahte an nih avâng maiin Pathian duhsakna dawn phû bîk niin an inngai a ni.—Mt. 3:9.
Mahni hmasial leh inngaihlu takte hual vêlin kan awm a, an rilru put hmangte chuan min thunun thei a ni. (Gal. 5:26) Chuvângin, chanvo hlu eng emaw dawn leh ṭha taka cheibâwl phû bîk niin kan inngai ṭan thei a ni. Chutiang ngaih dân chu nei lo tûrin eng nge kan tih theih? A hmasain, chumi chungchânga Pathian Jehova thlîr dân chu kan hriat a ngai a. Hêng Bible thu bul pahnihte hian min ṭanpui dâwn a ni.
Kan dawn tûrte chu Jehova’n a ruat. Entîrna ṭhenkhat hi han ngaihtuah teh.
Chhûngkaw ruahmannaah chuan, pasal chuan a nupui zahna dawng nia a inhriat a, nupui chuan a pasal hmangaihna dawng nia a inhriat a ngai a. (Eph. 5:33) Nupa inhmangaihna chu an kawppuite chungah chauh an lantîr tûr a ni. (1 Kor. 7:3) Fate chuan nu leh pate thu an âwih tûr a ni a, nu leh pate pawhin an fate chu an hmangaihin an ngaihsak tûr a ni.—2 Kor. 12:14; Eph. 6:2.
Kohhranah upate chuan an thawhrimna avângin kan zah an phû a. (1 Thes. 5:12) Chutih rualin, an unaute chunga intilal tûrin dikna an nei lo.—1 Pet. 5:2, 3.
Pathianin mihring rorêltute chu an khua leh tuite hnên aṭanga chhiah khawn tûr leh chawimawina dawng tûrin dikna a pe a ni.—Rom 13:1, 6, 7.
Jehova chuan hmangaihna nei takin kan phû aia tam min pe. Sual fate kan nih avângin, thi tlâk kan ni a. (Rom 6:23) Mahse, Pathian chuan kan chunga a hmangaihna rinawm avângin malsâwmna tam tak min pe a. (Sâm 103:10, 11) A hnên aṭanga kan dawn malsâwmna, a nih loh leh chanvo hlu tinte chu kan phû loh a khawngaihna nasa tak vâng a ni.—Rom 12:6-8; Eph. 2:8.
MAHNI HMASIALNA LEH INNGAIHHLUTNA RILRU PUT HMANG PUMPELH DAN
Khawvêl rilru put hmang lakah fîmkhur rawh. Kan hriat loh hlânin, mi dangte aia tam lehzuala dawn phû niin kan inngai ṭan thei a. Isua chuan denarii hlawhtu hnathawktute chungchâng tehkhinthu sawiin chutiang ngaih dân chu awlsam takin a lo awm thei tih a târ lang a ni. Hnathawktu ṭhenkhat chuan zîng aṭangin ni sa hnuaiah ni lêngin an thawk a; mi dangte erawh chuan dârkâr khat chauh an thawk a ni. Lo thawk hmasate chuan hlawh tam zâwk dawn phû niin an inngai a. (Mt. 20:1-16) Tehkhinthu chu hrilhfiahin, a hnungzuitute chu Pathianin a pêkte chunga lungawi tûr an ni tih Isua’n a târ lang a ni.
Ni lênga hna thawktute chuan hlawh tam zâwk dawn phû niin an inngai
Lâwm nachâng hria la, phût lêt suh. (1 Thes. 5:18) Hemi kawngah hian tirhkoh Paula chu kan entawn thei a ni. Ani chuan Korinth khuaa a unaute chu sum leh pai lama amah ṭanpui tûrin phût thei mah se, chutiang chuan a ti lo. (1 Kor. 9:11-14) Malsâwmna kan dawn apiangte chu ngaihluin, phût lêt duhna chu kan pumpelh tûr a ni.
Tirhkoh Paula chuan sum leh pai lama ṭanpuina a phût lo
Inngaihtlâwmna nei rawh. Kan nihna aia sânga kan inngaih hian tam lehzual dawn phû niin kan inngai ṭan ta ṭhîn a. Inngaihtlâwmna chu chutiang ngaih dân hlauhawm tak laka invênna a ni.
Zâwlnei Daniela inngaihtlâwmna chuan Jehova tâna mi hlu tak a nihtîr
Zâwlnei Daniela chuan inngaihtlâwmna lantîrna kawngah entawn tûr ṭha tak a siam a. A chhûngkaw ṭobul, a hmêlṭhatna, a finna leh, a theihnate avângin chawimawina leh chanvo hlu a dawnte chu a phû rêng vâng niin a ngai thei a. (Dan. 1:3, 4, 19, 20) Mahse, ani chu a inngaitlâwm reng a, chu mizia chuan Jehova tâna mi hlu tak a nihtîr a ni.—Dan. 2:30; 10:11, 12.
Tûn lai khawvêla hluar tak mahni hmasialna leh inngaihhlutna rilru put hmangte chu i hnâwl ang u. Chu aiin, a khawngaihna nasa tak avânga Jehova min pêk malsâwmna tinte chungah lâwmna i nei zêl zâwk ang u.