Jehova Ngaihdamna—I Tâna Awmzia A Neih Dân

1. Engvângin nge mihringte inngaihdamna chu hriatthiam a har ṭhin?

“KA NGAIDAM CHE.” He thu hi ṭawngkam emaw, thiltih emawa kan tihnat tu emawin min hrilh hian kan thaw a veng huai a. Mahse, “Ka ngaidam che” tih thu awmze dik tak chu eng nge ni? Ṭhian ṭha in la ni reng a tihna a ni em? Nge ni a, chumi chungchâng chu sawi nawn a duh tawh lo mai zâwk? Mihringte inngaihdamna hian awmze hrang hrang a nei thei a ni.

2. Engtin nge Bible-in Jehova ngaihdamna chu a târ lan? (Footnote en bawk rawh.)

² Jehova’n mihring ṭha famkim lote a ngaihdam dân leh kan inngaihdam tawn dân chu a inang lo hle a. A ngaihdam dân chu a danglam bîk hle a ni. Chuvângin, Fakna hla phuahtu chuan: “I hnênah ngaihdamna dik tak a awm a ni, ṭiha i awm theih nân,” tiin a sawi a.a (Sâm 130:4, NWT) Ni e, Jehova ngaihdamna chu “ngaihdamna dik tak” a ni. Ani chu ngaihdamna dik tak awmzia min kawhhmuhtu a ni a. Dinhmun ṭhenkhata Bible ziaktute’n ngaihdamna sawina atâna Hebrai thu mal an hman hi mihringte inkâra inngaihdamna sawi nân hman a ni ngai lo.

3. Engtin nge Jehova ngaihdamna chu kan ngaihdamna laka a danglam? (Isaia 55:6, 7)

³ Jehova’n tu emaw a ngaihdam tawh chuan a sualna chu a la bo hmak a. An inlaichînna chhe tawh pawh chu siam ṭhat leh a ni a. Jehova ngaihdamna chu a nasain a ropui hle a ni.—Isaia 55:6, 7 chhiar rawh.

4. Engtin nge Jehova’n ngaihdamna awmze dik tak hre thiam tûra min ṭanpui?

⁴ Jehova ngaihdamna chu kan ngaihdamna lakah a danglam a nih chuan, engtin nge keini mi ṭha famkim lote hian ngaihdamna awmze dik tak chu kan hriatthiam theih ang? Ani chuan a ngaihdamna awmzia kan hriatthiam theih nân chiang taka mitthla theih entîr nei ṭawngkamte a hmang a. He thuziakah hian chûng zînga ṭhenkhat chu kan zir chiang ang. Chûngte chuan Jehova’n kan sualte a lâk bo rualin sual avânga amah nêna kan inlaichînna chhe tawh a siam ṭhat dân a târ lang ang a. Chûng entîr nei ṭawngkamte kan zir hunah, kawng tam taka ngaihdamna lantîrtu khawngaihna leh ngilneihnaa khat, kan Pa chunga kan lâwmna chu a nasa lehzual ngei ang.

JEHOVA’N KAN SUALTE A LA BO

5. Jehova’n kan sualte a ngaihdam hian eng thil nge a tih?

⁵ Bible chuan sual hi phurrit tak nên a tehkhin ṭhîn a. Lal Davida chuan a thil tihsual chu heti hian a târ lang a ni: “Ka khawlohnate chuan ka lû hi a chîm pil a, phur rit tak ang, ka zawh rual loh hi a ni,” tiin. (Sâm 38:4) Mahse, Jehova chuan thil sual ti inlamlêtte sual chu a ngaihdamsak a. (Sâm 25:18; 32:5) Heta “ngaihdam” tia lehlin Hebrai thu mal hian “chawisak,” a nih loh leh “phurhsak” tih awmzia a nei a. Chuvângin, Jehova chu kan sual phurrit tak min chawisak a, min lâk bosaktu mi chak tak angin kan mitthla thei a ni.

6. Kan sualte chu eng anga hlaah nge Jehova’n min lâk bosak?

⁶ Entîr nei ṭawngkam dang leh chuan Jehova’n kan sualte hla taka a phurh bo dân chu a târ lang a. Sâm 103:12 chuan heti hian min hrilh a ni: “Chhak leh thlang a inhlat ang hian, kan bawhchhiatnate chu kan hnên ata a dah sawn ta daih a,” tiin. Chhak lam chu thlang lam aṭanga hmun hla ber a ni a. Engtikah mah a intâwk thei lo. Chumi awmzia chu, Jehova’n kan sualte chu kan ngaihtuah phâk bâka hlaah a la bo tihna a ni. A ngaihdamna târ lan dân chu a va thlamuanthlâk tak êm!

7. Jehova’n kan sualte a paih bo dân chungchâng Bible-in engtin nge a sawi? (Mika 7:18, 19)

⁷ Jehova’n entîr neiin kan sualte chu kan lak aṭanga hla takah la bo mah se, a la hre reng em? Hre reng lo ve. Lal Hezekia chuan Jehova chungchângah heti hian a ziak a ni: “Ka sualte zawng zawng kha i hnung lamah chuan i paih vek si a,” tiin. (Is. 38:9, 17) He entîr nei ṭawngkam hian Jehova’n inlamlêtte sualna chu lain, hmuh phâk lohna hmunah a paih bo tih a târ lang a ni. Hêng thute hi: “[Ka sualte hi] awm lo angin min siamsak,” tiin a sawi theih bawk a ni. Bible chuan entîr nei ṭawngkam dangin Mika 7:18, 19-ah a târ lang leh bawk a. (Chhiar rawh.) Chutah chuan, Jehova’n kan sualte chu tuifinriat mawng thûk takah a paih anga târ lan a ni a. Hmân lai chuan, tuifinriat mawnga paih tawh thilte chu lâk lêt leh theih a ni tawh lo a ni.

8. Engte nge kan zir tawh?

⁸ Hêng entîr nei ṭawngkamte aṭangin Jehova’n min ngaihdam hian kan sual phurrit tak chu min lâk bosak tih kan hre thei a. “An dân bawhchhiatna ngaihdama awmte leh an sualte khuha awmte chu an hlim e; a sualna Jehova’n a hriatsak reng lohva chu a hlim e,” tia Davida sawi ang hi a ni. (Rom 4:7, 8, NWT) Chu tak chu a ni, ngaihdamna dik tak chu!

JEHOVA’N SUAL A NUAI REH

9. Jehova min ngaihdamna nasatzia hrilhfiah nân eng entîr nei ṭawngkam nge hman a nih?

⁹ Tlanna ṭanchhana inlamlêtte sual a nuai reh dân ngaihlu tûra min ṭanpui tûrin entîr nei ṭawngkam dang a hmang a. Jehova’n chûng kan sualte chu silfai a, tlêngfai angin entîr neia târ lan a ni a. Chu chuan, thil sual titu chu a tithianghlim a ni. (Sâm 51:7; Is. 4:4; Jer. 33:8) Chuvângin, Jehova ngei pawhin: “In sualte chu sen lâr angin awm tawh mah sela, vûr angin a vâr ang; sen duk angin sen tawh mah sela, berâm hmul angin a awm ang,” tiin a sawi a ni. (Is. 1:18) Thawmhnawa rawng sen a kai hian nuai reh a harsa êm êm a. Mahse, he entîr nei ṭawngkam hmang hian Jehova chuan kan sualna zawng zawng chu fai var khawpa tlenfai theih a ni tih min tiam a ni.

10. Jehova’n a ngaihdamna nasatzia târ lan nân eng entîr nei ṭawngkam dang nge a hman?

¹⁰ Thuziak hmasaah khân, sual chu “leibâ” nêna tehkhin a ni a. (Mt. 6:12, NWT; Lk. 11:4) Chuvângin, Jehova chunga thil kan tihsual apiang hian a laka ba neih belh zêl ang kan ni. Kan bat chu a va tam tak êm! Mahse, Jehova’n min ngaihdam hian kan bâ chu min ngaihdamsak ang a ni a. Rûl leh tûrin min phût lo. Jehova ngaihdamnain min chhâwk zângkhai dân entîrna ṭha tak a va ni êm!

11. Bible-in kan sualte “thai bo” a ni tia a sawi hian eng a sawina nge? (Tirhkohte 3:19)

¹¹ Jehova’n kan bâte, a nih loh leh kan sualte chu a ngaidam mai ni lovin, a thai bo a ni. (Tirhkohte 3:19 chhiar rawh.) Bâ ngaihdam a ni kan tih hian, ba bu-a lian taka X inthai chu kan mitthlaah a rawn lang mai thei a. Mahse, leibat zât chu a la lang thei tho dâwn a. Chutih rualin, thai bo tih chuan awmze dang a nei a ni. He entîr nei ṭawngkam hre thiam tûr chuan, hmân laia lehkhatui an siam dân kan hriat phawt a ngai a. Lehkhatui chu meihawl, thing hnai ban leh, tui inchawhpawlh aṭanga siam a ni ṭhîn. Tu emaw chuan, nawhfe tihnâwngin lehkha ziak chu a nâwt reh thei a ni. Chuvângin, bâ “thai bo” a nih hian nawh reh hmak a ni a. A hmaa lehkha ziak chu hmuh theih a ni tawh lo. Chhinchhiahna chu a bo hmak a ni. Jehova’n kan sualte chu a ngaidam mai ni lovin, a thai bo hmak tih hriatna chuan rilru a va tihahdam tak êm!—Sâm 51:9.

12. Chhûm chhah mup tih entîr nei ṭawngkam aṭangin eng nge kan zir theih?

¹² Jehova’n sual a thai bo dân sawifiah nân chutiang entîr nei ṭawngkam dang chu a hmang a. “In bawhchhiatnate chu chhûm chhah mup tihbo angin ka tibo ta a, in sualnate chu chhûm tihbo angin ka tibo ta bawk a,” a ti a ni. (Is. 44:22) Jehova’n min ngaihdam hian, kan sualte chu hmuh theih a nih tawh loh nân chhûm chhah mupa min hliahkhuhsak ang a ni.

13. Jehova’n kan sualte a ngaihdam hian engtin nge kan awm?

¹³ Chu entîrna chuan kan tân eng awmzia nge a neih? Jehova’n kan sualte a ngaihdam tawh chuan kan dam chhûngin chu sual avânga inthiam lohna neih a ngai tawh lo a ni. Isua Krista thisen hmangin kan bâte chu min ngaihdamsak hmak a. Chhinchhiahnaah pawh a awm tawh lo. Hei hi kan inlamlêt huna Jehova hnên aṭanga kan dawn ngaihdamna dik tak chu a ni.

JEHOVA’N INLAICHINNA A SIAM ṬHA

14. Engvângin nge Jehova’n min ngaidam pumhlûm ang tih kan rin theih? (milemte en bawk rawh.)

¹⁴ Jehova hnên aṭanga kan dawn ngaihdamna dik tak chuan amah nêna inlaichînna ṭha neih leh theihna hun remchâng min pe a. Chu chuan, inthiam lohna nei reng lo tûrin min ṭanpui bawk a ni. Jehova’n lungnih lohna pai renga min hrem hun a chân chu kan hlauh a ngai lo. Chutiang chu thlen pawh a thleng ngai lo vang. Engvângin nge Jehova ngaihdamna chu kan rin theih? Jehova chuan zâwlnei Jeremia hnênah: “An bawhchhiatna chu ka ngaidam ang a, an sualna pawh ka hre reng dâwn tawh si lo,” tiin a hrilh a ni. (Jer. 31:33, 34) Chûng thute chu tirhkoh Paula’n la chhâwngin: “An sualte pawh ka hre reng dâwn tawh si lo,” tiin a ziak a ni. (Heb. 8:12) Mahse, a sawi tum dik tak chu eng nge ni?

15. Eng kawngin nge Jehova’n kan sualte chu a hriat reng loh?

¹⁵ Bible-a “hre reng” tih ṭawngkam hian thil eng emaw ngaihtuah nawn, a nih loh leh hriat chhuah leh chu a kâwk reng lo va. Chu aiin, thiltih eng emaw a kâwk zâwk a. Isua bula khenbeh mi sual khân, “Isu, i ram i thlen hunah mi hre reng ang che,” tiin a ngên a. (Lk. 23:42, 43, NWT) Isua chhânnaah chuan a thil tih tûr, a kaihthawh leh tûr thu târ lanna a awm avângin, chu a thusawi chu amah hre reng tûr maia ngenna a ni lo. Chuvângin, Jehova’n kan sualte a hre reng lo a tih hian min ngaidamin, chûng sualte avâng chuan min hrem dâwn lo a tihna a ni.

16. Engtin nge Bible chuan ngaihdamna dik tak aṭanga lo awm zalenna chu a târ lan?

¹⁶ Bible chuan ngaihdamna dik tak aṭanga lo awm zalenna chungchâng kan hriatthiam theih nân entîr nei ṭawngkam dang a hmang leh a. Kan pianpui thil sual tih châknate avângin “sual bâwihte” tia sawi kan ni a. Mahse, Jehova ngaihdamna zârah ‘sual laka chhuah zalena awm,’ bâwihte ang kan ni ta a ni. (Rom 6:17, 18, NWT; Thup. 1:5) Ni e, Jehova min ngaihdamna chuan chhuah zalena awm bâwihte ang maiin hlimna min neihtîr a ni.

17. Engtin nge ngaihdamna chuan min tihdam? (Isaia 53:5)

¹⁷ Isaia 53:5 chhiar rawh. Kan sawiho tûr entîr nei ṭawngkam hnuhnûng ber chuan thihna thlen thei natna nei nên min tehkhin a. Jehova min pêk a Fapa tlanna inthawina avângin entîr neia tihdam kan ni a. (1 Pet. 2: 24) Tlanna chuan thlarau lama kan dam lohna avânga Jehova nêna kan inlaichînna chhe tawh chu a siam ṭha leh a. Natna khirh tak nei tu emaw chu tihdama a awm avânga a hlim ang hian, Jehova ngaihdamna avânga thlarau lama tihdam kan nih a, a pawm kan hlawh hian kan hlim hle a ni.

JEHOVA NGAIHDAMNAIN KAN TANA AWMZIA A NEIH CHU

18. Jehova ngaihdamna chungchânga Bible-a târ lan entîr nei ṭawngkam chi hrang hrang kan zirna aṭangin eng nge kan hriat? (“Jehova Min Ngaihdam Dân,” tih bâwm chu en bawk rawh.)

¹⁸ Jehova ngaihdamna chungchâng Bible-a târ lan entîr nei ṭawngkamte kan zirna aṭangin eng nge kan hriat? Ani chuan min ngaihdam tawh chuan min ngaidam pumhlûmin min ngaidam hlen a ni. Chu chuan, kan Pa vâna mi nêna inlaichînna ṭha min neihtîr a. Chutih rualin, ngaihdamna dik tak chu sual fate’n kan phu rêng vânga dawng kan ni lo va. Jehova hmangaihna leh khawngaihna nasa tak avânga kan dawn thil thlâwn pêk a ni zâwk a ni.—Rom 3:24.

19. (a) Engvângin nge kan lâwm ang? (Rom 4:8) (b) A dawta thuziakah eng nge kan sawiho vang?

¹⁹ Rom 4:8 chhiar rawh. Jehova chu “ngaihdamna dik tak” lantîrtu Pathian a nih avângin kan va lâwm tak êm! (Sâm 130:4, NWT) Mahse, Jehova ngaihdamna dawng tûr chuan kan tih ngei ngai thil pawimawh tak pakhat a awm a. Isua chuan: “Mite bawhchhiatna in ngaihdam loh chuan, in Pa vâna mi pawhin a ngaidam bîk lo vang che u,” tiin a sawi a ni. (Mt. 6:14, 15, NWT) Ni e, Jehova ngaihdamna entawn chu kan tân a pawimawh tak zet tih a chiang hle. Mahse, chutiang chuan engtin nge kan tih theih ang? A dawta thuziak chuan chutianga kan tih theih dân chu a târ lang ang.