Jehova Ngaihdamna—Kan Ngaihhlut Chhan

1-2. Eng kawngin nge mihringte dinhmun chu paragraph 1-naa târ lan ṭhalai dinhmun nên a inan?

CHHUNGKAW hausa tak aṭanga seilian ṭhalai pakhat hi han mitthla teh. Ni khat chu, chêt sualna thlengah a nu leh pate chu an boral ta thut a. Lungchhe taka a awm laiin chanchin ṭha lo dang a dawng leh a. Chu chu a nu leh pate’n leiba tam tak an nei tih chu a ni. Tûnah chuan an hausakna rochun aiin an leibâte chu a rochun ta zâwk a. An leibatnate’n pe vat tûrin an duh bawk. Chûng leibâte chu a pêk sên loh khawpa tam a ni.

² Kawng ṭhenkhatah chuan, chu ṭhalai ang chu kan ni a. Kan nu leh pa hmasa ber Evi leh Adama chu ṭha famkim niin, paradis mawi takah an chêng a. (Gen. 1:27; 2:7-9) Nun hlimawm tak chatuana chen theihna hun remchâng an nei a ni. Mahse, thil ṭha lo tak a thleng a; Evi leh Adama chuan thil an tisual a. Chuvângin, an paradis in leh chatuana nun theihna chu an chân ta a ni. An thlahte hnênah eng nge an rochun tâk ang? Bible chuan: “Mi pakhat [Adama] avânga sual khawvêla a lût ang khân, sual avângin thihna a lût bawk a; chutichuan, mi zawng zawngin thil sual an tih avângin, thihnain mi zawng zawng a fan chhuak ta a ni,” tiin a sawi. (Rom 5:12, NWT) Adama hnên aṭanga kan rochun sual chuan thihna min thlen a. Chu kan rochun sual chu tu mahin kan pêk theih ngai loh tûr leiba tam tak ang chu a ni.—Sâm 49:8.

3. Engvângin nge kan thil tihsualte chu “bâte” nên a inan?

³ Isua chuan sual chu “bâte” nên a tehkhin a. (Mt. 6:12, NWT; Lk. 11:4) Chuvângin, thil kan tihsual hian Jehova chunga leiba nei ang kan ni. Kan thil tihsual man chu kan rulh a ngai a. Rulh a nih loh chuan kan leibâ chu kan thih hunah chauh pêk tlâk a ni ang.—Rom 6:7, 23.

4. (a) Ṭanpuina tel lo chuan, thil sual titu zawng zawngte chungah eng thil nge thleng ang? (Sâm 49:7-9) (b) Bible-a “sual” tih thu mal hian eng awmzia nge a neih? (“Sual,” tih bâwm chu en rawh.)

⁴ Kan tân Evi leh Adama hloh tak zawng zawng neih lêt leh chu thil theih a ni em? Mahni ngawt chuan kan nei lêt thei lo. (Sâm 49:7-9 chhiar rawh.) Ṭanpuina tel lo chuan hma lam hun beiseina emaw, thawhleh beiseina emaw kan nei thei lo vang a. Ramsate ang maiin thawhleh beiseina nei lovin kan thi ang.—Thur. 3:19; 2 Pet. 2:12.

5. Engtin nge hmangaihna ngah tak kan Pa chuan kan rochun sual man pe tûra min ṭanpui? (A kâwma milem en rawh.)

⁵ A tîra kan târ lan tâk ṭhalai kha lo ngaihtuah leh ta ila. Mi hausa tak pakhatin a leibâte chu rulhsak dâwn ta se, engtin nge a awm ang? Lâwm takin a pawm ang tih a chiang hle. Chutiang bawkin, hmangaihna ngah tak kan Pa, Jehova chuan Adama hnên aṭanga kan rochun leiba rulhna tûr thilpêk min pe a. Isua chuan heti hian a hrilhfiah a ni: “Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân,” tiin. (Joh. 3:16, NWT) Chu bâkah, chu thilpêk chuan Jehova nêna inlaichînna ṭha neih theihna hun remchâng min pe bawk a ni.

6. He thuziakah hian Bible-a eng thu malte nge kan ngaihtuahho vang a, engvângin nge?

⁶ Engtin nge chu thilpêk duhawm tak chu dawnga kan sualte, a nih loh leh “bâte” chu ngaihdam a nih theih ang? Chu zawhna chhânna chu Bible-in inremna, sual thawina, inrem leh theihna, tlanna, chhandamna leh, mi fela ruatna tih thu malte a hman dân aṭangin kan hre thei ang. He thuziakah hian chûng thu malte awmzia chu kan sawiho vang a. Chûng hrilhfiahnate kan chhût ngun rualin, ngaihdam kan nih theih nâna Jehova tih tawhte chungah ngaihhlutna kan nei lehzual ang.

THILTUM: INREMNA

7. (a) Evi leh Adama chuan eng thil dang nge an chân? (b) Evi leh Adama thlah kan nih angin, eng nge kan mamawh? (Rom 5:10, 11)

⁷ Evi leh Adama chuan chatuana nun theihna an chân bâkah, an Pa Jehova nêna an inlaichînna hlu tak chu an chân bawk a. Thil an tihsual hma chuan anni chu Pathian chhûngkaw zînga mi an ni a. (Lk. 3:38) Mahse, fate an neih hmaa Pathian Jehova thu an âwih loh khân a chhûngkua aṭanga hnawhchhuah an ni a. (Gen. 3:23, 24; 4:1) Chuvângin, an thlahte kan nih angin Jehova nêna inremna siam kan mamawh a ni. (Rom 5:10, 11 chhiar rawh.) Thu danga sawi chuan, amah nêna inlaichînna ṭha kan siam a ngai a. Hrilhfiahna pakhat sawi dân chuan, heta Grik thu mal “inremna” tih hian “hmêlma tu emaw ṭhiana siamna” tih a kâwk a. Thil lâwmawm tak chu, chutiang a nih theih nân Jehova’n hma a la hmasa a ni. Engtin nge?

RUAHMANNA: SUAL THAWINA

8. (a) Sual thawina chu eng nge ni? (b) Inrem leh theihna chu eng nge ni?

⁸ Sual thawina chu Jehova’n amah leh sual fate inkâra inlaichînna ṭha a awm theih nâna a ruahmanna siam a ni a. Chutah chuan hlutna intluk thil pahnih inthlengna a tel a ni. Chutiang chuan thil hloh tawh emaw, tihchhiat tawh emaw chu neih leh theih emaw, siamṭhat leh theih emaw a ni. Kristian Grik Pathian Lehkha Thu chuan “sual thawina” tih awmze nei thu mal dang inrem leh theihna tih chu a hmang a. (Rom 3:25) Inrem leh theihna chu Pathian nêna inrema inlaichînna ṭha min neihtîr theitu thiltih a ni.

9. Israel mite sual ngaihdamsak an nih theih nân Jehova’n hun eng emawti chhûnga hman tûr eng ruahmanna nge a siamsak?

⁹ Jehova chuan Israel mite chu an sual ngaihdam a nih theih nân leh amah nêna inlaichînna ṭha an neih theih nân, hun eng emawti chhûng atâna hman tûr ruahmanna a siam a. Israel ramah chuan Inthawina Nî chu kum tin neih a ni ṭhîn a. Chumi nî chuan puithiam lalin mipuite sual thawi nân ran a hlân a. Mahse, ramsate chu mihringte aia an hnuaihnun zâwk avângin ran hmanga inthawina chuan tu sual mah a la bo hlen thei lo. Mahse, Israel mi inlamlêtte’n Jehova phût anga hâlral thilhlan an hlan chhûng chu, an sualte a ngaihdamsak a ni. (Heb. 10:1-4) Chu bâkah, chu ruahmanna leh sual inthawi ziahna chuan Israelte rilruah sual nei an nihzia leh sual tlenfai pumhlûmna an mamawhzia a hriatchhuahtîr ṭhîn a ni.

10. Jehova’n sual ngaihdam hlen a nih theih nân eng ruahmanna dangte nge a siam?

¹⁰ Jehova chuan kan sual ngaihdam hlen a nih theihna tûrin ruahmanna a siam a. A fapa duhtak chu “mi tam tak sualte kalpui tûra vawi khat hlana awm” tûrin ruahmanna a siam a. (Heb. 9:28) Tichuan, Isua chuan ‘mi tam tak tlan nân a nun’ a pe a ni. (Mt. 20:28, NWT) A nih leh, tlanna chu eng nge ni?

A MAN: TLANNA

11. (a) Bible sawi dânin, tlanna chu eng nge ni? (b) Tlanna pêk a nih theih nân eng nge ngai?

¹¹ Bible sawi dânin, tlanna chu sual thawina leh inremna a awm theih nâna man pêk a ni a. Jehova thlîrna aṭangin chu chu thil chân tâk neih lêt leh theihna a ni. Eng kawngin nge? Evi leh Adama’n an nun ṭha famkim leh chatuana nun theihna an chân tih hre reng ang che. Chuvângin, tlanna chu an thil hloh tâk hlutna nêna intluk chiah a ni tûr a ni. (1 Tim. 2:6) Chu chu puitling tu emaw (1) ṭha famkim; (2) leia chatuana nun theihna nei; (3) kan tâna a nun inthawi nâna hlan inhuamtu chauhvin a pe thei a. Chutiang mi nunna chauhvin kan thil chân tâkte man chu a pe thei a ni.

12. Engvângin nge Isua’n tlanna man chu a pêk theih?

¹² Isua’n tlanna man a pêk theih chhan pathum lo ngaihtuah ta ila. (1) “Ani chuan thil rêng a tisual lo,” mi ṭha famkim a ni. (1 Pet. 2:22) (2) Chuvângin, leia chatuana nun theihna a nei a. (3) Ani chuan kan tân a nun hlâna thih a inhuam a ni. (Heb. 10:9, 10) Isua chu mi ṭha famkim a nih angin, a nun chu mihring hmasa ber Adama’n thil a tihsual hma nên a intluk chiah a. (1 Kor. 15:45) Kan tân a nun hlânin, Adama chân tâk neih lêt leh theih nâna a man zât chu a pe thei a ni. (Rom 5:19) Chutiang chuan, Isua chu “Adama hnuhnung zâwk” a lo ni ta a. Mi ṭha famkim dangin a man a rawn pêk nawn a ngai tawh lo. Ani chuan “vawi khatah a tlingtla ta nghâl” a ni.—Heb. 7:27; 10:12.

13. Sual thawina ruahmanna leh tlanna chu engtin nge a danglam?

¹³ A nih leh, sual thawina ruahmanna leh tlanna chu engtin nge a danglam? Sual thawina ruahmanna chu Pathianin amah leh mihringte inkâra inlaichînna ṭha a awm theih nâna a hmalâkna a ni a. Tlanna chu mihringte sual thawi a nih theihna tûra a man pêk hi a ni. Kan tâna Isua thisen hlu tak leih buakna chuan chumi man chu a pe tla a ni.—Eph. 1:7; Heb. 9:14.

A RAH CHHUAH: CHHANDAMNA LEH MI FELA RUATNA

14. Tûnah eng nge kan sawiho vang a, engvângin nge?

¹⁴ Sual thawina ruahmanna rahchhuah chu engte nge ni? Bible chuan a rah chhuahte târ lan nân thu mal chi hrang hrang a hmang a. Chûng thu malte awmzia chu inang deuh vek mah se, Jehova ngaihdamna thlentu sual thawina rah chhuah chi hrang hrangte chu an sawi uar a ni. Chûng thu malte kan zir chian rualin mi mal taka min nghawng dân kan hre thei bawk ang.

15-16. (a) Bible-a “chhandamna” tih thu mal chuan eng nge a kawh? (b) Chu chuan engtin nge min nghawng?

¹⁵ Bible-a hman chhandamna tih thu mal hian tlanna avânga chhuah zalenna, a nih loh leh leiba rulh tlâkna a kâwk a. Tirhkoh Petera chuan heti hian a sawi a ni: “In thlahtute pêk chhâwn, in awm dân eng khaw ni lawi lo lak ata chu thil chhe thei, tangkarua leh rangkachaka tlan [a nih loh leh, chhandam] in ni lo va, berâmno hmêlhem lo leh bawlhhlawh kai lo thisen anga Krista thisen hlu chuan tlan in ni zâwk tih in hre si a,” tiin.—1 Pet. 1:18-19.

¹⁶ Tlanna inthawina azârah sual leh thihna laka chhuah zalen kan ni thei a. (Rom 5:21) Isua thisen, a nih loh leh a nunna hlu tak aṭanga lo awm chhandamna avângin Jehova leh Isua chunga lâwm nachhan tûr ṭha tak kan nei tih a chiang hle.—1 Kor. 15:22.

17-18. (a) Mi fela ruatna chu eng nge ni? (b) Chu chuan engtin nge min nghawng?

¹⁷ Mi fela ruatna tih chuan thubuaite chu sût lêt tawh niin, kan chungchânga thil chhinchhiahte chu thai chhiat emaw, nuai reh emaw a ni tawh tih a kâwk a. Jehova’n chutiang chuan ti mah se, rorêlna dik chungchânga a tehfung chu a la vawng reng a ni. Thil eng emaw kan tih avângin thiam min chantîr emaw, kan sualna a ngaizam emaw a ni lo va. Chu aiin, sual thawina ruahmanna leh tlanna chunga rinna kan lantîr avâng zâwkin, Jehova’n kan leibâte chu min sût lêtsak a ni.—Rom 3:24; Gal. 2:16.

¹⁸ Chu chuan kan tân eng awmzia nge a neih? Isua nêna vâna rorêl tûra thlante chu Pathian fate anga mi fela ruat an ni tawh a. (Tit. 3:7; 1 Joh. 3:1) An sualte chu ngaihdam a ni tawh. Thil sual ti ngai lo anga ngaih an nih tawh avângin, Lalrama lût tûrin an tling a ni. (Rom 8:1, 2, 30) Lei lam beiseina neitute pawh Pathian ṭhiante anga mi fela ruat niin, an sualte pawh ngaihdam a ni tawh a. (Jak. 2:21-23) Armageddon-a dam khawchhuak tûr mipui tam tak chuan thihna an tem ngai dâwn lo pawh a ni thei. (Joh. 11:26) Thi tawh “mi felte” leh “fel lote” chu kaihthawh an ni ang a. (Tirh. 24:15, NWT; Joh. 5:28, 29) A tâwpah chuan, leia Jehova thuawihtu a chhiahhlawh rinawm zawng zawngte chuan “Pathian fate zalênna ropui tak an nei ang”. (Rom 8:21, NWT) Sual inthawina ruahmanna—kan Pa, Jehova nêna inremna famkim—aṭanga lo awm malsâwmna chu a va ropui tak êm!

19. Engtin nge kan dinhmun chu a ṭha zawnga a inthlâk danglam? (“Kan Tâna Awmzia A Neih Chu,” tih bâwm chu en rawh.)

¹⁹ Kan dinhmun chu a tîra kan târ lan tâk ṭhalai, thil engkim châna a rulh theih ngai loh tûr leiba tam tak rochungtu ang chu a ni a. Mahse, Jehova’n min ṭanpui avângin kan lâwm hle. Sual thawina ruahmanna avâng leh tlanna pêk a nih tawh avângin kan dinhmun chu a danglam tawh a. Isua Krista kan rinna avângin sual leh thihna ata chhandam leh chhuah zalen kan ni thei tawh bawk a. Kan sualna chu ngaihdam theih niin kan thil tihsualte pawh nuai reh theih a ni. Mahse, a pawimawh berah chuan kan Pa vâna mi nên inlaichînna ṭha tak kan nei thei tawh a ni.

20. A dawta thuziakah eng nge kan sawiho vang?

²⁰ Jehova leh Isua’n kan tâna an thiltihte kan chhût ngun hian kan thinlung chu lâwmnain a khat a. (2 Kor. 5:15) An ṭanpuina tel lo chuan eng beiseina mah kan nei lo vang! A nih leh, Jehova ngaihdamna chuan a mi mal takin kan tân eng awmzia nge a neih? Chu chu a dawta thuziakah kan sawiho vang.