Jehova Ngaihdamna Chu Pawm Rawh

1-2. Thil sual ti inlamlêt chuan eng ang hahdamna nge a neih theih? (A kâwma milem en bawk rawh.)

LAL Davida chuan tûn hmaa thil sual tih avânga inthiam lohna neih awmzia chu a hria a. (Sâm 40:12; 51:3, a chunga thuziak) A nunah sual pawi takte a ti a ni. Mahse, simna dik tak a lantîr avângin Jehova’n a ngaidam a. (2 Sam. 12:13) Chuvângin, Pathian ngaihdamna aṭanga lo awm hahdamna neih awmzia chu a hre thiam bawk a ni.—Sâm 32:1.

² Davida angin, Jehova zahngaihna hmuhna aṭangin hahdamna kan nei thei a. Kan sim tak zet a, sual kan puan a, ti nawn lo tûra theih tâwp kan chhuah chuan, kan sualte—sual pawi takte pawh ni se—Jehova’n ngaihdam a inhuam tih hriat chu a va thlamuanthlâk tak êm! (Thuf. 28:13; Tirh. 26:20; 1 Joh. 1:9) Chu bâkah, sual tihna chu a thleng lo ang maiin min ngaidam pumhlûm tih hriat chu a va hahdamthlâk tak êm!—Ezek. 33:16.

3-4. Unaunu pakhat chu baptisma a chan hnuah engtin nge a awm a, he thuziakah hian eng nge kan sawiho vang?

³ Mahse, mi ṭhenkhat chuan Jehova ngaihdamna chu pawm harsa tih châng an nei thei a. Thutaka seilian Jennifer-i chungchâng hi han ngaihtuah teh. A tleirâwl chhoh chuan, thil sual tiin nun chi hnihin a nung a. Mahse, kum tam tak hnuah Jehova hnêna rawn kîr lehin baptisma a chang a ni. Ani chuan: “Ka tûn hma nun chu sum ngainatna, nungchang bawlhhlawhna, zu ruihna leh, thinrimnain a khat a. Ngaihdam ka dîla ka sim tawh avângin, Krista inthawinain min ti thianghlim tawh tih ka hria a. Mahse, ka thinlung chuan a la pawm thei chuang lo,” tiin a sawi.

⁴ Tûn hmaa i thil tih sual chu Pathianin a ngaidam tawh tih thinlung taka pawm harsa tih châng i nei em? Davida angin, a zahngaihna chu thlamuanpui tûrin a duh che a ni. He thuziakah hian, Jehova ngaihdamna kan pawm a ngaih chhan leh chutianga pawm tûra min ṭanpui theitu chungchâng kan sawiho vang.

ENGVANGIN NGE JEHOVA NGAIHDAMNA CHU KAN PAWM A PAWIMAWH?

5. Setana chuan eng nge ring tûra min duh? Entîrna pe rawh.

⁵ Jehova ngaihdamna kan pawm chuan Setana thanga awh chu kan pumpelh thei ang. Jehova rawngbâwl kan bânsan theih nân Setana’n eng pawh a ti dâwn tih hre reng ang che. Chutianga ti tûr chuan, kan sual chu ngaihdam theih a ni lo tih min rintîr a tum thei a. Nungchang bawlhhlawhna avânga Korinth kohhran aṭanga chhuahtîra awm mi pakhat chungchâng hi han ngaihtuah teh. (1 Kor. 5:1, 5, 13) Simna a lantîr hnu pawhin, Setana chuan kohhrana mite chu amah ngaidam duh lo tûr leh kohhrana lâwm lût tawh lo tûrin a duh a. Chutih rualin, simna lantîrtu chu ngaihdam theih ni lova inhria a, ‘a lungngaih lutuk avânga beidawngin’ Jehova rawngbâwl bânsan tûrin a duh bawk a ni. Setana chuan a thiltum emaw, a thil tih dân emaw chu a la thlâk lo va. ‘A ruahmannate chu kan hai lo bawk.’—2 Kor. 2:5-11, NWT.

6. Engtin nge inthiam lohna phurrit ata hahdamna kan hmuh theih ang?

⁶ Jehova ngaihdamna kan pawm chuan inthiam lohna phurrit ata hahdamna kan hmu thei ang. Thil sual tih avânga inthiam lohna neih chu thil pângngai tak a ni a. (Sâm 51:17) Thil ṭha tak a ni bawk. Kan chhia leh ṭha hriatna chuan insiam ṭha tûra kan tih ngaite ti tûrin min chêttîr thei a. (2 Kor. 7:10, 11) Mahse, kan sim hnu pawha hun rei tak chhûng inthiam lohna kan la nei reng a nih chuan, kan beidawn phah thei a ni. Jehova ngaihdamna kan pawm a nih chuan, inthiam lohna phurrit chu kan dah thla thei a. Tichuan, Pathianin a duh angin, chhia leh ṭha hriatna thiang leh hlimna nasa tak neiin a rawng kan bâwl thei dâwn a ni. (Kol. 1:10, 11; 2 Tim. 1:3) Mahse, engtin nge Pathian ngaihdamna pawm tûrin kan thinlung kan hmin theih ang?

ENGIN NGE JEHOVA NGAIHDAMNA PAWM TURA MIN ṬANPUI THEI?

7-8. Engtin nge Jehova’n Mosia hnênah a chungchâng a sawi a, chu chuan eng rinnghehna nge min neihtîr? (Exodus 34:6, 7)

⁷ Jehova’n a chungchâng a târ lan dân chu ngaihtuah rawh. Entîr nân, Sinai Tlânga Mosia hnêna a thusawi hi chhinchhiah ang che.a (Exodus 34:6, 7 chhiar rawh.) A mizia leh a kawngte chanchin tam tak sawi theih nei mah se, “Pathian lainatnaa khat, mi khawngaih thei tak” a nihzia a sawi uar a. Chutiang Pathian chuan sual sim tak zettute chu ngaidam lovin a awm dâwn em ni? Awm lo vang! Chu chu Jehova neih theih ngai loh tûr mizia, zahngaihna neih lohna leh thinlung sak tak nihna a ni dâwn si a.

⁸ Jehova chu thutak Pathian a nih avângin, a nihna lo angin a insawi ngai dâwn lo tih kan chiang thei a. (Sâm 31:5) A thusawite chu kan ring thei a ni. Chuvângin, tûn hmaa i thil tih sual avânga inthiam lohna i la neih reng chuan, heti hian inzâwt ang che: ‘Pathian Jehova chu zahngaihna leh lainatnaa khat a ni tih leh simna lantîrtu apiang a ngaidam ang tih ka ring em? Ka ring a nih chuan, min ngaidam tih chu pawm tûr ka ni lo vem ni?’ tiin.

9. Kan sualte ngaihdam a ni tih awmzia chu eng nge ni? (Sâm 32:5)

⁹ Jehova’n a ngaihdamna chungchâng Bible ziaktute a târ lantîr dân chu chhût ngun rawh. Bible ziaktu Davida’n Jehova ngaihdamna chungchâng a târ lan dân hi lo ngaihtuah ta ila. (Sâm 32:5 chhiar rawh.) “Ka sual khawlohna chu i lo ngaihdam tâk kha,” tiin a sawi a ni. Heta “ngaihdam,” tiha lehlin Hebrai thu mal hian “chawi kâng,” “la bo,” a nih loh leh “phur,” tih a kâwk thei a. Pathianin Davida a ngaihdam khân, a sual chu chawi kânsakin a phur bo tihna a ni a. Chuta chin chu, Davida chuan inthiam lohna phurrit tak ata hahdamna a hmu thei ta a ni. (Sâm 32:2-4) Chutiang hahdamna chu kan hmu ve thei a. Kan sualte kan sim tak zet chuan, Jehova’n a chawi kâna a phurh bo tawh sualte avânga inthiam lohna kan neih reng a ngai tawh lo.

10-11. ‘Ngaihdam peih,’ tih ṭawngkam aṭangin Jehova chungchâng eng nge kan hriat theih? (Sâm 86:5)

¹⁰ Sâm 86:5 chhiar rawh. Jehova chuan ‘ngaihdam a peih’ tih Davida’n a sawi a. Bible hrilhfiahna pakhat chuan chumi ṭawngkam nêna inkûngkaihin Pathian chungchângah: “[Ani] chu ‘ngaidamtu’ a ni a—chu chu amaha ‘bet’ a ni,” tiin a sawi. Engvângin nge ngaihdamna chu Jehova miziaa bet a nih? Chumi châng vêk chuan: “A kotu apiang che chungah ngilneihna i ngah sî ṭhîn a,” tiin a hrilhfiah a ni. Thuziak hmasaa kan hriat tawh angin, hmangaihna rinawm chuan Jehova chu amah betu rinawmte nêna inlaichînna thûk leh zung kaih nghet tak siam tûrin a chettîr a. A hmangaihna rinawm avângin, simna lantîrtu zawng zawngte chu “a ngaidam nasa khawp dâwn” a ni. (Is. 55:7) Pathian ngaihdamna pawm harsa i tih chuan, heti hian i inzâwt thei a ni: ‘Jehova chu Ngaidamtu—a zahngaihna dîla simna lantîrtu zawng zawngte ngaihdam peih rengtu—a ni tih ka ring em? Ka ring a nih chuan, a zahngaihna dîla ka auh khân min ngaidam tawh tih ka pawm tûr a ni lo vem ni?’ tiin.

¹¹ Sual fate kan nihna chu Jehova’n a hre thiam pumhlûm tih hriatna aṭangin thlamuanna kan hmu thei a. (Sâm 139:1, 2) Chu chu Pathian ngaihdamna pawm tûra min ṭanpuitu Sâm bu-a Davida thusawi dangte aṭangin fiah takin kan hre thei a ni.

JEHOVA’N A HRIAT RENG CHU THEIHNGHILH SUH

12-13. Sâm 103:14-a sawi angin, Jehova’n kan chungchângah eng nge a hriat reng a, chu chuan eng ti tûrin nge a chêttîr?

¹² Sâm 103:14 chhiar rawh. Jehova chuan “vaivut mai kan ni tih a hriat reng” thu Davida’n a sawi a. Chûng thute hmang chuan, Pathianin simna lantîrtute ngaihdam a inpeih reng chhan pakhat chu a târ lang a: Sual fate kan nihzia a hre reng a ni. Chumi hre thiam lehzual tûr chuan, Davida thusawite chu ngun lehzualin i lo enho vang u.

¹³ Davida chuan “kan taksa siam dân” chu Pathianin chiang takin a hria tih a sawi a. Adama chu “leia vaivutin” a siam a; mihring ṭha famkimte pawhin theih chin an nei tih a hre chiang a ni—entîr nân, ei te, mut te leh, boruak hîpte an mamawh tih chu. (Gen. 2:7) Mahse, Evi leh Adama te’n thil an tih sual khân vaivut an nihna chuan awmze thûk lehzual a nei a. An thlahte kan nih angin, thil sual tih duhna min neihtîrtu sual chu kan rochung a ni. Jehova chuan sual fate kan nihna chu a hre satliah mai lo va; a ‘hre reng’ tih Davida’n a sawi a ni. Heta hman Hebrai thu mal hian a ṭha zâwnga thiltih a kâwk thei a. Davida sawi awmzia chu heti hian kan khai khâwm thei a ni: Jehova chuan tlin loh châng kan nei dâwn tih a hre thiam a; thil kan tih sual hunah pawh, thinlung taka kan sim chuan kan chungah zahngaihna lantîrin min ngaidam dâwn a ni.—Sâm 78:38, 39.

14. (a) Engtin nge Jehova ngaihdamna nasatzia Davida’n a hrilhfiah? (Sâm 103:12) (b) Engtin nge Davida tehkhin thu chuan Jehova’n min ngaidam pumhlûm tih a târ lan? (“Jehova’n A Ngaihdama A Theihnghilh Dân,” tih bâwm chu en rawh.)

¹⁴ Jehova ngaihdamna chu eng ang khawpa nasa nge a nih? (Sâm 103:12 chhiar rawh.) Davida chuan Pathianin min ngaihdam hian, kan sualna chu “chhak leh thlang a inhlat” anga hlaah min dahsak tih a sawi a. Chhak lam chu thlang lam aṭanga hla berah a awm a; an intawng ngai lo. Chu chuan Jehova ngaihdam tawh sualte chungchâng eng nge min hriattîr? Hrilhfiahna pakhat chuan heti hian a tehkhin a ni: “Sual chu hla taka lâk bo a nih chuan, a rim te, a hniak te leh, chumi chungchânga hriat rengnate chawpin a bo vek tih kan chiang thei,” tiin. Rim eng emaw chuan thil thleng tawhte chu min hriat chhuahtîr thei a. Chuvângin, Jehova’n sual a ngaihdam hian, chu sual chu hriat chhuahtîra kan chunga rorêl tûra chêttîr theitu a rim chawpa bo vek ang a ni.—Ezek. 18:21, 22; Tirh. 3:19.

15. Hun kal tawha thil kan tih sual avânga inthiam lohna kan la nei reng a nih chuan eng nge kan tih theih?

¹⁵ Engtin nge Sâm 103-naa Davida thusawite chuan Jehova ngaihdamna pawm tûra min ṭanpui theih? Hun kal tawha thil kan tih sual avânga inthiam lohna kan la nei reng a nih chuan: ‘Jehova hriat reng chu ka theihnghilh em —sual fa ka nihzia hriain, keimah anga thil sual ti inlamlêt hi min ngaidam dâwn tih ka theihnghilh em? Jehova theihnghilh tawhte chu ka la hre reng em—a ngaihdam a, thiam loh min chantîr tawh lohna tûr sual chu ka la hre reng em?’ tiin kan inzâwt thei a ni. Pathianin tûn hmaa kan thil tih sualte chu a ngaihven lo va. Keini pawhin kan ngaihven tûr a ni lo. (Sâm 130:3) Jehova ngaihdamna kan pawm chuan, tûn hmaa kan thil tih sualte avângin mahni kan inngaidam theiin, hma lam kan pan thei dâwn a ni.

16. Inthiam lohna neih reng a hlauhawm chhan entîrna pe rawh. (Milem en bawk rawh.)

¹⁶ Entîr nân, inthiam lohna neih reng chu hnung lam enna dârthlalang en chunga motor khalh tum ang a ni a. I hnung lam aṭanga tawh sual i tawh theihte i hmuh theih nân, a khât tâwka dârthlalang en chu thil ṭha tak a ni. Mahse, him taka kal zêl tûr chuan hma lam i thlîr tlat a pawimawh. Chutiang bawkin, tûn hmaa kan thil tih sualte aṭanga inzir tûr leh ti nawn leh tawh lo tûra kan tumna ti nghet tûrin, a khât tâwka chûngte ngaihtuah lêt chu thil ṭha a ni thei a. Mahse, chûngte kan ngaihtuah reng erawh chuan, inthiam lohna chuan Pathian rawng chu a ṭha thei ang bera bâwl thei lovin min siam thei a ni. Chuvângin, hma lam hun i ngaihven tlat zâwk ang u. Thiltawn ṭha lote ‘rilruah pawh a luh tawh lohna’ tûr Pathian tiam khawvêl thara min hruaitu kawng chu kan zawh mêk si a.—Is. 65:17; Thuf. 4:25.

I THINLUNG HMIN ZAWM ZEL RAWH

17. Engvângin nge Jehova’n min hmangaih tih leh min ngaidam tih pawm tûra kan thinlung kan hmin zawm zêl a ngaih?

¹⁷ Jehova’n min hmangaih tih leh min ngaidam tih pawm tûra kan thinlung kan hmin zawm zêl a ngai a ni. (1 Joh. 3:19) Engvângin nge? Setana chuan hmangaih tlâk loh leh ngaihdam tlâk loh nia inhriatna min neihtîr a tum reng dâwn vâng a ni. A thiltum ber chu Jehova rawngbâwl min bânsantîr hi a ni a. Hun a nei tam tawh lo tih a inhriat avângin, ṭan a khawh nasa lehzual dâwn tih kan beisei thei a ni. (Thup. 12:12) Mahse, ani chu hnehna kan chantîr ngai tûr a ni lo!

18. Jehova’n a hmangaih che tih leh a ngaidam che tih pawm tûra i thinlung hmin tûrin eng nge i tih theih?

¹⁸ Jehova’n a hmangaih che tih i rinna ti nghet tûrin, thuziak hmasaa târ lan thurâwnte kha nunpui la. Jehova ngaihdamna pawm tûra i thinlung hmin tûrin, a chungchâng a târ lan dân chu ngaihtuah ang che. Bible ziaktute hnêna a ngaihdamna chungchâng a târ lantîr dân chu chhût ngun la. Sual fa i nihzia hriain, zahngaihna nei takin a dâwr ang che tih theihnghilh lo bawk la. A ngaihdam hian a ngaidam pumhlûm a ni tih hre reng bawk ang che. Tichuan, Davida’n Jehova zahngaihna chunga rinnghehna a neih ang chu neiin, “Jehova, ‘ka sual khawlohna’ i ngaihdam avângin i chungah ka lâwm e!” tiin i sawi thei dâwn a ni.—Sâm 32:5.