Sual Fate Chhandam Tûra Jehova Thiltih

1-2. (a) Sual chu eng nge ni a, engtin nge kan hneh theih? (“Ṭawngkam Hrilhfiahna” chu en bawk rawh.) (b) Tûn ṭum chhuak Vênnainsâng-a he thuziak leh thuziak dangahte eng nge kan sawiho vang? (“Chhiartute Hriat Atân,” tih chu en bawk rawh.)

PATHIAN Jehova’n eng ang khawpin nge a hmangaih che? A chhânna i hmuh theih dân kawng ṭha tak chu sual leh thihna lak aṭanga chhanhim tûr chea a thil tih tawhte zir hi a ni. Suala chu nangmaha i hneh theih ngai loh tûr hmêlma hlauhawm tak a ni a. Nî tin thil kan tisualin, sual avângin kan thi ṭhîn a ni. (Rom 5:12) Mahse, lâwmawm takin Jehova ṭanpuinain sual chu kan hneh thei a. Kan hneh ngei dâwn tih a chiang bawk!

² Pathian Jehova chuan kum 6,000 chuang mihringte chu sual donaah a lo ṭanpui tawh a ni. Engvângin nge? Anni chu a hmangaih vâng a ni. A tîr ata a hmangaih avângin he sual beihnaah hian kawng tam takin a lo ṭanpui tawh a. Sualin thihna a thlen tih a hriat avângin kan thih a duh lo va. Chatuana kan nun a duh a ni. (Rom 6:23) Chu chu i tâna a duh chu a ni. He thuziakah hian zawhna pathum kan sawiho vang: (1) Engtin nge Jehova’n sual fate hnêna beiseina a pêk? (2) Engtin nge Bible hun laia sual fate’n Jehova lawm an hlawh theih? (3) Sual lak aṭanga mihringte chhandam tûrin Isua’n eng nge a tih?

ENGTIN NGE JEHOVA’N SUAL FATE HNENA BEISEINA A PEK?

3. Engtin nge kan nu leh pa hmasa berte chuan thil an tihsual?

³ Jehova’n mihring hmasa berte a siam khân hlim taka awm tûrin a duh a. Chênna tûr hmun mawi tak, inneihna thilpêk duhawm tak leh, hna phûrawm tak a pe a ni. An thlahte nên leilung hi luah khatin khawvêl pumpui chu Eden huan anga hmun mawi takah an chantîr ang. Thupêk zawm awlsam tak pakhat a pe a. Chu thupêk chu bawhchhiaa a laka an hel lui a nih chuan, an sualna avângin an thi ang tih a vaukhân bawk a ni. Mahse, thil thlen dân chu kan hria a. Pathian leh anmahni chunga hmangaihna nei lo thlarau thilsiam pakhat chuan thupêk chu bawhchhe tûrin a rawn thlêm a. A thlêm thlûkin an awm ta a. Hmangaihna nei tak an Pa chu ring lovin thil an tisual ta a ni. Chutah, Jehova sawi lâwk ang ngeiin chumi nî aṭang chuan an thiltih sawhkhâwk chu tuarin an lo tar a, a tâwpah an thi ta a ni.—Gen. 1:28, 29; 2:8, 9, 16-18; 3:1-6, 17-19, 24; 5:5.

4. Engvângin nge Jehova’n sual a huat a, engvângin nge sual do lêt tûra min ṭanpui? (Rom 8:20, 21)

⁴ Jehova’n kan inzirna atân chu thilthleng lungchhiatthlâk tak chu Bible-ah a chuantîr a. Chu chuan, sual a huat êm êm nachhan hre thiam tûrin min ṭanpui a ni. Sual chuan kan Pa laka min ṭhen hrangin thihna a thlen a. (Is. 59:2) Chuvângin, harsatna zawng zawng awmtîrtu thlarau thilsiam, helhmang Setana chuan sual chu a ngainain a tipung a ni. Eden huanah khân hnehna ropui tak a chang niin a inhre mai thei a. Mahse, Pathian Jehova hmangaihna ngahzia a hre thiam lo a ni. Pathian chuan Evi leh Adama thlahte tâna a thiltum chu a thlâk danglam lo. Mihring chhûngkua chu a hmangaih êm avângin beiseina kawng a hawnsak vat a ni. (Rom 8:20, 21 chhiar rawh.) Evi leh Adama thlah ṭhenkhatin amah an hmangaih dâwn tih leh a ṭanpuina rinchhanin sual an do dâwn tih a hria a. Pa leh Siamtu a nih angin sual lak aṭanga chhuah zalêna amah an hnaih theihna tûr kawng a hawnsak dâwn a ni. Engtin nge Jehova’n chu kawng chu a hawn ang?

5. Engtik khân nge Jehova’n mihringte tân beiseina kâwl a ên ṭantîr? Hrilhfiah rawh. (Genesis 3:15)

⁵ Genesis 3:15 chhiar rawh. Jehova’n Setana tihboral a nih tûr thu a hrilh lâwk khân beiseina kâwl a lo êng ṭan a. Chu beiseina thlen famkimtîrtu tûr “thlah” chungchâng a sawi lâwk a ni. Chu thlah chuan Setana tiboralin Eden huana a chawhchhuah sual zawng zawng a sût lêt dâwn a ni. (1 Joh. 3:8) Mahse, chumi hma chuan a ke ârtui chu Setana’n a “tithitling,” a nih loh leh a chungah thihna a thlen ang. Chu chuan Jehova rilru a tina êm êm dâwn a. Chuti chung chuan, mihringte chu sual leh thihna lak ata chhandam an nih theih dâwn avângin chutianga tawrh chu a inhuam a ni.

ENGTIN NGE BIBLE HUN LAIA SUAL FATE’N JEHOVA LAWM AN HLAWH THEIH?

6. Abela leh Nova te ang mi rinawmte’n Jehova hnaih tûrin eng nge an tih?

⁶ A hnu kum zabi tam tak chhûngin, Jehova’n sual fate’n amah an hnaih theih dân tûr chu zawi zawiin a tichiang telh telh a. Eden huana helna a chhuah hnuah, Evi leh Adama te fa pahnihna Abela chu Jehova chunga rinna lantîrtu mihring hmasa ber a ni a. Jehova a hmangaih a, tihlâwma hnaih a duh avângin hâlral thilhlan a hlân a. Berâm vêngtu a nih angin berâm no talhin Jehova hnênah a hlân a ni. Engtin nge Jehova’n a chhân lêt? “Abela leh a thilhlan chu a lâwm” a ni. (Gen. 4:4) Jehova chuan Nova anga, amah hmangaiha rinchhantute thilhlan chu a pawm bawk a. (Gen. 8:20, 21) Chûng thilhlante a pawmna aṭangin sual fate’n a lawm an hlawh thei tih leh an hnaih thei tih a târ lang a ni.b

7. Abrahama’n a fapa hlan a inhuamna aṭangin eng nge kan zir theih?

⁷ Ṭum khat chu Jehova’n mi rinawm Abrahama chu thil harsa tak ti tûrin a hrilh a. A fapa Isaaka chu a hnêna hlân tûrin a ti a ni. Abrahama tân chu chu a tih tawh azawnga thil huphurhawm ber a ni ngei ang. Chuti chung chuan, Jehova sawi angin a ti a. Mahse, a fapa a tihhlum hma lawkin Pathianin ani chu a dang a, a rilru a zâng ta huai a ni. Chu thilthleng chuan mi rinawm zawng zawngte tân thutak pawimawh tak a târ lang a: Jehova’n a fapa duh tak chu inthawina atâna pêk a inhuam ang tih chu. Mihringte hi min va hmangaih tak êm!—Gen. 22:1-18.

8. Dân hnuaia inthawinate hlanna chuan eng nge a târ lan? (Leviticus 4:27-29; 17:11)

⁸ Kum zabi tam tak hnuah, Pathian hnam thlan Israelte hnêna Dân pêk chuan an sual ngaihdam a nih theih nân hâlral thilhlan hlân tûrin a phût a. (Leviticus 4:27-29; 17:11 chhiar rawh.) Chûng inthawinate chuan mihringte sual laka chhandam hlen an nih theih nân inthawina ropui zâwk hlan a la ni dâwn tih a târ lang a ni. Thutiam thlah Pathian Fapa hlu tak chu hrehawm tuarin berâm no hlan tûr angin tihhlum a ni dâwn tih hrilhfiah tûrin Pathian zâwlneite chu thlarauva hriattîr an ni a. (Is. 53:1-12) Han ngaihtuah teh: Jehova chuan nang pawh tiamin mihring zawng zawng sual leh thihna laka chhan chhuak tûrin a Fapa duh tak hlân tûrin ruahmanna a siam a nih chu!

MIHRINGTE CHHANDAM TURIN ISUA’N ENG NGE A TIH?

9. Baptistu Johana chuan Isua chungchângah eng nge a sawi? (Hebrai 9:22; 10:1-4, 12)

⁹ C.E. kum zabi khatnaah, Pathian chhiahhlawh Baptistu Johana chuan Nazaret Isua a hmuhin: “En teh u, Pathian Berâm No, khawvêl sual la botu tûr saw!” tiin a sawi a. (Joh. 1:29, NWT.) Chûng thlarau thâwkkhuma a thusawite chuan Isua chu hun rei tak ata hrilhlâwk tawh thlah a ni tih a târ lang a ni. Ani chuan thutiam angin inthawina a hlân ang. Tûnah chuan, sual fate tân sual hneh pumhlûm theihna tûr beiseina chu tûn hma zawng aiin a nghet lehzual a ni.—Hebrai 9:22; 10:1-4, 12 chhiar rawh.

10. Engtin nge Isua chuan mi sualte “simtîr” tûra lo kal a ni tih a târ lan?

¹⁰ Isua chuan an thiltih sualte avânga rilru hrehawm taka awmte chu a ngaihsak lehzualin, a hnungzuitute ni tûrin a sâwm a. Sual chu mihringte hrehawmna zawng zawng lo chhuahna bulpui a ni tih a hria a ni. Chuvângin, mite’n mi sual nia an hriatte chu a ṭanpui a. Entîrna pein: “Dam lote’n doctor an mamawh a, mi hrisêlte erawh chuan an mamawh lo,” tiin a sawi a. “Mi felte tâna lo kal ka ni lo va, mi sualte simtîr tûr zâwka lo kal ka ni,” tiin a sawi belh bawk. (Mt. 9:12, 13, NWT.) Chûng a thusawite mil chuan thil a ti a ni. A mittui nêna a kê hrutu hmeichhe sualna chu zahngaihna nei takin a ngaihdamsak a. (Lk. 7:37-50) Tuichhunchhuah bula a tawh Samari hmeichhia chu nungchang bawlhhlawh takin a nung tih hre mah se, thutak pawimawh tak a zirtîr a. (Joh. 4:7, 17-19, 25, 26) Chu bâkah, Pathianin Isua chu sual man, thihna hial pawh sût lêt tûrin thiltihtheihna a pe a ni. Engtin nge? Isua chuan a hmei a pa, a pui a pangte chu a kaitho a ni.—Mt. 11:5.

11. Engvângin nge thil sual titute chu Isua lama hîpa an awm?

¹¹ Thil sual tam tak titute pawh Isua lama hîpa an awm chu thil mak a ni lo. An chunga khawngaihna leh hriatthiamna a lantîr avângin amah pan chu nuam an ti a ni. (Lk. 15:1, 2) Chu bâkah, amaha rinna an lantîr avângin anni chu a fak a, ṭha takin a cheibâwl bawk. (Lk. 19:1-10) A Pa ngilneihna chu hmuh theihin famkim takin a lantîr a ni. (Joh. 14:9) A thusawi leh thiltihte hmangin khawngaihna leh ngilneihna ngah tak a Pa chuan mihringte chu a hmangaihin, sual an donaah hnehna an chan theih nâna ṭanpui a duhzia a lantîr a. Isua chuan thil sual titute chu inthlâk danglama amah zui duhna nei tûrin a ṭanpui bawk a ni.—Lk. 5:27, 28.

12. A thihna tûr chungchângah Isua’n eng nge a sawi?

¹² Isua’n a hmachhawn tûr chu a hria a. A hnungzuitute hnênah phatsan a ni anga, banah tihhlum a ni dâwn tih vawi tam tak a hrilh a ni. (Mt. 17:22; 20:18, 19) Johana sawi leh zawlneite hrilh lâwk angin a inthawina chuan khawvêl aṭangin sual a la bo dâwn tih a hria a. A nun a hlan hnuah ‘mi zawng zawng a lamah a hîp’ dâwn tih a sawi bawk a ni. (Joh. 12:32) Sual fate chuan Isua chu an Lal anga pawm a, a hniakhnung zuiin Jehova an tilâwm thei a ni. Chutianga an tih chuan a tâwpah “sual laka chhuah zalen an ni ang.” (Rom 6:14, 18, 22, NWT; Joh. 8:32) Chuvângin, Isua chuan inhuam tak leh huaisen takin râpthlâk taka thihna chu a hmachhawn a ni.—Joh. 10:17, 18.

13. Engtin nge Isua a thih a, a thihna chuan Pathian Jehova chungchâng eng nge min zirtîr? (Milem en bawk rawh.)

¹³ Isua chuan phatsan te, man te, na taka ṭawng khum te, sawichhiat te, mi sual anga puhna te leh, nghaisaknate pawh a tâwk a. A tâwpah, sipaite chuan an tihhlumna tûr hmuna hruaiin banah an khêng bet a ni. Chûng hrehawmnate chu rinawm taka a tawrh lai chuan hrehawm ti taka lo thlîrtu Mi Pakhat a awm a. Chu chu Pathian Jehova a ni. A Fapa tawrhna chu tihtâwpsak tûrin thiltihtheihna nei mah se, a tihtâwpsak lo. Engvângin nge? Pa, hmangaihna ngah tak chuan engvângin nge chutianga a tih? Hmangaihna vâng a ni. Isua chuan: “Pathianin khawvêl a hmangaih êm êm a; chutichuan, a Fapa mal neih chhun a pe a, tu pawh amaha rinna lantîrtu apiang an boral loh va, chatuana nunna an neih zâwk nân,” tiin a sawi a ni.—Joh. 3:16, NWT.

14. Isua inthawina chuan eng nge a hriattîr che?

¹⁴ Isua inthawina chu Jehova’n Evi leh Adama thlahte a hmangaihzia a nemnghehna ropui ber a ni a. Chutiang chuan Jehova’n a hmangaihzia che a nem nghet a ni. Sual leh thihna ata chhan chhuak tûr chein hrehawm tam tak tuarin a neih ṭhat ber a pe che a. (1 Joh. 4:9, 10) Chuvângin, sual do hneh tûra min ṭanpui a duh tih a chiang a ni.

15. Pathian thilpêk Isua tlanna inthawina hlâwkpui tûrin eng nge kan tih ngai?

¹⁵ Pathian thilpêk, a Fapa mal neih chhun tlanna inthawina avângin kan sualte ngaihdam a ni thei a. Mahse, Pathian ngaihdamna dawng tûr chuan kan tih ngei tûr a awm a ni. Chu chu eng nge? Baptistu Johana leh Isua Krista ngei chuan: “Sim rawh u, vân Ram chu a hnai tawh e,” tia sawiin a chhânna chu min pe a. (Mt. 3:1, 2; 4:17, NWT.) Chuvângin, simna tel lo chuan sual kan do thei lo vanga, kan Pa duh tak kan hnaih thei lo bawk ang. A nih leh, simnaah chuan eng nge tel a, chu chuan ṭha famkim lo kan ni chung pawhin engtin nge sual do tûra min ṭanpui? A dawta thuziakah chhân a ni ang.