Hun Harsate Tuar Chhuak Tûrin Mi Dangte Ṭanpui Rawh

1. Engtin nge Jehova’n a chhiahhlawh rinawmte ṭawngṭaina a chhân ṭhin?

JEHOVA’N tuemaw ṭhahnemngai taka ṭawngṭaina chhânna atân a hmang thei che tih i hria em? Kohhran upa, kohhranho rawngbâwltu, pioneer, a nih loh leh kohhrana thuchhuahtu i nih pawhin mi dangte i ṭanpui thei a. I upa emaw, i naupang emaw, unaunu emaw, unaupa emaw pawh ni la, i ṭanpui thei bawk a ni. Jehova hmangaihtu tuemawin a ṭanpuina a dîl hian kan Pathian chuan amah chu ‘thlamuan’ tûrin kohhran upate leh a chhiahhlawh rinawm dangte a hmang fo ṭhîn. (Kol. 4:11) Chutiang kawnga Jehova leh kan unaute rawng kan bâwlsak thei chu chanvo hlu a va ni êm! Chutiang thil chu hri lên lai te, chhiatna thlen lai te, leh tihduhdahna thlen laitein kan ti thei a ni.

HRI LEN CHHUNGIN MI DANGTE ṬANPUI RAWH

2. Engvângin nge hri lên chhûng hian mi dangte ṭanpui chu a harsat mai theih?

² Hri lêng hian kan tân inṭanpui tawn a tiharsa thei a. Entîr nân, kan ṭhiante tlawh châk hle mah ila, chutianga tih chu a him lo a ni. Sum leh pai lama harsatna tâwkte chaw eia sâwm kan duh pawh a ni thei a; mahse, chu pawh chu thil theih a ni lo. Mi dangte ṭanpui chu duh hle mah ila, kan chhûngte ngeiin hrehawm an tuar a nih chuan, chutianga tih chu a harsa hle thei bawk. Kan unaute ṭanpui chu kan duh reng a, an tâna kan tih theihte kan tih hian Jehova a lâwm a ni. (Thuf. 3:27; 19:17) Eng nge kan tih theih?

3. Desi-i awmna kohhrana upate entawn tûr siam aṭangin eng nge kan zir? (Jeremia 23:4)

³ Upate tih theih chu. Kohhran upa i nih chuan, berâmte hre chiang rawh. (Jeremia 23:4 chhiar rawh.) Thuziak hmasaa târ lan unaunu Desi-i chuan, “Kan rawngbâwlna group-a upate chuan kei leh mi dangte min thawhpui fo va, kan inkawmhonaah pawh min rawn telpui ṭhîn a ni,” tiin a sawi.b Chutianga an tih ṭhin avâng chuan, COVID-19 hripui lên hnuah leh a chhûngte ṭhenkhat hri avânga a chân hnuah Desi-i ṭanpui chu upate tân a awlsam lehzual a ni.

4. Engvângin nge upate chuan Desi-i chu an ṭanpui theih a, zir tûr eng nge kan neih?

⁴ Desi-i chuan, “Kohhran upate chu ka ṭhiante ang maia ka lo hriat tawh avângin, ka rilru leh ka ngaihtuahnate an hnêna hrilh chu a awlsam hle a ni,” tiin a sawi. Kohhran upate tâna zir tûr chu eng nge ni? Chhiatna thlen hmain, in enkawlna hnuaia awm berâmte chu vêng ṭha rawh u. An tân ṭhian ni ula. Hri lên avânga anmahni a mi mala in tlawh thei lo a nih chuan, biak pawh theih dân kawng dang zawng ang che u. Desi-i chuan, “A châng chuan upa hrang hrangin ni khat chhûngin min rawn phone loh pawn message-te min rawn thawn ṭhîn. Chûng Bible châng min thawnte leh min chhiarsakte chu ka hriat tawh hnu ni mah se, ka thinlung a khawih hle,” tiin a sawi.

5. Engtin nge upate chuan unaute mamawh chu an hriat theih a, anni chu an ṭanpui theih?

⁵ I unaute mamawh i hriat theih dân kawng khat chu thiam taka zawhnate zâwt a, an rilrua thil awmte phawrh chhuahsak hi a ni. (Thuf. 20:5) Anni chuan ei tûr, damdawi, leh thil dangte chu an mamawh tâwk an nei em? An hna emaw, an in emaw hial pawh chân thei dinhmunah an ding em? Sawrkâr aṭanga ṭanpuina dawn theih a awm a nih chuan, chumi dawng thei tûr chuan kan ṭanpuina an mamawh em? Desi-i chuan tisa lamah Kristian unaute ṭanpuina a dawng a. Mahse, upate hnên aṭanga rilru lam leh thlarau lam ṭanpuina a dawnte chuan, fiahna a tawhte paltlang tûrin a bîk takin a ṭanpui a ni. Ani chuan: “Upate’n min ṭawngṭaipui a. An sawi chiah chu hre tawh lo mah ila, chutih hun laia ka rilru a khawih dân chu ka la hre reng a ni. Chu chu Jehova’n, ‘I mal lo a nia’ tia min hrilh ang mai a ni,” tiin a sawi.—Is. 41:10, 13.

6. Kohhrana mi tam takin mi dangte ṭanpui tûrin eng nge an tih theih? (Milem en rawh.)

⁶ Mi dangte tih theih chu. Hmahruai tûra upate kan beisei chu thil inâwm tak a ni a. Mahse, Jehova chuan infuih a, inṭanpui tawn tûrin min duh a ni. (Gal. 6:10) Hmangaihna kan lantîr tlêmtê pawhin dam lo tu emaw chungah nghawng nasa tak a nei thei a. Naupang chuan unaupa tu emaw fuih nân card emaw, lemziak emaw a thawn thei a ni. Ṭhalai unau puitling tak chuan unaunu tu emaw tân ei tûr leisakin hna ṭûl dang a thawhsak thei bawk. Dam lo tu emaw tâna in lama ei tûr siamsak a, a ina va pêk chungchâng hi eng nge ni ve? Ni e, hri a darh zau zêl hian, kohhrana mi tinte’n fuihna an mamawh a. Hmaichhanin emaw, videoconference emawa kan inkhâwm zawhah, unaute fuih tûrin kan awm hnufual thei ang. Upate pawhin fuihna an mamawh ve bawk. Thuhretu ṭhenkhat chuan hri lên chhûnga unaute tâna tih tûr tam lehzual neitu upate hnênah lâwmthu sawina thuziak an thawn a ni. ‘Infuih tawna, intisâwt tawn ṭheuh’ tûra kan tih theihte kan ti hi a va ṭha êm!—1 Thes. 5:11.

CHHIATNA TAWKTE ṬANPUI RAWH

7. Chhiatna thlen hnuah eng harsatna nge awm mai thei?

⁷ Chhiatna chuan tu emaw nun chu mit khap kâr lekah a tichhe vek thei a. A tuartute chuan an thil neih te, an in te, leh an hmangaih takte hial pawh an chân thei bawk. Hetiang thil râpthlâk takte hi kan Kristian unaute chungah pawh a thleng thei a ni. Anmahni ṭanpui tûrin eng nge kan tih theih?

8. Upate leh chhûngkaw lûte chuan chhiatna a thlen hmain eng nge an tih theih?

⁸ Upate tih theih chu. Upate u, chhiatna thlen hmain inbuatsaih tûrin unaute chu ṭanpui ula. Kohhrana mi tinin him taka awm thei tûra an tih ngaite leh upate biak pawh dân an hria tih chian ang che u. Thuziak hmasaa kan sawi tâk Margaret-i chuan heti hian a sawi a ni: “Kan kohhran upate chuan inkhâwmnaa tualchhûng mamawhah kan chheh vêlah ram kâng chhuah theih hun chhûng a la zawh loh thu an sawi a. Anni chuan thuneitute’n insawn chhuak tûra thu an chhuah emaw, dinhmun a hlauhawm viau emaw chuan in chhuahsan nghâl tûrin min hrilh a ni,” tiin. Kâr nga hnu lekah kâng mei râpthlâk tak a chhuah avângin, chu an hriattîrna chu a hun taka pêk a ni. Chhûngkuaa Pathian biakna neihnaah, chhûngkaw lûte chuan chhûngkuaa mi tinte’n an tih ngaite an enpui thei a. I fate nên in lo inbuatsaih lâwk a nih chuan, chhiatna a thleng a nih pawhin hahdam taka in awm theih ngei a rinawm.

9. Engtin nge chhiatna thlen hma leh a thlen hnuah upate an inbuatsaih theih?

⁹ Group overseer i nih chuan, chhiatna a thlen hmain i rawngbâwlna group-a awmte phone number leh address dik tak i nei tih chian ang che. Chûngte chu ziak chhuak la, a la dik reng em tih chian ṭhîn ang che. Chutiang chuan chhiatna a thleng a nih pawhin, an mamawhte hre tûrin thuchhuahtu tinte chu i be pawh thei dâwn a ni. Chûng chanchin kimchangte chu bial kantu be pawh ṭhîntu, kohhran upate râwn khâwmtu hnênah hriattîr vat ang che. Hêng unaupate hi an thawhho chuan a ṭha thei ang berin ṭanpuina an pe thei dâwn a ni. Kâng mei a chhuah hnuah Margaret-i te bial kantu chu dârkâr 36 chhûng mu lovin a awm a, ani chuan an in chhuahsan ngai unau 450 vêlte mamawh ngaihsak a, be pawhtu upate hnathawh a huaihawt a. (2 Kor. 11:27) Hetiang kawng hian, mi tinte’n awmna tûr hmun an nei ṭheuh thei a ni.

10. Engvângin nge upate’n berâmte tlawhna chu an ngaih pawimawh ang? (Johana 21:15)

¹⁰ Thlarau lam leh rilru lama ṭanpuina pêk hi Kristian upate hnathawh zînga pakhat a ni a. (1 Pet. 5:2) Chhiatna thlen laiin, upate chuan unaute zawng zawng an him em tih leh ei tûr, silhfên, leh awmna tûr hmun an nei em tih an chian hmasa tûr a ni. Mahse, chhiatna thlen hnu thla tam tak chhûng chu, chhiatna tuartute chuan thlarau lam leh rilru lamah ṭanpuina an la mamawh chhunzawm zêl a rinawm. (Johana 21:15 chhiar rawh.) Chhiatna tuar unau tam tak tlawhtu Branch Committee member, Harold-a chuan: “Ngai awh leh tûr chuan hun a duh rei khawp mai,” tiin a sawi a. “An nun chu pângngai takin hmang chho ṭan leh mah se, an hmangaih tak an chân tâk te, an thil hlu neih an chân te, leh dinhmun hlauhawm tak an tawhte chu an rilruah a la châm reng thei a. Chûngte chuan an lungngaihnate a chawh thawhsak thei a ni. Chu chu rinna tlâkchham vâng ni lovin, mihring nih dân phung pângngai a ni,” tiin a sawi belh bawk.

11. Chhûngkuate chuan eng thilte nge an la mamawh chhunzawm zêl theih?

¹¹ Upate chuan “ṭapte chu ṭahpui” tûra fuihna chu an zâwm a. (Rom 12:15) Chhiatna tuarte chu Jehova leh an Kristian unaute’n an hmangaih reng tih hriatnawntîr an ngai thei. Upate chuan chhûngkuate chu ṭawngṭaina, inzirna, inkhâwma telna, leh thu hrilh rawngbâwlnaa inhman pawh tiamin an thlarau lam hun duan nei reng tûra ṭanpui chu an duh a ni. Chu bâkah, upate chuan nu leh pate chu chhiatnain a tihchhiat theih loh thilte ngaihtuah tlat tûra an fate ṭanpui tûrin an fuih bawk. Nu leh pate u, in fate chu Jehova chu an Ṭhian a ni reng ang tih leh anni chu a ṭanpui reng ang tih hriatnawntîr ang che u. Anmahni ṭanpui tûra inpeih reng khawvêl pum huap chhûngkuaah an tel reng thei tih hrilh theihnghilh suh u.—1 Pet. 2:17.

12. Chhiatna tuarte ṭanpui tûrin mi dangte’n eng nge an tih theih? (Milem en rawh)

¹² Mi dangte tih theih chu. In bul hnaiah chhiatna a thleng a nih chuan, i ṭanpui theih dân tûr upate zâwt ang che. An in chhuahsan ngaite, a nih loh leh in sakna lama tlâwmngaia inpete chu hun engemawti chhûng atân i lo mikhual thei a. Ṭanpui ngai thuchhuahtute hnênah ei tûr leh thil dangte i pe thei bawk. Chhiatna chu hmun hla zâwkah a thleng a nih pawhin, i la ṭanpui thei reng tho a ni. Engtin nge i ṭanpui theih? Chhiatna tuarte ṭawngṭaisakna hmangin i ṭanpui thei a ni. (2 Kor. 1:8-11) Khawvêl pum huap rawngbâwlna atâna thawhlâwm thawhin chhawmdâwlna hna chu sum leh paiin i ṭanpui thei bawk. (2 Kor. 8:2-5) Chhiatna thlenna hmunah ṭanpui tûra i kal thei a nih chuan, upate hnênah tlâwmngaia inpêk dân chungchâng zâwt ang che. Chutianga ti tûra sâwmna i dawng a nih chuan, a ṭha thei ang bera i ṭanpui theih nân zirtîrna ṭhenkhat i dawn ngei a rinawm.

UNAUTE CHU TIHDUHDAHNA TUAR CHHUAK TURIN ṬANPUI RAWH

13. Kan rawngbâwlna khap behna ramahte chuan unaute’n eng harsatnate nge an tawh?

¹³ Kan rawngbâwlna khap behna ramahte chuan tihduhdahna chuan nun a tiharsa lehzual thei a. Chûng rama awm kan unaute chuan ei leh bâr lama harsatna te, dam lohna te, leh hmangaih takte thihnaa chânnate an la tuar chhunzawm zêl a ni. Mahse, khap behna avângin upate tân fuihna mamawhte tlawh leh zalên taka biak pawh chu a theih loh mai thei. Chu chu thuziak hmasa lama kan sawi tâk Andrei-a chungah pawh a thleng dik a ni. A rawngbâwlna group-a unaunu pakhat chuan sum leh paiah harsatna a tâwk a. Ani chu motor-in a chesual a. A taksa hmun tam takah zai a ngai a, hna a thawk thei lo a ni. Khuahkhirhna a awm chung leh hripui a lêng chung pawhin unaute chuan ṭanpui tûrin theih tâwp an chhuah a, Pathian Jehova pawhin a hmu reng a ni.

14. Engtin nge upate’n Jehova rinchhanna kawngah entawn tûr an siam theih?

¹⁴ Upate tih theih chu. Andrei-a chuan ṭawngṭaiin, a tih theihte a ti a. Engtin nge Jehova’n a chhân? Chêtsualna tâwk unaunu chu nasa lehzuala ṭanpui tûrin kohhrana mi hrang hrangte a chêttîr a ni. Unau ṭhenkhatte chuan chu unaunu chu damdawi inah an hruai a. Mi dangte chuan sum leh paiin an ṭanpui thung. Jehova’n anni chu an tih theih apiang ti tûra chêttîrin, an thawhhona leh huaisen taka ṭan an lâkna chu mal a sâwm a ni. (Heb. 13:16) Upate u, rawngbâwlna khuahkhirh a nih hunah mi dangte ṭanpuina dîl rawh u. (Jer. 36:5, 6) Eng dang zawng aiin Jehova rinchhan rawh u. Ani chuan kan unaute mamawh phuhrûksak tûrin a ṭanpui thei che u a ni.

15. Tihduhdahna hnuaiah engtin nge kan Kristian inpumkhatna chu kan vawn theih ang?

¹⁵ Mi dangte tih theih chu. Khapbehna hnuaiah chuan unau tlêmtê chauhva kan inhmuhkhâwm a ngai thei a. Chuvângin, remna kan neih chu a hma zawng aiin a pawimawh lehzual a ni. Setana chu do rawh, unaute ni lovin. Unaute thil tihsual chu haider la, inrem lohna eng pawh chinfel thuai tum ang che. (Thuf. 19:11; Eph. 4:26) Inṭanpui tawnna kawngah hma hruai ang che. (Tit. 3:14) Mi dangte’n unaunu an ṭanpuina chuan rawngbâwlna group-ah nghawng ṭha tak a nei a. Anni chu chhûngkua ang maiin an inpawh lehzual a ni.—Sâm 133:1.

16. Kolossa 4:3, 18-in a sawi angin, engtin nge tihduhdahna tuar kan unaute chu kan ṭanpui theih?

¹⁶ Sawrkâr khuahkhirhnate tâwk chung pawhin kan Kristian unau a sâng têlte chuan Jehova rawng an bâwl a. An zînga ṭhenkhat chu an rinna avângin lung inah an tâng a ni. Lung ina tângte, an chhûngte, leh hêng unaute thlarau lam, tisa lam, leh dân lama ṭanpuina pe tûra an zalênna dinhmun hlauhawma dahtute tân kan ṭawngṭai thei a ni.c (Kolossa 4:3, 18 chhiar rawh.) I ṭawngṭaina thiltihtheihna chu ngainêp ngai suh!—2 Thes. 3:1, 2; 1 Tim. 2:1, 2.

17. Engtin nge tihduhdahna hmachhawn tûrin tûnah i inbuatsaih theih?

¹⁷ In chhûngkuain tihduhdahna hmachhawn tûrin tûnah in lo inbuatsaih thei a. (Tirh. 14:22) Thil ṭha lo, thleng thei zawng zawngte chu ngaihtuah suh. Chu aiin, Jehova nêna in inṭhianna tinghet la, i fate pawh chutianga ti tûr chuan ṭanpui bawk ang che. I rilru a hah chângin, Pathian hnênah i thinlung leih bua la. (Sâm 62:7, 8) Pathian in rin theih chhan chhûngkuain sawiho ṭhîn ang che u.d Chhiatna thlen hunah mi mala in lo inbuatsaihna leh Jehova in rinna chuan in fate chu huaisenna leh thlamuanna a neihtîr ang.

18. Eng hma lam hunin nge min hmuak?

¹⁸ Pathian thlamuanna chuan him nia inhriatna min neihtîr a. (Phil. 4:6, 7) Chumi hmang chuan Jehova’n tûn laia min nghawng thei hri te, chhiatna te, leh tihduhdahnate tuar chung pawhin kan thinlung a tihahdam a ni. Ani chuan min enkawl tûrin upa thawkrim takte a hmang a. Chu bâkah, inṭanpui tawn theihna chanvo min pe ṭheuh a ni. Tûna thlamuanna kan neih hian “hrehawm nasa tak” pawh tiamin, fiahna nasa zâwk lo thleng tûrte hmachhawn thei tûrin min thuam ang. (Mt. 24:21) Chutih hunah chuan thlamuanna kan neih reng a ngai ang a, mi dangte pawh nei ve tûrin kan ṭanpui a ngai bawk ang. Mahse, chûng thilte a thlen hnuah chuan, rilru hahna min thlentu thilte kan hmachhawn tawh lo vang a. A tâwpah chuan, Jehova’n engtik lai pawha nei tûra min duh, thlamuanna famkim leh tluantling chu kan nei tawh ang.—Is. 26:3, 4.