‘Lei Rochung’ Tûrin I Inpeih Tawh Em?

LEI PARADIS-A CHANTIR TURIN I INPEIH TAWH EM?

Jehova’n mihringte hnêna ‘leilung hi luah khat a, an thû thûa awmtîr’ tûra thu a pêk khân, khawvêl pumpui hi zawi zawiin paradis a ni dâwn tih a târ lang a. (Gen. 1:28) Chatuana nung tûrte chuan chu thupêk chu an zâwm tûr a ni. Mahse, Eden huan a awm tawh loh avângin, anni chu paradis-ah an awm nghâl lo vang. Armageddon a tâwp hnu chuan, tihchhiata awm leilung hmun ṭhenkhat thianfai tûrin hnathawh tûr tam tak kan nei ang. Thawh tûr a va tam dâwn êm!

Chu chuan Babulon aṭanga an kîr leh huna Israel mite hnathawh tûrte chu min hriat chhuahtîr a. An rama an chên tawh lohna chu kum 70 vêl a ni tawh a. Mahse, Isaia chuan Jehova malsâwmnain ram chu an din ṭha leh thei dâwn tih a sawi lâwk a ni. Chu hrilh lâwkna chuan: “A thlalêr chu Eden angin a siam a, a ram ro chu LALPA huan angin a siam bawk a,” tiin a sawi. (Is. 51:3) Jehova chuan Israelte chu an ram hmun mawi taka an siamnaah a ṭanpui a. Chutiang bawkin, lei rochung tûrte pawhin Jehova malsâwmnain lei hi paradis mawi takah an siam thei ang. Chu hnathawhnaa tel ve i duhzia chu tûnah ngei pawh i lantîr thei a ni.

Chutianga i tih theih dân kawng khat chu, i in leh a vêl thianghlim leh fel fai taka dahna hmangin a ni a. I ṭhenawmte chuan tifai lo pawh ni se, nang chuan i in leh a vêlte chu i tifai thei a ni. Chu bâkah, tualchhûng Kingdom Hall leh Assembly Hall tih thianghlimna leh enkawlnaah i ṭanpui thei bawk. I dinhmunin a zir chuan, leilung chhiatna tuarte chhawmdâwlnaa ṭanpui tûra tlâwmngaia inpe tûrin dîlna i ziak thei bawk a ni. Chutiang chuan mamawh hun atâna ṭanpui i inpeihzia i lantîr a ni ang. Heti hian inzâwt rawh, ‘Leilung luahtu tûrte zîngah ka tel ve thei dâwn a nih chuan, eng thiamnate nge ka lo neih lâwk theih ang?’ tiin.

MITTHI THO LEHTE ṬANPUI TURIN I INPEIH TAWH EM?

Isua’n Jaira fanu a kaihthawh hnu lawk khân, naupang chu ei tûr pe tûrin a hrilh a. (Mk. 5:42, 43) Chu hmeichhe naupang kum 12 mi mamawh pêk chu thil harsa a ni lo ngei ang. Mahse, Isua thutiam, “thlâna awm zawng zawngin a aw an hria ang a, an chhuak vek ang,” tih a thlen famkim huna thawh tûr a tam tûrzia chu han ngaihtuah teh. (Joh. 5:28, 29) Bible chuan chipchiar takin sawi lo mah se, mitthi tho lehte chuan ei tûr te, awmna hmun tûr te, leh thawmhnawte an mamawh ang tih kan hria a. Tûnah ngei pawh hian anmahni ṭanpui i inpeih tih i lantîr thei ang em? Zawhna ṭhenkhat lo ngaihtuah ta ila.

In kohhranah bial kantuin a rawn tlawh dâwn tih an puan hunah, chaw ei tûrin i sâwm ang em? Bethel-a hunbi kima rawngbâwlte pioneer thawk tûra tih an nih hunah emaw, bial kantu’n bial a kan zawh hunah emaw in luah tûr an zawnnaah i lo ṭanpui thei ang em? In awmna biala regional inkhâwmpui neih a nih dâwn chuan, inkhâwmpui neih hma leh neih zawhah tlâwmngaiin i ṭanpui thei ang em? A nih loh leh, inkhâwmpui palaite chu i lo lâwm thei ang em?

MITTHI THO LEHTE CHU ZIRTIR TURIN I INPEIH TAWH EM?

Tirhkohte 24:15 thu nêna inmilin, mi tlûklehdingâwn tam tak an rawn tho leh ang tih kan beisei a. An zînga tam tak chu tûn hmain Jehova chungchâng hriatna hun remchâng la nei lote an ni ang. An rawn thawh leh hunah chuan, chutianga zirna hun ṭha chu an nei ang.a Pathian chhiahhlawh rinawm leh thiltawn ngah takte chu, chu zirtîrna hnaah chuan an tel ang. (Is. 11:9) Europe leh South America leh Africa rama rawng lo bâwl tawh ṭhîn, Charlotte-i chuan chu hun chu a nghâkhlel hle tawh a. Ani chuan: “Mitthi tho lehte zirtîr chu ka châk tawh hle a. Hun kal tawha mi, tuemaw chanchin ka chhiar hian: ‘Ani hian Jehova chu lo hre ta se chuan, a nun chu a danglam ngei ang,’ tiin ka ngaihtuah fo ṭhîn. Mitthi tho lehte chu an thih hnua thil thlengte hrilh ka châk tawh hle,” tiin a sawi.

Isua leia a lo kal hmaa thi ta Jehova chhiahhlawh rinawmte pawhin zir tûr tam tak an nei ang. Amah pawhin a hriatthiam loh hrilh lâwkna a ziahte thlen famkimna, Daniela hnêna hrilh a hlimawm dân tûr leh chanvo hlu a nih dân tûr chu han mitthla teh. (Dan. 12:8) Ruthi leh Naomi te chu Messia thlahtute zînga an tel dân chungchâng hre tûra zirtîr chu a nuam hle ang. Tûn lai khawvêl suaksual tak nêksâwrna leh tibuaitu awm lova khawvêl pum huap zirtîrnaa tel chu a va hlimawm dâwn tak êm!

Engtin nge mitthi tho lehte zirtîr tûrin inpeih i duhzia tûnah hian i lantîr theih? Lantîr theih dân kawng ṭha tak pakhat chu i zirtîr thiamna tihhmasâwn tumna hmangin leh tûn laia khawvêl pum huapa thu hrilh rawngbâwlnaa tel ziahna hmangin a ni. (Mt. 24:14) Tûnah hian kum upatna avâng leh dinhmun dangte avânga tihtheih chin i nei a nih pawhin, theih tâwp i chhuahna chuan mitthi tho lehte zirtîr tûra i inpeih tawhzia a lantîr thei a ni.

Zawhna pawimawh tak lo awm ta chu, Lei rochun chu i nghâkhlel tak zet em? Lei chu paradis-a chantîr mai bâkah, mitthi tho lehte ṭanpui a, anmahni zirtîr chu i châk tawh em? tihte hi a ni. Lei i rochun huna i thawh tûr ang hnate chu tûn aṭang pawha thawh theihna hun remchâng zawngin chumi hun atâna i lo inpeih tawhzia i lantîr thei a ni.