Dinhmun Khirh Tak Hmachhawn Chung Pawhin Thlamuanna I Nei Thei

1. “Pathian thlamuanna” chu eng nge ni a, chumi neih chu engtin nge kan hlâwkpui theih? (Philippi 4:6, 7)

HE KHAWVEL mite’n an hriat loh thlamuanna a awm a. Chu chu kan Pa vâna mi nêna inlaichînna hlu tak neihna aṭanga lo awm “Pathian thlamuanna” a ni. Pathian thlamuanna kan neih hian him niin kan inhria a. (Philippi 4:6, 7 chhiar rawh.) Amah hmangaihtute nêna inṭhian ṭhatna kan nei bawk. Chu bâkah, “remna Pathian” nên mi mal inlaichînna ṭha tak kan nei bawk a ni. (1 Thes. 5:23) Kan Pa vâna mi kan hriat a, kan rin a, a thu kan awih hian Pathian thlamuanna chuan dinhmun harsa tak kan hmachhawn hunah rilru hahna min chhâwk thei a ni.

2. Engvângin nge Pathian thlamuanna neih chu thil theih a ni tih kan chian theih?

² Hri lêng te, chhiatna te, tualchhûng buaina te, a nih loh leh tihduhdahna ang chi dinhmun khirh tak kan tawh hunahte Pathian thlamuanna neih chu thil theih a ni tak zet em? Hêng thilte hian hlauhna nasa tak min neihtîr thei a ni. Mahse, Isua chuan a hnungzuitute chu: “In thinlung mangang suh se, hlauh pawh hlau suh se,” tiin a fuih a ni. (Joh. 14:27) Unaute’n Isua fuihna thu an zâwm chu a lâwmawm hle. Anni chuan Jehova ṭanpuinain fiahna khirh takte an hmachhawn chung pawhin thlamuanna an nei thei a ni.

HRI LEN CHHUNGA THLAMUANNA NEIH DAN

3. Engtin nge hri lêng, a nih loh leh hripui lêngin kan thlamuanna neih a lâk bo mai theih?

³ Hri lêng, a nih loh leh hripui lêng chuan nasa takin nun a thlâk danglam thei a. COVID-19-in mi tam takte nuna nghawng a neih dân hi han ngaihtuah teh. Zir chianna pakhat chuan an mi zir chiante zînga a zâtve aia tamin hripui lên chhûngin mut theih loh avânga harsatna an neih thu a târ lang a ni. Hripui lên chhûng khân rilru hahna te, rilru lam natna te, zu leh damdawi hman sualna te, inchhûng khura tharum thawhna te, leh mahni intihhlum tumnate chu a pung nasa hle a. I chênna hmunah hri a lêng a nih chuan, engtin nge rilru hahna thununin Pathian thlamuanna i neih theih ang?

4. Engvângin nge ni hnuhnûng chungchânga Isua hrilh lâwkna hriatna chuan thlamuanna min neihtîr?

⁴ Isua chuan ni hnuhnûng chhûngin “hmun hrang hrangah” ṭâmte a tlain, hrite a lêng bawk ang tih a sawi lâwk a. (Lk. 21:11) Chumi hriatna chuan engtin nge thlamuanna min neihtîr? Hrite lêng chu mak kan ti lo va. Isua sawi angin hêng thilte hi a thleng tih kan hria a ni. Tâwpna hun chhûnga nungte tâna Isua thurâwn pêk: “In mangan loh nân fîmkhur rawh u,” tih chu zawm nachhan tûr kan nei a ni.—Mt. 24:6.

5. (a) Philippi 4:8, 9 thu nêna inmilin hri lêng kan hmachhawn laiin eng chungchângah nge kan ṭawngṭai theih? (b) Engtin nge unaunu pakhatin Bible chhiar aw thunsa ngaihthlâkna chu a hlâwkpui a, engtin nge a entawn tûr siamin a ṭanpui theih che?

⁵ Hri lêng chuan awlsam takin lungngaihna leh hlauhna min neihtîr thei a. Chu chu unaunu Desi-i chungah a thleng a ni.b A patea te, a papuia fapa upa ber te, leh doctor-te COVID-19 avânga an thih hnuah, ani chuan hri kai leh a nu kum upa tawh tak a kaichhâwn chu a hlau hle a. Hripui lêng avângin a hna chân a hlau va, ei tûr leina tûr neih loh leh in luah man pêk theih loh a hlau hle bawk. Chûngte chuan a ngaihtuahna a luah khatin, zân a mut theih loh phah hial a. Mahse, Desi-i chuan thlamuanna a nei leh a ni. Engtin nge? Jehova hnênah a bîk takin, rilru hahdamna nei tûr leh a êng zâwnga thil ngaihtuah tûra ṭanpui tûrin a dîl a ni. (Philippi 4:8, 9 chhiar rawh.) Ngaihthlâk tûr Bible chhiar aw thunsa hmanga Jehova’n amah “a biakna” chu a ngaithla a. Ani chuan, “A chhiartu aw dam tak chuan ka rilru hahna min chhâwk a, Jehova zahngaihna min hriatnawntîr a ni,” tiin a sawi.—Sâm 94:19.

6. Engtin nge mi mala inzirna leh kohhran inkhâwmna chuan a ṭanpui ang che?

⁶ Hri lêng chuan i hun hman dân ṭhenkhat a tibuai ang tih chu a chiang a. Mahse, mi mala i inzirna leh inkhâwma i telna tûr tihbuaitîr suh ang che. Kan thu leh hla chhuahte leh video-tea kan hmuh thiltawnte chuan i harsatna ang tâwk chung pawhin unaute’n rinawmna an vawng reng thei tih a hriatnawntîr ang che. (1 Pet. 5:9) Inkhâwmna chuan Bible-a mi tichak thei tak thute ngaihtuah tûrin a ṭanpui ang che a. Mi dangte tihchak theihna leh nangmah ngei pawh tihchak i nih theihna hun remchâng a pe bawk ang che. (Rom 1:11, 12) Jehova’n amah betute an dam loh lai, an hlauh lai, leh mal ngawih ngawih nia an inhriat laia a ṭanpui dân i ngaihtuah a nih chuan, nang pawh a ṭanpui ve ang che tih i ring nghet tlat thei a ni.

7. Tirhkoh Johana hnên aṭangin eng nge i zir theih?

⁷ I unaute be pawh tûrin ṭan la rawh. Hri lêng avângin kan Kristian unaute nêna kan awmho hunah pawh inhlat taka kan awm reng a ngai thei a. Chutiang hunah chuan tirhkoh Johana rilru ang hi i pu mai thei. Ani chuan a ṭhian Gaia chu inhmatawn ngeia hmuh a duh a ni. (3 Joh. 13, 14) Mahse, Johana chuan Gaia chu hun engemawti chhûng a la hmu thei dawn lo tih a hria a. Chuvângin, Johana chuan a tih theih tiin Gaia chu lehkha a thawn a ni. I unaute chu an awmna hmunah i tlawh ziah thei lo a nih chuan phone te, video call te, leh message-tein biak pawh tum ṭhîn ang che. I Kristian unaute i biak pawh ziah chuan him leh thlamuang niin i inhria ang. A bîk takin, i rilru a hah laiin upate chu bia la, hmangaih taka an fuihna che chu pawm ang che.—Is. 32:1, 2.

CHHIATNA HMACHHAWN LAIA THLAMUANNA NEIH DAN

8. Engtin nge chhiatnain i thlamuanna neih a lâk bo theih?

⁸ Tui lian te, lîrnghîng te, kâng meite i lo tuar tawh a nih chuan, chûng thilte a thlen hnuah pawh rilru hahna nasa tak i la nei chhunzawm thei. I hmangaih tak i chân, a nih loh leh i neih zawng zawng i chân a nih chuan lungngai taka awmin, beisei bo nia inhriain, i thin a rim hial pawh a ni thei bawk. Chu chu hausak i âtchilh tihna emaw, rinna i tlachham ta tihna emaw a ni lo. Fiahna khirh tak i tâwk a, mi ṭhenkhatin chu chu ṭha lo taka i chhân lêt an beisei pawh a ni thei. (Job. 1:11) Mahse, dinhmun khirh tak i tâwk chung pawhin thlamuanna i la nei thei reng a ni. Engtin nge?

9. Engtin nge Isua’n chhiatna lo thleng tûrte atâna min lo buatsaih lâwk?

⁹ Isua hrilh lâwknate chu hre reng ang che. Khawvêla mi ṭhenkhat, an chunga chhiatna thleng ngai lo tûra ngaitute ang lo takin chhiatna nasa takte chu a pun chhoh zêl kan beisei a, chûng chhiatna ṭhenkhat chuan keini pawh min nghawng thei a ni. Isua’n a hnungzuitute chu “lîr nasa takin” a nghîng ang tih leh tâwpna a lo thlen hmain chhiatna dang a lo thleng ang tih a hrilh a. (Lk. 21:11) ‘Sual a pung ang’ tih pawh a sawi lâwk bawk. Chu chu dân bawhchhiatna, tharum thawhna, leh firfiaka chêtna thleng ṭhînahte hian a lang chiang hle. (Mt. 24:12) Isua’n chûng chhiatnate chu Jehova kalsantute chungah chauh a thleng ang tiin a sawi ngai lo. A nihna takah chuan, Jehova chhiahhlawh tam takte chu chhiatna tuartute an ni. (Is. 57:1; 2 Kor. 11:25) Jehova chuan chhiatna zawng zawng lakah mak tak maiin min vênghim kher lo mah se, rilru hahdam tak leh thlamuang taka awm reng tûra kan mamawh apiang min pe ang.

10. Engvângin nge chhiatna lo thleng tûr atâna tûna lo inbuatsaih chu rinna târ lanna a nih? (Thufingte 22:3)

¹⁰ Chhiatna thleng theite hmachhawn tûra kan lo inbuatsaih lâwk a nih chuan, rîkrum thil a thlen hunah hahdam taka awm chu awlsam kan ti lehzual ang. A nih leh, lo inbuatsaih lâwkna chu Jehova rinna kan tlachham tihna a ni em? Ni lo ve. A nihna takah chuan, chhiatna atâna lo inbuatsaih lâwkna chuan Jehova min ṭanpui theihna kan rinzia a târ lang zâwk a ni. Engtin nge? Pathian Thu chuan chhiatna thleng theite laka lo inbuatsaih lâwk tûrin thurâwn min pe a. (Thufingte 22:3 chhiar rawh.) Pathian inawpna pâwl chuan magazine-a thuziakte leh kohhrana inkhâwmnate leh a hun taka thu puan chhuahnate hmangin rîkrum thil atâna inbuatsaih lâwk tûrin min fuih nawn fo a ni.c Jehova kan ring em? Kan ring a nih chuan chhiatna thlen hma, tûnah hian chûng thurâwnte chu kan zâwm ang.

11. Margaret-i thiltawn aṭangin eng nge kan zir?

¹¹ Unaunu Margaret-i thiltawn hi lo ngaihtuah ta ila. An khuaa ram kâng nasa tak a chhuah avângin a chênna in chhuahsan tûra thupêk a ni a. Kawngah chuan motor a tam êm avângin, tumahin hma lam an pan thei lo va. Meikhu a chhah hle a, Margaret-i chu a motor-ah hun engemaw chen a tâng a ni. Mahse, a lo inbuatsaih lâwk avângin a dam chhuak a. A tlân chhuah theihna tûr kawng a hriat theih nâna amah ṭanpui theitu map a pawisa ipah a dah a ni. Rîkrum thil a lo thlen huna awlsam taka a zawh theih tûr kawngah a motor-in a lo tlân chhin hial a. A inbuatsaihna azârah Margaret-i chu a dam chhuak a ni.

12. Kan himna tûra kaihhruaina siamte chu engvângin nge kan zawm ang?

¹² Keimahni leh mi dangte him nân thuneitute chuan chhuakvâk lo tûr te, insawn chhuak tûr te, a nih loh leh kaihhruaina dang zâwm tûrtein min ti mai thei. Mi ṭhenkhat chuan an thil neihte kalsan an duh loh avângin hêng kaihhruainate hi an zâwm lo a ni. Engtin nge Kristiante’n an chhân lêt? Bible chuan: “Lalpa avâng chuan mihring ruat apiangte hnênah intulût rawh u, chung nunga awm lalber hnênah emaw, . . . ram awptu hnênah pawh,” tiin min hrilh a ni. (1 Pet. 2:13, 14) Pathian inawpna pâwl chuan him taka kan awm theih nân kaihhruainate min pe bawk. Rîkrum thil a thlen huna min biak pawh theih nân kan phone number thar ber upate hnêna pe tûra hriatnawntîr kan ni ziah ṭhîn. Chutiang chuan i ti tawh em? Kan tlân khâwmna tûr hmun te, kan tlân chhuah dân tûr te, leh ṭanpuina kan dawn dân tûr te, a nih loh leh mi dangte kan ṭanpui dân tûr leh kan ṭanpui hun tûr chungchângah kaihhruaina kan dawng thei bawk. Kaihhruainate kan zâwm lo a nih chuan, kan nunna leh kohhran upate nunna chu dinhmun hlauhawmah kan dah thei a ni. Chûng mi rinawmte chuan min ngaihsak reng tih theihnghilh suh ang che. (Heb. 13:17) Margaret-i chuan, “Kohhran upate leh inawpna pâwl kaihhruaina zawmna chuan ka nun a chhanhim tih ka ring nghet tlat,” tiin a sawi.

13. Engin nge hmun hima insuan chhuak Kristian tam takte chu hlimna leh thlamuanna pe?

¹³ Chhiatna te, indona te, leh tualchhûng buainate avânga an in chhuahsan ngai unaute chuan an dinhmun tharte mila insiam rem tûr leh theocratic thiltihtea tel chhunzawm lehnghâl tûrin theih tâwp an chhuah a. Tihduhdahna avânga darh ta, Kristian hmasate ang bawkin, anni chuan “thu chu an hril zêl” a ni. (Tirh. 8:4) Thu hrilhna chuan, dinhmun harsa takte ni lovin, Lalram ngaihtuah tlat zâwk tûrin anni chu a ṭanpui a. Chutiang chuan an hlimna leh thlamuanna an vawng reng a ni.

TIHDUHDAHNA TAWRH LAIA THLAMUANNA NEIH DAN

14. Engtin nge tihduhdahnain kan thlamuanna neih a lâkbo theih?

¹⁴ Tihduhdahna chuan thlamuanna min thlentu thil tam tak min chântîr thei a. Zalên taka kan inhmuh khâwm a, thu kan hrilh a, man hlauhna nei lova kan nî tin thiltihte kan tih chhunzawm hian kan hlimin lungawina kan nei a ni. Chutiang thilte kan ti thei lo a nih chuan, kan rilru a hahin, thil lo thleng tûrte chu kan hlau mai thei. Chutianga awm chu thil pângngai tak a ni. Mahse, kan fîmkhur hle tûr a ni a. Isua chuan tihduhdahnain a hnungzuitute a tlûktîr thei tih a târ lang a ni. (Joh. 16:1, 2) A nih chuan, engtin nge tihduhdahna kan tawh laiin thlamuanna kan neih reng theih ang?

15. Engvângin nge tihduhdahna kan hlauh loh vang? (Johana 15:20; 16:33)

¹⁵ Pathian Thu chuan: “Tu pawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin min hrilh a. (2 Tim. 3:12) Unaupa Andrei-a chuan a awmna rama kan rawngbâwlna khap beh a nih hnu chuan chu thu dik chu pawm harsa a ti hle. Ani chuan: ‘He ramah hian Thuhretu tam tak an awm a. Engtin nge thuneitute’n kan zâin min man vek theih tehlul ang?,’ tiin a ngaihtuah a. Mahse, chu ngaihtuahna chuan Andrei-a chu thlamuanna pêk aiin rilru hah takin a awmtîr reng zâwk a ni. Unau dangte chu Jehova chungah an innghat a, man tâwk lo tûrin an inngai lo. Anni chuan man tâwk thei an ni tih inhre mah se, Andrei-a angin an rilru a hah lutuk lo. Chuvângin, Andrei-a chuan an rilru put hmang ang neih a, Jehova rinchhan pumhlûm chu a tum ta a ni. Thlamuanna a nei ta thuai a, tûnah chuan harsatnate tâwk chung pawhin hlimna a nei tawh a ni. Chutiang chu kan chungah pawh a thleng ve thei. Isua’n tihduhdahnate kan beisei theih thu min hrilh rualin kan rinawm reng thei tih pawh min tiam bawk a ni.—Johana 15:20; 16:33 chhiar rawh.

16. Tihduhdahna hnuaiah eng kaihhruaina nge kan zawm ngai?

¹⁶ Kan rawngbâwlna khap beh, a nih loh leh nasa taka khuahkhirh a nih hunah branch office leh upate hnên aṭangin kaihhruainate kan dawng thei a. Chûngte chu min vênhim nân te, thlarau lam chaw kan dawng zawm zêl tih chian nân te, leh a tam thei ang bera thu hril zawm zêl tûra min ṭanpui nânte a ni. Kaihhruainate chu pêk a nih chhan i hre thiam vek lo a nih pawhin, theih tâwpin zawm tum tlat ang che. (Jak. 3:17) Chu bâkah, a hre lo tûrte hnênah unaute chungchâng leh kohhran thiltihte chungchâng hrilh ngai suh ang che.—Thur. 3:7.

17. Kum zabi khatnaa tirhkohte angin eng nge tih kan tum tlat?

¹⁷ Setana’n Pathian mite a beih chhan bul ber pakhat chu “Isua hriattîrna thu pawmte” an nih vâng a ni a. (Thup. 12:17) Setana leh a khawvêl chu hlau suh. Dodâlna tâwk chung pawha thu hrilh leh zirtîrnaa telna hian hlimna leh thlamuanna min pe a ni. Kum zabi khatnaa Juda thuneitute’n tirhkohte hnêna thu hril chhunzawm tawh lo tûra an tih khân, chûng mi rinawmte chuan Pathian thu âwih an thlang a. Anni chuan thu an hril zawm zêl a, chu chuan hlimna a pe a ni. (Tirh. 5:27-29, 41, 42) Chutih rualin, kan rawngbâwlna khuahkhirh a nih hian thu hrilhnaa kan tel hunah kan fîmkhur hle tûr a ni. (Mt. 10:16) Mahse, theih tâwp kan chhuah chuan Pathian Jehova tihlâwmna leh nun chhanhimnaa telna aṭanga lo awm thlamuanna kan nei ang.

“THLAMUANNA PATHIAN CHUAN A AWMPUI ANG CHE U”

18. Tu hnên aṭangin nge thlamuanna dik tak kan neih theih ang?

¹⁸ Hun harsa ber hnuaiah pawh thlamuanna kan nei thei tih ring tlat la. Chutiang hunah chuan kan mamawh thlamuanna chu Pathian thlamuanna, Jehova chauhvin a pêk theih thlamuanna a ni tih kan hre reng tûr a ni. Hri lêng te, chhiatna te, leh tihduhdahnate i hmachhawn hunah ani chu rinchhan rawh. A inawpna pâwl bêl tlat la. Hma lam hun ṭha tak lo thleng tûr chu thlîr tlat ang che. Chutianga i tih chuan, “thlamuanna Pathian chuan a awmpui ang che.” (Phil. 4:9) A dawta thuziakah chuan Pathian thlamuanna nei tûra harsatna tâwktu kan Kristian unaute kan ṭanpui theih dân kan sawiho vang.