Tunah Ngei Pawh Nun Hlimawm Tak Kan Nei Thei
NUNAH natna te, tarna te, leh thihnate’n nghawng ṭha lo a neih tawh loh hun tûr hma lam hun nuam tak chu i nei thei! Mahse, tûn laia kan nun chu harsatna leh buainain a khat a. Tûnah ngei pawh, hlimna nei tûrin engin nge ṭanpui thei che? Bible chuan nun hlimawm leh lungawi thlâk tak nei thei tûrin kaihhruaina ṭha tak takte min pe a. Nuna harsatna ṭhenkhat leh chûng harsatnate hmachhawn thei tûra Bible-in min ṭanpui theih dânte chu ngaihtuah ang che.
LUNGAWINA HMUH DAN
Bible fuihna: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u.”—Hebrai 13:5.
Tûn laia mite chuan loh theih lohva kan neih ngai thil tam tak a awm tih min hrilh châmchi a. Mahse, Bible chuan kan ‘thil neih chhun chungahte chuan kan lungawi’ thei tiin a sawi. Engtin nge?
‘Tangka sum ngainat’ pumpelh rawh. Mite chuan ‘tangka sum ngainatna’ avângin an hrisêlna te, chhûngkua te, ṭhian te, nungchang thianghlimna te, leh an zahawmna hial pawh an chân phah a ni. (1 Timothea 6:10) An va chân nasa tak êm! A tâwpah chuan, sum ngainatu chuan “duhtâwk a hmu lo vang.”—Thuhriltu 5:10.
Thilte ni lovin, mite chu ngai hlu rawh. Khawvêl lam thilte chuan ṭangkaina tam tak a nei ngei mai. Mahse, chûng thilte chuan min hmangaih emaw, min hlut emaw thei lo va; mihring chauhvin chutiang chuan an ti thei a ni. “Ṭhian” ṭha kan neih chuan nuna lungawina nei tûrin min ṭanpui ang.—Thufingte 17:17.
BIBLE KAIHHRUAINA ZAWMIN TUNAH NGEI PAWH NUN HLIMAWM TAK KAN NEI THEI
HRISEL LOHNA HMACHHAWN DAN
Bible fuihna: “ Thinlung hlim hi damdawi ṭha tak a ni.”—Thufingte 17:22.
“Damdawi ṭha” angin, hlimna chuan hrisêl lohna hmachhawn tûrin min ṭanpui thei a. A nih leh, kan hrisêlna a ṭha lo chung pawhin, engtin nge hlimna kan hmuh theih?
Lâwm nachâng hre rawh. Kan hrehawmna te chauh kan ngaihtuah reng chuan “nî zawng zawng mai hi” a ṭha lo niin a lang ang. (Thufingte 15:15) Chu aiin, Bible chuan “lâwm nachâng hre bawk rawh u,” tiin a sawi a. (Kolossa 3:15) Thil tê tham pawh ni se, kan thil ṭha neihahte chuan lâwm nachâng hriat tum rawh. Ni tla êng mawi tak te, thli fîm te, leh hmangaih takte nui hmêl chuan nun a tihlimawm lehzual a ni.
Mi dangte tân thil tihsak rawh. Kan hrisêlna a ṭha lo a nih pawhin, “englo lâk aiin pêkin lukhâwng a nei zâwk” a ni. (Tirhkohte 20:35) Mite’n kan thawhrimna an hlut hian, rilruah lungawina kan nei a, chu chuan kan buainate ngaihtuah lutuk lo tûrin min ṭanpui a. Mi dangte’n nun ṭha zâwk an neih theihna tûra kan ṭanpuina hmangin kan nun kan tiṭha lehzual thei a ni.
INNEIHNA TINGHET RAWH
Bible fuihna: “Thil pawimawh zâwkte chu fiah rawh u.”—Philippi 1:10, New World Translation.
Hun hmang dûn tam lo nupate chuan an inlaichînna chu an tiderthâwng thei a. Nupate chuan an inneihna chu an nuna thil pawimawh berte zînga pakhat angin an thlîr tûr a ni.
Thilte ti dûn rawh u. Mahni tui zâwngte chu mahni chauhva tih aiin, engvângin nge thil ti dûn tûra hun i siam zâwk loh vang? Bible chuan: “Pahnih chu pakhat ai chuan an ṭha zâwk,” tiin a sawi a. (Thuhriltu 4:9) Ei rawngbâwl te, taksa sawizawi te, thil ei paha chawlh hahdam te, leh in ngainat zâwngte chu in ti dûn thei a ni.
Hmangaihna lantîr rawh. Bible chuan nupate chu inhmangaih a, inzah tawn tûrin a fuih a. (Ephesi 5:28, 33) Nui hmêl te, duat taka inpawm te, leh thilpêk tê thamte pawhin inneihna chu nasa takin a tinghet thei a. Nupate chuan an pahnih chauhva nupa nun hmangin inlaichînna ṭha tak an nei tûr a ni.—Hebrai 13:4.