Engtin Nge Nun Ṭha Zawk I Neih Theih?

TUNA kan nun hi Pathian duh dân a ni lo va. Leilung hi Siamtu lalchungnunna zahtu te, a kaihhruaina hlâwkpuitu te, leh a mize duhawm tak târ langtu mihringte luah khah tûra siam a ni a. Anni chuan fate neiin, thil tharte hmu chhuakin, leh hlim taka thawkhovin lei pumpui hi paradis-ah an chantîr ang.

PATHIANIN LEIA KAN NUN DAN HI A RUAHMAN ANGA THLAK DANGLAM TURIN A TIAM

• “Ani chuan indonate chu kâwlkil thlengin a tireh.”—Sâm 46:9.

• “Lei tichhetute tihchhiat ve thung hun chu a lo thleng bawk a.”—Thu Puan 11:18.

• “Chu mi khuaa awm chuan ‘Ka dam lo ve,’ a ti lo vang.”—Isaia 33:24.

• “Ka mi thlante chu rei tak an thawh chhuah chungah chuan an lâwm dâwn a ni.”—Isaia 65:22.

Engtin nge chûng hrilh lâwknate chu a thlen famkim ang? Pathianin a Fapa Isua chu, vân aṭanga leilung awptu tûr sawrkâr ṭha famkima Lal ni tûrin a ruat tawh a ni. Bible-in chu sawrkâr chu Pathian Ram tiin a ko va. (Daniela 2:44) Bible chuan Isua chungchângah: ‘Pathianin Lalṭhutthlêngah a ṭhuttîr ang a; chatuanin a lal ang,’ tiin a sawi a ni.—Luka 1:32, 33 C.L. Re-edited.

Leia a awm laiin, Isua chuan Lal a nih hunah mihringte nun chu tûn aia ṭha zâwkin a siam dâwn tih târ lan nân thil mak tam tak a ti a ni.

ISUA’N THUAWIH MIHRINGTE TANA THIL ṬHA A TIH TURTE A LANTIR

• Ani chuan natna tinrêng tidamin, mihringte awngrawpna a tihbo dân tûr a lantîr a ni.—Matthaia 9:35.

• Ani chuan tuifinriat fâwn tirehin, leilung pianken chaknate thununin mite chu a humhim ang tih a târ lang a ni.—Marka 4:36-39.

• Ani chuan mi sâng tam tak hrâiin, nuna kan mamawhte chu a phuhru dâwn tih a târ lang a ni.—Marka 6:41-44.

• Ani chuan inneihnaah tui uaina chantîrin, mite chu hlim taka nun hmang tûrin a ṭanpui dâwn tih a târ lang a ni.—Johana 2:7-11.

Pathianin amah hmangaihtute tâna a buatsaih nunna chu engtin nge i neih theih? I zawh tûr “kawng” pakhat a awm a. Chu chu Bible chuan, ‘nunnaa kalna kawng chu, a hmutute pawh tlêm tê an ni,’ tiin a sawi.—Matthaia 7:14.

NUN ṬHA ZAWKA HRUAITU KAWNG CHU ZAWH RAWH

Nunnaa kalna kawng chu eng nge ni? Pathian chuan: “Kei hi LALPA in Pathian, in ṭhatna ṭûra nangmahni zirtîrtu, in kalna tûr kawnga hruaitu che u chu ka ni,” tiin a sawi a. (Isaia 48:17) Chumi kawnga kal chu zawh theih azawnga nun kawng ṭha ber a ni.

Isua chuan: “Keimah hi kawng leh thutak leh nunna ka ni,” tiin a sawi a. (Johana 14:6) Isua zirtîr thutak chu kan rin a, a entawn tûr siamte kan zui chuan, Pathian kan hnaih thei ang a, nun kawng ṭha ber chu kan zawh thei ang.

Engtin nge nunnaa kalna kawng chu kan hmuh theih? Sakhua tam tak a awm a; mahse, Isua chuan: “‘Lalpa, Lalpa’ mi ti nazawng chu vân ramah an lût lo vang a; ka Pa vâna mi duh zâwng titu erawh chu an lût ang,” tiin min vaukhân a. (Matthaia 7:21) Ani chuan: “Anmahni chu an rahah in hre mai ang,” tiin a sawi bawk. (Matthaia 7:16) Bible chuan biakna dik chu hria a, biakna dik leh dik lo hre hrang tûrin a ṭanpui thei che a ni.—Johana 17:17.

Engtin nge nunnaa kalna kawng chu kan zawh theih? Chu kawng zawhnaah chuan nunna Hnâr hriatna a tel a: Ani chu tu nge a nih? A hming chu tu nge ni? Ani chu eng ang mi nge a nih? Kan tân eng nge min tihsak? Eng ti tûrin nge min duh?a

Pathian chuan mihringte chu hnate thawk a, ei a, infiam a, chhûngkaw din tûr chauhvin min siam lo va. Min Siamtu chu kan hre theiin, a ṭhian kan ni thei bawk. A duh zâwng tiin kan hmangaihzia kan lantîr thei a ni. Isua chuan: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a sawi.—Johana 17:3.

ZIN KAWNG ATANA RAHBI HMASA BER CHU RAP RAWH

Pathian dik awm chhun tilâwm tûr chuan inthlâk danglamna siam a ngai thei a. Chu chu thil harsa angin a lang mai thei. Mahse, nunnaa kalna kawng kan zawh ṭan chuan kan nun chu a ṭha lehzual ngei ang. Pathian chungchânga zawhna pawimawh zualte chhânna hmu tûrin, Jehova Thuhretute chuan i tâna a remchânna hmun leh huna a thlâwnna Bible zirpui che an duh a. Kan website www.jw.org aṭangin min hriattîr thei a ni.