Tuar Zo Thei Tawh Lova I Inhriat Hunah

Brazil rama awm Adriana-i chuan: “Chutianga inhriatna chu rilruah a châm reng ṭhîn a. Chuvângin, mahni intihhlum chu ṭha zâwk tûrah ka ngai ta a ni,” tiin a sawi.

NUN zawm zêl duhna nei tawh lo khawpin i rilru a hrehawm tawh ṭhîn em? Chutiang i nih chuan, Adriana-i rilru awm dân chu i hriatthiampui ngei ang. Lungngaihna nasa tak a neih avângin a rilru a hrehawm hle a, beisei bo ni hian a inhria a ni. Adriana-i chuan nasa taka rilru beidawnna a nei a ni.

Dam lo leh kum upa tak nu leh pa enkawltu Japan rama awm Kaoru-a hi han ngaihtuah teh. Ani chuan: “Ka hnathawhnaah nêksawrna a tam lutuk avângin ka tuar zo lo va. Hun a lo rei chuan, ka chaw ei a tui lo va, ka mu thei bawk hek lo. Thi i la, ka hahdam zâwk ang tiin ka ngaihtuah ṭan ta a,” tiin a sawi.

Nigeria rama Ojebode-a chuan: “Ka lunghnual lutuk avângin ka ṭap ṭhîn a, chuvângin mahni intihhlum dân kawng ka zawng ta a ni,” tiin a sawi. Thil lâwmawm tak mai chu, Ojebode-a, Kaoru-a, leh Adriana-i te chuan mahni an intihlum lo hi a ni. Mahse, kum tin hian mi a sâng têlin mahni an intihlum a ni.

ṬANPUINA HMUH THEIHNA

Mahni intihlum a tam zâwkte chu mipa an ni a, chûng zînga mi tam tak chuan ṭanpuina dîl chu thil zahthlâk nia an ngaih vâng a ni. Isua’n dam lote chuan dâktawr an ngai tih a sawi a. (Luka 5:31) Chuvângin, chutianga mahni intihhlum duhna rilru i lo nei a nih chuan, khawngaih takin, ṭanpuina dîl chu zak suh ang che. Nasa taka rilru beidawnna nei tam tak chuan damdawi lama inenkawlnain a tiziaawm deuh tih an hmu a. Ojebode-a, Kaoru-a, leh Adriana-i te chuan damdawi lama ṭanpuina an dawng a, tûnah chuan an dam ṭha hle tawh a ni.

Dâktawrte chuan nasa taka rilru beidawnna neite chu damdawi hmang tûrin emaw, inbiakna hmanga tihdamnate hmang tûrin emaw an fuih mai thei a. Chûng mite chuan an chhûngte leh ṭhiante hriatthiamna te, dawhtheihna te, ngaihsakna te, leh ṭanpuinate an mamawh bawk. Kan ṭhian neih theih zînga ṭha ber chu a Thu, Bible aṭanga ṭanpuina ṭha tak min petu Pathian Jehova hi a ni.

CHINFEL HLEN DAN A AWM EM?

Nasa taka rilru beidawnna neite chu hun rei tak chhûng enkawl an ngai mai thei a, an thiltih dânte pawh an thlâkthleng a ngai mai thei a ni. Nasa taka rilru beidawnna i nei a nih chuan, Ojebode-a tih angin, hma lam hun chu a êng zâwngin i thlîr thei a. Ani chuan: “Leia chêng tumahin ‘Ka dam lo ve’ an tih tawh loh hun tûr sawi lâwkna Isaia 33:24 thlen famkim hun tûr chu ka beisei tlat a ni,” tiin a sawi. Ojebode-a angin, “natna” awm tawh lohna hmun “lei thar” chungchânga Pathian thutiamah chuan thlamuanna hmu ang che. (Thu Puan 21:1, 4) Chu thutiamah chuan rilru lam natna rêng rêng a awm tawh loh hun pawh a tel a. I rilru natnate chu chatuana tihbo a ni tawh ang. “Hriat rengin a awm tawh lo vang a, rilruah pawh a lût tawh hek lo vang.”—Isaia 65:17.

Min Ṭanpui Thei Bible Chângte

Pathianin rilrua i tawrhnate chu a hria.

“Kei LALPA in Pathian hian, ‘Hlau suh u, ka ṭanpui dâwn a che u,’ tiin, in kut ding lam chu ka chelh dâwn si a.”—Isaia 41:13.

Jehova chuan rilrua kan tawrhnate chu mi dang zawng aiin a hre thiam a, min ṭanpui a duh a ni.

Pathian Thu chhût ngun rawh.

‘[Elija] chuan thih a dîl ta a, aw LALPA, tûnah hian ka nunna hi la mai teh,’ tiin.—1 Lalte 19:4.

Ojebode-a chuan: “Pathian Thu chhût ngunna chuan min ṭanpui a. Zâwlnei Elija pawhin rilrua ka tawrh angin a tuar ve tih ka hria,” tiin a sawi.

Bible-a entawn tûr siamte aṭangin inzir rawh.

“I [Petera] rin a bo loh nân ka [Isua] ṭawngṭaisak che a ni.”—Luka 22:32.

Tirhkoh Petera’n Isua vawi thum a phatsan hnu chuan, hrehawm a tih êm avângin lungchhe takin a ṭap ta zawih zawih a. Kaoru-a chuan: “Jehova leh Isua chuan Petera rilru awm dân chu an ngaihsak tih hre thiam tûrin Petera thiltawn chuan min ṭanpui a. Chu chuan min thlamuan tak zet a ni,” tiin a sawi.

I rilru natnate chu “hriat rengin a awm tawh lo vang a, rilruah pawh a lût tawh hek lo vang.”—Isaia 65:17