2 | “Pathian Lehkha Thu-a . . . Thlamuanna”

BIBLE SAWI DAN: “Pathian Lehkha Thua chhelna leh thlamuanna hmua beiseina kan neih theihna tûrin, hmânlaia ziak apiangte chu keimahni min zirtîrna turin ziak a ni si a.”—ROM 15:4.

Chumi Awmzia Chu

Bible-ah hian ngaihtuahna ṭha lote hmachhawn tûra chakna leh chhelna min pe theitu thlamuanna thute a chuang a. Bible thuchah chuan nakin lawkah rilru natnate kan nei tawh dâwn lo tih beiseina min pe bawk.

A Ṭanpui Theih Dân Che

Kan za hian hlim loh châng kan nei ṭheuh va; mahse, rilru hahna nasa tak, a nih loh leh lungkhamna nasa tak neite chu eng lai pawhin rilru hrehawm takin an awm a ni. Engtin nge Bible-in a ṭanpui theih?

Bible-ah hian ngaihtuahna ṭha lote thlâk theitu thu ṭha tam tak a chuang a. (Philippi 4:8) Chu chuan kan ngaihtuahnate thunun tûra min ṭanpuitu, thlamuanna leh hahdamna thutein kan rilru a tikhat thei.—Sâm 94:18, 19.
Bible chuan hlu lo nia inhriatna do hneh tûrin min ṭanpui thei.—Luka 12:6, 7.
Bible châng tam tak chuan kan mal lo tih leh, min Siamtu kan Pathian chuan kan rilru vei zâwngte a hre thiam tih min hriat chiantîr.—Sâm 34:18; 1 Johana 3:19, 20.
Bible chuan min tina thei hriatrengnate chu Pathianin min lâk bosak ang tih a tiam a. (Isaia 65:17; Thu Puan 21:4) Rilru leh ngaihtuahna lama manganna kan neih hunah, chu thutiam chuan tuar chhuak tûrin min tichak thei.

Bible-in A Ṭanpui Dân Jessica-i

Rilru Hahna Nasa Takin Min Nghawng Dân

“Kum 25 ka nihin, rilru hahna nasa tak aṭanga lo awm rilru lam natna ka nei a. Thunun theih loh hriatrengna rawn lang chhuak thut thut ṭhîn chuan nasa takin min tihrehawm a ni. Doctor-te chuan ka rilru hahna nasa tak chu, hun kal tawha ka thiltawn hrehawm tak avânga a thim zâwnga thil ka thlîr ṭhin vâng a ni tih hre thiam tûrin min ṭanpui a. Damdawi lama a ṭûl anga inenkawlna bâkah, ngaihtuahna ṭha lote hriaa siam ṭha thei tûrin mi thiamte nêna inbiakna hmanga inenkawlna ka neih a ngai a ni.”

Bible-in Min Ṭanpui Dân

“Rilru hahna nasa tak ka neih a zual lai ber chuan, ka chiaiin lungkhamna nasa tak ka nei a, ka mu thei lo bawk. Zânah te chuan ka thunun theih loh ngaihtuahna tam tak ka neihte chuan min chîmbuai fo ṭhîn. Sâm 94:19 chuan lungkhamnate’n min chîmbuai hunah Pathianin min thlamuanin min tihahdam thei tih a sawi a. Chuvângin, Bible leh mi tichak thei tak Bible chângte ka ziahna lehkhabu tê chu ka khum bulah ka dah ṭhîn. Ka mut theih loh chângin, Bible châng ṭhenkhat chhiarin Pathian ngaihtuahnate chu ka inthlamuantîr ṭhîn a ni.

“Bible chuan kan ngaihtuahnate chu Pathian ngaihtuahna anga siamrem tûrin min fuih a. Hlutna nei lo leh hmangaih tlâk lo niin ka inngai ṭhîn a. Mahse, chutiang ngaih dân chuan Pathian chu hmangaihna leh khawngaihna nei tak Pa anga Bible-in a sawi chu a kalh a ni tih ka hre ta a. Ka ngaihtuahna inthununtîr aiin, zawi zawiin ka ngaihtuahnate chu ka thunun ta zâwk a ni. Pathianin min thlîr anga mahni inthlîr ka zir a. Chu chu mahni inthlîr dân dik lo ka neih hneh tûra min ṭanpuitu rahbi pawimawh tak a ni.

“Min tina thei hriatrengnate leh ngaihtuahna ṭha lote a awm tawh loh hun tûr chu ka nghâkhlel hle a. Nakinah chuan rilru lam natnate a awm tawh lo vang tih ka hria a. Chu chuan tûna ka thil tawrhte tuar chhuak tûr leh, rilru hahna nasa tak ka neih tawh loh hun tûr hma lam hun thlîr tlat tûrin min ṭanpui a ni.”