Thih Ka Duh—Intihhlum Duhna Rilru Ka Neih Hunah Bible-in Min Ṭanpui Thei Em?

Bible chhânna

Thei e! Bible hi “inngaitlâwmte thlamuantu Pathian” hnên aṭanga lo kal a ni a. (2 Korinth 7:6) Bible hi rilru lam enkawlna zirlai bu ni lo mah se, intihhlum duhna rilru hneh tûrin mi tam tak chu a ṭanpui a ni. A thurâwn pêk ṭangkai tak chuan nang pawh a ṭanpui thei che.

Bible-in eng thurâwn ṭangkai tak nge a pêk?

● I rilrua awmte sawi chhuak rawh.

Bible sawi dân: “Ṭhian chuan englai pawhin a hmangaih reng a, mangan nî atâna unauva piang a ni.”—Thufingte 17:17.

A awmzia: Kan rilru a hah hian mi dangte ṭanpuina kan mamawh.

I rilrua awmte sawi chhuak lova i awm reng hian, i ritphur chu phurh zawh rual lovah a chang thei a. Mahse, i rilrua awmte mi dangte hnêna i hrilh chuan i ziaawm phah theiin, i dinhmun chu a êng zâwngin i thlîr thei ang.

Heti hian tichhin teh: Vawiinah i chhûngkaw zînga mi emaw, i ṭhian rin tak emaw be rawh.a I rilrua awmte chu i ziak chhuak thei bawk a ni.
● Damdawi lama mi thiam bîkte ṭanpuina dawng rawh.

Bible sawi dân: “Mi chakte chuan dâktawr an ngai lo va, mi bawrhsâwmte zâwkin an ngai a ni.”—Matthaia 9:12.

A awmzia: Kan dam loh hunah damdawi lama ṭanpuina kan zawng tûr a ni.

Intihhlum duhna rilru chu rilru lam natna lan chhuahna a ni thei a. Tisa lama dam lohna ang bawkin, hei hi thil zahthlâk a ni lo. Rilru lam natna hi enkawl theih a ni.

Heti hian tichhin teh: A rang thei ang berin doctor thiam tak ṭanpuina zawng rawh.
● Pathianin a ngaihsak che tih hre reng rawh.

Bible sawi dân: “Chawngzawng panga dâr tangka pahnihah an hralh ṭhîn lo vem ni? Nimahsela, an zînga pakhat mah Pathianin a hmaih ngai si lo. . . . Hlau suh u; chawngzawng tam tak aiin in hlu zâwk a ni.”—Luka 12:6, 7.

A awmzia: Pathian tân i hlu.

Mal hle niin i inhre thei a; mahse, Pathianin i hrehawm tawrhte chu a hre thiam a ni. Nun châkna i nei lo a nih pawhin ani chuan a ngaihsak che a. Sâm 51:17 chuan: “Aw Pathian, thinlung lungchhia leh inchhîr ngawih ngawih hi i hmusit lo vang,” tiin a sawi a ni. Pathian chuan a hmangaih che avângin nung tûrin a duh che.

Heti hian tichhin teh: Pathianin a hmangaih che tih finfiahna Bible aṭangin bihchiang rawh. Entîr nân, Bible zirna ṭanpuitu Draw Close to Jehovah lehkhabu bung 24-na en rawh.
● Pathian hnênah ṭawngṭai rawh.

Bible sawi dân: “[Pathianin] a ngaihsak ṭhin che u avângin, in manganna zawng zawng ama chungah nghat vek rawh u.”—1 Petera 5:7.

A awmzia: Pathian chuan i rilru hahna eng pawh a hnêna inhawng tak leh tlang taka hrilh tûrin a sâwm che.

Pathian chuan i dinhmun tawh mêk tuar chhuak thei tûrin chhûngrila thlamuanna leh chakna a pe thei che a. (Philippi 4:6, 7, 13) Chutiang kawng chuan thinlung taka amah kotute chu a tichak a ni.—Sâm 55:22.

Heti hian tichhin teh: Vawiinah Pathian hnênah ṭawngṭai la. A hming Jehova lamin i rilrua awmte chu a hnênah hrilh ang che. (Sâm 83:18) Chakna nei tûrin a ṭanpuina dîl bawk rawh.
● Bible-a nakin hun beiseina chungchâng chhût ngun rawh.

Bible sawi dân: “Chu beiseina chu nunna thîrchakaiah kan nei a, rinawm leh nghet tak a ni.”—Hebrai 6:19.

A awmzia: Thinlunga i ngaihtuahte chu tui fâwn na taka lawng ang maiin a nghet lo thei a, mahse Bible pêk beiseina chuan nghet taka awm tûrin a ṭanpui thei che.

Chu beiseina chu duhthusâm mai a ni lo, kan hrehawm tawrhna awmtîrtu tibo tûra Pathian thutiam a ṭanchhan a ni.—Thu Puan 21:4.

Heti hian tichhin teh: “A Real Hope for a Better Tomorrow,” tih thuziak chu chhiarin Bible-in a pêk beiseina chungchâng zir belh rawh.
● I nuam tih zâwng thil ti rawh.

Bible sawi dân: “Thinlung hlim hi damdawi ṭha tak a ni.”—Thufingte 17:22.

A awmzia: Min tihlimtu thilte kan tih hian kan ngaihtuahna, a nih loh leh rilru lamin a hrisêl phah thei.

Heti hian tichhin teh: I nuam tih zâwng thil ti rawh. Entîr nân, mi tiphûr thei tak rimawi i ngaithla thei a, mi tichak thei tak thu i chhiar thei a, a nih loh leh i tui zâwng thil i ti thei a ni. Thil ho tê pawh ni se, mi dangte ṭanpui tûra thil engemaw i tih chuan i hlimna chu i tipung bawk ang.—Tirhkohte 20:35.
● I taksa hrisêlna ngai pawimawh rawh.

Bible sawi dân: “Taksa insawizawina hi sâwt zawng a sâwt ve bawk.”—1 Timothea 4:8.

A awmzia: Kan insawizawi a, mut kan kham a, ei tûr hrisêl kan ei hian kan hlâwkpui.

Heti hian tichhin teh: Minute 15 vêl lek pawh ni se, rang taka pênin kein kal rawh.
● Kan ngaihtuahna leh nuna thil dangte hi a inthlâk ṭhîn tih hre reng rawh.

Bible sawi dân: “Naktûkah chuan eng nge lo awm dâwn in hre si lo.”—Jakoba 4:14.

A awmzia: Harsatna khirh tak—i thunun theih lo ang hiala lang—pawh hi hun rei lo te atân mai a ni thei.

Vawiina i dinhmun chu chhe hlein lang mah se, naktukah a inthlâk danglam thei a. Chuvângin, hmachhawn dân kawngte zawng rawh. (2 Korinth 4:8) I dinhmun khirh tak chu a hun takah a inthlâk danglam thei a; mahse, intihhlum chu i sût thei tawh lo vang.

Heti hian tichhin teh: Bible-a thih hial duh khawpa beidawngte chungchâng chhiar la, a tâwpah an hriat lâwk loh dân kawngtea a ṭha zâwnga an nun a inthlâk dân hmu ang che. Entîrna ṭhenkhat lo ngaihtuah ta ila.

Bible-in thih duhna neite chungchâng min hrilh em?

Hrilh e. A nihna takah chuan Bible-in, “Thih ka duh,” tia sawitu mi ṭhenkhat chungchâng min hrilh a. Pathianin anni chu a hau lo va, a ṭanpui zâwk a ni. Chutiang chuan a tihsak ve thei che.

Elija

● Tu nge a nih? Elija chu zâwlnei huaisen tak a ni a. Mahse, lunghnualna ata a fihlîm bîk lo. Jakoba 5:17 chuan: “Elija chu keimahni nungchang ang pu mihring bawk a ni,” tiin a sawi.
● Engvângin nge thih a duh? Ṭum khat chu, Elija chuan mal niin a inhria a, a hlauh bâkah, tlâk tlai lo niin a inhre bawk. Chuvângin: “LALPA, tûnah hian ka nunna hi la mai teh,” tiin a ngên a ni.—1 Lalte 19:4.
● Engin nge ani chu ṭanpui? Elija chuan a rilrua awmte Pathian hnênah a phawrh a. Engtin nge Pathianin a tihchak? Pathian chuan ngaihsakna a lantîr a, A thiltihtheihna a hmuhtîr bawk a ni. Elija chu a la ṭangkai reng tih a hriattîr a, amah ngaihsak a, ṭanpui theitu tûr a pe bawk a ni.
▸ Elija chungchâng chhiar rawh: 1 Lalte 19:2-18.

Joba

● Tu nge a nih? Joba chu Pathian dik rinawm taka betu mi hausak tak a ni.
● Engvângin nge thih a duh? Vawi leh khatah Joba chungah thil ṭha lo tam tak a thleng a. A thil neih zawng zawng a chân a. A fate zawng zawng chhiatna thlengah an boral a. Natna khirh tak a tuar a. A tâwpah, a harsatna tawh chu amah vâng a ni tia râwng tak leh dik lo taka puh a ni a. Chuvângin, Joba chuan: “Ka ning hluah hluah, ka nung rei lo vang,” tiin a sawi a ni.—Joba 7:16.
● Engin nge ani chu ṭanpui? Joba chu Pathian hnênah a ṭawngṭai a, mi dangte a be bawk. (Joba 10:1-3) A dinhmun thlîr dân danga thlîr tûra ṭanpuitu a ṭhian khawngaihna nei tak Elihua’n a tichak a. Joba chuan Pathian zilhna leh ṭanpuina chu lâwm takin a pawm a ni.
▸ Joba chungchâng chhiar rawh: Joba 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mosia

● Tu nge a nih? Mosia chu hmânlai Israelte hruaitu leh zâwlnei rinawm tak a ni.
● Engvângin nge thih a duh? Mosia chuan mawhphurhna lian tak a chelh a, sawisêl a hlawh reng bawk a, a chau ngawih ngawih a ni. Chuvângin, Pathian hnênah: “Min tihlum daih law law mai la,” tiin a sawi a ni.—Numbers 11:11, 15.
● Engin nge ani chu ṭanpui? Mosia chuan a rilru awm dân chu Pathian hnênah a hrilh a. Pathianin ani chu rilru hahdamna a neih theih nân a mawhphurna a chhâwk zângkhai a ni.
▸ Mosia chungchâng chhiar rawh: Numbers 11:4-6, 10-17.

Eng Bible chângte’n nge intihhlum duhna rilru do hneh tûra ṭanpui thei che?

Pathianin a ngaihsak che tih târ langtu Bible chângte:

“LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn.”—Sâm 34:18.
“Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn.”—Sâm 94:19.

(Sâm 27:10; 103:12-14; 2 Korinth 1:3, 4 en bawk rawh.)

I hrehawm tawrhte Pathianin a hre thiam tih târ langtu Bible chângte:

“Ka manganna hi i hmu si ṭhîn a; ka nunna hi a hrehawm laite pawhin i hre ṭhîn.”—Sâm 31:7.
‘An manganna zawng zawngah chuan ani chu a mangang ve ṭhîn a. A hmangaihna leh a khawngaihnain anmahni a pua a.’—Isaia 63:9.

Pathianin amah hnaih tûr leh ṭawngṭaia i thinlung leihbaw tûrin a duh che tih târ langtu Bible chângte:

“Engah mah mangang suh u; engkimah ṭawngṭai leh dîlin, . . . in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.”—Philippi 4:6, 7.
“Pathian hnaih rawh u, tichuan anin a hnaih ang che u.”—Jakoba 4:8.

(Sâm 34:4, 15; 55:22 en bawk rawh.)

Pathianin chakna a pe thei che tih târ langtu Bible chângte:

“Mi tichaktuah chuan engkim ka ti thei a ni.”—Philippi 4:13.
“Hlau suh u, kei in hnênah ka awm si a; mangang suh u, kei in Pathian ka ni si a. Ka tichak ang che u a, a ni, ka ṭanpui ang che u.”—Isaia 41:10.

(Sâm 138:3; Isaia 40:29-31 en bawk rawh.)

I ṭhianin, “Thih ka duh” ti ta se, engtin nge ni ang?

Intihhlum duhna rilru an nei tih târ langtu an thusawi eng pawh ngaihthah suh. I ṭhian chu a rilrua awm sawi chhuak tûrin fuih rawh. (Thufingte 20:5) Mite’n intihhlum an duh thu an sawi chhuah hian, chu chuan intihhlumna lakah a vêng thei.
Hriatthiamna nei takin ngaihthla rawh. “Thusawi chuh lo sela, thin tinel rawh se.” (Jakoba 1:19) Hrehawmna, a nih loh leh rilru hahna nasa tak chuan mi chu ‘bung takin’ thu a sawitîr thei tih hria ang che. (Joba 6:2, 3) Chuvângin, i ṭhianin chaltlai tak leh ngilnei lo taka thil engemaw a sawi chuan a lutukin chhâng lêt lo la, thinur nân hmang suh.
Thlamuan rawh. Bible chuan: “Mi beidawngte chu thlamuan ula,” tiin a sawi a. (1 Thessalonika 5:14, C.L. Re-edited) I ṭhian rilru tihahtu chu sawi nêpsak suh. A rilrua awmte leh a rilru hah chhan chu zahsak la. Amah i ngaihsakzia hrilh ang che.
I ṭhian chu ṭanpuina dawng tûrin fuih rawh. Thufingte 13:10 chuan: “Thunun ṭhat mi hnênah erawh chuan finna a awm,” tiin a sawi a. I ṭhian chu nasa taka a dam lo a nih chuan doctor hmu tûrin i fuih ngei ang. Intihhlum duhna rilru pawh hi rilru lam natna lan chhuahna a ni thei a, chuvângin mi thiam bîkte ṭanpuina zawng tûrin fuih la. Kalpui i inhuam thu hrilh bawk rawh.
Hmangaihna lantîr rawh. Bible chuan: “Ṭhian chuan englai pawhin a hmangaih reng a, mangan nî atâna unauva piang a ni,” tiin a sawi a. (Thufingte 17:17) I ṭhian harsatna, a nih loh leh intihhlum duhna rilru chu i tihrehsak thei lo va. Mahse, i hmangaih tih leh amah ṭanpui i duh tih i hriattîr chuan ni khat dang hmang leh tûrin i ṭanpui thei a, ni dangah chuan beiseina nei lehzualin a inhre thei a ni.

Intihhlum ka lo tum tawh ṭhîn a nih chuan engtin nge ni ang?

I inthiam lovin, i zak pawh a ni thei a. Chu chu thil hriatthiamawm tak a ni. Intihhlum duhna i neih chhan, a nih loh leh tûna rilru lama i harsatna tawh mêk chu tuman an hre thiam lo angin i ngai mai thei bawk.

Bible chuan mi dangte rilru kan hriatthiampui pumhlûm thei lo tih a pawm a. “Mahni lungngaihna chu amah chauhvin a hria a,” tiin a sawi. (Thufingte 14:10; 1 Lalte 8:38) Chuvângin, kan hmangaih takte’n min thlamuan theih mah se, an theihna chuan chin tâwk a nei a ni. Amaherawh chu i mal lo a ni tih i chiang thei.

Pathianin mihring thinlung a hria. (2 Chronicles 6:30) Jehova’n mahni intihhlum chu kawng awmchhun a ni tia rintîrtu che chu a hria a. Kan sawi tâk inthiam lohna, a nih loh leh zahna pawh tiamin tûna i rilrua awmte chu a hre thiam bawk.—Sâm 139:1.

Pathianin nunna a ngaihhlut êm avângin, intihhlum duhna rilru neite chu ngaihdam a inhuam a. (Sâm 86:5) Intihhlum tumtu tam takte chuan thih an duh lo va, an hrehawm tawrhte tihtâwp an duh zâwk mai a ni tih a hria a. Chuvângin, ‘kan rilruin thiam loh min chantîr a nih pawhin, “Pathian chu kan rilru aiin a ropui zâwk a, engkim a hriat avângin,” ani chuan min ṭanpui thei a ni. (1 Johana 3:19, 20) Ni e, i tân “khawngaihnate Pa leh thlamuanna zawng zawng Pathian” nih a duh a ni.—2 Korinth 1:3.

a I intihhlum duhna rilru chu a nasat viau va, i rin theih mi i bula an awm lo a nih chuan rîkrum thila nangmah ṭanpui theitu tûr phone rawh.

Thih Ka Duh—Intihhlum Duhna Rilru Ka Neih Hunah Bible-in Min Ṭanpui Thei Em?

Bible chhânna

Bible-in eng thurâwn ṭangkai tak nge a pêk?

● I rilrua awmte sawi chhuak rawh.

● Damdawi lama mi thiam bîkte ṭanpuina dawng rawh.

● Pathianin a ngaihsak che tih hre reng rawh.

● Pathian hnênah ṭawngṭai rawh.

● Bible-a nakin hun beiseina chungchâng chhût ngun rawh.

● I nuam tih zâwng thil ti rawh.

● I taksa hrisêlna ngai pawimawh rawh.

● Kan ngaihtuahna leh nuna thil dangte hi a inthlâk ṭhîn tih hre reng rawh.

Bible-in thih duhna neite chungchâng min hrilh em?

Elija

Joba

Mosia