Hlimna I Hmu Thei Ngei A Ni

HLIMNA dik leh tlo chu a châng chuan thil hmuh harsa tak a ni a. A chhan bul ber chu hlimna zawng rengtu mi tam tak chuan a zawnna tûr hmun dika an zawn loh vâng a ni. Kawng dik kawhhmuh thei tûr ṭhian rin tlâk leh tling nei sela chu aw!

Chu mamawh kaihhruaina petu bulpui ber chu Bible hi a ni a. A bu khat chauh​—Sâm bu​—hi lo ngaihtuah ta ila. Sâm bu hi Pathian Jehova chawimawina hla thlankhâwm 150 lai awmna a ni a, a chanve vêl chu hmân lai Israel Lal Davida phuah a ni. Mahse, a ziaktute nihna hriat aia pawimawh zâwk chu mihringte Ṭhian ropui ber, Jehova thâwk khuma ziak a ni tih hriat hi a ni a. Chuvângin, chu lehkhabuah chuan kan ṭhatna tûra Pathian kaihhruaina a tel a, chutah chuan hlimna kawng kawhhmuhna a tel bawk tih kan hre chiang thei a ni.

Sâm ziaktute chuan hlimna chu Pathian nêna inlaichînna ṭha neihna rah chhuah a ni tih an hre chiang hle a. Fakna hla phuahtu chuan: “LALPA ṭih mi chu a eng a thâwl,” a nih loh leh a hlim, tiin a ziak a ni. (Sâm 112:1) Mihring inlaichînna te, an thil neih te, leh an thil tihpuitlin te zînga a engamah hian “LALPA Pathiana nei mite” hlimna neih ang chu a pe thei lo. (Sâm 144:15) Hei hi tûn laia Pathian chhiahhlawh tam takte nun kawng hian a finfiah a ni.

Kum 40 pêl hret tawh Susanne-i chu entîrna pakhat a ni.a Ani chuan: “Tûn laiah hian mi tam takte chu thiltum inang tipuitling tûr emaw, tuizâwng inang tiho tûr emawin pâwl ṭhenkhatah an inzawm khâwm ṭhîn a. Mahse, pâwl khata awmte chu ṭhian angin an inthlîr vek khât hle thung. Jehova mite zîngah erawh chuan a dân a dang daih a ni. Jehova kan hmangaihna chuan in hmangaih tawnna min neihtîr a. Khawi hmunah pawh awm mah ila, Pathian mite zîngah chuan kan tlângnêl hle a ni. He inpumkhatna hian kan nun chu nasa takin a tinuam a. Tu dangin nge mi chi hrang hrangte leh chhûngkaw seilenna inang lo tak takte, leh hnam hrang hranga mite chu ka ṭhian tia chhâl thei ang? Jehova mite zînga mi nih hi hlimna min petu a ni tih ka thinlung zawng zawngin ka sawi thei a ni,” tiin a sawi a ni.

Scotland rama piang Maree-i pawh chuan hlimna nei tûr chuan Jehova nêna inlaichînna ṭha tak neih a pawimawh tih a hre bawk a. Ani chuan: “Bible thutak ka hriat hma chuan thlahrâng film-te chu hmuh nawm ka ti hle ṭhîn a. Mahse, chûng thlahrâng hlauhawm tak takte hnawh kian nâna ka kuta kros ka hûm tlat loh chuan ka muhîl thei ṭhîn lo. Thutak ka hriata, chûng film-te ka en tawh loh hnuah chuan, Jehova nêna kan inlaichînna chuan hlau miah lovin min muthilhtîr thei a, ramhuaite emaw, thlahrângte emaw aia thiltithei daih zâwk Pathian ka bia chu ka hlim hle a ni,” tiin a sawi.

Jehova Rinna Chuan Hlimna A Thlen

Siamtu engkim tihtheihna leh finna tâwpchin nei lo chu rinhlelh chhan tûr kan nei lo. Davida chuan Jehova lakah rinna pumhlûm a nghat thei tih leh inhumhim nân a hmang thei tih hriain, heti hian a ziak a ni: “LALPA chu a rinchhana neia . . . chu, a eng a thâwl e,” tiin.​—Sâm 40:4.

Maria-i chuan: “Spain ram leh hmun danga ka thiltawn chu hei hi a ni, Jehova duhzâwng anga thil kan tih hian, chu chuan kan ngaihtuahna leh rilru chu kalh mah se, rah ṭha ber a chhuah ṭhîn tih hi. Jehova kawngte chu a ṭhat ber avângin, hlimna a awmtîr a ni,” tiin a sawi.

Kristian upa Europe ram hmun tam taka rawngbâwltu Andreas-a chuan a thiltawn aṭangin Jehova chungah rinna kan nghah theih thu a hre bawk a ni. Ani chuan heti hian a sawi: “Ka tleirâwl lai chuan ka u mipa, ka rinna min ṭâwmpui lotu chuan ka nunah nghawng a nei nasa hle a, hausak theihna tûr hna zawng tûrin min fuih a ni. Pension hmuh theihna hna thawh rinchhan lo va, hun bikima rawngbâwl ka thlan tâkah chuan ani chu a lunghnual hle a. Mahse, hun bikima rawng ka bâwl chhûng zawngin, ka tlachham ngai lo va, mi dangte’n an duhthusâm phâk chauh malsâwmnate chu ka dawng zâwk a ni,” tiin.

Felix-a chu Selters, Germany-a Jehova Thuhretute branch sak belhna ṭanpui tûrin kum 1993-ah chuan sâwm a ni a. Hna thawh zawh a nih chuan, Bethel chhûngkaw zînga tel nghet tûra sâwm a ni. Engtin nge chu chu a chhân lêt? “Chu sâwmna chu inringhlel deuh chungin ka pawm a. Mahse, tûnah chuan hei kum sâwm dâwn lai ka awm tawh a, Jehova’n ka ṭawngṭaina a chhâng a ni tih ka hre chiang ta hle. Ka tâna ṭha ber tûr chu a hria a. Amaha rinna pumhlûm nghatin leh inkaihhruaitîrna hmangin, ka tih atâna a duh tak ka inkawhhmuhtîr a ni,” tiin a sawi.

Kan sawi tâk Susanne-i chuan hun bikima rawngbâwl chu a duh a. Mahse, hunbi neia hnathawh tûr a zawng hmu hlei thei si lo. Hmuh theih inbeisei chunga kum khat a hman liam hnuah chuan, Jehova rinchhan chungin a pên chhuak ta a. “Regular pioneer thawh dîlna chu ka theh lût ve tawp mai a. Chutih lai chuan dân narâna thla khat vêl tla tûr pawisa ka nei a ni. Chu thla chu thla phûrawm takah a chang ta hlauh mai! Ka rawngbâwlnaah hlimna nasa tak hmu mah ila, vawi tam tak interview ka neihah chuan ka tling thei lo va. Mahse, Jehova chuan a tiam ang ngeiin min kalsan lo. Chu mi thla a tâwpna nîah chuan, hna thawh tûr ka hmu ta a. Tûnah chuan Jehova ka ring tak zet thei tawh tih ka hre ta! He hun bikima rawngbâwlnaa thiltawn hmasa ber hi nun manhla leh hlim tak min neihtîrtu zînga mi a ni,” tiin a sawi a ni.

Pathian Zilhna Pawmna Chuan Hlimna A Belhchhah

Lal Davida chuan thil sual râpthlâk tak ṭhenkhat a ti a. A châng phei chuan zilhna fing chu a mamawh a ni. Davida angin zilhnate leh zirtîrnate chu pawm kan inhuam em?

France rama mi Aida-i chuan ṭum khat chu thil sual nasa tak a ti tih a inhria a. Heti hian a sawi a ni: “Ka thil ngaih pawimawh ber chu Jehova nêna kan inlaichînna siam ṭhat leh a ni a. Thil dang engmah ka ngai pawimawh lo,” tiin. Tichuan, Kristian upate chu ṭanpui tûrin a pan a. Kum 14 aia tam hunbi kima rawng a bâwl hnuah, tûnah chuan: “Jehova’n ka sualte min ngaidam tih hriat chu a va lâwmawm tak êm!” tiin a sawi a ni.

Pathian zilhna dawnna chuan thil sual tih palhna lakah min vêng a ni. Judith-i chuan heti hian a sawi: “Kum 20 mi ka nihin, theih tâwp chhuaha ka rilru hneh tumtu German mi sumdâwnna lama ka thawhpui chu ka ngaizâwng a. Chu pa chu mi zahawm, eizawnna kawnga hlawhtling tak, leh pawmlai nei a ni lehnghâl! Jehova dânte zawm emaw, amah hnâwl ṭhak emaw chu ka thlan a ngai tih ka hria a. Ka nu leh pate chu ka hrilh ta a. Ka pa chuan thukhuh nei hauh lovin Jehova’n ka laka a beisei chu min hrilh a. Ani chuan a ruh lang râwtin min hrilh a ni​—ka mamawh tak mai chu! Chutichung chuan, Pathian thu bulte ngaihthah theih dân kawng chu ka zawng tlat a. Chawlhkâr engemawti chhûng chu ka nu chuan Pathian dânte pawimawhzia leh nun chhanhimna a nihzia min hrilh nân tlai lam hun chu a hmang a. Jehova lam ka hnaih tial tial avângin ka lâwm hle a ni. A zilhna leh zirtîrna ka dawn chuan hlimna nasa tak min pe a, hunbi kima kum tam tak chhûng rawngbâwlna hlimawm tak leh keimah leh Jehova thinlung tak zeta hmangaihtu Kristian pasal ṭha tak chu min pe a ni,” tiin.

Hêng thiltawnte hian Davida thusawi: “A bawhchhiatna ngaihdama awma, a sualna hliahkhuha awma chu a eng a thâwl e,” tih a dikzia leh a pawimawhzia a târ lang chiang hle.​—Sâm 32:​1, 2.

Mi Dangte Ngaihsakna Lantîrna Aṭanga Hlimna Awm Chu

Davida chuan heti hian a ziak a: “Retheite ngaihtuah mi chu a eng a thâwl e,” tiin. “Manganna nî chuan LALPAN ani chu a chhanhim ang. LALPAN ani chu humhimin a tinung ang a, leiah hian malsâwmin a awm ang,” tiin a sawi zawm a ni. (Sâm 41:​1, 2) Davida’n a ṭhian hmangaih tak Jonathana fapa kebai Mephibosetha chunga ngaihsakna duhawm tak a lantîr hi mi retheite chunga rilru put hmang dik entawn tlâk a ni.​—2 Samuela 9:​1-13.

Missionary nia kum 47 lai rawngbâwl tawh Marlies-i chuan Africa, Asia, leh Europe Khaw Chhak lama hmun hlauhawm tak tlânsan ngaite zîngah thu hrilh theihna hun remchâng hlu tak chu a nei a ni. Ani chuan heti hian a sawi: “Anni chuan harsatna chi hrang hrang an neiin en san deuh nia inhriatna an nei tlângpui a, dik tak chuan thlei bîk nia inhriatna an nei a ni. Chutiang mite ṭanpuina chuan engtik lai pawhin hlimna min pe a ni,” tiin.

Kum 40 pêl hret tawh Marina-i chuan: “Pasal nei lo ka nih angin, mi dangte ṭanpuina dawn a hlutzia chu ka hria a. Hei hian phone hmang emaw, lehkha thawn emawa mite fuih tûrin min chêttîr a ni. Chu chu mi tam takin an ngaihhlutzia an sawi a. Mi dangte ṭanpuina chuan hlimna min pe a ni,” tiin a ziak.

Kum 25 mi vêl Dimitar-a chuan heti hian a sawi: “Ka nu chuan amah chauhvin min chawi lian a. Ka naupan laia Kohhran Book Study overseer min ṭanpuina avângin ka lâwm hle mai. Ani chuan min zirtîr tûrin chawlhkâr tina rawngbâwlnaah min hruai a. A beih fan fanna avâng chuan tûn thlengin ka la lâwm reng a ni. Mi chawhphûr har tak ka ni tih ka inhre si a,” tiin. Ṭanpuina a lo dawn tawhte chunga a lâwm êm avângin, tûnah chuan mi dangte a ṭanpui tawh a ni: “Naupangte leh tleirâwl tîrte chu thla khatah vawi khat tal thlawhhma rawngbâwlnaah thawhpui hrâm ka tum ṭhîn,” tiin a sawi belh a ni.

Sâm bu pawhin hlimna siamtu thil dangte pawh a sawi bawk a. Pakhat chu, keimahni chakna ni lo va, Jehova chakna rinchhan a pawimawhna hi a ni: “[Jehovaa] chakna nei mi chu a eng a thâwl e.”​—Sâm 84:5.

Corinna-i chuan he thu dikzia hi a sawi thei a ni. Rawngbâwlna mamawh lehzualna ramah a insawn a. “Ṭawng thar, hnam thar, leh ngaih dân thar ka hmachhawn a. Planet hran daiha awm ang maiin ka inhria. Hmêlhriat loh rama thu hrilh tûr han ngaihtuah ringawt pawh chuan min tizâm hle a. Jehova hnênah ṭanpuina ka dîl a, mite tlawh pawh vak loh hmun fâlah hian Pathian chakna avâng chauhvin nilêngin thu ka hril thei a. A hnuah chuan, chutianga thu hrilh chu khawvêla thiltih âwm ber niin a lang ta. Bible zirpui tam tak ka nei ṭan a, he thiltawn aṭang hian hlâwkna ka la hmu zêl a ni. Jehova chakna ringin harsatna tihven theih rual loh nia langte pawh kan paltlang thei a ni tih ka zir a ni,” tiin a sawi.

Ni e, hêng thil tam tak, Pathian leh a mite nêna inṭhianna neih te, Jehova rin tlatna te, a zilhna pawmna te, leh mi dangte ngaihsakna te hian hlimna a pe a ni. Jehova kawnga kalna leh a dânte zawmna hmang hian, a duhsakna kan dawng thei a ni.​—Sâm 89:15; 106:3; 112:1; 128:​1, 2. (w06 6/15)

[Footnote]

[Phêk 8-naa milem]

Maria-i

[Phêk 9-naa milem]

Maree-i

[Phêk 9-naa milem]

Susanne-i leh Andreas-a

[Phêk 11-naa milem]

Corinna-i

[Phêk 11-naa milem]

Dimitar-a