Hlimnaa Hruaitu Rin Tlâk

“HLIMNA ûm” hi mi zawng zawng neih dikna a ni a. Chu chu United States of America ram Zalênna Puanchhuahna thuziak siamtute thlîr dân a ni. Mahse, thiltum ûm chu tihpuitlin nên chuan a inang lo hle. Ṭhalai tam tak chuan intihhlimna leh infiamna lama eizawnna chu an ûm nachungin, i hmêlhriat engzât chiahin nge chu duh taka an thil ûm chu thleng tak zet le? “I hlawhtling lo pawh a ni thei,” tiin rimawi khawvêla hlawhtling tûra nasa taka thawkrim zaithiam hmingthang tak lo ni ta chuan a sawi.

Chutiang bawk chuan, hlimna zawnna kawnga hlawhtling lo tûra inhriatna i nei a nih pawhin, i lunghnual a ngai lo. Hlimna chu a dik zâwnga i zawn phawt chuan i hmu ngei ang. Chu chu engvângin nge kan sawi theih? Thuziak hmasa khân “fak tlâk Pathian,” a nih loh leh Pathian hlim Jehova chungchâng a sawi lang tawh a. (1 Timothea 1:​10, 11) Hlimna i zawnnain lunghnualna a thlen lohna tûrin Pathian chuan Bible-ah kaihhruaina a pe che a ni. Jehova chuan lungngaihna thlentîr fotu thilte tuar chhuak tûrin a ṭanpui thei che. Entîr nân, i hmangaih takin a thihsan che huna a hnem dân che hi han ngaihtuah teh.

I Hmangaih Takin An Thihsan Che Hian

Thihna hian ṭhatna lai rêng sawi tûr a nei lo. Chu chuan fate chu nu leh pate lak aṭangin leh nu leh pate chu fate lak aṭangin a ṭhen hrang a ni. Inṭhian ṭha takte chu a ṭhen hrangin, tualchhûng inlungrual takte chu a tithlaphâng a. Thihna a awm hian, chhûngkaw hlim tak chu lungngaihnain a khat a ni.

Thihna hi chhiatna râpthlâk tak a ni tih chu kan hre tlâng a. Amaherawhchu, mi ṭhenkhat chuan thihna râpthlâkzia chu hnâwlin, malsâwmna angin an târ lang zâwk mah a ni. August 2005-a Hurricane Katrina thlipuiin Mexico tuipui kam a nuai hnua thilthleng hi han ngaihtuah teh. Chuta thi zînga mi pakhat vuinaah chuan kohhran rawngbâwltu pakhat chuan: “Ani chu Katrina thlipui nuai hlum a ni hlei nêm. Pathianin a vân inah a hruai zâwk alâwm,” tiin a sawi. A hnuah chuan, hmeichhe pakhat chuan damdawi inah a nu chu a chân a. Chuta ziaktu lam hna thawktu pakhat chuan a hnênah chuan a nu chu Pathianin vâna a hruai chhoh thu hrilhin, chu mi avânga lungngai lo tûrin a hnêm a ni. A fanu chu: “Engvângin nge, engvâng tehlulin nge ka hnên ata min lâksak?” tiin a ṭap a ni.

Chutiang mitthite chungchânga ngaih dân dik lo chuan lusûnte chu a hnêm lo fo tih a chiang hle. Engvângin nge? Chûng ngaih dânte chuan thihna chungchânga thudik a târ lan loh vâng a ni. Pathian chu chhûngkaw zînga mi an duhlai ngawih ngawihte râpthlâk tak leh lungchhiatthlâk taka lâk luihsaktu anga târ lan a ni chu a pawi lehzual a ni. Pathian chu hnêmtu ang ni lovin, thihna râpthlâk tak thlentîrtu mi sual anga lantîr a ni zâwk a. Mahse, Pathian Thu chuan thihna chungchânga thudik chu a sawi thung a ni.

Bible chuan thihna chu hmêlma tiin a ko va. Thihna chu mihringte chunga rorêltu lal angin a tehkhin a ni. (Rom 5:17; 1 Korinth 15:26) Thihna hi tuma do hneh theih loh hmêlma thiltithei tak a ni a, kan hmangaih tak thi apiangte hi thihna hnuaia tlâwm chhiarsên rual lohte belhchhahna mai an ni. He Bible thudik hi kan hmangaih takte’n min thihsan huna kan sûnna leh mal ngawih ngawiha kan inhriatna nên hian a inrem chiah a. Chutianga inhriatna chu thil pângngai tak a ni tih a nemnghet a ni. Nimahsela, Pathianin kan hmangaih takte vâna lâk chhoh nân hmêlma thihna chu a hmang em? He zawhna hi Bible i han chhântîr teh ang u.

Thuhriltu 9:​5, 10 chuan: “Mitthi erawh chuan engmah an hre lo va, . . . thlân i kalna tûrah chuan thiltih tûr emaw, remruat tûr emaw, hriatna emaw, finna emaw a awm si lo va,” tiin a sawi. Thlânah chuan mitthite chu engmah tithei lo, che sawn thei lo, hriatna nei lo, a nih loh leh ngaihtuahna rêng rêng nei lovin an awm a. An dinhmun chu tui taka muhîl nêna tehkhin theih a ni. Bible chuan Pathianin kan hmangaih takte chu vâna a bula awm tûrin a la chho lo tih a sawi chiang hle a. Thihna chuan thlânah nunna rêng nei lovin a siam zâwk a ni.

Isua chuan a ṭhian Lazara a thih khân he thudik hi a nemnghet a. Mitthia chu muhîl angin a sawi a ni. Lazara chu Pathian Engkimtitheia hnênah a kal a nih si chuan, Isua’n a hnua thi leh tho tûra leia a kaihthawh lehna chu ngilneihna thiltih a ni hauh lo vang le. Isua chuan thlânmualah aw ring takin: “Lazar, lo chhuak rawh,” a tih thu thâwk khum thu chuan a sawi a. “Mitthi chu . . . a lo chhuak ta a,” tiin a sawi chhunzawm a ni. Lazara chu a lo nung leh ta. Isua chuan Lazara’n lei a chhuahsan rêng rêng lo tih a hria a. Thlânah chuan nunna rêng nei lovin a awm mai a ni.​—Johana 11:​11-14, 34, 38-44.

He thilthleng Bible-a chhinchhiah hian Pathianin lei aṭanga vâna mihringte lâk sawn nân thihna a hmang lo tih hre thiam tûrin min ṭanpui a. Chuvângin, kan lungngaihna hi Pathian thlentîr a ni lo tih hriain, amah kan hnaih thei a ni. Hmêlma thihnain lungngaihna leh chhiatna min thlen theihte chu a hre thiam vek a ni tih kan ring tlat thei bawk. Mitthi chungchânga Bible thutak chuan mitthite chu hremhmunah emaw, sual kan faina hmunah emaw na tuarin an awm lo va, thlânah nunna rêng nei lovin an awm zâwk a ni tih a târ lang. Chuvângin, kan hmangaih takte rilrua an châm rengna chuan Pathian min huattîr emaw, an awmna chin hriat loh avânga hlauhna emaw min neihtîr a ngai lo. Chu bâkah, Jehova chuan Bible-ah hnemna dang pawh min la pêk belhchhah a ni.

Hlimnaa Hruaitu Beiseina

Bible châng kan sawi tâkte khân beiseina chu hlimna dik pêng pawimawh tak a nihzia a târ lang a. Bible-a “beiseina” tih thu mal hman hian thil ṭha tak lo la thleng ngei tûr nghâk tih a kâwk a ni. Beiseinain tûna hlimna a thlen theih dân hre thiam tûrin, Isua’n Lazara a kaihthawh chungchângah khân i han kîr leh teh ang u.

Isua thilmak tih chuan a lo berah chhan pahnih a nei a. Pakhatna chu Marthi, Mari, leh sûntu ṭhenrual ṭhate lungngaihna tihrehsak a ni a. A kaihthawhsak leh chuan an hmangaih tak thi ta chu an kâwm leh thei ta a ni. Amaherawhchu, Isua chuan Marthi hnênah a chhan pawimawh zâwk, a pahnihna chu a sawi a: “I rin chuan Pathian ropuizia i hmu ang tih ka hrilh lo che em ni?” tiin. (Johana 11:40) The New Testament in Modern English, by J. B. Phillips chuan “Pathian ropuizia” tih chu “Pathian thiltih theihte makzia” tiin a dah a ni. Lazara chu kaitho lehin, Isua chuan Pathian Jehova’n nakin huna thil a tih tûrte leh a tih theihte thlîr lâwkna chu a pe a. Hetah hian “Pathian thiltih theihte makzia” chungchâng chu kimchang zâwka târ lan a ni.

Johana 5:​28, 29-ah Isua chuan: “Hêng hi mak ti suh u, a hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang,” tiin a sawi a. Chu chu kan hmangaihte pawh tiamin thlâna mitthi awm zawng zawng chu nung damin an lo tho leh dâwn tihna a ni. Tirhkohte 24:15 chuan he thilthleng tûr mak ropui tak chungchâng hi kimchang lehzualin a sawi a ni: “Mi felte leh fel lote thawhlehna a awm ang,” tiin. Jehova hre lotu leh be lotu “mi fel lote” ngei pawh chuan Pathian lawm hlawh theihna hun remchâng chu an la nei ang.

Khawiah nge he thawhlehna hi a thlen ang? Sâm 37:29 chuan: “Mi felte chuan ram hi an luah ang a, a chhûngah hian kumkhuain an awm ang,” tiin a sawi. Chu mi awmzia chu han ngaihtuah teh! Leiah hian thihnain a ṭhen hran chhûngkuate chu an inhmukhâwm leh dâwn a ni. Tûn hmaa i ṭhian ngainat takte nêna hun hlimawm tak hman ho leh tûr chungchâng i han ngaihtuah hian, i thinlung hlimnaa a khah chu a inâwm hle a ni.

Jehova Chuan Hlim Tûrin A Duh Che

Jehova’n buaina tâwk reng chung pawha i hlimna a tihpun theih dân kawng hnih chu kan ngaihtuah tawh a. Pakhatnaah chuan, Bible kaltlangin i harsatnate hlawhtling taka hmachhawn thei tûra i mamawh hriatna leh kaihhruaina a pe che a ni. Bible chuan thihna râpthlâk tak tuar thei tûra min ṭanpui bâkah, a zilhna thute chuan ei leh bâr lama harsatna leh hrisêl lohnate hma chhawn thei tûrin min ṭanpui bawk. Khawtlâng rorêl dik lohna leh politics-a buainate tuar chhuak tûrin chakna a pe thei che a. Pathian lehkha thu kaihhruainate i nunpui chuan, chu chuan mi mal harsatna dangte pawh hma chhawn tûrin a ṭanpui thei che a ni.

Pahnihnaah, Bible zirna aṭangin mihringte pêk theih thil engkim aia ṭha zâwk beiseina chu i nei a. Ṭhiante leh chhûngte thawhlehna chu Bible thu zirtîrte zînga mi a ni. Thu Puan 21:​3, 4 chuan chiang lehzualin: “Pathian ngei chu an hnênah a awm ang a, an Pathian a ni bawk ang; an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang; thil hmasate chu a ral ta,” tiin min hrilh a ni. He mi awmzia hi i nuna lungngaihna awmtîrtu apiang chu chatuan atân a ral thuai dâwn tihna a ni. Bible thutiam chu a lo thleng famkim ang a, chu chu i chên thei ang. Hun ṭha zâwkin min hmuak reng tih hriat ringawt pawh chuan min chhâwk hle a. Thih hnua chatuana inhremna a awm lo tih hriat chu hlim chhan tûr pakhat a ni.

Entîr nân: Kum tam tak liamta khân, Maria-i chuan a pasal cancer natna avânga nasa taka tuar chu a dawmhlum a. A pasal sûnna mittui pawh a la hul hmain, sum leh pai lama harsatna a tawh avângin a fanu pathumte nên an in an chhuahsan a ngai a ni. Kum hnih hnuah chuan amah ngei pawhin cancer a vei tih hmuhchhuah a ni a. Inzaipui vawi hnih a tâwk a, nî tinin nâ nasa tak a tuar bawk a. Hêng harsatnate tuar reng chung pawha beiseina a neih tlatna chuan mi dangte fuih tûrin a chêttîr hial a ni. Engtin nge a hlim reng theih le?

Maria-i chuan: “Harsatna ka tawhin, chûng ringawt ngaihtuah loh chu ka tum a. Hêng zawhna: ‘Engah nge kei kherin ka tawh? Engvângin nge hetianga ka tawrh a ngaih? Engvângin nge ka dam loh viau mai le?’ tih ang chi zawhnate chu ngaihtuah loh ka tum a ni. Chu ai chuan, ka chakna neihte chu Jehova rawngbâwl nân leh mi dangte ṭanpui nân ka hmang zâwk a. Chu chuan hlimna min pe a ni,” tiin a hlim reng theih chhan a sawi a ni.

Maria-i nunah beiseinain eng hmun nge a luah? Jehova’n mihringte lak ata natna leh harsatna dangte a lâk bona tûr nakin hunah chuan a beiseina chu a nghat a ni. Damdawi ina inenkawl tûra a kal chuan, chu beiseina nei ve lo cancer vei dangte hnênah chuan a beiseina chu a sawi ṭhîn a. Maria-i tân chuan beiseina chu engtiang taka pawimawh nge ni? Ani chuan heti hian a sawi: “Hebrai 6:​19-a Bible thu chu ka ngaihtuah fo ṭhîn a, chutah chuan Paula chuan beiseina chu nunna thîrchakai angin a sawi a. Chu thîrchakai tel lo chuan, thlipui kâra lawnglêng len bo ang i ni ang. Mahse, chu thîrchakaia thlun beh i nih chuan thlipui ang mai harsatna pawh tâwk mah la, i him tlat ang,” tiin. Chu ‘chatuan nunna beiseina, Pathian dâwt sawi thei lova tiam’ chuan Maria-i chu hlim reng tûrin a ṭanpui a ni. Chu chuan i tân pawh chutiang bawk chu a ti thei a ni.​—Tita 1:​1, 2.

Bible zirna hmangin, harsatna tuar reng chung pawhin hlimna dik tak chu i hmu thei a. Bible zir dân tûr chungchângah erawh chuan zawhna tam tak i nei mai thei a. Jehova Thuhretute chuan i hlim tak zetna tûra i hriat ngai Bible aṭanga chhânnate kawhhmuh che chu an châk hle ang. Jehova’n i hmaa a dahsak che beiseina thlen famkimna i nghah chhûng hian: “Hlimna leh lâwmna an hmu tawh ang a, lungngaihna leh rûmna chu a bo tawh ang,” tia a sawite zînga mi i ni ve thei a ni.​—Isaia 35:10. (w06 6/15)

[Phêk 5-naa milem]

Bible thutak chauhvin lungngaihna a tinêp thei

[Phêk 7-naa milem]

Bible-a thawhleh beiseina chuan hlimna a pe thei che