Hlimna Zawnna

KUM tlêm tê liam ta khân France, Germany, Great Britain, leh United States-a chêng mipuite chu, “Hlim nân eng thil nge ngai?” tih zawhna zawh an ni a. Mipui zawhna zawh zinga zaa 89-te chuan hlim nân hrisêlna ṭha neih a ngai niin an sawi; zaa 79-te tân chuan nupa nun lungawithlâk tak neih a ni a; zaa 62-te chuan nu leh pa hlawhtling tak nih an ti a; zaa 51-te erawh chuan eizawnna kawnga hlawhtlin niin an ngai thung a ni. Mi tam takte chu hlimna hi pawisaah a innghat lo tih zirtîr ni ṭhîn mah se, zaa 47-te chuan a innghah an ring tho tho a ni. Thil awm dân dik tak chuan eng nge a târ lan?

A hmasain, pawisa leh hlimna inzawmna ni âwm tak hi i lo en teh ang. United States rama mi hausa ber ber za thlankhâwmte ngaih dân lâk khâwmna chuan mi nâwlpuite aia an hlim zâwk chuan loh thu a târ lang. Chu bâkah, United States rama mi tam takte hian kum sawmthum liam taa an thil neih zât lêt khat vêl an nei nachungin, tûn hma aiin an hlim zâwk chuang lo niin mihring rilru sûkthlêk dân zir chîk mite chuan an sawi. Report pakhat sawi dânin: “Chu mi hun chhûng vêk chuan, lunghnualna a pung nasa hle a. Ṭhalaite mahnia inthahna a lêt thumin a pung a. Nupa inṭhenna a lêtin a pung bawk” a ni. Ram hrang hrang 50 vêla pawisa leh hlimna inzawmna zir chîktute chuan pawisain hlimna a lei thei lo rêng rêng tih an pawm tlâng a ni.

A dawt lehah chuan, hrisêlna ṭha te, nupa nun lungawithlâk tak te, leh eizawnnaa hlawhtlinna te hi engti fakauvin nge hlimna atân a pawimawh? Hêng thilte hi hlimna atân a pawimawh tak zet a nih chuan, hrisêlna ṭha nei lo leh nupa nun lungawithlâk tak nei lote dinhmun hi engtin nge ni ang? Fa nei lo nu leh pate leh mipa leh hmeichhia eizawnna kawnga hlawhtling lote hi engtin nge ni ang? Hêng mi mal tinte hi nun hlim lo tak nei tura ruat an ni bîk em ni? Thil awm dân inthlâk danglam ta sela chuan, tûna hrisêlna ṭha leh nupa nun lungawithlâk hmangtute chuan hlimna dik nia an ngaih an hlimna chu an hloh mai ang em?

A Hmun Dik Takah Kan Zawng Em?

Tupawhin hlim kan duh ṭheuh va. Mihringte chu Pathian anpuia siam kan nih a vâng leh mihringte siamtu chu “Pathian hlim” a nih avângin hei hi thil mak a ni lo. (1 Timothea 1:​11, NW; Genesis 1:​26, 27) Hei vâng hian, mihringte’n hlimna an zawng pawh hi thil pângngai tak a ni. Amaherawhchu, mi tam takte chuan hlimna chelh tum chu ṭiau vaivut kuta humbeh tum angah an ngai a ni​—awlsam takin a tawlh chhuak ve ve si a.

Mahselangin, ṭhenkhat chuan hlimna nei tûrin an thawk rim lutuk a ni thei ang em? Mifing Eric Hoffer-a pawhin chutiang a nih a ring a. A thlîr dân chuan: “Hlimna zawnna hi hlim lohna hnâr bul ber te zinga mi a ni.” Hlimna hi a zawn lohna tûrah kan zawn chuan chutiang chu a ni ngei ang. Chutiang a nih chuan, lunghnualna leh beidawnna kan tâwk ngei ang. Hausak tum; hming than emaw, challan emaw tum; politics lam, khawtlâng lam, a nih loh leh sumdâwnna lama thiltumte ûmna; a nih loh leh mahni duhzâwng chauh ngaihtuah leh thâwklehkhata tisa duhna tih puitlinna, hêng zawng zawngte hian hlimna a thlen lo a ni. Thu inkalh ni âwm tak, “Hlim tum lo ila kan hlim thawkhat zâwk ang e,” tih ziaktu ngaih dân mi ṭhenkhatin an ṭâwmpui pawh hi a mak lo ve!

Chhinchhiah tlâk takin, atîra kan târ lan ngaih dân lâk khâwmnaah chuan mi 10 zêla mi 4 te chuan hlimna chu thil ṭha tih leh mi dangte ṭanpuina aṭanga neih theih a nih an ring a ni. Tin, mi 4 zêla 1 chuan rinna leh sakhaw thurinte hi hlimna neih nâna thil pawimawh tak niin an sawi bawk. Kan hlim tak zet nâna thil mamawh chu bihchian a ngai tih a chiang ta hle. A dawta thuziak chuan bihchiang tûrin min ṭanpui ang. (w04 9/1)

[Phêk 3-naa milemte]

Mi tam tak chuan pawisa, chhungkaw nun lungawithlâk tak, a nih loh leh eizawnna kawnga hlawhtlinna hi hlimna bul ber a nih an ring. Chu chu i pawm em?