Eng Nge Pathian I Zawh Duh?

KHAWVEL zawng zawnga mite hian nun chungchângah zawhna khirh tak an nei ṭheuh va. Chutiang zawhna chu i nei ve em? Mi tam tak chuan sakhaw zirtîrtute hnênah an zawhnate chu an zâwt a; mahse, a chhânna lungawithlâk an hmu lo. Mi dangte chuan chûng zawhnate chu anmahniin an ngaihtuah veng veng a. A ṭhen chuan kaihhruaina dîlin an ṭawngṭai a ni. Chutianga kan rilru tibuaitu zawhnate chhânna chu Pathian hnên aṭanga hmuh theih a ni tak zet em? Mi tam takin Pathian an zawh duh zîngah chuan, hêng a hnuaia zawhnate hi a tel a ni.

Aw Pathian, tunge maw i nih chiah le?

Mihringte’n Pathian an thlîr dân chu an hnam zia te, an nu leh pa sakhuana te, leh an duh thlanna te hian a thunun tlat a. Ṭhen khatte chuan an Pathiante chu hming an pe a, a ṭhen chuan Pathian tiin an ko tawp a ni. Chu chu thil pawimawh a ni em? Kan hnêna amah leh a hming puangzârtu Pathian dik pakhat a awm em?

Engvângin nge hrehawm tawrhna a tam êm êm mai le?

Miin a fîmkhur loh vâng emaw, a nungchâng bawlhhlawh vâng emawa a hrisêlna a tlâkchhiat a, a retheih phah chuan, a phunnawi mai thei a. Mahse, hrehawm a tawrh chhan chu a hre chiang khawp ang.

Nimahsela, mi tam takte chuan anmahni thiam loh vâng ni si lovin hrehawmna nasa tak an tuar thei a. Ṭhenkhat chuan natna benvawn an vei a. Mi dangte chuan an chhûngkaw tâna chênna tûr leh ei leh in khamkhawp tûr neih nân harsatna namên lo an hmachhawn a ngai bawk a. Mi maktaduai tam takte lah dân bawhchhiatna te, indona te, pâwngpaw tharum thawhna te, leilung chhiatna te, a nih loh leh thuneitute rorêl dik lohna te chu an tuar a ni.

Chuvângin mi tam takte’n: ‘Engvângin nge hêng dinhmunte hi a hluar tâk êm êm mai le? Engvângin nge Pathianin hêng hrehawm tawrhna zawng zawng hi awm a phal?’ tia an zâwt ṭhîn pawh hi an thiamawm hle.

Engvângin nge ka lo pian chhuah? Nunin a tum hi eng nge ni ang le?

Hêng zawhnate hi nî tin thiltih aṭanga lungawina tak tak hmu thei lote beidawnna avânga lo chhuak a ni fo va​—chutiang beidawnna chu mi tam takin an nei a ni. Mi dang maktaduai tam takte chuan mi tinte nun kawng tûr chu Pathianin engemawtia ruat lâwk niin an ring a. Chutiang chu a ni em? Pathianin i tân thiltum bîk a nei tak tak a nih chuan, chu mi hriat chu i duh ngei ang.

Khawvêla lehkhabu zawng zawng zîngah hian, lehkhabu pakhat chauhvin Pathian thâwk khum a nih thu chiang takin a sawi a. Mihring zawng zawng tâna Pathian thuchah nihphung tûra i beisei ang ngeiin, he lehkhabu hi lehkhabu ziak tawh zawng zawng aiin ṭawng chi hrang tam taka hmuh theih a ni a. Chu chu Holy Bible a ni. Bible chhûngah chuan, lei leh vân Siamtu, Pathian ngei chuan a nihna leh a hming chu a puang a ni. Chu hming chu i hria em? Pathian eng ang Mi nge a nih tih chungchâng Bible sawite chu i hria em? Pathian thil phûtte chungchâng a sawi chu i hria em? (w03 5/1)

[Phêk 2-naa Thlalâk Hawhtîrtu]

A KAWM: Chad Ehlers/Index Stock Photography

[Phêk 3-naa Thlalâk Hawhtîrtu]

Tlâng: Chad Ehlers/Index Stock Photography