Tih Tak Zetin Kan Sawm A Che

Kum 2,000 kal tawha kan Lalpa Isua Krista’n bul a lo ṭan Zanriah Hnuhnûng chu thilthleng ngaihven tlâk mai a ni lo. He thil hian a inṭan phat aṭangin mihringte chungah nghawng ropui tak a nei a. Chu mi zâna thilthleng chungchâng Chanchin Ṭha ziaka an chhiarte chuan an rilru a khawih avângin, mi tam tak chuan kawng chi hrang hranga Lalpa Zanriah hman chu an tum a ni.

Isua Krista ngeiin a hnungzuitute chu he thilthleng hi hmang ṭhîn tûra thu a pêk avângin chutianga kawng chi hrang hranga hman an tum pawh chu an thiamawm hle. “Mi hriat reng nân hei hi ti ṭhîn rawh u,” tiin anni chu chiang takin a hrilh si a.​—Luka 22:19; 1 Korinth 11:​23-25.

Dik takin, he thilthleng hlâwkpui tak zet tûr chuan, miin Pathian Thu, Bible-in a pêk a awmzia dik tak a hre thiam tûr a ni a. Chu bâkah, Bible-in he thilthleng hman hun tûr leh a hman dân tûr a sawite hriat chu a pawimawh a ni.

Isua thupêk zâwmin, khawvêl puma Jehova Thuhretute chu Nilaini, April 16, 2003 tlaiah Isua thih Hriatrengna hmangho tûrin an inhmukhâwm ang. Chu hun chu an tân chuan Pathian Lehkha Thu enfiahna leh an Lalpa Isua Krista an rinna leh an hmangaihna tuaitharna hun a ni ang, ani chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” a ti a ni. (Johana 3:16) Nangpawh, Isua Krista leh a Pa vâna mi, Pathian Jehova i hmangaihna leh i rinna tichak tûra chu mi tlaia lo tel ve tûrin, tih tak zetin kan sâwm che a ni. (w03 4/1)