Ṭhenkhatin Chhânna An Hmuh Dân

MAKTADUAI tam takte chu an ṭawngṭai ziah a. Ṭhenkhat chuan an ṭawngṭaina chu chhân a nih an ring nghet tlat a. Ṭhenkhat chuan an ring chiah lo. Ṭhenkhat dangte chuan an zawhnate chhânna chu an zawng a; mahse, Pathian hnêna an thil hriat duhte chu ṭawngtaia dîl nachâng an hre lo.

Bible chuan Pathian dik chu “ṭawngṭaina Ngaithlatu” a nihzia a târ lang a ni. (Sâm 65:2) I ṭawngṭai ṭhîn a nih chuan, i ṭawngṭaina chu Pathian dik hnênah i hlân ngei em? I ṭawngṭaina chu a chhân tûr chi a ni em?

Khawvêl hmun tina mi tam takte tân a chunga zawhnate chu aw tia chhân theih a ni tlat! Engtin nge a chhânna an hmuh? Eng nge an zir?

Pathian​—Tunge A Nih?

Portugal rama hmeichhe sakhaw rawngbâwltu nula thianghlimte leh puithiamte zirtîrna dawng hmeichhe pakhat chuan a sakhua chu tih tak zetin a vuan a. Thiltih pawimawh tak nia zirtîrna a dawnte a sakhuain a thlâkthleng a, a kalsan chuan a rilru a buai phah hle ṭhîn a. Ram danga a zinna chuan Khawchhak Lam mite Pathian biak dân a hmuhtîr a, Pathian dik pakhat chauh a awm chu a ringhlel ṭan ta a. Engtin nge Pathian chibai a bûk ang? Bible-a thu awmte chu an sakhaw rawngbâwltu hnêna a zawhin, a zawhnate lah hnâwlsak a ni si a, a lungni lo hle a.

Katholic kohhran chuan, chu zirtîrtu awmna khawpuiah chuan Jehova Thuhretute nêna inbe lo tûra a mi leh sate hriattîrna lehkha chu a semdarh a. Mahse, zawhna a la nei cheu si a. Nikhat chu Thuhretute’n an va tlawh chuan, a lo ngaihthlâksakin a thil hriatte chu a ngaihven a. Chu chu anniho a biak hmasak ber ṭum a ni.

A zawhna tam takte chhânna hmuh nân, Thuhretute nên Bible an zir ṭan ta a. Chawlhkâr tin, zawh tûr tam tak a lo nei ṭhîn a ni. Pathian hming te, Pathian dik pakhat chauh a awm leh awm loh te, milem hmanga amah chibai bûk a phal leh phal loh te, leh thil dang tam takte chu hriat a duh a. A chhânna a hmuh zawng zawng chu mi mal ngaih dân mai ni lovin, Bible-a mi a nihzia a hria a, mak a tiin a thil zirah chuan a tui ta hle mai a. Zâwi zâwiin, a zawhna tam tak chu chhânsak a ni ta a. Tûnah chuan, Isua Krista’n “Pathian chibai bûktu tak takten” an tih dân tûra a sawi angin, Jehova chu thlarau leh thutakin chibai a bûk tawh a ni.​—Johana 4:​23, NW.

Sri Lanka ramah chuan chhûngkaw pakhatin Bible an chhiarho ziah a; mahse, an tâna pawimawh zawhna tam takte chhânna chu an hmu lo va. Ṭanpuina an mamawh nâ a; an sakhaw rawngbâwltu chuan a ṭanpui thei lo a ni. Amaherawhchu, Thuhretute’n an va tlawh a, Bible thu leh hla chhuah ṭangkai tak tak an hnutchhiah a. A hnua Jehova Thuhretute’n Bible chungchâng an zawhnate lungawithlâk taka an chhânsak hnu chuan, an chhûngkuaa Bible zir chu an remti ta a. An thil zirah an tui hle a ni.

Amaherawhchu, nu ber chuan a têt lai aṭanga biak ina thurin zirtîrna a dawnte chuan thûk taka zung a kaih avângin, Isua ngeiin a sawi angin “Pathian tak chauh” chu Isua Krista Pa a ni tih a hre thiam hlei thei lo va. (Johana 17:​1, 3) Isua chu Pa nên a intluk a, chu “thurûk” chu zawhfiah chi a ni lo tia zirtîr a lo ni tawh ṭhîn a. Jehova hming lam meuhvin, Isua tunge a nih hriatthiamtîr tûrin tih tak zet leh beidawng takin a ṭawngṭai ta a. Tichuan, a kaihhawih Bible chângte chu fîmkhur takin a enfiah leh a ni. (Johana 14:28; 17:​21; 1 Korinth 8:​5, 6) A mit ata phuhlip tla ang maiin, tûnah chuan Jehova​—lei leh vân Siamtu, Isua Krista Pa​—chu Pathian tak a nihzia a hre thiam ta a ni.​—Isaia 42:​8; Jeremia 10:​10-12.

Hrehawm Tawrhnate​—Engvângin nge?

Joba chuan hrehawm tâwpkhâwk chu a lo tuar a. A fate chu thlipuiin a nuai hlum vek a, nasa taka tihretheih a ni bawk. Pân chhia nasa tak leh ṭhian ṭha lote nêksâwrna chu chhel takin a tuar bawk a. Hêng zawng zawng avâng hian, Joba’n thuhnudâwn lovin thu ṭhenkhat chu a sawi a ni. (Joba 6:3) Mahse Pathianin Joba dinhmun chu a ngaihtuah tel a. (Joba 35:15) Joba rilru chu hriain, a mamawh zilhna chu a pe a ni. Tûn laia mite tân pawh chutiang chuan a ti bawk.

Mozambique rama Castroa chu kum sâwm mi lek a nihin a nuin a thihsan a, a lungchhe hle a ni. “Engvângin nge min boralsan kher a ngaih le?” tiin a inzâwt a. Pathian ṭih nu leh pate enkawl seilen ni mah se, atân engmahin awmzia a nei ta lo. A rilru leh a thinlung chu engin nge hnêm ta? Chichewa Bible tê a chhiar aṭang leh a ute nêna chu mi chungchâng sawihona aṭangin thlamuanna a hmu a ni.

Castroa chuan a nu thih chhan chu Pathian rorêl dik loh vâng a nih lohzia leh famkim lohna kan rochun vâng a nihziate chu zâwi zâwiin a lo hre thiam ta a. (Rom 5:​12; 6:23) A nu hmuh leh theih beiseina a pêk avângin, Bible thu tiam thawhlehna chuan thlamuanna ropui ber a pe a ni. (Johana 5:​28, 29; Tirhkohte 24:15) Lungchhiatthlâk takin, kum li hnuah a pain a boralsan leh a. Mahse, tûn ṭum chu Castroa chuan a tuar thiam tawh zâwk a. Tûnah chuan, Jehova chu a hmangaih a, a nun chu rinawm taka Pathian rawngbâwl nân a hmang mêk a ni. Amah hretu zawng zawng chuan a hlimzia an hmu a ni.

An hmangaihte chântu mi tam takte pawhin Castroa thlamuanna petu Bible thutak aṭangin thlamuanna an hmu a. Mi suaksualte avânga harsatna namên lo tâwk ṭhenkhatte chuan, Joba zawh angin an zâwt ve a ni: ‘Eng tizia nge mi suaksualte chu an nun?’ tiin. (Joba 21:7) Chu zawhna Pathian Thuin a chhân lêt dân an pawm tak zet hian, Pathian thil tih dân chu an ṭhatna tûr hlîr a ni tih an hriat phah a ni.​—2 Petera 3:9.

Barbarai chu United States-a seilian a ni a, indona râpthlâk tak chu amah ngeiin a tawng lo va. Mahse, indona khawvêla seilian a ni. Indona leh innghaisakna chanchin chu nî tin puan chhuah a ni a. School a kal lai pawhin, mite rin loh lam lama thil lo thleng ṭhînte chungchâng a zirte chuan a ngaihna a tihre lo va. Chûng thilthlengte chu engin nge awmtîr? Pathianin a lo hre ve em? Pathian a awm a ring a; mahse, a chungchângah ngaih dân chiang fak a nei thei tlat lo.

Amaherawhchu, Barbarai nun thlîr dân chu Jehova Thuhretute a kawm aṭangin zâwi zâwiin a lo inthlâkthleng a. An thusawi a ngaithla a, anni nên chuan Bible a zir ta a ni. Kingdom Hall-ah a inkhâwm bawk. An inkhâwmpui lianahte pawh a tel bawk a ni. Chu bâkah, zawhna a zawhin, Thuhretu dang dangte hnên aṭang pawhin ngaih dân thuhmun a dawng tih a hria a. Chutih ahnêkin, Thuhretute ngaihtuahna chu Bible-a a innghah avângin, an thusawi chu a inthlâwp thlap zâwk a ni.

Thuhretute chuan Bible aṭangin khawvêl hi Diabol-Setana thununin a awm a, ro a rêl bawk a, chuvângin khawvêlin a thlarau a lantîr a ni tih an kawhhmuh a. (Johana 14:30; 2 Korinth 4:4; Ephesi 2:​1-3; 1 Johana 5:19) Barbarai a ngaihna tihre lo ṭhîntu thilthlengte chu Bible-in a sawi lâwk a ni tih an hrilhfiah a. (Daniela, Bung 2, 7, leh 8) Pathianin a duh hunah thil lo theng tûr hmuh lâwk theihna a hman avângin a lo sawi lâwk mai a ni. Chûng thilthleng ṭhenkhatte chu Pathian thlentîr a ni a. Thil dangte erawh chu a phalna avâng maia lo thleng a ni. Thuhretute chuan Barbarai hnênah Bible pawhin kan huna thiltheng a chhia leh a ṭhate a sawi lâwkin a awmzia pawh a hrilhfiah bawk a ni tih an hrilh a. (Matthaia 24:​3-14) Bible thutiam khawvêl thar chu an kawhhmuh a, chutah felnain ro a rêl ang a, hrehawm tawrhnate chu thil hmasate a ni dâwn tih an hrilh a ni.​—2 Petera 3:13; Thu Puan 21:​3, 4.

Barbarai chuan mihring hrehawm tawrhnate chu Pathian Jehova awmtîr a nih loh rualin, hrehawm tawrhna tihtâwp nân a thupêk zâwm duh lote chungah tihluihna a hmang lo tih zawi zawiin a lo hre thiam ta a. (Deuteronomy 30:​19, 20) Pathianin hlim taka chatuana nun kan chen theih nân ruahmanna a siam a; mahse, tûnah a kawng felte mila kan nun dâwn leh dâwn loh lantîr theihna hun remchâng min pe a ni. (Thu Puan 14:​6, 7) Barbarai chuan Pathian thil phûtte zir a, nunpui chu a tum ta a. Isua’n a hnungzuitu dikte chhinchhiahna a sawi ang hmangaihna chu Jehova Thuhretute zîngah a hmu bawk a ni.​—Johana 13:​34, 35.

Nang pawhin amah ṭanpuitu ruahmannate chu i ṭangkaipui ve thei a ni.

Nun Awmze Nei Chu

Nun hlawhtling tak nei anga langte pawhin, an mahni tibuaitu zawhnate chhânna chu an zawng mai thei a. Entîr nân, Britain rama tlangvâl Matthewa chuan, Pathian dik hmuh leh nunin a tum hriat chu a châk êm êm a. Matthewa kum 17 mi a nihin a pain a thihsan a. Chu mi hnuah, Matthewa chuan rimawi lamah degree a la a. A sum leh pai âtchilhna nun kawng tlâktlai lohzia chu a hre chho ta a. London-a awm tûrin a in a chhuahsan a, chutah chuan ruihhlo te, night club-ah te, arsi hmanga ai ennaah te, thlarau zâwlnaah te, Zen Buddhism-ah te, leh mihring finna dangah te a inhnamhnawih a​—chutianga a tih chhan chu nun lungawithlâk a zawn vâng a ni. Beidawng takin, Pathian hnênah thutak zawng hmu tûrin ṭanpuina a dîl a.

Ni hnih a liam hnu chuan, a ṭhian hlui nên an inhmu a, a dinhmun khirh tak chu a hrilh a. Chu pa chu Jehova Thuhretute nêna Bible lo zir tawh a ni a. Matthewa chu 2 Timothea 3:​1-5 hmuhtîr a nih chuan, kan chhehvêl khawvêl awm dân chu Bible sawi ang chiah a nihzia a hriatin mak a ti hle a. Tlâng Chunga Thusawi a chhiar chuan a rilru a khawih hle bawk a ni. (Matthaia, bung 5-7) Atîrah chuan, Jehova Thuhretute sawichhiatna thute a lo chhiar tawh avângin a hreh a; mahse, a tâwpah chuan a hnai ber Kingdom Hall-a inkhâwm chu a titlu ta a.

Matthewa chuan a thu hriatte chu ngaihnawm a ti hle a; tichuan, kohhran upa pakhat nên Bible a zir ṭan ta a ni. A thu zirte chu a lo zawn ṭhinte a nihzia leh a hmaa Pathian hnêna a ṭawngṭaina chhânna a nihzia a hre thiam thuai a. Jehova tilâwm lo a thil chînte a bânsan chu a hlâwkpui êm êm a. Pathian ṭihna ṭha a han neih chuan, chu chuan Pathian thupêkte nêna inmila nung tûrin a chêttîr a. Matthewa’n chutianga nun chuan awmzia a nei tak zet tih a hre ta a ni.​—Thuhriltu 12:13.

He thu ziaka târ lan, Matthewa emaw, mi dangte emaw hi nun lungawithlâk hmu tûra ruat lâwk an ni lo. Amaherawhchu, Pathian thupêkte lâwm taka zâwmtu apiangte neih theih Pathian Jehova thiltum chungchâng chu an zir a ni. (Tirhkohte 10:​34, 35) Chu thiltumah chuan, indona laka fihlîm, natna leh ṭâmna laka zalênna​—thihna takngial pawh awm tawh lohna khawvêla chatuan nunna a tel a ni. (Isaia 2:4; 25:​6-8; 33:​24, Johana 3:16) Chu chu a ni lâwm ni i duh chu? A nih chuan, Bible ṭanchhan Jehova Thuhretute Kingdom Hall-a inkhâwnnaah telin nun lungawithlâk hmuh theih dân chu i zir belh thei a ni. Chutianga ti tûrin tih tak zeta sâwm i ni e. (w03 5/1)

[Phêk 7-naa milem]

Pathian hming bil hmangin tih tak zetin ṭawngṭai rawh

[Phêk 7-naa milem]

Bible thu zirtîr tak taktute nên Bible zir rawh

[Phêk 7-naa milem]

Kingdom Hall-ah inkhâwm rawh

[Phêk 4-naa Thlalâk Hawhtîrtu]

Kea zin mi: Chad Ehlers/Index Stock Photography