Thihna I Thlîr Dân Chu Eng Nge Ni?
ENG ANGA hrisêl ṭha leh hausa pawh ni mah ila, thihna hian kan nî tin nunah thla min zâr khum reng a. Engtik lai pawhin kan chungah a lo thleng thut thei reng a ni. September 11, 2001-a New York Khawpui leh Washington, D.C. mi sualte beihna ang chite chuan, “hmêlma hnuhnûng ber,” thihna chuan mi zawng zawng, hausa leh rethei, a pui a pangte chu a la khâwm a, a châng phei chuan rei lo te chhûngin mi sâng tam takte nun a lâksak a ni tih min hriatchhuahtîr a ni.—1 Korinth 15:26.
Thihna chu thil hlauhawm tak a ni nachungin, chu chuan mite ngaihven a hlawh tlat a. Thihna chungchâng thu, a bîk takin dinhmun râpthlâk taka mi tam tak a ruala an thihna chungchâng thu ziakna chanchinbute chu hralh a tla êm êm a; tin, chutiang chanchin chhuahna television chuan mi tam zâwk a hîp bawk a ni. Indona avânga thihna emaw, leilung chhiatna avânga thihna emaw, dân bawhchhiatna avânga thihna emaw, a nih loh leh natna avânga thihna emaw pawh ni se, mite chuan chutiang chanchin chu an ning thei lo a ang hle. He thihna thu nasa taka ngaihvenna hi mi ropui leh hmingthang tak takte an thih hunah chuan dangdai taka lantîr a ni thung. Mite chu an ṭap a, an chiau vak vak a, âwmte inchûmin, an intina hial a ni.
Hêng thihna chhân lêt dân chi hrang hrangte hi phat rual a ni lo. Engpawhnise, mite chuan thihna—mi dangte thihna—chu an ngaihven reng a. Nimahsela, mahni ngeia thihna tawn chu an ngaihtuah ngam si lo. Mahni ngei thi tûra inchan chu kan zaa kan ngaihtuah duh loh ber thil a ni.
Thihnain A Tibuai Che Em?
Mahni thi tûra inchan chu thil duhawm lo ber a ni a, a ni reng bawk ang. Eng vâng nge? A chhan chu Pathianin keimahniah chatuana nun châkna a dah tlat vâng a ni. Thuhriltu 3:11 chuan: “Mihring rilruah chuan chatuan a dah bawk a,” a ti. Chuvângin, he pumpelh theih loh thihna hian mihring rilru a kam tlat a, chhûngril lam inrem lohna a awmtîr reng a ni. He rilru kam tlattu sukiang tûr leh nun reng kan châkna phuhru tûr hian mihringte chuan rin dân chi hrang hrang, thlarau thi thei lo rinna te leh pianchhâwnna rinna te thlengin an siam chhuak a ni.
Engpawhnise, thihna hi thil buaithlâk tak, leh râpawm tak zawng a ni ngei mai a, thih hlauhna chu hmun tinah a awm a ni. Chuvângin, mihringte hian thihna an hlau tlat hi mak kan ti tûr a ni lo. Thil pakhatah chuan thihna chuan hausak leh thuneihna ûmna nun kawng sâwt lohzia chu a hailang chiang hle a ni.
Dawm Hlum Theih Lohvin I Awm Em Ni?
Hmân lai chuan, natna khirh tak tuar leh hliampui tuar thi mai tûrte chu mahni inchhûng lum ngeiah hmangaihte’n an dawm hlum ṭhîn. Hei hi Bible hun lai pawha chîn dân a ni a; tûn laiah pawh hnam ṭhenkhat chuan an la chîng reng a ni. (Genesis 49:1, 2, 33) Chutiang dinhmunah chuan, chhûngkaw zînga mite chu an kalkhâwm a, an titinaah chuan naupangte pawh an telh ṭhîn. Chu chuan, chhûngkaw zînga mi tinte chu amah chauh lungngai a ni bîk lo tih a hriattîr a, mawhphurhna leh sûnna a neihhotîr thei a ni.
Hei hi thihna chungchâng sawiho khapna, chu mi sawiho chu lungngaihna nia ngaihna, leh chutiang sawihona chu naupangte “tawrh theih rual ni lo” anga ngaih avânga teltîr lohna hnam dân nên chuan a inkalh tlat a ni. Tûn laia thihna chu kawng tam takin a danglam a, a tlângpui thuin khawhar taka thih a ni fo tawh a ni. Mi tam zâwk chuan mahni in lum ngei leh chhûngte enkawlna hnuaia thlamuang taka thih chu duhzâwk mah se, damdawi ina pindan hrangah na tuar chung leh tûn lai khâwl changkâng tak takte nêna inzawm thluah chungin an thi fo ṭhîn. A lehlamah chuan, mi maktaduai tam tak chu hnam insâmna te, ṭâm te, AIDS te, tualchhûng indona te, a nih loh leh retheih lutukna avângtein tu hriat lohvin an thi bawk a ni.
Ngaihtuah Tûr
Bible chuan thihna chungchâng ngaihtuah lo tûrin min ti lo va. Thuhriltu 7:2 phei chuan heti hian min hrilh zâwk a ni: “Lusûn ina kal a ṭha e, ruaiṭheh ina kal ai chuan; chu chu mi zawng zawng tâwpna a ni si,” tiin. Thihna kan han tawn meuh chuan, kan nî tin lungngaihte leh thiltihte chu hawisanin, kan nun tâwizia chu kan ngaihtuah mai thei a ni. Chutiang ngaihtuahna chuan awmze nei lo va khawsa mai lo tûr leh nun awmze nei zâwka nung tûrin min ṭanpui thei a ni.
Thihna i thlîr dân chu eng nge ni? I nun tâwp hun tûr chungchânga i rilru put dân te, i rin dân te, i beiseina te, leh i hlauhna te chu i enfiah tawh em?
Nunna nihphung ang bawkin, thihna nihphung chu mihringte hrilhfiah theih leh hriatthiam theih piah lam thil a ni. He mi chungchânga thuneitu rin tlâk awmchhun chu min Siamtu hi a ni. A hnênah chuan “nunna tuikhur” leh “thihna ata chhuahnate” a awm a ni. (Sâm 36:9; 68:20) Thilmak tak angin lang mah se, Pathian thu hmanga tûn lai rin dân lâr tak ṭhenkhat enfiahna chu a thlamuanthlâkin, a phûrawm hle a ni. Chu chuan thihna chu thil engkim tâwpna a nih kher a ngai lo tih a târ lang ang. (w02 6/1)
[Phêk 4-naa thu lâk chhuah]
Thi thut thei reng kan nihna chuan awmze nei zâwka nung tûrin min ṭanpui