Hmelma Thihna Chu Hnehin A Awm—engtin Nge?

KAN nu leh pa hmasa ber Adama leh Evi thuâwih lohna chuan mi zawng zawng chungah sual leh thihna thlen mah se, chu chuan mihringte tâna Pathian thiltum chu a thlâk danglam lo. Pathianin a thiltum a thlâk danglam lo tih a Thu, Bible bu pumpuiah vawi tam tak a sawi a ni.

• “Mi felte chuan ram hi an luah ang a, a chhûngah hian kumkhuain an awm ang.”—Sâm 37:29.

• “Thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang.”—Isaia 25:8.

• “Hmêlma hnuhnûng ber tihbova awm tûr chu thihna hi a ni.”—1 Korinth 15:26.

• “Thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang.”—Thu Puan 21:4.

Engtin nge Pathianin ‘thihna chu a lem hlen a,’ hmêlma thihna chu a ‘tihbo’ vang? Kan hriat tawh angin, Bible chuan: ‘Mi felte chu kumkhuain an nung ang,’ tiin chiang takin a sawi a. Mahse, ‘thil ṭha titu, mi fel chu lei chungah hian an awm lo,’ tih pawh a sawi bawk. (Thuhriltu 7:20) A nih leh, thihna hneh tûr chuan, Pathianin a sawi tawh chu a ngaihthah dâwn em ni? Chu chu thil ni thei a ni lo! ‘Pathian, dâwt sawi thei lo’ a nih avângin, chutiang chuan a ti ngai lo vang. (Tita 1:1, 2) A nih leh, Pathianin mihringte a siam chhan duhawm tak tihlawhtling tûrin eng nge a tih tâk ang?

TLANNA PEIN, THIHNA CHU A HNEH

Pathian Jehova chuan ruahmanna duhawm tak siamin, thihna ata mihringte chhan chhuak tûrin tlanna a pe a. Tlanna tih awmzia chu thiltih chhiat nêna a hlutna inang chiah pêk emaw, rorêlna dikin a phût anga tihlungawina emaw hi a ni. Mi zawng zawngin sual leh thihna kan rochun avângin, Bible chuan tlang takin hetiang hian a sawi a ni: “Tuman an unau pawh an tlan thei tawp lo vang a, Pathian hnênah tlanna an pêksak thei hek lo vang: (An nun tlanna tûr chuan thil nasa tak sên tûr a ni a, kumkhua pawha atina tin loh mai tûr a ni,)” tiin.—Sâm 49:7, 8.

Ṭha famkim lo mihring a thih hian ama sual man chauh a pe thei a; mahni a inchhandam thei lo va, mi dang sual man a pêksak thei hek lo. (Rom 6:7) Chuvângin, a sualna vâng ni lovin, kan sualna avânga a nun hlântu tûr, sualna nei lo mi ṭha famkim kan mamawh a ni.—Hebrai 10:1-4.

Chutiang ni thei tûr chuan, Pathianin ruahmanna a siam a. A Fapa Isua chu ṭha famkim leh sualna nei lo mihringa lo piang tûrin vân aṭangin leiah a rawn tîr ta a ni. (1 Petera 2:22) Isua chuan “mi tam tak tlan nâna a nun pe zâwk” tûrin a lo kal tih a sawi a. (Marka. 10:45) Hmêlma thihna hneh a, nun kan neih theih nân ani chu a thi a ni.—Johana 3:16.

ENG HUNAH NGE THIHNA CHU HNEH A NIH ANG?

Bible hrilh lâwk thleng famkim angin, he khawvêl suaksual “ni hnuhnûngahte” kan awm tih târ langtu ‘hun khirh takahte’ kan nung a. (2 Timothea 3:1) Ni hnuhnûngte chu ‘Pathian ngaihsak lo mite rorêl leh boral nîah’ tihtâwp a ni ang. (2 Petera 3:3, 7) Mahse, Pathian hmangaihtute chu, chu boralna ata an dam khawchhuak ang a, ‘kumkhaw nunna’ changin malsâwm an ni ang.—Matthaia 25:46.

Mi dang maktaduai tam tak chuan kaihthawh an nih hunah chatuana nun theihna hun remchâng an nei ang. Isua’n Nain khua a va tlawh khân, thawhlehna chu eng nge a nih tih a târ lang a. Hmeithainu fapa neih chhun chu a thi a, Isua chuan “a khawngaih êm” avângin a kai tho leh a ni. (Luka 7:11-15) Chu bâkah, tirhkoh Paula chuan: “Mi felte leh fel lote thawhlehna a awm ang tih Pathian lamah ka beisei,” tiin a sawi a. He beiseina chiang tak hi Pathianin mihringte a hmangaihzia lantîrna chhinchhiah tlâk tak a ni.—Tirhkohte 24:15.

Mi maktaduai tam tak chuan chatuana nun an beisei thei a. Bible chuan: “Mi felte chuan ram hi an luah ang a, a chhûngah hian kumkhuain an awm ang,” tiin a sawi a ni. (Sâm 37:29) Chutih hunah chuan, anni chuan kum 2,000 vêl kal taa tirhkoh Paula ziah, mi tiphûr thei tak leh thlamuan thei tak he thu hi mi mal takin an tawng tawh ang: “Aw thihna, i hnehna chu khawiah nge a awm tâk? Aw thihna, i tûr chu khawiah nge a awm tâk?” tih hi. (1 Korinth 15:55) Mihringte hneh theih loh hmêlma thihna chu hnehin a awm tawh ang!