Pathian Hmangaihna Ata Tuin Nge Min Ṭhen Ang?
“Amahin min hmangaih hmasak avângin kan hmangaih a ni.”—1 JOHANA 4:19.
1, 2. (a) Mite hmangaih kan ni tih inhriat chu engvângin nge kan tân a pawimawh? (b) Tu hmangaihna nge kan mamawh ber?
MITE hmangaih i ni tih inhriat chu i tân eng angin nge a pawimawh? Nausên aṭanga puitling thlengin, mihringte hian hmangaihna hi an ṭhatpui hle a. Nuin duat taka a fa sên a pawm lai i hmu tawh ngai em? A vêlah chuan engpawh thleng mah se, nausên chuan a nu nui hmêl a hmuh phawt chuan, a nu âng chhûngah chuan thlamuang takin a bei hle hle ṭhîn a ni. A nih loh leh, i tleirâwl chhuah lai hun chhûnga i awm dânte i la hria em? (1 Thessalonika 2:7) A châng chuan, i thil duhzâwng leh i rilru pawh i hre mumal lo mai thei a; mahse, i nu leh pate’n an hmangaihzia che hriat chu a va pawimawh êm! Harsatna emaw, zawhna emaw i neih apiangin i pan thei tih i hriatna chuan a ṭanpui che lâwm ni? Dik takin, kan dam chhûnga kan mamawh ber chu mite hmangaih nih hi a ni. Chu hmangaihna chuan hlutna kan neihzia a nemnghet a ni.
2 Nu leh pate hmangaihna tlo tak chuan a nihna tûr ang taka ṭhanlenna leh inbûk tâwkna a siam tak zet a ni. Mahse, kan Pa vâna mi, Jehova’n min hmangaih a ni tih rin tlatna chu kan thlarau leh rilru lam ṭhatna atân a pawimawh lehzual a ni. He magazine chhiartu ṭhenkhat chuan anmahni ngaihsak tak taktu nu leh pa an nei lo pawh a ni thei. Chutiang zînga mi i nih chuan, lunghnual miah suh. Nu leh pa hmangaihna dawn tûr i neih loh pawhin, Pathian hmangaihna rinawm chuan a ai a rawn awh ang.
3. Jehova chuan a mite a hmangaihzia engtin nge a hrilh?
3 A zâwlnei Isaia kal tlangin Jehova chuan, nuin a fa hnute hne lai chu a “theihnghilh” thei a nih pawhin ani chuan a mite a theihnghilh dâwn lo tih a sawi a ni. (Isaia 49:15) Chutiang bawkin, Davida pawhin ringngam takin: “Ka nu leh ka pa chuan mi kalsan . . . [mah se] LALPA chuan min la pawm ang,” tiin a sawi a ni. (Sâm 27:10) A va thlamuan thlâk êm! Eng ang dinhmunah pawh ding la, Pathian Jehova nêna inpumpêk inlaichînna nei i nih phawt chuan, a hmangaihna che chu mihring tupawh hmangaihna aiin a nasa a ni tih hre reng ang che.
Pathian Hmangaihnaah Chuan Invawng Ṭha Rawh U
4. Engtin nge kum zabi pakhatnaa Kristiante chu Pathian hmangaihna hriatnawntîr an nih?
4 Jehova hmangaihna chu engtikin nge i lo hriat ṭan? I thiltawnte chuan kum zabi pakhatnaa Kristiante thiltawn nên inanna a neih a rinawm. Rom mite hnêna Paula lehkha thawn bung 5-naah chuan Pathian laka lo inmihran ṭhîn misualte’n Jehova hmangaihna an lo hriat dân chu a sawi mawi hle a. Châng 5-ah chuan tihian kan chhiar: “Thlarau thianghlim kan hnêna min pêk khân Pathian hmangaihna chu kan thinlunga a leih tawh avângin,” tiin. Tin, châng 8-ah: “Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân,” tiin a sawi zawm a ni.
5. Pathian hmangaihna nasatzia chu engtin nge i lo hriat thiam?
5 Chutiang bawkin, Pathian Thu tak hrilhhriat i nih a, rinna i lantîr tâkah chuan Jehova thlarau thianghlimin i thinlungah hna a thawk ṭan a. Chutiang chuan Jehova’n a Fapa duh tak i tâna thi tûra a rawn tirhna ropuizia chu i lo hre thiamin, i lo ngaihlu ṭan ta a ni. Chutiang chuan, mihringte a hmangaihzia hre thiam tûrin Jehova chuan a ṭanpui che a ni. A laka inmihran leh sualna neia piang ni mah la, Jehova chuan chatuan nun beiseina nei tûra mi fel anga ruat theihna kawng a lo hawng a ni tih i hriatna chuan, i rilru a khawih hle lo maw? Jehova hmangaihna pawh i neih phah lo maw?—Rom 5:10.
6. Engvângin nge Jehova nên inhlat viauva inhriat châng kan neih theih?
6 I Pa vâna mi hmangaihnaa hîpa awmin, leh a pawm tlâk ni tûra i nun insiam ṭhain, i nun chu Pathian hnênah i pumpêk ta a. Tûnah chuan Pathian nêna inremna chu i nei ta a ni. Mahse, engemaw châng chuan Jehova nêna inhlat viau nia inhriat châng i nei ṭhîn em? Chu chu kan zaa chungah a lo thleng thei vek a ni. Amaherawhchu, Pathian chu a danglam ve ngai lo tih hre reng ang che. Nîin lei lama a êng zung a chhuah reng ang chiah hian a hmangaihna chu a pângngai reng a ni. (Malakia 3:6; Jakoba 1:17) Keini erawh chu kan danglam thei a ni—engemaw chhûng tal chu. Khawvêl a inher hian, kan awmna lei chanve chu thimin a khuh ṭhîn a. Chutiang bawk chuan, hun rei lote chhûng lek pawh Pathian kan hawisan chuan, amah nêna kan inlaichînnaah dangtu awm tlat niin kan inhre thei a ni. Chu dinhmun siam ṭha tûr chuan eng nge kan tih theih?
7. Engtin nge mahni inenfiahna chuan Pathian hmangaihnaa awm reng tûrin min ṭanpui theih?
7 Pathian hmangaihna laka hrang riauva inhriatna kan neih chuan, hêng a hnuaia zawhnate hi kan inzâwt tûr a ni: ‘Pathian hmangaihna chu ka hlut ta mang lo vem ni? Rinna lama ka chak lohzia kawng chi hrang hranga lantîrin, Pathian nung leh hmangaihna Pathian lak aṭang chuan zawi zawiin ka tawlh bo vem ni? “Thlarau lam thilte” ni lovin, “tisa lam thilte” ka ngaihtuah zâwk em ni?’ tihte hi. (Rom 8:5-8; Hebrai 3:12) Jehova laka kan inlahrang a nih chuan, amah nêna inlaichînna ṭha leh duhawm tak nei leh tûr chuan hma kan la thei a ni. Jakoba chuan: “Pathian hnaih rawh u, tichuan anin a hnaih ang che u,” tiin min fuih a. (Jakoba 4:8) Juda thusawi: “Duh takte u, nangni zawngin in rin chhan thianghlim ber chungah chuan nangmahni leh nangmahni inrem chhovin, thlarau thianghlimah ṭawngṭaiin, . . . Pathian hmangaihnaah chuan invawng ṭha rawh u,” tih hi zâwm ang che.—Juda 20, 21.
Dinhmun Inthlâkin Pathian Hmangaihna A Nghawng Ve Lo
8. Kan nunah eng inthlâk danglamna nge awm thut thei?
8 He khawvêla kan nun hi a inthlâk reng a. Lal Solomona chuan thilte chu kan zaa chungah “hun leh khawrêl ang angin a thleng,” a ni tih a lo hria a ni. (Thuhriltu 9:11) Zan khat thil thu maiah pawh kan nun hi a inthlâk thut thei a. Vawiinah kan hrisêl var a, a tûk maiah chuan kan na vak thei a ni. Hna nghet nei nia kan inhriat laiin, a tûk lawkah hna thawh tûr nei lovin kan awm thut thei bawk. Hriat lâwkna awm hlek lovin, kan duh takte chu an thi thut thei a. Khawi ram emawa Kristiante chuan hun engemaw chhûng chu remna an chen laiin, thâwklehkhatah tihduhdahna an tawng thut thei bawk. Dik lo taka hêka awmin, chu mi avânga rorêl dik lohna kan tuar mai thei a ni. Ni e, nun hi a nghet lovin, a him lo tak zet a ni.—Jakoba 4:13-15.
9. Engvângin nge Rom bung 8 thu hi ngaihtuah âwm a nih?
9 Thil lungchhiat thlâk tak kan chungah a lo thlen chuan, hlamchhiah nia inhriatna kan nei thei a, Pathian min hmangaihna pawh a chuai taah kan ngai hial mai thei. Chutiang thilte chu kan tawn ṭheuh avângin, Rom bung 8-a tirhkoh Paula hnemna thu ṭha tak takte chu ngun taka ngaihtuah âwm kan ni. Chûng thute chu thlarauva hriak thih Kristiante hnêna a sawi a ni a. Mahse, a thu bul chu Kristian hun hmaa awm Abrahama anga mi fel leh Pathian ṭhiana puan, berâm dangte tân pawh a hman theih a ni.—Rom 4:20-22; Jakoba 2:21-23.
10, 11. (a) Hmêlmate’n Pathian mite chu engtin nge an hêk ṭhin? (b) Engvângin nge chûng hêknate chu Kristiante tân thil pawimawh ber a nih loh?
10 Rom 8:31-34 hi chhiar rawh. Paula chuan tihian zawhna a siam a: “Pathian kan lama a ṭan chuan tuin nge min do thei ang?” tiin. Ni e, Setana leh a khawvêl suaksual chuan min do tlat a. Hmêlmate chuan dik lo takin min hêk thei a, ram rorêlnaahte pawh min khing hial thei a ni. Kristian nu leh pa ṭhenkhatte chu Pathian dânin a phal loh damdawia inenkawlnate chu an fate an dawntîr loh avâng leh milem betute hlimhlâwp bâwlnaa an teltîr loh avângin, an fate an hua anga puh an ni. (Tirhkohte 15:28, 29; 2 Korinth 6:14-16) Kristian rinawm dangte chu indonaa tela an mihring puite an thah duh loh avâng leh politics-a an inrawlh duh loh avângin hel anga dik lo taka puh an ni bawk. (Johana 17:16) Dodâltu ṭhenkhat chuan insawichhiatna thu chu an thehdarh a, Jehova Thuhretute chu rin dân veiherh pâwl hlauhawm tak angin dik lo takin an puh hial a ni.
11 Mahse, tirhkohte hun laiah pawh: “He pâwl hi ram tinah sawichhiat an ni,” tih hi theihnghilh suh ang che. (Tirhkohte 28:22) Chung insawichhiatnate chu thil pawimawh ber em ni? Krista inthawina an rin avânga Kristiante mi fela puangtu chu Pathian alâwm. Thilthlâwnpêk hlu ber—a Fapa duh tak—a pêk tawh hnuah amah chibai bûktute chu engvângin nge a hmangaih tawh loh vang? (1 Johana 4:10) Tûnah chuan Krista chu thihna ata a tho leh tawh a, Pathian ding lamah awmin, Kristiante chu a humhim reng tawh a ni. Krista’n a hnungzuite a humhimna chu tuin nge hnial thei a, a mi rinawmte tâna Pathian rorêlna duhawm tak hi tuin nge hlawhtling taka cho thei? Tumahin!—Isaia 50:8, 9; Hebrai 4:15, 16.
12, 13. (a) Eng ang dinhmunte hian nge Pathian hmangaihna ata min ṭhen theih loh? (b) Diabola’n harsatna min siam hian eng nge a tum ber? (c) Engvângin nge Kristiante chuan hnehna pumhlûm an chan?
12 Rom 8:35-37 chhiar rawh. A mi malin, Jehova leh a Fapa, Isua Krista hmangaihna ata min ṭhen theitu emaw, min ṭhen thei thil emaw a awm em? Setana chuan lei lama a mite hmangin Kristiante chu nasa takin a tibuai mai thei. Kum zabi liam ta chhûng khân, ram tam taka kan Kristian unau tam takte chuan râwng taka tihduhdahna an tuar a. Tûn laiah pawh, hmun ṭhenkhata kan unaute chuan ei leh bâr harsatna avânga lungkhamna chu nî tin an tâwk a ni. Ṭhenkhat chu an ṭâm a, silh leh fên an tlachham a ni. Diabola’n hêng harsatna zawng zawng a thlentîr chhan hi eng nge ni? A lo berah pawh, a tum chu Jehova chibai bûktute tihlunghnual hi a ni. Setana chuan Pathian min hmangaihna chu a dai tawh tih kan rin a duh a ni. A nih leh, Pathian min hmangaihna chu a dai tawh em?
13 Sâm 44:22 sawi chhâwngtu Paula angin, Pathian Thu ziak chu kan zir a. Hêng zawng zawngte hi Pathian hming avânga keini, a “berâm,” te chunga lo thleng a ni tih kan hria a ni. Hêngah hian, Pathian hming tihthianghlimna leh a lalchungnunna thiam chantîrna a inrawlh a ni. Chûng thil pawimawh tak takte avângin Pathianin fiahna awm a phal a, min hmangaih tawh loh vâng a ni lo. Eng dinhmun râpthlâk tak pawh lo thleng mah se, Pathianin a mite a hmangaihna, kan mi mal tina min hmangaihna chu a danglam lo tih kan hre chiang a ni. Kan rinawm ngheh phawt chuan, hrehawm kan tawrh apiang chu hnehnaah a la chang dâwn a ni. Pathian hmangaihna danglam thei lova tihchak leh chhawmdâwl kan ni si a.
14. Kristiante chuan hrehawm tuar mahse, Pathianin a hmangaih a ni tih chu Paula’n engvângin nge a rin tlat theih?
14 Rom 8:38, 39 chhiar rawh. Kristiante chu Pathian hmangaihna ata engmahin a ṭhen thei lo tih engin nge Paula chu hmin? Rinhlelh rual lovin, harsatnate chuan Pathian hmangaihna a khawih danglam thei lo tih chu rawngbâwlnaa a thiltawnte chuan Paula chu a rin nghehtîr a ni. (2 Korinth 11:23-27; Philippi 4:13) Tin, Paula chuan Jehova chatuan thil tum leh tûn hmaa A mite a dâwr dânte a hre bawk a ni. A nih leh rinawm taka a rawng bâwltute chunga Pathian hmangaihna chu thihnain a hneh thei em? Teuh lo mai! Chûng mi rinawm thi tâte chu Pathian hriatrengna ṭha famkimah an nung reng a, a hunah chuan a kaitho leh dâwn a ni.—Luka 20:37, 38; 1 Korinth 15:22-26.
15, 16. A chhiahhlawh rinawmte laka Pathian hmangaihna titâwp thei lo thil ṭhenkhatte sawi rawh.
15 Tûn lai vânduaina engpawh—piansualna khawp chêtsualna emaw, thihpui khawp hial natna emaw, a nih loh leh, ei leh bâr harsatna emaw—tuar mah ila, Pathianin a mite a hmangaihna chu engmahin a tichhe thei lo. Vântirhkoh thiltithei tak tak, vântirhkoh thuawih lo Setana lo nita te ngei pawhin, Jehova’n a chhiahhlawh inpumpêkte a hmangaihna chu a dang thei lo. Sawrkârin Pathian chhiahhlawhte chu a khap betin, dik lo taka cheibâwlin “khua leh tuia pawm loh” [persona non grata] a nihtîr hial thei a ni. (1 Korinth 4:13) Chutianga sawrkâr pâwngpaw huatna chuan mite chu min dodâl tûrin a tur lui mai thei; mahse, chûng chuan lei leh vân Lalchungnung ber chu min thlahthlam tûrin a thlêmthlu chuang lo.
16 Kristian kan nih angin, Paula’n “thil awmsa” a tih—he thil kalhmanga thil thlengte emaw, dinhmunte emaw—nakina “thil lo la awm tûrte” emaw chuan Pathianin a mite a hmangaihna chu a tichhia ang tih kan hlauh a ngai lo. Khawvêl leh vâna thlarau sualhote’n min bei reng mah se, Pathian hmangaihna rinawm chuan min titlai reng ang. Paula sawi uar angin, “sânna te, thûkna te,” pawhin Pathian hmangaihna chu a dang lo vang. Ni e, min tilunghnual thei thil, thûkna te emaw, kan chunga thununna lek kawh tum, sânnate emaw chuan Pathian hmangaihna ata min ṭhen thei lo va; thil siam dang rêng rêngte pawhin Siamtu leh a chhiahhlawh rinawmte inkâra inlaichînna awm chu a tikhaw lo thei lo. Pathian hmangaihna chu a thlâwn ngai lo; chatuan daih a ni.—1 Korinth 13:8.
Pathian Ngilneihna Chu Hlut Reng Rawh
17. (a) Engvângin nge Pathian hmangaihna neih chu “nunna aiin a ṭhat zâwk”? (b) Engtin nge Pathian ngilneihna kan hlutzia kan lantîr theih?
17 Pathian hmangaihna hi i tân eng ang fakauvin nge a pawimawh? “I ngilneihna hi nunna aiin a ṭhat zâwk avângin ka hmui hian a fak ang che. Chutiang bawkin ka dam chhûng zawngin ka fak ang chia: i hmingin ka kutte ka phar ang” tia ziaktu Davida ang hian i ngai pawimawh ve em? (Sâm 63:3, 4) Dik takin, Pathian hmangaihna leh a inṭhianna rinawm dawn aia ṭha he khawvêl hian eng nge min pêk theih? Entîr nân, Pathian nêna inlaichînna ṭha tak aṭanga lo awm rilru thlamuanna leh hlimna aiin sum hmuhna hna ṭha tak ûm chu a ṭha zâwk em? (Luka 12:15) Kristian ṭhenkhatte chu Jehova phatsan nge an duh a, tihhlum tih thu-ah duhthlanna siamtîr an ni a. Chutiang dinhmun chu Khawvêl Indopui ll-na chhûnga Nazi concentration camp-a awm, Jehova Thuhretu tam takte khân an lo tawng a ni. Pathian phatsan thlang chu an awm mang lo; kan Kristian unaute chuan Pathian hmangaihnaa invawn ṭhat chu an thlang a, a ṭûl chuan an nunna hial chân pawh an inhuam a ni. Chutianga a hmangaihnaa invawng ṭhate chuan he khawvêlin a pêk theih loh, chatuana nunna chu Pathian hnên aṭangin an dawng ang tih an ring nghet tlat thei a ni. (Marka 8:34-36) Mahse, chatuan nunna mai aia tam a la kaihhnawih cheu.
18. Engvângin nge chatuan nunna chu a duhawm êm êm?
18 Jehova tel lova chatuana nun chu thil theih ni lo mah se, Siamtu tel lovin hun rei tak chhûng nung ta ila, chu nun awm dân tûr chu suangtuah han tum chhin teh. Thil tum dik a awm loh chuan, engmah lo mai a ni dâwn a ni. Jehova chuan he ni hnuhnûngahte hian a mite chu hna thawh tûr duhawm tak a pe a. Chuvângin, thutiam Hlentu Ropui, Jehova chuan chatuan nunna min pêk hunah chuan, thil ṭha zir tûr leh tih tûr phûrawm tak tak a tam hle dâwn tih kan ring tlat thei a ni. (Thuhriltu 3:11) Kum sângbi tam tak lo awm tûrah chuan eng anga nasa pawhin zir mah ila, “Pathian finna leh hriatna ngahzia chu” kan chhût chhuak zo ngai lo vang.—Rom 11:33.
Pain A Hmangaih Che U
19. An inṭhen dâwn khân, eng fuihna thutiam nge Isua Krista’n a zirtîrte a pêk?
19 C.E. 33 Nisan ni 14-a a tirhkoh 11-te nêna zanriah an kîlho laiin, Isua chuan an hmaa thil lo awm tûrte atâna anmahni tihchak nân thil tam tak a hrilh a. Thlêma a awm chhûng zawnga a awmpuitutte an ni a, Isua’n anmahni a hmangaihzia chu an hre ṭheuh va ni. (Luka 22:28, 30; Johana 1:16; 13:1) Tichuan Isua’n: “Pa ngeiin a hmangaih si che u a,” tiin a hrilh a ni. (Johana 16:27) Chûng thute chuan zirtîrte chu an Pa vâna miin a hmangaihzia hre tûrin a va ṭanpui nasa dâwn êm!
20. Eng nge tih i tum tlat a, eng thilah nge rin tlatna i neih theih?
20 Tûna nungdama la awm mi tam takte hian kum sawmbi tam tak chhûng rinawm takin Jehova rawng an bâwl tawh a. Rinhlelh rual lovin, he thil kalhmang suaksualte tâwp hma hian, fiahna dang tam tak kan tâwk dâwn. Chûng fiahna emaw, manganna emawte chuan Pathian hmangaihna rinawm chu rinhlelhtîr ngai che suh se. He thil hi sawi pawimawh luat a awm thei lo vang; Jehova’n a hmangaih che tih hi. (Jakoba 5:11) Chuvângin, kan zain kan tih tûr ṭheuh ti chhunzawmin, rinawm takin Pathian thupêkte i zâwm ang u. (Johana 15:8-10) Hun remchâng apiang chu a hming fak nân i hmang ang u. Ṭawngṭaina leh a Thu zirna hmangin, Jehova hnaih zêl kan tumna chu kan tinghet sauh sauh tûr a ni. Jehova tihlâwm tuma theihtâwp kan chhuah phawt chuan, hma lam hunah eng pawh lo thleng se, kan thlamuang reng ang a, a hmangaihna reh ngai lo chu kan ring nghet tlat ang.—2 Petera 3:14. (w01 10/15)
Engtin Nge I Chhân Ang?
• Kan thlarau lam inbûk tâwkna leh rilru lama inbûk tâwkna nei reng tûr chuan, tu hmangaihna nge a bîk taka kan mamawh?
• Eng thilte hian nge Jehova’n a chhiahhlawhte a hmangaihna chu titâwp thei lo?
• Engvângin nge Jehova hmangaihna neih chu “nunna aiin a ṭhat zâwk”?
[Phêk 19-naa milemte]
Pathian hmangaihna ata ṭhen nia kan inhriat chuan, thil awm dân siam ṭha tûrin hma kan la thei
[Phêk 21-naa milem]
Paula chuan tihduhdah a nih chhan a hria