I Thinnel Tak Zet Em?

TU EMAW mawi lo taka khawsa i hmuh avângin i thinur tawh ngai em? I ṭhian kawngngeihte nêna in inkâr tichhe thei boruak ṭha lo tak a lo awmin chêt mai i awlsam em?

A châng chuan sual turu tak chu a punlun zêl loh nâna khauh taka hma lâk vat a ngai ṭhîn. Entîr nân, B.C.E., kum zabi 16-naa thil sual tihna nasa takin Israel mite dinhmun a tihderthâwn khân, Arona tupa Phinehas-a chuan thil ṭha lo tibo tûrin hma a la nghâl vat a. Pathian Jehova chuan a thiltih chu a pawmzia hetiang hian a sawi: “Phinehasa hian ka thîk anga an zînga a thîkna chuan ka thinurna chu Israela thlahte lak ata a tikiang ta,” tiin.​—Numbers 25:​1-11.

Phinehas-a chuan sualna punlun zêl tûr chu tihtâwp nâna tih tûr tak a ti a. A nih leh mi dang chêt dân dik lo ringawt avângin phubâ la tâ ila engtin nge ni ang? A chhan mumal tak awm si lo emaw, insûm miah lo emawa kan chêt nghâl mai chuan, mi fel nihna aiin mi thinram​—mi dangte ṭhat famkim lohna pawh hrethiam duh lo​—kan lo ni mai zâwk dâwn a ni. He thang pumpelh tûr hian engin nge min ṭanpui thei?

‘Jehova Chuan I Khawlohna Zawng Zawng A Ngaidam Ṭhîn’

Jehova chu “Pathian ṭhahnemngai; Pathian thîkthu chhia,” a ni. (Exodus 20:​5, footnote) Siamtu a nih avângin a laka inpumpêk tûra min phût theihna dân a nei a ni. (Thu Puan 4:11) Amaherawchu, Jehova chu mihring chak lohnate chungah a thinnel a. Chuvângin fakna hla phuahtu Davida pawh hetiang hian a zai a ni: “LALPA chu lainatnaa khat, mi khawngaih thei tak, thinnel tak, ngilngeihna ngah tak a ni. Ani chuan a hau fo lo vang a; . . . Kan sualnate angin kan chungah a ti lo va, kan khawlohnate angin min thungrûl hek lo,” tiin. Ni e, kan inlamlêt phawt chuan, Pathian chuan ‘kan khawlohnate zawng zawng a ngaidam ṭhîn.’​—Sâm 103:​3, 8-10.

Mihringte pianpui sual hi a hriatthiam avângin, Jehova chuan thil sualti inlamlêtte chu “a hau fo lo” va. (Sâm 51:5; Rom 5:12) Sualna leh famkim lohna tihbo hi a thil tum rêng a ni zâwk a ni. Chu a thil tum chu a hlenchhuah hma chuan ‘min thungrûl lovin,’ Isua Krista tlanna inthawina azârah zahngai takin ngaihdamna a la nei zêl zâwk a ni. A inâwm huna Jehova’n zahngaihna a lantîr loh chuan tumah hi damkhawchhuak tlâk kan awm hauh lo vang. (Sâm 130:3) Kan pa vâna mi, a laka inpumpêk min phûttu chu zahngai thei Pathian a ni chu a va han lâwmawm êm!

Inbûktâwk A Ngai

Vânlâwta Lal Chungnung ber mah mihring ṭha famkim lote chunga a thin a nel si chuan, keini pawhin chutiang chuan kan ti ve tûr a ni lâwm ni? Thinnelna chu “mi dangte thiltih leh ngaihdân ngaihtheihna thinlung” tia hrilhfiah a ni a. Chutiang thinlung​—mi dangte’n sual lian tham ni lo, thiltih leh ṭawngkama inâwm lo taka an khawsak huna thinnelna leh tawrh theihna chu kan nei em?

Mahse, pâwngpaw thinnel lutuk erawh kan pumpelh a ngai. Entîr nân, sakhaw hotute’n puithiam huatthlala tak, mipa leh hmeichhe naupang te khawih chingpen hmang an ngaihtheina hian chhiatna râpthlâk tak thil a ti a ni. Ireland-a reporter pakhat chuan heti hian a sawi. “Naupangte chunga thil thleng apiang chu an chunga sual thiltih thleng ang lekah ngaiin, sakhaw hotute chuan chûng naupang khawih chingpen hrât puithiamte chu [hmun dangah] an sawn a, an duhtâwk mai thîn,” tiin.

Chutiang mite hmun danga sawn ringawt chu thinnelna dik entîrna a ni em? Teuh lo mai! Damdawi lam hotute hian doctor rinawm lo tak chu mi an zai chhunzawmtîr zêl mai a, a dam lo zaite chu thiin emaw, zengin emaw a chhuah zêl chung pawhin, damdawi in dang dangah sawn kual zêl ta se la. Damdawi thiamte inkâra rinawmna dik lo chuan chutiang khawpa “thinnelna” chu a siam pawh a ni thei e. Mahse, chûng an ngaihthahna emaw, damlo hriat lohva a taksa pêng hralh rûkna emaw avânga nun chântute leh ramtuileilova awmte chungchâng chu engtin nge ni ta ang?

Tin, thinram lutuk pawh a ṭha chuang lo. Isua he leia a awm lai khân, Juda ṭhenkhat, Ṭhahnemngai tia hriatte chuan anmahni insawi thiamna kawngah Pinehasa entawn tûr siam kha dik lo taka hman ṭangkai dân an zawng a. Chûng mi Ṭhahnemngaite thiltih râpthlak tak pakhat chu “Jerusalema kût lai leh chutiang puipun nikhuatea mipuite zînga va tela, an hmêlmate chu a rûka va vih hlum ṭhin chu a ni.”

Kristian kan ni a, chûng mi Ṭhahnemngaite tih anga kan mi ngaihtheih loh zâwngte kut thlâk khawp chuan kan che duh dâwn hauh lo va. Mahse, thinramna chuan kan mi ngaihtheih loh zâwngte chu kawng dang engemaw zâwng tala beihna​—anmahni sawichhiatna emaw min neihtîr em? Kan thin a nel tak zet a nih chuan chutianga mi dang tina thei ṭawngkamte chu kan hmang duh hauh lovang.

Kum zabi pakhatnaa Pharisaite kha thinram tak dang an ni leh a. Anni chuan mi dangte chu thiam loh an chantîr reng a, mihring ṭhat famkim lohna chu an hre thiam duh lo a ni. Pharisai chapo takte chuan mipuite chu an hmusit a, “ânchhe dawng” an ti a ni. (Johana 7:49) Chhan ṭha tak neiin Isua chuan chûng intifelte chu hetiang hian a hrilh a: “Nangni lehkhaziaktu leh Pharisai vervêkte u, in chung a pik e! pudina te, mohuri te, zira te chu sâwmah pakhat in pe ṭhîn a, dân thu pawimawh zâwk​—felna te, khawngaihna te, rinawmna te chu​—in ngaihthah si ṭhîn; nimahsela, chûng chu asin in tih tûr ni, a dangte chu tih ṭhulh chuang lovin,” tiin.​—Matthaia 23:23.

Hetianga a sawi hian Isua chuan Mosia Dân zawm a pawimawhzia a sawi nêp a ni lo. Dân thu “pawimawh zâwk” chu felna leh khawngaihna nêna hman a ṭûlzia a lantîr mai zâwk a ni. Isua leh a zirtîrte chu Pharisai leh Ṭhahnemngai thinram takte lakah chuan an va danglam êm!

Pathian Jehova chuan suahsualna chu a pawmzam mai mai lo va, Isua Krista pawhin a pawmzam hek lo. Nakin lawkah ‘Pathian hre lo mi leh kan Chanchin Ṭha âwih lo mite chungah phuba lâk a ni dâwn’ a ni. (2 Thessalonika 1:​6-10) Nimahsela, Isua chuan felna avângin ṭhahnem a ngai a, thil ṭha titute chungah chuan a Pa vâna mi thinnelna, zahngaihna leh hmangaihna ang lantîr a ṭhulh ngai lo. (Isaia 42:​1-3; Matthaia 11:​28-30; 12:​18-21) Kan tâna entawn tûr ṭha a va ni êm!

Indawh Tawn Rawh U

Thil ṭha tih kawnga ṭhahnemngai tak ni mah ila, he Paula fuihna thu: “Tupawhin tu chungah pawh thupawi nei ang ula indawh tawnin inngaidam tawh ula, Lalpa chuan a ngaidam che u ang tak khân ngaidam ve rawh u,” tih hi a takin i zâwm ṭheuh vang u. (Kolossa 3:13; Matthaia 6:​14, 15) thinnel tûr chuan he famkim lohna khawvêlah hian kan tlinlohna leh thil tihsualte indawh tawn a ṭûl a. Mi dangte chungah a âwm tâwk chauh kan beisei tûr a ni.​—Philippi 4:5.

Thinnel nih chu thil sual tih pawmpui emaw, khawlohnate hmu miah lo emaw tihna a ni lo. Rinpui ṭhenkhatte ngaihtuahna emaw, khawsazia emaw chu Jehova tehna nên a inmil lo pawh a ni thei. Khawsazia chu Pathianin a hnâwl khawpin la sual nasa rih lo mah se, insiamremna engemaw a ngai a ni tih hriattîrna chu a pe mai thei a ni. (Genesis 4:​6, 7) Thlarau lama tlingte’n thil tisualtu zaidawh taka siam ṭhat leh an tum chu hmangaihna a va ni êm! (Galatia 6:1) Nimahsela, he mi kawnga hlawhtling tûr chuan sawisêl hrât tak nih ai chuan mi dangte ngaihtuahna tak tak neia kan chêt a ngai a ni.

“Thuhnuairawh Tak leh Ṭih Dêk Chungin”

Kan sakhaw rin ang ring ve lote laka zaidamna lantîr chungchâng hi eng nge ni ve le? Kum 1931-a din Ireland rama National School zawng zawnga târ “Zir Tûr Tlângpui” tihah chuan hetiang hian a inziak a: “Tihluihna hmanga mite hneh tum hi Isua Krista rilru a ni lo va. . . . Ṭhenawmte nêna inhnial leh anmahni sawichhiat hi keimahni kan dik a, anni chu an dik lo tia hmin theihna a ni lo. Chutih ahnêkin, Kristian thlarau kan nei lo tih kan rintîr zâwk mah mah a ni,” tiin.

Isua chuan Pathian Thu lama mite hîp thei tûr zâwngin a zirtîrin, thil a ti a. Keini pawhin kan ti ve tûr a ni. (Marka 6:​34; Luka 4:​22, 32; 1 Petera 2:​21) Ani chu ṭha famkim, Pathianin abîka finna a pêk a nih avângin, mite thinlung a hre thei vek a. Chuvângin, a ṭûl phawt chuan, Isua chuan Jehova hmêlmate thiam loh chantîrna thu a chhak chhuak thei a. (Matthaia 23:​13-33) A tân chuan thinnel lohna a ni ve lo.

Keini erawh chuan Isua angin mite thinlung kan hre thei ve lo va. Chuvângin he tirhkoh Petera fuihna thu hi kan zâwm tûr a ni. Ani chuan tihian a sawi a: “In thinlungah Krista chu Lalah ruat rawh u; nangmahnia awm in beisei chhan zâwt apiang che u chhâng tûrin inpeih sa fo ang che u, nimahsela thuhnuairawlh tak leh ṭih dêk chungin,” tiin. (1 Petera 3:15) Jehova chhiahhlawhte kan ni bawk a, kan thu rin hi kan hum tlat tûr a ni, Pathian Thu-a innghat tlat a nih avângin. Nimahsela, chutianga kan tih chuan mi dangte leh an sakhaw vawn zahna lantîr thei zâwngin kan tih a ngai a ni. Paula chuan: “In ṭawngka chhuak chu, chia al, khawngaihna tel ni fo rawh se,” tiin a ziak a ni.​—Kolossa 4:6.

Tlâng chunga a Thusawi hmingthang takah Isua chuan: “Thil engkim miin in chunga an tiha in duh tûr ang apiang chu, mi chungah pawh ti ve rawh u,” tiin a sawi a ni. (Matthaia 7:12) Chutichuan, indawh tawn ila, chanchin ṭha kan hrilh mite chu zahna i lantîr ang u. Felna avânga kan ṭhahnemngaihna chu Bible ṭanchhan thinnelna nêna inbûk tâwk taka kan vawn chuan, Jehova kan tilâwm ang a, mi thinnel tak zet kan lo ni dâwn a ni. (w01 7/15)

[Phêk 31-naa milem]

Pharisaite thinramna thinlung ang chu pumpelh rawh

[Phêk 31-naa milem]

Isua chuan a Pa thinnelna thinlung a lantîr. Nang i lantîr ve em?